1-3. Mɛni he nyɛlɔ nɛ ngɛ wɔ tsuo wa se fiee, nɛ mɛni he je nɔ́ nɛ Baiblo ɔ tsɔɔ ɔ he nɛ wa ma susu ɔ, ma ha wa tsui maa nɔ wa mi?

NGƆƆ lɛ kaa o ngɛ fo tue ngɛ he nyɛlɔ ko nɛ he ngɛ gbeye nya. E he wa pe mo, nɛ e fo mi hu wa pe mo. O le kaa yiwutsotsɛ ji lɛ, ejakaa e gbe o huɛmɛ komɛ. E ngɛ mi kaa o ngɛ fo ɔ tue wawɛɛ mohu, se kɛ̃ ɔ, e miɔ nɛ e su o he. E pee kaa nɔ́ nɛ o be hɛ nɔ kami ko. Se tlukaa a, kpɔlɔ ko kɛ mo ba kpe. E he wa kulaa pe o he nyɛlɔ ɔ, nɛ e wo mo si kaa e maa ye bua mo. Enɛ ɔ ha o tsui nɔ o mi!

² Ngɛ blɔ ko nɔ ɔ, he nyɛlɔ ko kaa jã ngɛ o se fiee. Wɔ tsuo hu jã. Wa kase ngɛ yi nɛ sɛ hlami ɔ mi kaa Baiblo ɔ tsɛɛ gbenɔ ke he nyɛlɔ. Wa ti nɔ ko be nyɛe maa tu e nya fo. Wa kpɛti nihi fuu na bɔ nɛ he nyɛlɔ nɛ ɔ gbe wa suɔli ha. Se Yehowa ngɛ he wami kulaa pe gbenɔ. Lɛ ji Kpɔlɔ nɛ ngɛ suɔmi, nɛ e ha wa le momo kaa e ma nyɛ maa ye he nyɛlɔ nɛ ɔ nɔ kunimi. E wo si kaa e ma kpata he nyɛlɔ nɛ ɔ nɛ ji gbenɔ hɛ mi pɛsɛpɛsɛ. Baiblo ɔ de ke: “Nyagbe he nyɛlɔ nɛ a ma kpata e hɛ mi ji gbenɔ.” (1 Korinto Bi 15:26) Enɛ ɔ ji sane kpakpa!

³ Amlɔ nɛ ɔ, ha nɛ wa susu bɔ nɛ gbenɔ yeɔ wɔ awi ha  ke e gbe wa nɔ ko ɔ he nɛ waa hyɛ. Enɛ ɔ maa ye bua wɔ konɛ waa nu nɔ́ ko nɛ maa wo wa bua a sisi. Yehowa wo si kaa ni gbogboe ɔmɛ maa ba wami mi ekohu. (Yesaya 26:19) A maa ngɔ mɛ kɛ ba si himi mi ekohu. Enɛ ɔ ji gbogboehi a si temi hɛ nɔ kami ɔ nɛ.

4. (a) Mɛni he je wa leɔ bɔ nɛ Yehowa nuɔ gbenɔ he ha kɛ gu Yesu nɔ ɔ? (b) Yesu kɛ mɛnɔmɛ ná huɛ bɔmi nɛ ngɛ slɔɔto?

⁴ Anɛ nɔ ko nɛ o suɔ gbo hyɛ lo? Dɔmi, aywilɛho, kɛ he numi kaa hɛ nɔ kami ko be hu ɔ nya waa wawɛɛ. Ngɛ behi kaa kikɛ mi ɔ, e sa kaa waa ngɔ Mawu Munyu ɔ kɛ wo wa bua. (Kane 2 Korinto Bi 1:3, 4.) Baiblo ɔ ha wa na bɔ nɛ Yehowa kɛ Yesu nuɔ gbenɔ he ha. Yesu hɛɛ e Tsɛ ɔ su pɛpɛɛpɛ, lɔ ɔ he ɔ, e le bɔ nɛ ke nɔ ko nɔ gbo ɔ, e yee nɔ ha. (Yohane 14:9) Ke Yesu ya Yerusalem ɔ, e pɔɔ Lazaro kɛ e nyɛmiyihi Maria, kɛ Marta slaami ngɛ Betania, nɛ́ e kɛ lejɛ ɔ kɛ we ɔ. A ba pee huɛmɛ wawɛɛ. Baiblo ɔ de ke: “Yesu suɔ Marta kɛ e nyɛmiyo ɔ, kɛ Lazaro saminya.” (Yohane 11:5) Se kaa bɔ nɛ wa kase ngɛ yi nɛ sɛ hlami ɔ mi ɔ, Lazaro ba gbo.

