E kɛ we nɛ wa na kaa Yesu tĩ blɔ tsɔɔmi nɛ e kɛ ha ngɛ sɔlemi he ɔ mi. Se pi lɔ ɔ pɛ ji nɔ́ nɛ e tĩ mi ngɛ e sɔmɔmi ní tsumi ɔ mi. Benɛ e pee nyakpɛ níhi ngɛ Galilea a, nihi de ke e kɛ daimonio ɔmɛ a nɔkɔtɔma a he wami lɛ pee jã. Benɛ e ya su Yudea a, mɛ hu a ke e kɛ daimoniohi a he wami lɛ ngɛ ní tsue.

Yesu hia mumi yayami ngɛ amuɛti ko mi, nɛ e pee ma kpekpemi ɔ nyakpɛ. Se nihi nɛ a ngɛ Yesu he guɛ gbee ɔ lɛɛ a bua jɔɛ. A de ke: “Beelzebul, mumi yayami ɔmɛ a tsɛ ɔ nɛ e haa Yesu he wami nɛ e kɛ hiaa mumi yayami ɔmɛ ɔ nɛ.” (Luka 11:15) Ni komɛ hu nɛ a ngɛ hlae nɛ a le nɔ tutuutu nɛ Yesu ji ɔ de lɛ ke e pee okadi ko loo nyakpɛ nɔ́ ngua ko kɛ tsɔɔ kaa e je hiɔwe niinɛ.

Benɛ Yesu na kaa ni ɔmɛ ngɛ hlae nɛ a ka lɛ ɔ, e de mɛ nɔ́ nɛ e de nihi nɛ a tu e he munyu yaya ngɛ Galilea a. E de mɛ kaa matsɛ yemi tsuaa matsɛ yemi nɛ e kɛ e he maa hwu ɔ be si dae. E de ke: “Ke Satan matsɛ yemi ɔ gba ta ngɔ wo mɛ nitsɛmɛ a he ɔ, kɛ jamɛ a matsɛ yemi ɔ maa pee kɛ da si kɛɛ?” Kɛkɛ nɛ Yesu ha nɛ a na he nɛ e he wami ɔ je. E de mɛ ke: ‘Se ke Mawu nine nguɛ i kɛ hiaa mumi yayami ɔmɛ ɔ, lɛɛ Mawu bɔni Matsɛ Yemi ngɛ nyɛ nɔ momo.’​​—Luka 11:18-20.

“Mawu nine nguɛ” nɛ Yesu wo ta a ma kai e tue buli ɔmɛ nɔ́ ko nɛ ba ngɛ Israel yi nɔ sane mi. Nihi nɛ a ngɛ Farao we ɔ mi nɛ a na nyakpɛ níhi nɛ Mose pee ɔ kpa ngmlaa ke: ‘Mawu nine nguɛ ji nɛ ɔ nɛ!’ Mlaa Nyɔngma amɛ nɛ a ngma ngɛ tɛ nɔ ɔ hu “Mawu nine nguɛ” lɛ ngma. (2 Mose 8:19; 31:18) Jã a kɛ̃ nɛ “Mawu nine nguɛ” nɛ ji mumi klɔuklɔu ɔ loo he wami nɛ Mawu kɛ tsuɔ ní ɔ lɛ ngɛ Yesu ye buae nɛ e ngɛ nyakpɛ níhi pee ɔ nɛ. Enɛ ɔ he ɔ, Mawu Matsɛ Yemi ɔ bɔni nihi nɛ a ngɛ si tee kɛ ngɛ Yesu woe ɔ a nɔ yemi momo, ejakaa Yesu nɛ́ Mawu hla lɛ kaa Mawu Matsɛ Yemi ɔ nya Matsɛ ɔ ngɛ nyakpɛ níhi pee ngɛ a kpɛti.

Kaa bɔ nɛ nɔ ko nɛ e he wa ya tuaa kãtsɛ ko nɛ hɛɛ dade kɛ ngɛ matsɛ we he bue nɛ e yeɔ e nɔ ɔ, jã a kɛ̃ nɛ mumi yayamihi nɛ Yesu ngɛ hiae ɔ ji odase nɛ tsɔɔ kaa e ngɛ Satan nɔ he wami. Yesu kpale tu nɔ́ hetomi nɔ́ nɛ kɔɔ mumi yayami nɛ je nyumu ko mi ɔ he munyu ekohu. Yesu tsɔɔ kaa ke nyumu ɔ hii si gu nɛ e ngɔɛ ní kpakpahi kɛ wui e mi ɔ, mumi yayami ɔ yaa nɛ e ya ngɔɔ mumi kpahi kpaago kɛ baa, nɛ a ba hii e mi, nɛ lɔ ɔ haa nɛ e si himi puɛɔ pe sa a po. (Mateo 12:22, 25-29, 43-45) Jã a kɛ̃ nɛ e ngɛ mi bae ngɛ Israel bi ɔmɛ a blɔ fa mi.

