1, 2. Mɛni ga Balaam to konɛ e kɛ ye Yehowa we bi awi?

LO GBELƆ ko ya he nɛ e pɔɔ lo sami ngɛ. E suɔ kaa e maa gbe lo pɔtɛɛ ko. Enɛ ɔ he ɔ, e ngɔ gbowe nya lo kɛ wo e gbowe ɔ nya nɛ e fɔ̃ kɛ wo pa a mi. Be bɔɔ se ɔ, gbowe kpã a mi wa, kɛkɛ nɛ e gbla lo ɔ kɛ ba kpo. E muɔ ngɛ e nya he, ejakaa e le kaa e ngɔ gbowe nya lo kpakpa kɛ tsu ní.

² Ngɛ jeha 1473 loko a fɔ Kristo ɔ mi ɔ, nyumu ko nɛ a tsɛɛ lɛ ke Balaam ɔ bɔ mɔde kaa e maa tsɔ ni komɛ klama. Nihi nɛ e ngɛ hlae maa tsɔ mɛ klama a ji Mawu we bi. Jamɛ a be ɔ mi ɔ, a ya to si ngɛ Moab Nga Kplanaa a nɔ ngɛ Si Womi Zugba a huzu ɔ nya. Balaam tsɛɛ e he Yehowa gbalɔ, se ngɛ anɔkuale mi ɔ, e hɛ tsuɔ. Nɔ ko ya dɔ lɛ kaa e ba gbiɛ Israel bi ɔmɛ ha lɛ. Se Yehowa ha nɛ Balaam jɔɔ Israel bi ɔmɛ mohu. Se kɛ̃ ɔ, akɛnɛ Balaam ngɛ hlae kaa e nine nɛ su hiɔwo ɔ nɔ kokooko he je ɔ, e susu kaa ke e nyɛ nɛ e sisi Mawu we bi ɔmɛ nɛ a pee yayami agbo kɛ si Mawu ɔ, eko ɔ, lɔ ɔ ma ha Mawu maa gbiɛ mɛ. Lɔ ɔ he ɔ, Balaam ngɔ Moab yihewi nɛ a he ngɛ fɛu ɔ kɛ tsɔ Israel bi ɔmɛ klama.​​—4 Mose 22:1-7; 31:15, 16; Kpojemi 2:14.

3. Kɛ Balaam klama nɛ e tsɔ ɔ tsu ní ha kɛɛ?

³ Anɛ klama nɛ a tsɔ nɛ ɔ tsu ní lo? Ngɛ blɔ ko nɔ ɔ, e tsu ní. Israel nyumuhi akpe nyɔngmahi abɔ du klama nɛ ɔ kɛ gu ‘Moab yi ɔmɛ nɛ a kɛ mɛ ya fiɛ nyumu kɛ yo yakayaka fiɛmi’ ɔ nɔ. A ya bɔni Moab bi ɔmɛ a mawu ɔmɛ, kɛ Baal nɛ  ngɛ Peor nɛ ji fɔmi loo bɔmi nami mawu nɛ ngɛ tai ɔ po jami. Enɛ ɔ ha nɛ Israel bi 24,000 gbo ngɛ Si Womi Zugba a huzu ɔ nya. Mɛni aywilɛho sane po ji nɛ ɔ!​​—4 Mose 25:1-9.

4. Mɛni ha nɛ Israel bi akpehi abɔ ngɔ a he kɛ ya wo ajuama bɔmi mi?

⁴ Mɛni ngɔ haomi nɛ ɔ kɛ ba? Israel bi fuu ba ná tsui yaya nɛ a je Yehowa se. Yehowa Mawu ji nɔ nɛ kpɔ̃ mɛ kɛ je Egipt, nɛ e lɛ mɛ ngɛ nga a nɔ, nɛ e kpaka mɛ kɛ ya su zugba nɛ e wo mɛ he si ɔ nɔ ɔ nɛ. (Hebri Bi 3:12) Bɔfo Paulo de ngɛ sane nɛ ɔ he ke: “Wa ko fiɛ yakayaka fiɛmi kaa bɔ nɛ a ti ni komɛ pee, nɛ nimli akpe nyingmi enyɔ kɛ etɛ gbo ligbi kake ɔ.” *​​—1 Korinto Bi 10:8.