5, 6. (a) Mɛni Yesu pee benɛ e ya Lazaro weku li kɛ huɛmɛ nɛ ngɛ aywilɛho ye ɔ a ngɔ ɔ? (b) Mɛni he je aywilɛho nɛ Yesu ye ɔ, ji he wami womi nɔ́ kɛ ha wɔ?

⁵ Kɛ ji bɔ nɛ Yesu nu e huɛ ɔ gbenɔ he ha kɛɛ? Amaniɛ bɔmi ɔ tsɔɔ wɔ kaa Yesu ya Lazaro weku li kɛ huɛmɛ a ngɔ benɛ a ngɛ a nɔ nɛ gbo ɔ he aywilɛho yee ɔ. Benɛ Yesu na bɔ nɛ a ngɛ ya foe ha a, e mi mi sã lɛ. Nɛ e “hao ngɛ mumi mi.” Kɛkɛ nɛ ngmami ɔ ke: “Yesu fo ya.” (Yohane 11:33, 35) Anɛ aywilɛho nɛ Yesu ye ɔ tsɔɔ kaa e be hɛ nɔ kami lo? Pi jã kulaa. Yesu le kaa nyakpɛ nɔ́ ko maa ya nɔ. (Yohane 11:3, 4) Se kɛ̃ ɔ, e nu dɔmi kɛ aywilɛho nɛ gbenɔ kɛ baa a he.

⁶ Aywilɛho nɛ Yesu ye ɔ ji he wami womi nɔ́ ha wɔ ngɛ  blɔ ko nɔ. E tsɔɔ wɔ kaa Yesu kɛ e Tsɛ Yehowa sume gbenɔ. Se Yehowa Mawu ma nyɛ maa ye he nyɛlɔ nɛ ɔ nɔ kunimi! Ha nɛ waa hyɛ nɔ́ nɛ Mawu ye bua Yesu nɛ e pee.

7, 8. Mɛni he je Lazaro sane ɔ ngɛ kaa nɔ́ nɛ hɛ nɔ kami ko be ha nihi nɛ ngɛ lejɛ ɔ, se mɛni Yesu pee?

⁷ A ngɔ Lazaro ya to tɛ puɔ ko mi, nɛ Yesu de kaa a je tɛ ɔ nɛ a kɛ tsi muɔ ɔ nya a kɛ je lejɛ ɔ. Marta kplɛɛ we nɔ, ejakaa Lazaro gbo ligbi eywiɛ, nɛ eko ɔ, e gbogboe ɔ bɔni puɛmi. (Yohane 11:39) Ngɛ adesahi a susumi nya a, hɛ nɔ kami ko be hu.

⁸ A je tɛ ɔ kɛ je muɔ ɔ nya, nɛ Yesu kpa ngmlaa wawɛɛ kɛ de ke: “Lazaro lee-ee, jee kpo!” Mɛni ba? ‘Nɔ nɛ gbo ɔ je kpo.’ (Yohane 11:43, 44) Anɛ o ma nyɛ maa po bua jɔmi nɛ ni ɔmɛ ná a he foni lo? A senɔ ji Lazaro jio, a weku no, loo huɛ ji lɛ jio, a kɛ lɛ ngɛ paka mi jio ɔ, nɔ́ nɛ a le ji kaa Lazaro gbo. Se hyɛ nyumu nɛ a suɔ nɛ ɔ nɔuu nɛ́ daa si ngɛ a kpɛti ekohu. A he we nɔ́ nɛ a na a yi. Nɔ́ jemi ko be he kaa a kpɛti nihi fuu maa fua Lazaro kɛ bua jɔmi. Hyɛ bɔ nɛ a ye gbenɔ nɔ kunimi ha!

