Benɛ Yesu ngɛ ní tsɔɔe ngɛ Kaisare Filipi kpokpa a nɔ ngɛ he ko nɛ kɛ Hermon Yoku ɔ kpɛti kɛ mi maa pee si tomi 15 ɔ, e de e bɔfo ɔmɛ nɔ́ ko nɛ ha nɛ a he mi po. E de mɛ ke: “Niinɛ, i ngɛ nyɛ dee ke ni komɛ daa si ngɛ hiɛ ɔ nɛ mɛɛ lɛɛ a be gboe kɛ yaa su benɛ a maa na Nɔmlɔ Bi ɔ nɛ ma kaa matsɛ.”​—Mateo 16:28.

Kaseli ɔmɛ a juɛmi maa pee mɛ yaa ngɛ nɔ́ nɛ Yesu de ɔ he. Maa pee otsi kake se ɔ, e ngɔ bɔfo ɔmɛ a kpɛti nihi etɛ kɛ piɛɛ e he kɛ ho yoku gagaa ko nɔ ya. E kɛ Petro, Yakobo, kɛ Yohane nɛ a ya. Benɛ a ngɛ lejɛ ɔ, je ba jɔ nɛ kaseli etɛ ɔmɛ a nɔ mahe mi. Benɛ Yesu ngɛ sɔlee ɔ, e nɔmlɔ tso ɔ su tsake ngɛ a hɛ mi. Kaseli etɛ ɔmɛ na kaa Yesu hɛ mi ngɛ kpɛe kaa pu, nɛ e tade ɔ hiɛ futaa nɛ e ngɛ kpɛe kaa la.

Tlukaa a, a na “Mose kɛ Eliya,” nɛ a daa si ngɛ Yesu kasa nya. A kɛ Yesu bɔni ‘jemi nɛ e maa je ɔ’ he munyu tumi. (Luka 9:30, 31) Jemi nɛ e maa je ɔ ji gbenɔ nɛ e ma ya gbo ngɛ Yerusalem, kɛ si nɛ a ma tle lɛ ɔ. (Mateo 16:21) Ní sɛɛmi nɛ ya nɔ nɛ ɔ ma nɔ mi kaa, ga nɛ Petro wo Yesu benɛ Yesu de kaseli ɔmɛ kaa e ma gbo ɔ be hie; ejakaa ja a pue Yesu hɛ mi si nɛ a gbe lɛ kɛ̃.

Benɛ mahe ɔ tsɔ ngɛ kaseli etɛ ɔmɛ a hɛ mi ɔ, a na nɔ́ nɛ ya nɔ ɔ tsuo nɛ a nya kpɛ a he. Nɔ́ nɛ ya nɔ nɛ ɔ ji nina, se e pee mɛ kaa nɔ́ nitsɛnitsɛ. Enɛ ɔ he ɔ, Petro de ke: “Tsɔɔlɔ, e hi kaa wa ngɛ hiɛ ɔ. Ha waa ma bo tsu etɛ, o nɔ́ kake, Mose nɔ́ kake, kɛ Eliya nɔ́ kake.” (Marko 9:5) Anɛ Petro ngɛ hlae nɛ e maa ma bo tsuhi kɛ ha mɛ konɛ nina a nɛ tsa nɔ bɔɔ lo?

Benɛ Petro ngɛ munyu tue kɛ mwɔɔ ɔ, bɔku hleii ko ba ha a nɔ, kɛkɛ nɛ a nu nɛ gbi ko pɛ ngɛ bɔku ɔ mi ke: ‘Ye Bi nɛ i suɔ lɛ saminya ji nɛ ɔ nɛ; nyɛɛ bu lɛ tue.’ Benɛ kaseli ɔmɛ nu Mawu gbi ɔ, a nɔ zugba nɛ a ngɔ a hɛ mi kɛ bu si, se Yesu de mɛ ke: “Nyɛɛ te si; nyɛ ko ye gbeye.” (Mateo 17:5-7) Benɛ a te si nɛ a bli a hɛngmɛ ɔ, a nɛ́ nɔ kpa ko ngɛ lejɛ ɔ hu kaa ja Yesu pɛ. Nina a ba nyagbe. Benɛ je na nɛ a ngɛ yoku ɔ kplee ɔ, Yesu fa mɛ ke: “Nyɛ ko sɛɛ nina nɛ ɔ he ní ha nɔ ko kɛ ya si a ma tle Nɔmlɔ Bi ɔ si kɛ je gbeje.”​​—Mateo 17:9.

Eliya nɛ a na ngɛ nina a mi ɔ tle sane bimi ko si. Kaseli ɔmɛ bi Yesu ke “Mɛni he je mɔ nɛ mlaa tsɔɔli ɔmɛ deɔ ke ja Eliya ba lolo ɔ?” Yesu ha heto ke: “Eliya ba momo, se nihi lí lɛ.” (Mateo 17:10-12) Yohane Nɔ Baptisilɔ ɔ he munyu Yesu ngɛ tue ɔ nɛ, ejakaa e tsu ní kaa Eliya. Kaa bɔ nɛ Eliya dla blɔ ngɔ to Elisha a, jã a kɛ̃ nɛ Yohane hu dla blɔ ngɔ to Kristo.

Atsinyɛ jemi ko be he kaa nina nɛ ɔ wo Yesu kɛ e bɔfo ɔmɛ he wami wawɛɛ! Nina a pee bɔ nɛ a maa wo Kristo hɛ mi nyami ha ngɛ e Matsɛ Yemi ɔ mi ɔ he foni. Enɛ ɔ he ɔ, kaseli ɔmɛ a kpɛti ni komɛ na ‘Nɔmlɔ Bi ɔ nɛ ma kaa Matsɛ’ kaa bɔ nɛ Yesu wo si ɔ. (Mateo 16:28) Benɛ a ngɛ yoku ɔ nɔ ɔ, a ‘na e he wami kpetekpleenyɛ ɔ kɛ mɛ nitsɛmɛ a hɛngmɛ.’ E ngɛ mi kaa Farisi bi ɔmɛ suɔ kaa Yesu nɛ ha mɛ okadi ko nɛ tsɔɔ kaa Mawu hla lɛ kaa Matsɛ mohu lɛɛ, se e ha we mɛ okadi ko. Yesu kaseli etɛ nɛ ɔmɛ lɛɛ a na Yesu nɔmlɔ tso su tsakemi nɛ ji okadi nɛ tsɔɔ kaa Yesu ji matsɛ nɛ Mawu hla kaa bɔ nɛ a gba kɛ kɔ Mawu Matsɛ Yemi ɔ he ɔ. Enɛ ɔ he ɔ, Petro ngma pee se ke: “Wa na kaa munyuhi nɛ gbali ɔmɛ tu ɔ ba mi niinɛ.”​​—2 Petro 1:16-19.