5, 6. Mɛni wa ma nyɛ maa kase kɛ je yayami nɛ Israel bi ɔmɛ pee ngɛ Moab Nga Kplanaa a nɔ ɔ mi mwɔnɛ ɔ?

⁵ Mawu we bi nɛ a ngɛ mwɔnɛ ɔ ma nyɛ maa kase níhi nɛ a he hia ngɛ sane nɛ ɔ mi, ejakaa e piɛ bɔɔ nɛ mɛ hu a maa su si womi zugba ngua ko nɔ. (1 Korinto Bi 10:11) Kaa nɔ hyɛmi nɔ́ ɔ, mwɔnɛ ɔ, bɔmi nami he sanehi he si pe bɔ nɛ e ji ngɛ blema Moab bi ɔmɛ a be ɔ mi ɔ kulaa. Jehanɛ se hu ɔ, daa jeha a, Kristofohi akpe nyɔngmahi abɔ duɔ ajuama bɔmi klama kake too ɔ nɛ du Israel bi ɔmɛ ɔ.  (2 Korinto Bi 2:11) Kaa bɔ nɛ Zimri ngɔ Midian yo kɛ ba Israel sito he ɔ nɛ e kɛ lɛ be ngɛ Israel bi ɔmɛ a hɛ mi kɛ ya sɛ e bo tsu ɔ mi ɔ, mwɔnɛ ɔ hu ɔ, ni komɛ ngɛ Mawu we bi a kpɛti nɛ a peeɔ jã. A puɛɔ nihi a je mi bami ngɛ Kristofohi asafo ɔ mi.​​—4 Mose 25:6, 14; Yuda 4.

⁶ Anɛ o yɔse kaa mwɔnɛ ɔ, o si fɔfɔɛ ɔ ngɛ kaa Israel bi ɔmɛ ngɛ Moab Nga Kplanaa a nɔ lo? Anɛ o na kaa e piɛ bɔɔ nɛ o nine maa su o hiɔwo nɛ́ ji je ehe nɛ wa hyɛ blɔ hluu ɔ nɔ lo? Ke jã a, lɛɛ moo bɔ mɔde wawɛɛ nɛ o ye Mawu mlaa nɛ nyɛɛ se nɛ ɔ nɔ konɛ o hi e suɔmi ɔ mi. Mawu de ke: ‘Nyɛɛ tu ajuama bɔmi nya fo.’​​—1 Korinto Bi 6:18.

7, 8. Mɛni ji “ajuama bɔmi,” nɛ mɛni blɔ nɔ nihi nɛ ngɔɔ a he kɛ woɔ mi ɔ kpaa nɔ́ nɛ a duɔ ɔ ngɛ?

⁷ Ngɛ Baiblo ɔ mi ɔ, “ajuama bɔmi” (Hela gbi, por·neiʹa) ji bɔmi nami mi ní peepeehi tsuo nɛ nihi nɛ sɛ we gba si himi mi ngɛ Ngmami ɔ nya a kɛ a he woɔ mi. Ekomɛ ji gba puɛmi, yahomi, nyumu kɛ yo nɛ sɛ we gba si himi mi nɛ a náa bɔmi, kɛ nyumu tso nɛ a kɛ woɔ nya mi aloo yo he nɛ a lɔ ɔ, nyumu tso nɛ a kɛ woɔ nɔ abɔɔmi yami he, kɛ nihi nɛ sɛ we gba si himi mi nɛ a fiɛɔ a sibi fɔmi níhi a he. Ekpa komɛ hu ji nyumu kɛ nyumu aloo yo kɛ yo a bɔmi nami, kɛ lohwehi nɛ nihi kɛ mɛ náa bɔmi. *

⁸ Ngmami ɔ tsɔɔ heii kaa: Nihi nɛ bɔɔ ajuama a be Kristofohi asafo ɔ mi nyɛe maa hi, nɛ a be neneene wami hu náe. (1 Korinto Bi 6:9; Kpojemi 22:15) Nɛ amlɔ nɛ ɔ po ɔ, a ngɔɔ haomi kɛ baa mɛ nitsɛmɛ a nɔ; ekomɛ ji kaa nihi he we mɛ yi hu, nɛ bumi hu be a he, a gba si himi peeɔ basaa, a he nile kojoɔ mɛ, a ngɔɔ hɔ nɛ a sume, a nuu hiɔ, nɛ a  gboɔ po. (Kane Galatia Bi 6:7, 8.) Anɛ e sa kaa o kɛ o he ya wo si himi ko nɛ maa ye mo awi mi lo? Mɔbɔ munyu ji kaa nihi fuu susuu we níhi a he kɛ yɛ tsitsaa nɛ a kɛ a he woɔ ní peepeehi nɛ haa nɔ bɔɔ ajuama a mi. Behi fuu ɔ, a jeɔ sisi kɛ ajuama bɔmi he fonihi a hyɛmi.

