Wa Nyɛmi Kpakpa Nɛ Suɔ Yehowa:

Yesu de ke: “Nyɛ maa le anɔkuale ɔ; nɛ anɔkuale ɔ ma ha nyɛ maa ye nyɛ he.” (Yohane 8:32) Munyu nɛ ɔmɛ woɔ nɔ he wami wawɛɛ nitsɛ! Niinɛ, e ngɛ mi kaa ‘nyagbe ligbi nɛ ɔmɛ’ a mi ɔ, lakpa yemi pɔ he mohu lɛɛ, se wa ma nyɛ maa le anɔkuale ɔ. (2 Timoteo 3:1) Anɛ o kai benɛ o ba le Mawu Munyu ɔ mi anɔkuale ɔ kekleekle ɔ lo? Atsinyɛ jemi ko be he kaa enɛ ɔ ha o ná bua jɔmi saminya!

Se kaa bɔ nɛ e he hia kaa wa ná anɔkuale ɔ he nile nɛ́ waa tsɔɔ nihi daa a, jã kɛ̃ e sa kaa wɔ hu waa ba wa je mi ngɛ anɔkuale ɔ nya. Loko wa ma nyɛ maa pee enɛ ɔ, ja wa to wa he ngɛ Mawu suɔmi ɔ mi. Mɛni enɛ ɔ biɔ kaa waa pee? Munyu nɛ Yesu tu gbɔkuɛ nɛ e nɔ jena e ma gbo ɔ ha sane bimi nɛ ɔ heto. E de e bɔfo anɔkualetsɛmɛ ɔmɛ ke: “Ke nyɛ ye ye mlaa amɛ a nɔ ɔ, lɛɛ suɔmi nɛ i ngɛ kɛ ha nyɛ ɔ maa hi si daa. Imi hu i ye Tsaatsɛ mlaa amɛ a nɔ, lɔ ɔ ha nɛ suɔmi nɛ e ngɛ kɛ ha mi ɔ se pui gblegbleegble.”​—Yohane 15:10.

Mo kadi kaa Yesu hi Mawu suɔmi ɔ mi kɛ gu e Tsɛ ɔ mlaa amɛ a nɔ nɛ e ye ɔ nɔ. E sa nɛ wɔ hu waa pee jã nɔuu mwɔnɛ ɔ. Loko wa maa hi Mawu suɔmi ɔ mi ɔ, ja wa nyɛɛ ngɛ anɔkuale ɔ nya daa ligbi. Ngɛ jamɛ a gbɔkuɛ ɔ nɔuu mi ɔ, Yesu de ke: “Amlɔ nɛ ɔ nɛ nyɛ na le anɔkuale ɔ, ke nyɛ tsu e nya ní ɔ, a gbaa nyɛ!”​​—Yohane 13:17.

Wa hɛ nɔ kami ji kaa womi nɛ ɔ maa ye bua mo konɛ o ya nɔ nɛ o nyɛɛ ngɛ anɔkuale ɔ nya, bɔ nɛ pee nɛ o ‘to o he ngɛ Mawu suɔmi ɔ mi, nɛ́ o ná neneene wami.’​—Yuda 21.