E sa nɛ nɔ́ hetomi nɔ́ nɛ kɔɔ bi nɛ laa a he ɔ nɛ ha nɛ Farisi bi ɔmɛ, kɛ mlaa tsɔɔli ɔmɛ, kɛ tó tsuli ɔmɛ nɛ a na kaa, Mawu suɔ kaa e kɛ yayami peeli nɛ a tsake a tsui ɔ a tɔmihi maa pa mɛ. (Luka 15:1-7, 11) Jehanɛ ɔ, Yesu kɛ e kaseli ɔmɛ tu munyu. E ngɔ nɔ́ hetomi nɔ́ kpa ko kɛ tsu ní. Nɔ́ hetomi nɔ́ ɔ kɔɔ niatsɛ ko nɛ e nu kaa e tsɔlɔ nɔkɔtɔma ngɛ e níhi a hɛ mi kpatae ɔ he.

Yesu tsɔɔ kaa niatsɛ ɔ yɔse kaa e tsɔlɔ ɔ ngɛ lɛ si gbee. Lɔ ɔ he ɔ, niatsɛ ɔ de kaa e maa fie e tsɔlɔ ɔ. Enɛ ɔ ha nɛ tsɔlɔ ɔ bi e he ke: “Ye nyɔmtsɛ ɔ miɔ nɛ e ma kpɔ ní tsumi ɔ ngɛ ye de; kɛ ma pee kɛɛ? I be nɔmlɔ tso mi he wami nɛ ma nyɛ ní tsumi kpakpataa ma tsu, nɛ nɔ́ bami hu maa pee mi zo.” Bɔ nɛ pee nɛ e he ko fi lɛ ɔ, e de e he ke: “Yoo, i le bɔ nɛ ma pee, kɛkɛ ɔ, ke ye ní tsumi ɔ je ye dɛ ɔ, ma ná huɛmɛ nɛ ma he mi atuu kɛ to we.” Nɔuu nɛ e tsɛ nihi nɛ a ye e nyɔmtsɛ ɔ hiɔ ɔ, nɛ e bi mɛ ke: “Hiɔ nyɛmɛ o hɛɛ ye nyɔmtsɛ ɔ?”​​—Luka 16:3-5.

Kekleekle nɔ ɔ ha heto ke: “Nu tɔ lafa.” Lɔ ɔ maa pee kaa oliv nu galɔn 580. Eko ɔ, nɔ nɛ ye hiɔ ɔ juaa nu, aloo e ngɛ oliv ngmɔ nɛ kle saminya. Tsɔlɔ ɔ de lɛ ke: “He o womi ɔ! Hii si esɔ, nɛ o ngma nyingmi enuɔ [galɔn 290].”​​—Luka 16:6.

Tsɔlɔ ɔ bi nɔ kpa hu ke: “Mo nɛɛ, hiɔ nyɛmɛ o hɛɛ?” E ha heto ke: “Ngma susumi kotoku lafa.” Enɛ ɔ hiɛmi maa pee kaa lita 22,000. Tsɔlɔ nɔkɔtɔma a de lɛ ke: “He o womi ɔ; ngmaa nyingmi kpaanyɔ.” Enɛ ɔ tsɔɔ kaa e je ngma susumi kotoku 20 ngɛ nɔ ha lɛ.​​—Luka 16:7.

Akɛnɛ tsɔlɔ ɔ lɛ e hyɛɛ e nyɔmtsɛ ɔ sika nɔ he je ɔ, ngɛ blɔ ko nɔ ɔ, e ma nyɛ ma je hiɔ nɛ nihi ye e nyɔmtsɛ ɔ nɔ. E pee jã ejakaa, e suɔ nɛ e kɛ nihi nɛ a ye hiɔ ɔ maa pee huɛ, konɛ ke e ní tsumi ɔ je e dɛ ɔ, mɛ hu a ye bua lɛ.

Pee se ɔ, e nyɔmtsɛ ɔ nu nɔ́ nɛ e pee ɔ he. E ngɛ mi kaa nɔ́ nɛ tsɔlɔ ɔ pee ɔ ha nɛ e nyɔmtsɛ ɔ gbee si mohu lɛɛ, se e nyɔmtsɛ ɔ bua jɔ nɔ́ nɛ e pee ɔ he, nɛ e je ‘tsɔlɔ nɛ yi anɔkuale ɔ’ yi kaa e “to ga kikɛ nɛ ɔ.” Yesu de hu ke: “Je mi bi a nane nya sɔɔ kɛ nɔ sisimi kulaa pe nihi nɛ yeɔ Mawu gbeye.”​​—Luka 16:8.