9. Anɛ e ji anɔkuale kaa ajuama bɔmi he foni hyɛmi yi nɔ awi kaa bɔ nɛ ni komɛ deɔ ɔ lo? Moo tsɔɔ nya.

⁹ Ngɛ mahi fuu a nɔ ɔ, ajuama bɔmi he fonihi ngɛ adafi fiami womihi a juami he, lahi, kɛ tiivi nɔ ní peepeehi a mi, nɛ e pɔ he wawɛɛ ngɛ Intanɛti ɔ nɔ. * Anɛ e yi nɔ awi kaa bɔ nɛ ni komɛ deɔ ɔ lo? E yeɔ nɔ awi wawɛɛ! Nihi nɛ hyɛɛ ajuama bɔmi he fonihi ɔ ma nyɛ ma plɛ pee nihi nɛ fiɛɔ mɛ nitsɛmɛ a fɔmi níhi a he daa, kɛ nihi nɛ “akɔnɔ ní yayahi nɛ ngɛ zo” heɔ si ngɛ a mi. Enɛ ɔ haa nɛ ke a ná we bɔmi ɔ, a he mi jɔɛ mɛ. A juɛmi mi tsuo hyiɔ kɛ akɔnɔ yayahi, a gba si himi peeɔ basaa, nɛ a poɔ gba mi po. * (Roma Bi 1:24-27; Efeso Bi 4:19) Níhi a mi hlalɔ ko ngɔ bɔmi nami nɛ nihi suɔ wawɛɛ ɔ kɛ to kansa he. E de ke: “E kleɔ. Ke e ná nu mo ɔ, e tsami yee wawɛɛ.”

10. Mɛni blɔ nɔ wa ma nyɛ maa ngɔ sisi tomi mlaa nɛ ngɛ Yakobo 1:14, 15 kɛ tsu ní ngɛ? (Hyɛ daka nɛ ji, “ Nɔ́ Nɛ Ye Bua Mi Nɛ Ye Je Mi Bami He Tsɔ” ɔ hulɔ.)

¹⁰ Mo susu munyu nɛ ngɛ Yakobo 1:14, 15 ɔ he nɛ o hyɛ. A ngma ngɛ lejɛ ɔ ke: “Nɔ tsuaa nɔ ɔ, lɛ nitsɛ e we akɔnɔ nɛ́ gblaa lɛ, nɛ́ sisiɔ lɛ ɔ nɛ kaa lɛ. Nɛ akɔnɔ ɔ, ke e ngɔ hɔ ɔ,  e fɔɔ yayami, nɛ yayami hu ke e wa a, e fɔɔ gbenɔ.” Enɛ ɔ he ɔ, ke akɔnɔ yaya ko ba sɛ o juɛmi mi ɔ, je kɛ fɔ he amlɔ! Ke o li o he be nɛ o hɛngmɛ ya gba bɔmi nami foni ko nɔ ɔ, e sa kaa o je o hɛngmɛ kɛ je nɔ amlɔ nɔuu. Ke kɔmpiuta nɔ nɛ o na ngɛ ɔ, moo gbe, nɛ ke tiivi nɔ nɛ o na ngɛ hu ɔ mo tsake he nɛ o ngɛ hyɛe ɔ. Moo bɔ mɔde wawɛɛ nɛ o yu o he ngɛ akɔnɔ yaya he, loko e ba he si ngɛ o mi nɛ o ya pee yayami!​​—Kane Mateo 5:29, 30.

