O ma kai kaa benɛ Yesu ye jeha 12 ɔ, e ya bi tsɔɔli ɔmɛ sanehi ngɛ sɔlemi we ɔ. Jeha 17 se ɔ, Yohane nɛ e ji Yesu weku no ɔ bɔni fiɛɛmi ngɛ Yordan Pa a se ngɛ pusinɔ he, nɛ nihi fuu bɔni e he munyu tumi. Nɔ́ nɛ ɔ ya nɔ ngɛ gbiɛ be mi ngɛ jeha 29 ɔ mi.

Yohane he ngɛ fɛu, nɛ ke e tu munyu hu ɔ, e taa nihi a tsui he. Tade nɛ e woɔ ɔ, afukpɔngɔ he womi nɛ a kɛ lo, nɛ lohwe he womi kpa fi e mlɛ mi. E yeɔ baalɛ kɛ nga nɔ hwo. Baalɛ ngɛ kaa tukpɛtukpɛ loo aga. Mɛni munyu nɛ Yohane fiɛɛ? E fiɛɛ ke: “Nyɛ tsake nyɛ tsui, ejakaa hiɔwe matsɛ yemi ɔ su si ta.”​​—Mateo 3:2.

E tue buli ɔmɛ a bua jɔ e sɛ gbi ɔ he. A kpɛti nihi fuu na kaa e sa nɛ a tsake a tsui, nɛ a tsake a je mi bami. Nihi je “Yerusalem, Yudea, kɛ Yordan kpokpa a nɔ” tsuo kɛ ba e ngɔ. (Mateo 3:5) Nihi nɛ a yaa Yohane ngɔ ɔ, a kpɛti nihi fuu tsakeɔ a tsui. E baptisiɔ mɛ ngɛ Yordan pa a mi. Mɛni he je?

E baptisiɔ nihi kɛ tsɔɔ kaa a tsake a tsui ngɛ yayamihi nɛ a pee kɛ si Mawu ɔ he. (Bɔfo Ɔmɛ A Ní Tsumi 19:4) Se pi mɛ tsuo nɛ a he su kɛ ha baptisimi. Benɛ jami hɛ mi nyɛɛli, Farisi bi, kɛ Saduki bi komɛ ba e ngɔ ɔ, Yohane tsɛ mɛ ke “sinɔhi a nina.” E de mɛ ke: “Nyɛɛ pee níhi nɛ tsɔɔ kaa nyɛ tsake nyɛ tsui. Nyɛ ko susu kaa ke nyɛ de kɛkɛ ke nyɛ nɛ̃ ji Abraham ɔ, nɛ tue gblami ko be nyɛ nɔ bae. I ngɛ nyɛ dee ke, Mawu ma nyɛ ngɔ tɛ nɛ ɔmɛ kɛ pee Abraham nina! Amlɔ nɛ ɔ, gbiɛ ɔ fɔɔ si ngɛ tso sipoku ɔmɛ a nɔ momo; tso tsuaa tso nɛ wui yiblii kpakpa a, a maa po, nɛ a ma sake ngɔ fɔ la mi.”​​—Mateo 3:7-10.

Akɛnɛ nihi ngɛ Yohane ngɔ yae, nɛ e sɛ gbi ɔ ngɛ nihi a tsui he tae, nɛ e ngɛ nihi fuu baptisie he je ɔ, ma nimeli ɔmɛ tsɔ osɔfo ɔmɛ kɛ Levi bi ɔmɛ kaa a ya bi lɛ ke: “Mɛnɔ ji mo?”

Yohane de mɛ ke: “Tsa pi imi ji Kristo ɔ.”

A bi lɛ ke, “Mɛnɔ ji mo mɔ? Eliya lo?”

E ha mɛ heto ke: “Tsa pi imi ji Eliya.”

A kpale bi lɛ ke: “Mo ji gbalɔ ɔ lo?” Gbalɔ ngua nɛ Mose gba kaa e maa ba a he munyu nɛ a ngɛ tue ɔ nɛ.​​—5 Mose 18:15, 18.

Yohane he nɔ ke: “Dɛbi!”

Jehanɛ ɔ, a kpale bi lɛ ke: “Lɛɛ mɛnɔ ji mo mɔ? Tsɔɔ wɔ koo! Ejakaa nihi nɛ tsɔ wɔ ɔ, e hia kaa wa ya ha mɛ heto. Kɛ o deɔ ngɛ mo nitsɛ o he kɛɛ?” Yohane he nɔ ke: ‘Imi ji nɔ nɛ ngɛ fiɛɛe ngɛ nga a nɔ ke, “Nyɛ dla blɔ ngɔ to Yehowa,” kaa bɔ nɛ gbalɔ Yesaya de ɔ nɛ.’​​—Yohane 1:19-23.

A bi lɛ ke: ‘Ke pi mo ji Kristo ɔ, nɛ pi mo ji Eliya, nɛ pi mo ji gbalɔ ɔ hulɔ ɔ, lɛɛ mɛni he nɛ o ngɛ nihi baptisie mɔ?’ Yohane he nɔ ke, ‘Imi lɛɛ nyu i kɛ ngɛ nyɛ baptisie; se nɔ ko daa si ngɛ nyɛ kpɛti ngɛ hiɛmɛ nɛ ɔ nɛ nyɛ li lɛ. I sɛ e hlami kɛ ba.’​​—Yohane 1:25-27.

Yohane ma nɔ mi kaa e ngɛ blɔ dlae kɛ gu nihi a juɛmi nɛ e dla a nɔ konɛ ke Mesia nɛ a wo e he si kaa e ma ba pee Matsɛ ɔ ba a, a he lɛ nɛ a ye. Yohane de ngɛ Mesia a he ke: “Lɛɛ e pe mi; e tokota tete po, i sɛ nɔ nɛ hɛɛɔ.” (Mateo 3:11) Yohane ya nɔ nɛ e de ke: “Nɔ ko ma ngɛ ye se; se e pã mi, ejakaa e ngɛ loko i ngɛ.”​​—Yohane 1:15.

Enɛ ɔ he ɔ, e sa saminya kaa Yohane fiɛɛ ke: “Nyɛ tsake nyɛ tsui, ejakaa hiɔwe matsɛ yemi ɔ su si ta.” (Mateo 3:2) E ha nɛ nihi na kaa be su nɛ Yesu Kristo maa je e fiɛɛmi ní tsumi ɔ sisi.