Ngɛ anɔkuale mi ɔ, Yesu bua jɔɛ nɔ́ nɛ tsɔlɔ ɔ pee ɔ he, nɛ jã kɛ̃ nɛ e bua jɔɛ sisimi nɛ yaa nɔ ngɛ ní tsumihi a mi ɔ he. Ke jã a, lɛɛ mɛni he je mɔ nɛ Yesu de ke tsɔlɔ ɔ kɛ nile tsu ní ɔ? Yesu wo e kaseli ɔmɛ ga ke: ‘Nyɛɛ ngɔ ní nɛ nyɛ ná kɛ gu sisimi blɔ nɔ ɔ kɛ pee huɛmɛ, konɛ ke ní ɔmɛ ba ta a, a he nyɛ kɛ ya sihi he nɛ ngɛ kɛ yaa neneene ɔ.’ (Luka 16:9) Nɔ́ nɛ wa ma nyɛ maa kase ngɛ mi ji kaa, e sa nɛ wa susu níhi a he kɛ ya tsitsaa, nɛ waa pee wa ní ngɛ nile mi. E sa nɛ “nihi nɛ yeɔ Mawu gbeye” ɔ nɛ a ha nɛ neneene wami nɛ a ma ná hwɔɔ se ɔ nɛ hi a juɛmi mi konɛ a ngɔ he lo nya níhi nɛ a ngɛ ɔ kɛ tsu ní ngɛ nile mi.

 Yehowa Mawu kɛ e Bi ɔ pɛ nɛ a ma nyɛ ma ha nihi he blɔ kaa a hi hiɔwe Matsɛ Yemi ɔ mi, aloo Paradeiso zugba a nɔ. E sa nɛ waa bɔ mɔde kaa waa kɛ níhi nɛ wa ngɛ ɔ ma fĩ Mawu Matsɛ Yemi ɔ se, konɛ waa pee Mawu kɛ e Bi ɔ a huɛmɛ. Ke wa pee jã, nɛ sika loo he lo nya níhi nɛ wa ngɛ ɔ hɛ mi kpata po ɔ, neneene wami nɛ wa ma ná hwɔɔ se ɔ lɛɛ, e be wɔ bɔe.

Yesu tsɔɔ hu kaa, ke nɔ ko hyɛɛ e he lo nya níhi a nɔ saminya nɛ a ngɔ Matsɛ Yemi ɔ he ní tsumihi nɛ a he hia kɛ wo e dɛ ɔ, e kɛ anɔkuale yemi ma tsu he ní. E de ke: “Ke je nɛ ɔ mi ní po nyɛ yi anɔkuale ngɛ mi ɔ, mɛnɔ maa tu ní nami nitsɛnitsɛ [kaa Matsɛ Yemi ɔ he níhi] ngɔ wo nyɛ dɛ mi?”​​—Luka 16:11.

Yesu ngɛ e kaseli ɔmɛ tsɔɔe kaa ja a bɔ mɔde wawɛɛ loko a ma he mɛ “kɛ ya sihi he nɛ ngɛ kɛ yaa neneene ɔ.” Nɔ ko be nyɛe ma sɔmɔ he lo nya níhi, nɛ ngɛ jamɛ a be ɔ mi nɔuu ɔ, e ma sɔmɔ Mawu ngɛ anɔkuale yemi mi. Nyagbe ɔ, Yesu de ke: “Sɔmɔlɔ ko be nyɛe ma sɔmɔ nyɔmtsɛmɛ enyɔ; e maa suɔ nɔ kake pe nɔ kake; e maa nyɛ nɔ kake, nɛ e maa suɔ nɔ kake; aloo e maa pee nɔ kake suɔmi nya ní, nɛ nɔ kake ɔ lɛɛ e be lɛ bue fɛɛ. Nɔ ko be nyɛe ma sɔmɔ Mawu kɛ sika tsuo.”​​—Luka 16:9, 13.