11. Be mi nɛ waa kɛ akɔnɔ yayahi ngɛ kunɔ nɔe ɔ, kɛ wa ma plɛ kɛ tsɔɔ kaa wa ngɔɔ wa he kɛ fɔɔ Yehowa nɔ kɛɛ?

¹¹ Yi mi tomi kpakpa he je nɛ Nɔ nɛ le wɔ saminya pe bɔ nɛ wɔ nitsɛmɛ wa le wa he ɔ wo wɔ ga nɛ nyɛɛ se nɛ ɔ nɛ. E de ke: “Lɔ ɔ he ɔ, je nɛ ɔ mi akɔnɔ níhi nɛ haoɔ nyɛ,  yo kɛ nyumu yakayaka fiɛmi, mu ní tsumi, mi mi la, akɔnɔ yaya, kɛ hɛ tsumi nɛ ngɛ kaa amaga jami ɔ, nyɛɛ gbe.” (Kolose Bi 3:5) Ngɛ anɔkuale mi ɔ, enɛ ɔ peemi be gbɔjɔɔ. Se mo kai kaa wa hiɔwe Tsɛ ɔ suɔ wɔ, nɛ e toɔ e tsui si ha wɔ, nɛ wa ma nyɛ ma bi lɛ yemi kɛ buami. (La 68:19) Enɛ ɔ he ɔ, ke ní yayamihi bɔni o juɛmi mi bami pɛ ɔ, moo sɔle ha Mawu amlɔ. Moo sɔle kaa e ha mo “he wami kpetekpleenyɛ.” Lɔ ɔ se ɔ, o kɛ o juɛmi nɛ ma ní kpakpahi a nɔ.​​—2 Korinto Bi 4:7; 1 Korinto Bi 9:27; hyɛ daka nɛ ji, “ Mɛni Blɔ Nɔ Ma Gu Kɛ Ngmɛɛ Su Yaya Ko He?”

12. Mɛni ji wa “tsui” ɔ, nɛ mɛni he je e sa kaa waa po he piɛ?

¹² Ní lelɔ Salomo ngma ke: “Poo o tsui he piɛ pe nɔ́ tsuaa nɔ́, ejakaa e mi lɛ wami jee.” (Abɛ 4:23, NW) Wa “tsui” ɔ ji wa subai, aloo nɔmlɔ tutuutu nɛ wa ji ngɛ Mawu hɛ mi. Bɔ nɛ Mawu naa wa “tsui” ɔ ha a lɛ maa tsɔɔ kaa wa ma ná neneene wami, loo wa be náe, se pi bɔ nɛ nihi naa wɔ ha. Sane ɔ pɛ ji nɛ ɔ nɛ, se hɛdɔ ngɛ he. Anɔkualetsɛ Hiob kɛ e hɛngmɛ pee somi bɔ nɛ pee nɛ e ko hyɛ yo ngɛ blɔ nɛ sɛ nɔ. (Hiob 31:1) Enɛ ɔ ji nɔ hyɛmi nɔ́ kpakpa ha wɔ! La polɔ ko hu je susumi nɛ ɔ nɔuu kpo. E de ke: “Níhi nɛ a he be se nami ɔ, ko ha ma hyɛ.”​​—La 119:37.

13. Mɛnɔ ji Dina, nɛ mɛni he je nihi nɛ e kɛ bɔ huɛ ɔ ha nɛ wa na kaa e kɛ nile tsu we ní ɔ?

¹³ Kaa bɔ nɛ wa na ngɛ Yi 3 ɔ mi ɔ, wa huɛmɛ ma nyɛ ma ha nɛ waa pee nɔ́ kpakpa aloo nɔ́ yaya. (Abɛ 13:20; kane 1 Korinto Bi 15:33.) Mo susu Dina nɛ ji blematsɛ Yakob biyo ɔ he nɛ o hyɛ. E ngɛ mi kaa Dina ná tsɔsemi kpakpa, se kɛ̃ ɔ, e kɛ nile ya tsu we ní, nɛ e kɛ Kanaan yi ɔmɛ ya bɔ huɛ. Kanaan bi ɔmɛ a je mi bami puɛ wawɛɛ kaa Moab bi ɔmɛ. (3 Mose 18:6-25) Kanaan nyumu ɔmɛ, kɛ Shekem nɛ “a buu lɛ wawɛɛ nitsɛ” ngɛ e tsɛ weku li ɔmɛ  a kpɛti ɔ na Dina kaa nɔ ko nɛ e sa kaa a kɛ lɛ nɛ ná bɔmi.​​—1 Mose 34:18, 19.