9, 10. (a) Mɛni blɔ nɔ Yesu gu kɛ tsɔɔ Nɔ nɛ ha lɛ he wami nɛ e kɛ tle Lazaro si ɔ? (b) Mɛni ji se nami komɛ nɛ ngɛ gbogboehi nɛ a tle mɛ si he sanehi nɛ ngɛ Baiblo ɔ mi nɛ o maa kane ɔ he?

⁹ Yesu de we ke lɛ nitsɛ e he wami nɛ e kɛ pee nyakpɛ nɔ́ nɛ ɔ. E ha nɛ e mi tɛ̃ heii kaa Yehowa ji nɔ nɛ tle Lazaro si ngɛ sɔlemi nɛ e sɔle kɛ sɛ hlami loko e tsɛ Lazaro ɔ mi. (Kane Yohane 11:41, 42.) Pi be nɛ ɔ pɛ nɛ Yehowa ngɔ e he wami ɔ kɛ tle nɔ gbogboe si. Ni gbogboehi nɛ a tle mɛ si nɛɛ nɛ́ a bɔ he amaniɛ ngɛ Mawu Munyu ɔ mi ɔ, a kpɛti kake kɛkɛ ji Lazaro si temi ɔ. * Ke o kane sane nɛ ɔmɛ  ngɛ Baiblo ɔ mi ɔ, o bua maa jɔ he. A tsɔɔ wɔ kaa Mawu hlɛ nimli a mi, ejakaa nihi nɛ a tle mɛ si ɔ, ekomɛ ji jokuɛwi kɛ nikɔtɔmahi, nyumuhi kɛ yihi, Israel bi kɛ ma je li tsuo. Hyɛ bua jɔmi nɛ a tsɔɔ kaa ni ɔmɛ na ha! Kaa nɔ hyɛmi nɔ́ ɔ, benɛ a tle jokuɛ yoyo ko si ɔ, e fɔli ɔmɛ “a bua jɔ a he saminya.” (Marko 5:42, NW) Niinɛ, Yehowa ha nɛ a ná bua jɔmi nɛ a hɛ be nɔ jee gblegbleegble.

¹⁰ E ji anɔkuale kaa nihi nɛ Yesu tle mɛ si ɔ, nyagbe ɔ, a gbo ekohu. Anɛ enɛ ɔ tsɔɔ kaa se nami ko be he kaa a tle mɛ si lo? Dɛbi! Baiblo mi sane nɛ ɔmɛ maa anɔkuale tsɔɔmi komɛ a nɔ mi, nɛ a haa wɔ hɛ nɔ kami.

11. Lazaro si temi he sane ɔ ma anɔkuale munyu nɛ ngɛ Fiɛlɔ 9:5 ɔ nɔ mi ngɛ mɛni blɔ nɔ?

¹¹ Baiblo ɔ tsɔɔ kaa ni gbogboe ɔmɛ “li nɔ́ ko nɔ́ ko.” (Fiɛlɔ 9:5) A be wami mi, nɛ a be he ko he ko hulɔ. Lazaro he sane ɔ maa anɔkuale munyu nɛ ɔ nɔ mi. Benɛ a tle Lazaro si ɔ, anɛ e kale kaa e ya na nɔ́ ko ngɛ hiɔwe, nɛ e kɛ ha nihi ná bua jɔmi lo? Aloo anɛ e sɛɛ hu kaa, e ya na nɔ́ ngɛ he nɛ ni komɛ tsɛɛ ke Abosiami la mi nɛ e kɛ wo a he gbeye lo? Dɛbi. Baiblo ɔ de we kaa Lazaro sɛɛ sanehi kaa kikɛ. Benɛ Lazaro gbo ligbi eywiɛ ɔ, e “li nɔ́ ko nɔ́ ko.” Lazaro gbo nɛ e ngɛ e he jɔɔe.—Yohane 11:11.

