Ní yayamihi nɛ ngɛ nɔ yae ngɛ zugba a nɔ amlɔ nɛ ɔ tsɔɔ kaa Paradeiso ɔ su si ta. Baiblo ɔ de kaa be nɛ mi wa maa ba ke Paradeiso ɔ su si ta a. Kikɛmɛ a be ɔ mi lɛ wa ngɛ amlɔ nɛ ɔ nɛ! Níhi nɛ Baiblo ɔ de kaa a maa baa ekomɛ ji:

Ta nguahi. “Ma maa te si ngɔ wo ma, nɛ matsɛ yemi maa te si ngɔ wo matsɛ yemi.” (Mateo 24:7) Gbami nɛ ɔ ba mi. Kɛ je jeha 1914 mi ɔ, a hwu je mi tahi enyɔ kɛ ta tsɔwitsɔwi babauu. Nimli ayɔhi abɔ gbo ngɛ ta nɛ ɔmɛ a mi.

Hiɔ nɛ gbɛ fia. “Gbenɔ hiɔ maa ba ngɛ he tsuaa he.” (Luka 21:11) Anɛ enɛ ɔ bɛ mi niinɛ lo? Ee. Helo mi pa, tsui hiɔ, hwlɔmi hiɔ, aslã, AIDS, kɛ hiɔ kpahi gbe nimli ayɔhi abɔ.

Hwɔ. Nimli ngɛ zugba a nɔ he tsuaa he nɛ́ niye ní bɔɔ pɛ kɛkɛ a náa nɛ a yeɔ. Hwɔ gbeɔ nimli akpeakpe abɔ daa jeha. Enɛ ɔ hu ji okadi nɛ́ tsɔɔ kaa e be kɛe nɛ Paradeiso ɔ maa ba. Baiblo ɔ de ke: “Hwɔ maa ba.”—Marko 13:8.

 Zugba mimiɛmi. “Nɛ zugba ma mimiɛ ngɛ he tsuaa he.” (Mateo 24:7) Enɛ ɔ hu ba mi ngɛ wa be nɛ ɔ mi. Ke je 1914 kɛ ma nɛ ɔ, nimli nɛ a he hiɛ pe ayɔ kake gbo ngɛ zugba mimiɛmi dɛ mi.

Yayami peeli. Nimli maa pee a he “sika suɔli” kɛ “hesuɔli.” A maa pee “nihi nɛ suɔ akɔnɔ níhi pe bɔnɛ a suɔ Mawu.” Bimɛ maa pee “a he fɔli a nɔ tue gboli.” (2 Timoteo 3:1-5, NW) Anɛ o kplɛɛ we nɔ kaa nihi fuu ngɛ mwɔnɛ ɔ nɛ́ a ngɛ ja lo? A be bumi ha Mawu, nɛ a haoɔ nihi nɛ suɔ kaa a maa kase Mawu he ní ɔ.

Awi yemi. “Mlaa kuami maa hiɛ.” (Mateo 24:12, Somi He Ɔ) Eko ɔ, o maa kplɛɛ nɔ kaa awi yemi pɔ he mwɔnɛ ɔ pe bɔnɛ e ji ngɛ jehahi komɛ nɛ be ɔ mi. Nimli ngɛ he fɛɛ he yee gbeye kaa a maa fia mɛ ojo, aloo a maa sisi mɛ, aloo kaa a maa plaa mɛ.

Ní nɛ ɔmɛ tsuo tsɔɔ kaa Mawu Matsɛ Yemi ɔ su si ta. Baiblo ɔ de ke: “Ke nyɛ na kaa ní nɛ ɔmɛ ngɛ mi bae ɔ, nyɛ ná le kaa Mawu matsɛ yemi ɔ su si ta.” (Luka 21:31, Somi He Ɔ) Mɛni ji Mawu Matsɛ Yemi ɔ? E ji Mawu hiɔwe nɔyemi nɛ ma ba pee zugba a Paradeiso. Mawu Matsɛ Yemi ɔ ma ba da adesa nɔyemi ɔmɛ a nane mi.—Daniel 2:44.