Yesu kɛ e kaseli eywiɛ ɔmɛ ná we deka kulaa ngɛ Kapernaum. Benɛ e su gbɔkuɛ nya si ɔ, a ngɔ hiɔtsɛmɛ kɛ ba Yesu ngɔ konɛ e tsa mɛ. Yesu ná we deka kulaa nɛ e kɛ maa jɔɔ e he.

E nɔ jena makɛ mla benɛ je mi tsɔ we lolo ɔ, Yesu te si nɛ e je kpo kɛ ho nga a nɔ he ko banee ya. E ya konɛ e ya sɔle kɛ ha e Tsɛ ɔ. Benɛ Yesu ho ɔ, e kɛ we kulaa nɛ kaseli ɔmɛ a na kaa e be a kpɛti. Enɛ ɔ he ɔ, “Simon kɛ e huɛmɛ ɔmɛ” a je kpo nɛ a bɔni lɛ hlami. E ma nyɛ maa pee kaa Simon, nɛ a tsɛɛ lɛ hu ke Petro ɔ lɛ nyɛɛ a hɛ mi, ejakaa e we mi nɛ Yesu ya to ɔ nɛ.​​—Marko 1:36; Luka 4:38.

Benɛ a ya na Yesu ɔ, Petro de lɛ ke: “Ni ɔmɛ tsuo ngɛ mo hlae.” (Marko 1:37) Kapernaum bi ɔmɛ suɔ nɛ Yesu nɛ hi a ngɔ. Ngɛ anɔkuale mi ɔ, a bua jɔ níhi nɛ Yesu pee ha mɛ ɔ he saminya, nɛ lɔ ɔ he nɛ ‘a ka kaa a maa tsi e nya konɛ e ko je a ngɔ’ ɔ nɛ. (Luka 4:42) Se anɛ Yesu ba zugba a nɔ ngɛ nyakpɛ ní tsumi he titli lo? Nɛ anɛ ma nɛ ɔ mi pɛ nɛ e sa kaa Yesu nɛ fiɛɛ ngɛ lo? Mɛni Yesu de ngɛ sane nɛ ɔ he?

Yesu de e kaseli ɔmɛ ke: “Nyɛ ha waa ya ma kpa amɛ nɛ bɔle wɔ nɛ ɔ a mi, konɛ ma ya fiɛɛ ngɛ lejɛ ɔmɛ hulɔ; ejakaa lɔ ɔ he i ba ngɛ.” Yesu de nihi nɛ a ngɛ hlaa nɛ a tsi e nya a hu ke: “E hia kaa ma ya fiɛɛ Mawu matsɛ yemi ɔ he sane kpakpa a ngɛ ma kpa amɛ a mi hulɔ, ejakaa lɔ ɔ nɛ Mawu tsɔ mi ke ma ba tsu.”​​—Marko 1:38; Luka 4:43.

Mawu Matsɛ Yemi ɔ fiɛɛmi titli he je nɛ Yesu ba zugba a nɔ ngɛ. Matsɛ Yemi ɔ ma tsɔ e Tsɛ ɔ biɛ he, nɛ e ma je adesahi a nyagbahi tsuo kɛ je. Kaa bɔ nɛ Mose pee nyakpɛ níhi kɛ tsɔɔ kaa Mawu lɛ tsɔ lɛ ɔ, jã a kɛ̃ nɛ Yesu hu pee nyakpɛ níhi kɛ tsɔɔ kaa Mawu lɛ tsɔ lɛ.​​—2 Mose 4:1-9, 30, 31.

Yesu kɛ e kaseli eywiɛ ɔmɛ a je Kapernaum nɛ a ya fiɛɛ ngɛ ma kpahi a nɔ. Kaseli nɛ ɔmɛ ji Petro kɛ e nyɛmi Andrea, kɛ Yohane kɛ lɛ hu e nyɛmi Yakobo. Otsi nɛ be ɔ, Yesu fɔ mɛ nine nɛ a piɛɛ e he kɛ je e sɔmɔmi ní tsumi ɔ sisi.

Blɔ nɛ Yesu kɛ kaseli eywiɛ ɔmɛ a hia kɛ ya fiɛɛ ngɛ Galilea a ye manye wawɛɛ nitsɛ! Ngɛ anɔkuale mi ɔ, Yesu he sane gbɛ fĩa mahi fuu a nɔ. ‘Yesu he sane gbɛ fĩa Siria zugba a nɔ tsuo,’ kɛ ma nyɔngma amɛ nɛ a tsɛɛ ke Dekapoli ɔ, kɛ Yordan Pa a se tsuo. (Mateo 4:24, 25) Nihi babauu je Yudea kɛ ma nɛ ɔmɛ a nɔ nɛ a ba nyɛɛ Yesu kɛ e kaseli ɔmɛ a se. Nihi fuu ngɔ hiɔtsɛmɛ kɛ ba e ngɔ konɛ e tsa mɛ. Yesu ha we nɛ zo nɛ gbe mɛ. E tsa nihi nɛ hiɔ slɔɔtohi ngɛ mɛ haoe ɔ tsuo, nɛ e hia mumi yayahi ngɛ ni ɔmɛ a mi.