12. Mɛni ha wa ngɛ nɔ mi mami kaa a tle Lazaro si niinɛ?

¹² Lazaro he sane ɔ tsɔɔ wɔ kaa gbogboehi a si temi ɔ ji nɔ́ nɛ maa ba nitsɛ, se pi nyazia ko kɛkɛ. Yesu tle Lazaro si ngɛ ma hɛ mi nɛ nihi fuu ye he odase. Nɛ jami hɛ mi nyɛɛli nɛ nyɛ Yesu ɔ po kua we kaa Yesu pee nyakpɛ nɔ́ kaa jã. Mohu ɔ, nɔ́ nɛ a de ji: “Kɛ wa maa pee kɛɛ? Nyɛɛ hyɛ níhi tsuo nɛ nyumu nɛ ɔ [Yesu] ngɛ pee kɛ ngɛ okadi toe.” (Yohane 11:47) Nihi babauu ya na Lazaro nɛ a tle lɛ si ɔ. Enɛ ɔ he ɔ, nimli babauu he Yesu ye. Ni ɔmɛ na kaa Lazaro  ji odase yemi nɛ tsɔɔ kaa Mawu ji nɔ nɛ tsɔ Yesu. Odase yemi ngua nɛ ɔ ha Yuda jami hɛ mi nyɛɛli nɛ a tsui he wa a to kaa a maa gbe Yesu kɛ Lazaro tsuo.—Yohane 11:53; 12:9-11.

13. Mɛni ha wa heɔ yeɔ kaa Yehowa ma nyɛ ma tle gbogboehi si?

¹³ Anɛ nile ngɛ mi kaa wa maa kplɛɛ gbogboehi a si temi ɔ nɔ kaa e ji anɔkuale lo? Ee, ejakaa Yesu tsɔɔ kaa hwɔɔ se ɔ, a ma tle “nihi tsuo nɛ ngɛ yɔkɔ ɔmɛ a mi” ɔ si. (Yohane 5:28, NW) Yehowa ji wami tsuo Bɔlɔ. Anɛ e sa kaa wa he ye kaa e be nyɛe maa ngɔ adesa kɛ ba wami mi ekohu lo? Ngɛ anɔkuale mi ɔ, Yehowa ngɛ nyɛmi nɛ e kɛ ma kai wa suɔli nɛ gbo ɔ. Dodoehi ayɔ akpeakpehi abɔ lɛ ngɛ hiɔwe, se Yehowa tsɛɔ mɛ kɛ a biɛhi kakaaka! (Yesaya 40:26) Lɔ ɔ he ɔ, Yehowa ma nyɛ ma kai wa suɔli nɛ gbo ɔmɛ a he nɔ́ tsuaa nɔ́ fitsofitso, nɛ e pee klaalo kaa e maa kpale mɛ kɛ ba wami mi ekohu.

14, 15. Ngɛ Hiob munyu ɔ nya a, mɛni tsɔɔ kaa Yehowa suɔ nɛ e ngɔ ni gbogboehi kɛ ba wami mi ekohu?

¹⁴ Se kɛ Yehowa nuɔ gbogboehi si nɛ e ma tle ɔ he kɛɛ? Baiblo ɔ tsɔɔ kaa e suɔ kaa e ma tle gbogboe ɔmɛ si. Anɔkualetsɛ Hiob bi ke: ‘Ke nɔmlɔ gbo ɔ, e kpaleɔ kɛ baa ekohu lo?’ Hiob ngɛ e mlɛmi ngɛ yɔkɔ mi kɛ ya si benɛ Mawu ma kai lɛ ɔ he munyu tue. E de Yehowa ke: ‘O ma tsɛ mi, nɛ ma he nɔ, ejakaa o suɔ kaa o ma hla o nine nya ní tsumi ɔ se blɔ.’—Hiob 14:13-15.