14. Mɛni blɔ nɔ nihi nɛ Dina kɛ bɔ ɔ ngɔ haomi kɛ ba ngɛ?

¹⁴ Eko ɔ, benɛ Dina na Shekem ɔ, e susuu we kaa Shekem juɛmi ji kaa e kɛ lɛ ma ná bɔmi. Kanaan bi fuu susu kaa tɔmi ko be nɔ́ nɛ Shekem pee ɔ he, ejakaa ke bɔmi nami he akɔnɔ te si ngɛ a mi ɔ, jã nɛ a peeɔ. Eko ɔ, Dina bɔ mɔde kaa e maa tsi e nya se e nyɛ we, ejakaa “e nu lɛ pani nya nɛ e kɛ lɛ hwɔ.” Pee se ɔ, e pee kaa nɔ́ nɛ Shekem ba “suɔ” Dina, se lɔ ɔ tsakee we nɔ́ nɛ e pee lɛ ɔ. (Kane 1 Mose 34:1-4.) Pi Dina pɛ nɛ e hao ngɛ sane nɛ ɔ he. Nihi nɛ e kɛ mɛ ya bɔ huɛ ɔ ngɔ hɛ mi si puemi kɛ he guɛ gbemi kɛ ba e weku mi bimɛ ɔmɛ tsuo a nɔ.​​—1 Mose 34:7, 25-31; Galatia Bi 6:7, 8.

15, 16. Kɛ wa ma plɛ kɛ ná nile nitsɛnitsɛ kɛɛ? (Hyɛ daka nɛ ji, “ Ngmamihi Nɛ E Sa Kaa O Susu He” ɔ hulɔ.)

¹⁵ Ke Dina kase nɔ́ ko ngɛ nɔ́ nɛ ba e nɔ ɔ mi po ɔ, e kɛ  haomi kpe. E sɛ kaa nihi nɛ a suɔ Yehowa nɛ a buɔ lɛ tue ɔ kɛ haomi nɛ kpe loko a kase ní ngɛ mi. Akɛnɛ a buɔ Mawu tue he je ɔ, a kɛ “ní leli nyɛɛɔ.” (Abɛ 13:20a) Enɛ ɔ he ɔ, a ba ‘leɔ nɔ́ nɛ sa mɛ peemi’ nɛ a tuu haomihi nɛ nihi ngɔɔ a he kɛ ya woɔ mi yaka gu ɔ nya fo.​​—Abɛ 2:6-9; La 1:1-3.

¹⁶ Nihi tsuo nɛ suɔ kaa a ná Mawu he nile ɔ ma nyɛ ma ná ke a bɔɔ mɔde nɛ a sɔleɔ, nɛ a kaseɔ Mawu Munyu ɔ kɛ  womihi nɛ tsɔlɔ anɔkualetsɛ kɛ ní lelɔ ɔ peeɔ ɔ daa. (Mateo 24:45; Yakobo 1:5) Nɔ́ kpa hu nɛ he hia ji he si bami, nɛ enɛ ɔ jeɔ kpo ngɛ bɔ nɛ wa jeɔ wa tsui mi nɛ wa buɔ ga womi nɛ jee Ngmami ɔ mi tue ha a mi. (2 Matsɛmɛ 22:18, 19) Kaa nɔ hyɛmi nɔ́ ɔ, eko ɔ, Kristofo no ko maa kplɛɛ nɔ kaa e tsui ma nyɛ maa sisi lɛ. (Yeremia 17:9) Se ke sane ko ba a, anɛ e maa ba e he si konɛ e kplɛɛ ga womi kɛ yemi kɛ buami nɛ a maa je suɔmi mi kɛ ha lɛ ɔ nɔ lo?

17. Moo kale si fɔfɔɛ ko nɛ ma nyɛ maa ba ngɛ weku ko mi, nɛ́ o tsɔɔ blɔ nɔ nɛ bitsɛ ko maa gu konɛ e kɛ e biyo nɛ susu níhi a he.

