ANƐ o na nɔ́ nɛ ngɛ nɔ yae ngɛ hiɛ ɔ lo? Israel ta hwuli sɔuu ji nɛ ɔ nɛ. Nyumuhi nɛ a ba si ɔ ngɛ nyu nue. Nyadalɔ Gideon nɛ daa si ngɛ a kasa nya a nɛ. E ngɛ bɔnɛ a plɛ kɛ ngɛ nyu ɔ nue ha a hyɛe.

Moo hyɛ blɔ slɔɔtohi a nɔ nɛ a gu kɛ ngɛ nyu ɔ nue ha. Ni komɛ ngɔ a nya kɛ bu nyu ɔ mi. Se nɔ kake wo e yi nɔ nɛ e ngɔ e nine kɛ ngɛ nyu ɔ nue, bɔnɛ pee nɛ e nyɛ nɛ e hyɛ e he kɛ kpe. Enɛ ɔ he hia wawɛɛ, ejakaa Yehowa de Gideon ke e hla nihi nɛ a hɛ maa hi a he nɔ benɛ a ngɛ nyu ɔ nue ɔ pɛ. Nihi nɛ piɛ ɔ lɛɛ Mawu de ke e ha nɛ a ho we mi ya. Ha nɛ waa hyɛ nɔ́ heje ha.

Israelbi ɔmɛ sɛ haomi nɛ nya wa mi ekohu. Nɔ́ nɛ ha e ba ja ji kaa a bui Yehowa tue. Midianbi ɔmɛ ná a nɔ he wami nɛ a ngɛ mɛ piie. Enɛ ɔ ha Israel fo ya kɛ tsɛ Yehowa, nɛ e he mɛ nɔ.

Yehowa de Gideon kaa e bua ta hwuli a nya, lɔɔ he ɔ, Gideon bua nyumuhi ta hwuli 32,000 nya. Se ta hwuli nɛ kɛ Israel ma ta hwumi ɔ hiɛmi ji 135,000. Se kɛ̃ ɔ, Yehowa de Gideon ke: ‘O ta hwuli ɔmɛ a he hiɛ tsɔ.’ Mɛni heje Yehowa de ja?

Ke Israel ye kunimi ngɛ ta a mi ɔ, a ma susu kaa mɛ nitsɛmɛ a he wami nya nɛ a ye kunimi ngɛ. A ma susu hu kaa Yehowa yemi kɛ buami he hia we mɛ. Enɛ ɔ he ɔ, Yehowa de Gideon ke: ‘Ha nihi nɛ ngɛ gbeye yee ɔ tsuo nɛ a ho we mi ya.’ Benɛ Gideon de mɛ ja a, ta hwuli 22,000 kpale kɛ ho we mi ya. Nɛ e piɛ nihi 10,000 pɛ ha lɛ nɛ́ a kɛ ta hwuli 135,000 ma ya kpe.

Se, bu tue! Yehowa de lɛ ke: ‘Kɛ̃ ɔ, o ni ɔmɛ a he hiɛ tsɔ.’ Lɔɔ he ɔ, E de Gideon kaa e ngɔ ta hwuli ɔmɛ kɛ ya pa nya nɛ a ya nu nyu, konɛ e ha nɛ nihi tsuo nɛ a maa ngɔ a nya kɛ bu nyu ɔ mi ɔ, a ho we mi ya. Yehowa wo lɛ si ke: ‘Ma ha o maa ye kunimi kɛ nimli 300 ɔmɛ nɛ benɛ a ngɛ nyu ɔ nue ɔ, a wo a yi nɔ ɔ.’

Ta hwumi be ɔ ba su. Gideon gba e ta hwuli ɔmɛ a mi kɛ wo kuuhi etɛ mi. E ha nɔ tsuaa nɔ bɛ, kɛ buɛ nɛ jatɛ ngɛ mi. Benɛ e su nyɔ mi ɔ, mɛ tsuo a ya bɔle a henyɛli ɔmɛ ngɛ a sito he ɔ. Kɛkɛ nɛ mɛ tsuo a kpa a bɛ ɔmɛ nɛ a ywia buɛ ɔmɛ si kake too, nɛ a kpa ngmlaa wawɛɛ ke: ‘Yehowa kɛ Gideon klaate!’ Benɛ henyɛli ɔmɛ te si ɔ, a tsui po nɛ a juɛmi futu. Mɛ tsuo a bɔni fo tumi, kɛkɛ nɛ Israelbi ɔmɛ ye a nɔ kunimi.