Benɛ kaseli ɔmɛ gblee nɔ́ nɛ ya nɔ ngɛ wo ɔ nɔ ɔ mi ta, nɛ́ a ya su wo ɔ se ɔ, nɔ́ ko ya nɔ nɛ po a he mi. Nyumuhi enyɔ komɛ nɛ a he ngɛ gbeye, nɛ mumi yayamihi ngɛ a mi tu fo kɛ ba Yesu ngɔ! Nyumu ɔmɛ a kpɛti nɔ kake he munyu nɛ a tu titli ejakaa eko ɔ, lɛ nɛ daimonio ɔmɛ ná e nɔ he wami wawɛɛ aloo lɛ nɛ daimonio ɔmɛ kɛ lɛ tsu ní be kɛkɛɛ.

Nyumu nɛ ɔ hɛɛ e he gu. Nyɔ kɛ pia tsuo ɔ, “yɔkɔ ɔmɛ kɛ yoku ɔmɛ a mi e hii; e kpaa ngmlaa nɛ e kɛ tɛ poɔ e he.” (Marko 5:5) E he ngɛ gbeye hluu kaa nɔ ko nɔ ko nyɛ we nɛ e gu jamɛ a blɔ ɔ nɔ. Nihi bɔɔ mɔde kaa a maa wo lɛ kɔsɔkɔsɔ, se be tsuaa be ɔ, e tsɔɔ kɔsɔkɔsɔ ɔ nɛ e kuɔɔ pã nɛ a bɔɔ lɛ ɔ. Enɛ ɔ he ɔ, nɔ ko nɔ ko nyɛ we nɛ e nu lɛ.

Se benɛ nyumu ɔ na Yesu nɛ ma ngɛ tsitsaa a, e tu fo kɛ ya e ngɔ, nɛ e ya kpla si ngɛ e hɛ mi nɛ e de ke: ‘Yesu, Mawu nɛ ngɛ hiɔwe lokoo ɔ Bi, mɛni o ngɛ hlae ngɛ ye dɛ? I kpa mo pɛɛ ngɛ Mawu biɛ mi kaa kó pĩ mi!’ Yesu tsɔɔ kaa e ngɛ he wami ngɛ mumi yayamihi a nɔ. E fa ke: “Mo mumi yayami, jee nyumu ɔ mi.”​​—Marko 5:7, 8.

Ngɛ anɔkuale mi ɔ, pi mumi yayami kake pɛ nɛ ngɛ nyumu ɔ mi. Benɛ Yesu bi lɛ ke: “Kɛ a tsɛɛ mo kɛɛ?” ɔ, e de ke: “Ye biɛ ji Asafo, ejakaa wa he hiɛ.” (Marko 5:9) Roma ta buli akpehi abɔ lɛ peeɔ asafo nɛ nyumu ɔ tu he munyu ɔ kake; enɛ ɔ he ɔ, daimoniohi fuu pee kake nɛ a ngɛ nyumu ɔ piie, nɛ a bua jɔ kaa e ngɛ nɔ́ nae. A kpa Yesu pɛɛ kaa e “ko ha nɛ a ya sɛ muɔ voo ɔ” mi. A le nɔ́ nɛ maa ba a kɛ a nya tsɛ Satan nɔ hwɔɔ se.​​—Luka 8:31.

Jamɛ a be ɔ mi ɔ, kpotoohi maa pee 2,000 ngɛ ní yee ngɛ a kasa nya. Mlaa a tsɔɔ kaa kpotoohi a he tsɔ we, lɔ ɔ he ɔ, Yuda bi lɛ́ kpotoo. Daimonio ɔmɛ de ke: “Ha nɛ wa ya sɛ kpotoo ɔmɛ a mi.” (Marko 5:12) Yesu kplɛɛ nɔ ha mɛ. Nɔuu nɛ kpotoohi maa pee 2,000 ɔmɛ tsuo a tu fo hlididididi kɛ sɛ wo ɔ mi nɛ a gbo.

Benɛ nihi nɛ a ngɛ kpotoo ɔmɛ a nɔ hyɛe ɔ na nɔ́ nɛ ba a, a ya bɔ amaniɛ ngɛ mahi kɛ kɔpehi  nɛ ngɛ kpokpa a nɔ ɔ mi. Nihi fuu ba konɛ a ba hyɛ nɔ́ nɛ ba a. Benɛ ni ɔmɛ ba a, a na kaa nyumu ɔ nɛ a hia mumi yayamihi ngɛ e mi ɔ ngɛ saminya ejakaa e wo tade, nɛ e hii si ngɛ Yesu kasa nya!

Gbeye pue nihi nɛ a nu nɔ́ nɛ ya nɔ ɔ kɛ nihi nɛ a ya na nyumu ɔ a nɔ, ejakaa a li nɔ́ nɛ maa je nɔ́ nɛ Yesu pee ɔ mi kɛ ba. Enɛ ɔ he ɔ, a kpa Yesu pɛɛ kaa e je kpokpa a nɔ. Benɛ Yesu sɛ lɛ mi nɛ e maa je ɔ, nyumu ɔ nɛ e hia mumi yayamihi ngɛ e mi ɔ kpa lɛ pɛɛ kaa e kɛ lɛ maa ya. Se Yesu de lɛ ke: ‘Kpale o se, nɛ o ho we mi ya. Yaa o weku li a ngɔ nɛ o ya sɛɛ ní nguanguahi nɛ Yehowa pee ha mo ɔ; nɛ o de mɛ bɔ nɛ e na mo mɔbɔ’ ɔ.​​—Marko 5:19.

Behi fuu ɔ, jinɛ Yesu deɔ nihi nɛ e tsaa mɛ ɔ kaa a ko de ni kpahi nɔ́ nɛ e pee ha mɛ ɔ, ejakaa e sume nɛ nihi nɛ a nu e he kɛ gu akeake nɔ. Se ngɛ si fɔfɔɛ nɛ ɔ mi ɔ, nyumu ɔ nɛ Yesu hia mumi yayamihi ngɛ e mi ɔ ji odase nɛ tsɔɔ kaa Yesu ngɛ he wami ngɛ daimoniohi a nɔ, nɛ nyumu ɔ ma nyɛ maa ye Yesu he odase kɛ ha nihi nɛ Yesu be mɛ nae nɛ e fiɛɛ ha mɛ ɔ. Jehanɛ ɔ, ke nihi tu munyu kɛ si Yesu kaa e ha nɛ ni komɛ a kpotoohi gbo ɔ, nyumu ɔ ma nyɛ ma fa Yesu he. Enɛ ɔ he ɔ, nyumu ɔ je nɛ e ya sɛɛ níhi nɛ Yesu pee ha lɛ ɔ ngɛ Dekapoli kpokpa a nɔ.