¹⁷ Mo susu si fɔfɔɛ nɛ ɔ he nɛ o hyɛ. Bitsɛ ko kplɛɛ we kaa e biyo kɛ niheyo ko nɛ e ji Kristofo no ɔ nɛ je kpo be mi nɛ nɔ ko piɛɛ we a he. Se e biyo ɔ bi lɛ ke: “Papaa, o he we mi yi lo? Wa ya be nɔ́ yayami ko pee!” Eko ɔ, yoyo ɔ suɔ Yehowa nɛ e hɛɛ we juɛmi yaya ko kulaa, se anɛ e ngɛ ‘nyɛɛe ngɛ Mawu nile nya’ lo? Anɛ e ngɛ ‘ajuama bɔmi nya fo tue lo’? Aloo e “heɔ e he yeɔ” ngɛ blɔ nɛ nile be mi nɔ? (Abɛ 28:26) Eko ɔ, o ma nyɛ ma susu sisi tomi mlaa kpahi nɛ ma nyɛ maa ye bua bitsɛ ɔ kɛ e biyo ɔ konɛ a kɛ susu sane nɛ ɔ he ɔ he.​​—Hyɛ Abɛ 22:3; Mateo 6:13; 26:41.

18, 19. Mɛni ka Yosef kɛ kpe ngɛ e si himi mi, nɛ kɛ e tsu he ní ha kɛɛ?

¹⁸ Dina tsɛbi ji Yosef. Yosef baa e je mi saminya, e suɔ Mawu, nɛ e tu ajuama bɔmi nya fo. (1 Mose 30:20-24) Benɛ Yosef ji jokuɛ ɔ, e na níhi nɛ je e nyɛmiyo ɔ ní peepee nɛ nile be mi ɔ mi kɛ ba. Atsinyɛ jemi ko be he kaa Yosef kai níhi nɛ ya nɔ ɔ, nɛ e suɔ kaa e maa hi Mawu suɔmi ɔ mi. Enɛ ɔ po e he piɛ jeha komɛ a se ngɛ Egipt benɛ e nyɔmtsɛ ɔ yo ɔ bɔ mɔde “daa ligbi” kaa e maa sisi lɛ nɛ e kɛ lɛ nɛ ná bɔmi ɔ. Akɛnɛ Yosef ji nyɔguɛ he je ɔ, e be nyɛe ma si e ní tsumi ɔ nɛ e je we ɔ mi! E sa kaa e ngɔ nile kɛ kã kɛ tsu sane ɔ he ní. Nɛ e pee jã, ejakaa Potifar yo ɔ ngɔ  munyu nɛ ɔ kɛ hao lɛ si abɔ, se e kplɛɛ we nɔ, nɛ nyagbe ɔ, e tu e nya fo.​​—Kane 1 Mose 39:7-12.

¹⁹ Mo susu he nɛ o hyɛ: Kaa Yosef susuɔ yo ɔ he, aloo e pɔɔ bɔmi nami he susumi ɔ, anɛ e ko nyɛ ye anɔkuale lo? E ko nyɛ we jã peemi. Yosef susuu we ní yayamihi a he, mohu ɔ, e bu huɛ bɔmi nɛ ngɛ e kɛ Yehowa a kpɛti ɔ kaa nɔ́ ko nɛ he hia, nɛ enɛ ɔ je kpo ngɛ munyu nɛ e tu Potifar yo ɔ mi. E de lɛ ke: “Nɔ́ ko nɔ́ ko be nɛ ye nyɔmtsɛ ɔ je we he gbi ha mi, kaa ja mo pɛ; ejakaa moo lɛɛ e yo ji mo. Mɛni he je mɔ nɛ ma tsu yi wu tso ní kaa kikɛ nɛ ɔ, nɛ ma pee yayami kɛ si Mawu?”​​—1 Mose 39:8, 9.

20. Mɛni Yehowa pee ngɛ Yosef sane ɔ he?

²⁰ Moo po bua jɔmi nɛ Yehowa ma ná a he foni nɛ o hyɛ. Yosef ngɛ tsitsaa he ko nɛ e weku li be lejɛ ɔ, se kɛ̃ ɔ, e ya nɔ nɛ e ye anɔkuale. (Abɛ 27:11) Pee se ɔ, Yehowa da sane ɔ mi ha Yosef. Pi kaa e ha nɛ a je Yosef kɛ je tsu ɔ mi kɛkɛ, se a pee lɛ amlaalo nɔkɔtɔma kɛ niye ní nɔ hyɛlɔ ngɛ Egipt! (1 Mose 41:39-49) Munyu nɛ ngɛ La 97:10 ji anɔkuale. A ngma ngɛ lejɛ ɔ ke: ‘Nyɛ nihi nɛ nyɛ suɔ Yehowa a, nyɛɛ hie yayami. E baa e ni klɔuklɔu ɔmɛ a yi, nɛ e jeɔ mɛ kɛ jeɔ yiwutsotsɛmɛ a dɛ mi.’