¹⁵ Mo susu he nɛ o hyɛ! Yehowa ngɛ he bua jɔmi wawɛɛ kaa e maa ngɔ ni gbogboe ɔmɛ kɛ ba wami mi ekohu. Anɛ o bua jɔɛ kaa Yehowa suɔ kaa e maa pee jã lo? Se ngɛ ni gbogboehi a si temi nɛ maa ba hwɔɔ se nɛ ɔ mi ɔ, mɛnɔmɛ si a ma tle, nɛ jije a ma tle mɛ si kɛ ya?

16. Nihi nɛ a ma tle mɛ si ɔ, ma ba ná mɛni si himi ngɛ zugba nɛ ɔ nɔ?

¹⁶ Ni gbogboehi a si temi he sanehi nɛ ngɛ Baiblo ɔ  mi ɔ tsɔɔ wɔ níhi fuu ngɛ gbogboehi a si temi nɛ maa ba hwɔɔ se ɔ he. Nihi nɛ a tle mɛ si kɛ ba wami mi ekohu ngɛ zugba nɛ ɔ nɔ ɔ kɛ a suɔli ba hi si ekohu. Jã ji bɔ nɛ hwɔɔ se gbogboehi a si temi ɔ hu ma ji, se e maa pee bua jɔmi po pe kekle ní ɔmɛ. Kaa bɔ nɛ wa kase ngɛ Yi 3 ɔ mi ɔ, Yehowa yi mi tomi ji kaa zugba a tsuo nɛ pee paradeiso. Lɔ ɔ he ɔ, a be ni gbogboehi si tlee kɛ ba hi je nɛ ta hwumi, awi yemi, kɛ hiɔ hyi lɛ tɔ mi. A ma ná he blɔ kɛ hi si ngɛ bua jɔmi kɛ tue mi jɔmi mi ngɛ zugba nɛ ɔ nɔ kɛ ya neneene.

17. Ni enyɛmɛ si a ma tle?

¹⁷ Mɛnɔmɛ si a ma tle? Yesu de ke “nihi tsuo nɛ ngɛ yɔkɔ ɔmɛ a mi ɔ maa nu e [Yesu] gbi, nɛ a maa je kpo.” (Yohane 5:28, 29, NW) Jã kɛ̃ Kpojemi 20:13 ɔ hu de ke: “Wo je ni gbogboehi tsuo nɛ ngɛ e mi ɔ ngɔ ha. Gbenɔ, kɛ gbeje hu je ni gbogboehi tsuo nɛ a kɛ to ɔ ngɔ ha.” (Hyɛ Mi Tsɔɔmi Munyu nɛ ji, “Mɛni Ji Sheol Kɛ Hades?.”) Ni gbogboehi nɛ ngɛ gbeje ɔ tsuo maa je kpo. Nimli ayɔ akpehi abɔ nɛ a ngɛ a he jɔɔe ngɛ lejɛ ɔ maa ba wami mi ekohu. Bɔfo Paulo de ke: “Adesahi tsuo maa te si kɛ je gbeje hwɔɔ se, ni kpakpahi jio, yayami peeli jio.” (Bɔfo Ɔmɛ A Ní Tsumi 24:15) Mɛni enɛ ɔ tsɔɔ?

18. Mɛnɔmɛ piɛɛ “ni kpakpahi” nɛ a ma tle mɛ si ɔ a he, nɛ mɛni blɔ nɔ hɛ nɔ kami nɛ ɔ ma nyɛ ma ná o nɔ he wami?

¹⁸ ‘Ni kpakpa amɛ’ ji nihi fuu nɛ wa kaneɔ a he ní ngɛ Baiblo ɔ mi kaa a hi si blema loko Yesu ba zugba a nɔ ɔ. Eko ɔ, o kai Noa, Abraham, Sara, Mose, Rut, Ester, kɛ ni kpahi fuu. A tu nyumuhi kɛ yihi nɛ ngɛ hemi kɛ yemi ɔ ekomɛ a he munyu ngɛ Hebri Bi yi 11. Se ‘ni kpakpa amɛ’ fã hu ji Yehowa sɔmɔli nɛ gboɔ ngɛ wa be nɛ ɔ mi. Gbogboehi a si temi hɛ nɔ kami ɔ he je ɔ, e sɛ nɛ waa ye gbenɔ gbeye.—Hebri Bi 2:15.

