Moo sɔle nɛ o dla o he saminya. Moo sɔle konɛ o nyɛ nɛ o ngɔ o juɛmi kɛ ma munyu ɔ nɔ, se pi mo nitsɛ o nɔ. Ha nɛ otihi nɛ o maa tu he munyu ɔ nɛ hi o juɛmi mi. Ngɔɔ mo nitsɛ o munyu kɛ tsɔɔ níhi a mi mohu pe nɛ o maa kane nɔ́ nɛ a ngma a.

Moo tu munyu kɛ je o tsui mi. Mo susu tue buli ɔmɛ a he. Bi o he ke, ‘Mɛni he je nɛ e sa nɛ a nu munyu nɛ ɔ?’ Ngɔɔ o juɛmi kɛ ma a nɔ. Kɛkɛ ɔ, bɔ nɛ o maa da si ha, bɔ nɛ o ma je o nine ha, kɛ bɔ nɛ o maa pee o hɛ mi ha a ma ha nɛ a na kaa o susuɔ a he.

Hyɛ tue buli ɔmɛ a hɛ mi. Moo hyɛ a hɛ mi ke tɔmi ko be he kaa o maa pee jã. Ke o ní tsumi ɔ ji munyu tumi ɔ, moo hyɛ tue buli ɔmɛ a hɛ mi kakaaka mohu pe nɛ o maa hyɛ mɛ tsuo si kake.