21. Mɛni nyɛminyumu wayoo ko nɛ ngɛ Afrika ma ko nɔ ɔ pee kɛ tsɔɔ kaa e ba e je mi saminya?

²¹ Jã kɛ̃ mwɔnɛ ɔ hu Mawu sɔmɔli fuu tsɔɔ kaa a ‘hiee nɔ́  nɛ dɛ blɔ, nɛ a suɔ nɔ́ kpakpa.’ (Amos 5:15) Niheyo ko nɛ e ji Odasefo no nɛ e ngɛ Afrika ma ko nɔ ɔ bɔ amaniɛ kaa yoyo ko nɛ e kɛ lɛ ngɛ sukuu tsu kake mi ɔ gba mi kpoo nɛ e de lɛ kaa e maa suɔ nɛ e kɛ lɛ nɛ ná bɔmi, konɛ e ye bua lɛ ngɛ akɔtaa ka ko nɛ a maa pee ɔ mi. Nyɛminyumu ɔ de ke: “I kua e munyu ɔ amlɔ. Nɛ akɛnɛ i hɛɛ ye anɔkuale yemi ɔ mi he je ɔ, i baa bumi nɛ i ngɛ kɛ ha Yehowa a yi. Enɛ ɔ he jua wa pe sika tsu kɛ sika hiɔ.” Niinɛ, yayami peemi ma nyɛ ma ha nɔ ko maa ye ‘ngɔɔmi be bɔɔ ko,’ se behi fuu ɔ, nɔ́ nɛ jee bua jɔmi nɛ se kɛ we nɛ ɔ mi kɛ baa ji tsui yeyee sɔuu. (Hebri Bi 11:25) Jehanɛ ɔ, ke wa ngɔ bua jɔmi kpiti nɛ wa ma ná a kɛ to bua jɔmi nɛ ngɛ daa nɛ wa náa akɛnɛ wa buɔ Yehowa tue ɔ he ɔ, se nami ko kulaa be he.​​—Abɛ 10:22.

22, 23. (a) Ke Kristofo no ko pee yayami nɛ hɛdɔ ngɛ he ɔ, mɛni tsɔɔ kaa hɛ nɔ kami ngɛ? (b) Mɛni yemi kɛ buami yayami peelɔ ɔ ma nyɛ ma ná?

²² Akɛnɛ wa yi mluku he je ɔ, wɔ tsuo waa kɛ níhi nɛ peeɔ wa he lo ɔ akɔnɔ ɔ hwuɔ ta konɛ waa pee nɔ́ nɛ da ngɛ Mawu hɛ mi. (Roma Bi 7:21-25) Yehowa le enɛ ɔ, “e le kaa zu kɛkɛ ji wɔ.” (La 103:14) Se eko ɔ, Kristofo no ko maa pee yayami nɛ ngɛ hɛdɔ. Ke e ba jã a, anɛ hɛ nɔ kami ko be lo? Hɛ nɔ kami ngɛ! Niinɛ, eko ɔ, nɔ nɛ pee yayami ɔ ma kpa yiblii yayahi kaa Matsɛ David pɛpɛɛpɛ. Se kɛ̃ ɔ, Mawu pee klaalo be tsuaa be kaa e kɛ ‘yayami maa pa’ nihi nɛ piaa a he nɛ a ‘jajeɔ’ a he yayami ɔmɛ ɔ.​​—La 86:5; Yakobo 5:16; kane Abɛ 28:13.

²³ Jehanɛ se hu ɔ, Mawu je mi mi jɔmi mi nɛ e kɛ ‘nimli adesahi ha kaa nike ní’ ngɛ Kristofohi asafo ɔ mi. A ji to hyɛli nɛ a nane pi si ngɛ Mawu jami mi nɛ a he su, nɛ́ a suɔ hu kaa a maa ye bua asafo mi bi ɔmɛ. (Efeso Bi 4:8, 12; Yakobo 5:14, 15) Oti nɛ a kɛ ma a hɛ mi ji kaa a maa ye bua  yayami peelɔ ɔ konɛ e dla e kɛ Mawu a kpɛti, nɛ “e ná nile” konɛ e ko ya pee jamɛ a yayami ɔ ekohu.​​—Abɛ 15:32.

