HYƐ nɔ́ nɛ nyumu nɛ ɔ ngɛ pue ngɛ e bo tsu ɔ mi! Tade ko nɛ́ ngɛ fɛu, kɛ sika tsu kɛ sika hiɔ. E muɔɔ mɛ kɛ je Yeriko ma a mi. Se mɛni e sa kaa a ko pee Yeriko ní nɛ ɔmɛ a he? O kai lo?

E sa kaa a ko kpata ní nɛ ɔmɛ a hɛ mi, nɛ́ a ngɔ sika tsu kɛ sika hiɔ ɔ kɛ ya Yehowa níto he ɔ, ngɛ kpe he bo tsu ɔ mi. Lɔɔ he ɔ, nimli nɛ ɔmɛ gbo Mawu tue. A ju Yehowa níhi. Nyumu ɔ biɛ ji Akan, nɛ nihi nɛ piɛɛ e he ɔ ji e weku ɔ mi bi komɛ. Ha nɛ waa hyɛ nɔ́ nɛ ba.

Benɛ Akan ju ní nɛ ɔmɛ se ɔ, Yoshua tsɔ nyumuhi komɛ kaa a kɛ Ai ma a nɛ ya hwu ta. Se Ai tabuli ɔmɛ ye a nɔ kunimi. A gbe a kpɛti ni komɛ, nɛ nihi nɛ piɛ ɔ tu fo. Yoshua ye aywilɛho. E ngɔ e hɛ mi kɛ bu zugba, nɛ e sɔle ha Yehowa ke: ‘Mɛni heje o ngmɛ blɔ nɛ haomi nɛ ɔ ba wa nɔ?’

Yehowa ha lɛ heto ke: ‘Tee si! Israel ma a pee yayami. A ngɔ níhi nɛ e sa kaa a kpata hɛ mi aloo a ngɔ kɛ ba Yehowa bo tsu ɔ mi ɔ eko. A ju tade ko nɛ́ ngɛ fɛu nɛ a laa nɔ. I be nyɛ jɔɔe hu kɛ ya si benɛ nyɛ ma kpata ní nɛ ɔmɛ kɛ julɔ ɔ a hɛ mi.’ Yehowa de Yoshua ke e maa tsɔɔ lɛ nɔ nɛ ji nɔmlɔ yayami ɔ.

Lɔɔ he ɔ, Yoshua bua mabi ɔmɛ tsuo a nya, nɛ Yehowa je nɔmlɔ yayami ɔ nɛ́ ji Akan kpo. Akan de ke: ‘I pee yayami. Benɛ i na tade nɛ ngɛ fɛu ɔ, kɛ sika tsu kɛ sika hiɔ ɔ, a mwɔ ye hɛ. Lɔɔ he ɔ, i muɔɔ mɛ, nɛ i ba pu mɛ ngɛ ye bo tsu ɔ mi.’

Benɛ a ya na ní ɔmɛ nɛ́ a muɔɔ mɛ kɛ ba ha Yoshua a, e de Akan ke: ‘Mɛni heje o ngɔ haomi kɛ ba wa nɔ kikɛ nɛ ɔ? Yehowa hu maa ngɔ haomi kɛ ba o nɔ!’ Kɛkɛ nɛ Israel ma a tsuo fiaa Akan kɛ e weku ɔ tɛ nɛ a gbo. Anɛ enɛ ɔ tsɔɔ we wɔ kaa wa ko ngɔ nɔ́ ko nɛ pi wa nɔ́ lo?

Pee se ɔ, Israel ya nɛ a kɛ Ai ya hwu ta ekohu. Jehanɛ ɔ lɛɛ, Yehowa ye bua e webi ɔmɛ nɛ a ye kunimi ngɛ ta a mi.