AO! AO! Mɛni ngɛ nɔ yae ngɛ hiɛ ɔ? Anɛ nɔ́ ko pee jokuɛ nyumuyo ɔ nɛ hwɔɔ si ngɛ zugba a lo? Hyɛ! Paulo piɛɛ nyumu ɔmɛ nɛ je we ɔ mi kɛ ma a he! O na Timoteo hu ngɛ lejɛ ɔ lo? Saflɛ ɔ nya nɛ nyumuyo ɔ je kɛ nɔ si maji?

Ee, ja ji nɔ́ nɛ ba. Paulo kɛ kaseli ɔmɛ nɛ ngɛ Troya ba ngɛ munyu tue. E le kaa e maa kɛ loko e maa na mɛ ekohu, ejakaa e maa sɛ lɛ mi kɛ je e nɔ jena. Lɔɔ he ɔ, e kɛ mɛ tu munyu hluu kɛ ya si nyɔ mi kpɛti.

Nyumuyo nɛ ɔ nɛ a tsɛɛ lɛ Eutiko ɔ hii si ngɛ saflɛ ɔ nya, kɛkɛ nɛ e hwɔ mahe. Nɛ e tsɔ kɛ je saflɛ ɔ nya ngɛ siaudo etɛne ɔ nɔ kɛ ba fia zugba! Tse jehanɛ ɔ o na nɔ́ nɛ ha ni ɔmɛ hao ɔ? Benɛ nyumu ɔmɛ ba wo e nɔ ɔ, nɔ́ nɛ a ye he gbeye ɔ ba mi ja. Nyumuyo ɔ gbo!

Benɛ Paulo na kaa nyumuyo ɔ gbo ɔ, e ya bu si ngɛ e nɔ nɛ e fua lɛ. Kɛkɛ nɛ e de ke: ‘Nyɛ ko ye tsui. Nɔ́ ko pee we lɛ!’ Nɛ e ji anɔkuale hulɔ! E ji nyakpɛ nɔ́! Paulo ngɔ lɛ kɛ ba wami mi ekohu! Ni ɔmɛ a bua jɔ saminya.

Mɛ tsuo a kpale kɛ ya hiɔwe tsu ɔ nɔ ekohu nɛ a ya ye ní. Paulo kɛ mɛ tu munyu hluu kɛ ya si jenanɛɛ. Se e fɔɔ si faii kaa Eutiko hwɔ we mahe hu! Kɛkɛ nɛ Paulo, kɛ Timoteo, kɛ nihi nɛ piɛɛ a he kɛ ngɛ blɔ hiae ɔ tsuo ya sɛ lɛ ɔ mi. O le he nɛ a yaa lo?

Paulo ngɛ e fiɛɛmi blɔ hiami nítsumi etɛne ɔ nya gbee, lɔɔ he ɔ, e kpale kɛ yaa e ma mi. Paulo ye jeha etɛ sɔuu ngɛ Efeso ma a mi ngɛ blɔ hiami nɛ ɔ mi. Lɔɔ he ɔ, e se kɛ ngɛ blɔ hiami nɛ ɔ mi pe enyɔne ɔ po.

Benɛ a je Troya a, lɛ ɔ ya da si ngɛ Mileto bɔɔ. Nɛ akɛnɛ Efeso kɛ lejɛ ɔ kɛ we heje ɔ, Paulo tsɔ nɛ a ya tsɛ asafo mi nikɔtɔmahi nɛ ngɛ lejɛ ɔ kɛ ba, konɛ e kɛ mɛ nɛ́ tu munyu nɛ ji nyagbe nɔ́. Lɔɔ se ɔ, benɛ be su nɛ lɛ ɔ maa je ɔ, ni ɔmɛ ye aywilɛho kaa Paulo ngɛ a he jee!

Nyagbe ɔ, lɛ ɔ ba su Kaisarea ekohu. Nɛ benɛ Paulo ngɛ kaselɔ Filipo we ɔ mi ɔ, gbalɔ Agabo ba bɔ Paulo kɔkɔ ko. E de Paulo kaa ke e ya Yerusalem ɔ, a maa wo lɛ tsu. Nɛ niinɛ hu ɔ, e ba mi ja. A wo Paulo tsu ngɛ Kaisarea jeha enyɔ, nɛ lɔɔ se ɔ, a ngɔ lɛ kɛ ho Roma ya konɛ Kaisare nɛ ya kojo lɛ. Ha nɛ waa hyɛ nɔ́ nɛ ba benɛ e hia blɔ kɛ yaa Roma a.