Yo ko nu nɔ́ nɛ Yesu de ɔ, nɛ e kpa ngmlaa ke: “A gbaa yo nɛ fɔ mo, nɛ e lɛ mo ɔ!” Yuda yo tsuaa Yuda yo ná nɛ a ko de ke e bi ji gbalɔ, hluu nɛ Mesia a. Lɔ ɔ he ɔ, yo nɛ ɔ ngɛ tsɔɔe kaa Maria bua maa jɔ wawɛɛ kaa lɛ nɛ e fɔ Yesu. Se Yesu dla yo ɔ juɛmi nɛ e tsɔɔ lɛ nɔ́ nɛ haa nɔ bua jɔmi nitsɛnitsɛ. E de yo ɔ ke: ‘Dɛbi, pi jã, mohu ɔ, nihi nɛ a nuɔ Mawu munyu ɔ, nɛ a yeɔ nɔ ɔ, mɛ lɛ a náa bua jɔmi!’ (Luka 11:27, 28) Yesu de we gblee kaa e sa nɛ nihi nɛ a je bumi slɔɔto kpo kɛ ha Maria. Mohu ɔ, e tsɔɔ kaa nihi nɛ a kɛ anɔkuale yemi sɔmɔɔ Mawu ɔ lɛ a náa bua jɔmi, se pi weku mi nɛ nɔ ko je loo níhi nɛ nɔ ko pee ngɛ e si himi mi.

Yesu kã ni ɔmɛ a hɛ mi ngɛ okadi nɛ a ngɛ hlae nɛ e pee kɛ tsɔɔ mɛ ɔ he kaa bɔ nɛ e kã ni komɛ a hɛ mi ngɛ Galilea be ko ɔ. E de mɛ ke e be mɛ okadi ko hae kaa ja “gbalɔ Yona okadi ɔ” pɛ. Ligbi etɛ nɛ Yona ye ngɛ lo ɔ mi mi, kɛ kã nɛ e kɛ fiɛɛ nɛ lɔ ɔ ha nɛ Nineve bi ɔmɛ tsake ɔ ji okadi ɔ nɛ. Yesu de mɛ ke: “Nɔ́ ko ngɛ hiɛ ɔ nɛ pe Yona tete!” (Luka 11:29-32) Jehanɛ hu ɔ, Salomo nɛ e nile he je ɔ, Sheba manyɛ ɔ hia blɔ kɛ ya bu lɛ tue ɔ po, Yesu pe lɛ.

Yesu tsa nɔ ke: “Nɔ ko su we kane ngɔ mɛ kɔkɔɔ mi, loo sowe sisi. Mohu ɔ, e ngɔɔ kɛ maa kane tso nɔ.” (Luka 11:33) Yesu ngɛ tsɔɔe kaa  nyakpɛ níhi nɛ e maa pee ngɛ nimli nɛ ɔmɛ a hɛ mi ɔ ngɛ kaa kane nɛ e su kɛ ma sowe sisi. Akɛnɛ a mumi mi hɛngmɛ ɔmɛ yu he je ɔ, a nɛ́ kaa Mawu lɛ e kɛ Yesu ngɛ ní tsue.

Yesu hia mumi yayami ngɛ nyumu ko nɛ mumi yayami ɔ ha nɛ e pee amuɛti ɔ mi, nɛ e bɔni munyu tumi. Jinɛ e sa nɛ nɔ́ nɛ ɔ nɛ wo nihi he wami konɛ a je Mawu yi, nɛ a tu níhi nɛ Yehowa ngɛ pee ɔ he munyu kɛ tsɔɔ ni kpahi. Enɛ ɔ he ɔ, Yesu bɔ nihi nɛ a ngɛ e he guɛ gbee ɔ kɔkɔ ke: “Lɔ ɔ he ɔ, hyɛ nɛ hi, konɛ la nɛ ngɛ o mi ɔ ko plɛ diblii. Ke o nɔmlɔ tso ɔ tsuo mi tsɔ, nɛ he ko he ko wui diblii ɔ, lɛ tsuo ma kpɛ kaa bɔ nɛ kane kpɛɔ nɛ e haa mo la a.”​​—Luka 11:35, 36.