19. Mɛnɔmɛ ji ‘yayami peeli ɔmɛ,’ nɛ mɛni he blɔ Yehowa je mi mi himi mi ha mɛ?

¹⁹ Nɛ nihi fuu nɛ ja we Yehowa loo a bui lɛ tue ejakaa a  nui e he hyɛ ɔ nɛɛ? Yehowa hɛ be nimli ayɔ akpehi abɔ nɛ a ji “yayami peeli” nɛ ɔmɛ a nɔ jee. Mɛ hu a ma tle mɛ si, nɛ a ma ha mɛ be konɛ a kase anɔkuale Mawu ɔ he ní nɛ a sɔmɔ lɛ. Ngɛ jeha akpe mi ɔ, a ma tle gbogboe ɔmɛ si, nɛ a ma ba piɛɛ adesahi anɔkualetsɛmɛ a he ngɛ zugba a nɔ kɛ sɔmɔ Yehowa. E maa pee be nɛ ngɛ bua jɔmi nitsɛ. Be nɛ ɔ ji nɔ́ nɛ Baiblo ɔ tsɛɛ ke Kojomi Ligbi ɔ nɛ. *

20. Mɛni ji Gehena, nɛ mɛnɔmɛ yaa lejɛ ɔ?

²⁰ Anɛ enɛ ɔ tsɔɔ kaa a ma tle nɔ tsuaa nɔ nɛ gbo ɔ si lo? Dɛbi. Baiblo ɔ de ke ni gbogboe komɛ ngɛ “Gehena.” (Luka 12:5, NW) Gehena ji biɛ nɛ a kɛ tsɛɛ kuku ko nɛ hi blema Yerusalem gbogbo ɔ se. Lejɛ ɔ a sãa gbogboehi kɛ dwɔmi ngɛ. Yuda bi ɔmɛ sakeɔ ni gbogboehi nɛ a buu mɛ kaa a sɛ pumi kɛ gbogboehi a si temi kɛ fɔɔ lejɛ ɔ. Lɔ ɔ he ɔ, Gehena peeɔ neneene hɛ mi kpatami he foni nɛ sa. E ngɛ mi kaa a ha Yesu blɔ nya kaa e kojo nihi nɛ a hɛ ngɛ kɛ ni gbogboehi mohu, se kɛ̃ ɔ, Yehowa ji Kojolɔ ngua. (Bɔfo Ɔmɛ A Ní Tsumi 10:42) Nihi nɛ e bu mɛ yayami peeli nɛ a kua kaa a ma tsake a je mi bami ɔ lɛɛ, e be mɛ si tlee kɔkɔɔkɔ.

21, 22. (a) Mɛni ji gbogboehi a si temi kpa ko hu nɛ ngɛ? (b) Mɛnɔ ji kekleekle nɔ nɛ a tle lɛ si kaa mumi?

²¹ Baiblo ɔ tu gbogboehi a si temi kpa ko hu he munyu, nɛ ji si temi kaa mumi adebɔ kɛ ya hiɔwe. Si temi nɛ ɔ he nɔ hyɛmi nɔ́ kake pɛ Baiblo ɔ bɔ he amaniɛ, nɛ ji Yesu Kristo si temi ɔ.

