Sɛ Womi Nɛ Je Blɔ Tsɔɔmi Ajla Toli Ɔmɛ A Ngɔ
“E sa kaa nyɛɛ pee tsɔɔli.” (Heb. 5:12) Mo susu he nɛ o hyɛ! Yehowa nɛ ji Tsɔɔlɔ nɛ pe kulaa ngɛ hiɔwe kɛ zugba a nɔ ɔ ha wɔ he blɔ kaa waa tsɔɔ nihi e he ní! Ke a ha wɔ he blɔ kaa waa tsɔɔ ni kpahi Yehowa he ní ngɛ weku ɔ mi, asafo ɔ mi, aloo fiɛɛmi mi ɔ, e ji he blɔ ngua nɛ e sɛ nɛ waa ngɔ kɛ fiɛ kulaa. Mɛni maa ye bua wɔ konɛ wa nyɛ nɛ waa tsɔɔ nihi ní saminya?
Wa maa na heto ɔ ngɛ munyu nɛ bɔfo Paulo ngma kɛ ya ha Timoteo ɔ mi. E ngma ke: “Yaa nɔ nɛ o ngɔ o juɛmi kɛ ma ní kanemi ngɛ nihi a hɛ mi, ga womi, kɛ ní tsɔɔmi nɔ.” Lɔ ɔ se ɔ, e ngma hu ke: “Ke o peeɔ jã a, o ma he mo nitsɛ kɛ nihi nɛ a buɔ mo tue ɔmɛ a yi wami.” (1 Tim. 4:13, 16) A ha mo yi wami hemi sɛ gbi kaa o de nihi. Enɛ ɔ he ɔ, e he hia nɛ o ní kanemi kɛ o ní tsɔɔmi nɛ hi hɛ mi yae. A pee womiyo nɛ ɔ nɛ e ye bua mo konɛ o nyɛ nɛ o pee jã. Womiyo ɔ mi ní komɛ ji nɛ ɔ nɛ.
Ngɛ ba fã fɛɛ ba fã a, o maa na ngmami ko nɛ a tsɛ se, nɛ ji Baiblo sisi tomi mlaa ko nɛ kɔɔ ní kasemi ɔ he aloo nɔ hyɛmi nɔ́ ko nɛ jeɔ oti ɔ kpo
Yehowa ji “Tsɔɔlɔ Kpanaa.” (Yes. 30:20, NW) Womiyo nɛ ɔ maa ye bua mo, nɛ o he maa be ngɛ ní kanemi kɛ ní tsɔɔmi mi, se e sɛ nɛ o hɛ nɛ je nɔ kaa Yehowa ngɔ nɛ sɛ gbi ɔ je, nɛ lɛ nɛ e gblaa nihi kɛ baa asafo ɔ mi. (Yoh. 6:44) Enɛ ɔ he ɔ, moo sɔle be fɛɛ be konɛ Yehowa nɛ ha mo mumi klɔuklɔu ɔ. O kɛ Mawu Munyu ɔ nɛ tsu ní be fɛɛ be. Moo gbla nihi a juɛmi kɛ ya Yehowa nɔ se pi o nɔ. Bɔɔ mɔde nɛ o ye bua o tue buli ɔmɛ konɛ a ná suɔmi nɛ mi kuɔ kɛ ha Yehowa.
O ná he blɔ nɛ e se be kaa o maa tsɔɔ nihi sɛ gbi nɛ e he hia pe kulaa nɛ a kɛ ha adesahi ɔ. Wa ngɛ nɔ mi mami kaa o maa ye manye ke o ngɔ o hɛ kɛ fɔ “he wami nɛ Mawu haa nɔ ɔ” nɔ.—1 Pet. 4:11.
Nyɛ nyɛmimɛ tsɔɔli,
Yehowa Odasefohi A Blɔ Tsɔɔmi Ajla Toli