24, 25. (a) Mɛni niheyo ɔ nɛ a tu e he munyu ngɛ Abɛ 7:6-23 pee nɛ tsɔɔ kaa “e be juɛmi”? (b) Mɛni e sa kaa waa pee konɛ wa ‘ná nile’?

²⁴ Baiblo ɔ tu nɔ ko nɛ e “be juɛmi” kɛ nɔ ko nɛ e ‘ngɛ juɛmi’ a he munyu. (Abɛ 7:7) Ke nɔ ko “be juɛmi” ɔ, e nui Mawu susumi ngɛ níhi a he ɔ sisi nɛ e be Mawu jami mi níhi a si kpami ko hulɔ. Jamɛatsɛ ɔ susuu we níhi a he saminya, nɛ e kɔ we nɔ́ se hulɔ. E he wɛ kulaa kaa nɔ ko kaa jã a maa pee yayami nɛ hɛdɔ ngɛ he kaa bɔ nɛ e ba niheyo ɔ nɛ a tu e he munyu ngɛ Abɛ 7:6-23 ɔ mi ɔ nɔ ɔ. Se “nɔ nɛ hlaa nile se blɔ” ɔ, kpaa e mi konɛ e na nɔmlɔ tutuutu nɛ e ji kɛ gu Mawu Munyu ɔ nɛ e kaseɔ kɛ sɔlemi nɛ e sɔleɔ daa a nɔ. E ngɛ mi kaa e yi mluku mohu lɛɛ, se e bɔɔ mɔde kaa e ma ha e susumihi, níhi nɛ e suɔ, e he numihi, kɛ otihi nɛ e kɛ ma e hɛ mi ɔ kɛ Mawu suɔmi nya ní nɛ kɔ. Enɛ ɔ tsɔɔ kaa “e suɔ lɛ nitsɛ e he,” aloo e ngɛ hlae nɛ e ná jɔɔmi, nɛ ‘e maa ya nɔ.’​​—Abɛ 19:8.

²⁵ Mo bi o he ke: ‘Anɛ i heɔ yeɔ niinɛ kaa Mawu tɛhi nɛ e po ɔ da kɛ pi si lo? Anɛ i heɔ yeɔ kaa ke i nyɛɛ ngɛ a nya a, ma ná bua jɔmi babauu lo?’ (La 19:7-10; Yesaya 48:17, 18) Ke o yi mi peeɔ mo enyɔɔnyɔ po ɔ, mo dla o juɛmi. Mo susu haomihi nɛ baa ke a kɛ Mawu mlaa amɛ tsu we ní ɔ he. Jehanɛ ɔ, ‘moo ka Yehowa nɛ o hyɛ, nɛ o maa na kaa e hi.’ Moo ba o je mi ngɛ anɔkuale ɔ nya, nɛ o susu ní kpakpahi a he. Ní nɛ ɔmɛ ji níhi nɛ ji anɔkuale, níhi nɛ da, níhi nɛ he tsɔ, níhi nɛ ngɛ fɛu, kɛ je mi bami kpakpa. (La 34:8; Filipi Bi 4:8, 9) Ná nɔ mi mami kaa be mi nɛ o ngɛ enɛ ɔ he mɔde bɔe wawɛɛ ɔ, jã nɔuu nɛ suɔmi nɛ o ngɛ ha Mawu ɔ hu mi maa hi wae, nɛ o maa suɔ níhi nɛ e suɔ, nɛ o maa yu o he ngɛ níhi nɛ e sume ɔ a he. Yosef yi mluku. Se kɛ̃ ɔ, e nyɛ ‘tu ajuama bɔmi nya fo’ ejakaa e ha Yehowa  tsɔse lɛ jehahi babauu, nɛ lɔ ɔ ha e ná nile. E ba mi jã ngɛ mo hu o blɔ fa mi.​​—Yesaya 64:8.

26. Mɛni sane nɛ he hia lɛ wa ma susu he ngɛ enɛ ɔ se?

²⁶ Wa Bɔlɔ ɔ bɔɛ wa fɔmi ní ɔmɛ ha wɔ konɛ wa kɛ fiɛ, mohu ɔ, e bɔ ha wɔ konɛ wa kɛ ná bua jɔmi ngɛ gba si himi mi nɛ wa kɛ fɔ. (Abɛ 5:18) Wa ma susu Mawu juɛmi ngɛ gba si himi he ngɛ yi enyɔ nɛ nyɛɛ se ɔ a mi.