²² Benɛ a gbe Yesu kaa adesa se ɔ, Yehowa ha we nɛ E Bi nɛ yeɔ anɔkuale ɔ nɛ tlɔ yɔkɔ ɔ mi. (La 16:10; Bɔfo Ɔmɛ A Ní Tsumi 13:34, 35) Mawu tle Yesu si, se pi kaa adesa hu.  Bɔfo Petro tsɔɔ nya kaa, “benɛ a gbe Kristo ɔ, . . . e hɛɛ nɔmlɔ adesa su. Se amlɔ nɛ ɔ nɛ Mawu ha nɛ e ba wami mi ɔ, mumi ji lɛ.” (1 Petro 3:18) Niinɛ, enɛ ɔ ji nyakpɛ nɔ́ ngua. Yesu ba wami mi ekohu kaa mumi mi nɔ nɛ ngɛ he wami! (Kane 1 Korinto Bi 15:3-6.) Yesu ji kekleekle nɔ nɛ ná gbogboehi a si temi nɛ ngɛ nyami nɛ ɔ. Se ni kpahi hu ma ná gbogboehi a si temi nɛ ɔ eko.—Yohane 3:13.

23, 24. Mɛnɔmɛ peeɔ Yesu “kuu nyafii ɔ,” nɛ a hiɛmi ji enyɛmɛ?

²³ Akɛnɛ Yesu le kaa e be kɛe nɛ e maa kpale kɛ ho hiɔwe ya he je ɔ, e de e kaseli ɔmɛ ke e ma ya “dla he ko” kɛ to mɛ ngɛ lejɛ ɔ. (Yohane 14:2) Yesu tsɛ nihi nɛ yaa hiɔwe ɔ ke “kuu nyafii.” (Luka 12:32) Nimli enyɛmɛ peeɔ Kristofohi anɔkualetsɛmɛ a kuu nyafii nɛ ɔ? Bɔfo Yohane de ngɛ Kpojemi 14:1 ke: “I hyɛ, nɛ i na To bi ɔ [Yesu Kristo] nɛ daa si ngɛ Zion yo ɔ nɔ, kɛ nimli 144, 000. A ngma To bi ɔ, kɛ e Tsɛ ɔ tsuo a biɛ ngɛ nimli nɛ ɔmɛ a ti nɔ tsuaa nɔ hɛ nya.”

²⁴ A ma tle Kristofohi 144,000 nɛ ɔ nɛ Yesu kaseli anɔkualetsɛmɛ ɔmɛ piɛɛ he ɔ si kɛ ya hiɔwe. Mɛni be a ma tle mɛ si? Bɔfo Paulo ngma kaa enɛ ɔ maa ba mi benɛ Kristo ba. (1 Korinto Bi 15:23) Kaa bɔ nɛ wa maa na ngɛ Yi 9 ɔ mi ɔ, jamɛ a be ɔ mi wa ngɛ amlɔ nɛ ɔ nɛ. Lɔ ɔ he ɔ, ke nihi 144,000 ɔ a kpɛti nihi bɔɔ nɛ piɛ ɔ eko gbo ɔ, a tleɔ lɛ si amlɔ kaa mumi kɛ yaa hiɔwe. (1 Korinto Bi 15:51-55) Se nimli adesahi babauu ɔ lɛɛ, a hɛ nɔ kami ji kaa a ma tle mɛ si hwɔɔ se kɛ ba hi si ngɛ paradeiso ngɛ zugba a nɔ.

25. Mɛni wa maa kase ngɛ yi nɛ nyɛɛ se ɔ mi?

²⁵ Niinɛ, Yehowa maa ye he nyɛlɔ nɛ ji gbenɔ nɔ kunimi nitsɛnitsɛ, nɛ gbenɔ maa je si himi mi kulaa! (Kane Yesaya 25:8.) Se eko ɔ, o ma bi ke, ‘Mɛni nihi nɛ a ma tle mɛ si kɛ ya hiɔwe ɔ ma ya pee ngɛ lejɛ ɔ?’ A ma ya pee nɔ yeli ngɛ hiɔwe Matsɛ Yemi nɛ e se be ɔ mi. Wa maa kase nɔ yemi nɛ ɔ he ní ngɛ yi nɛ nyɛɛ se ɔ mi.