Yesu ya hwɔ Betania Hɔ nɛ ji Nisan ligbi 8. E nɔ jena Hɔgba, Nisan ligbi 9 ɔ, e kɛ e kaseli ɔmɛ kpale kɛ ho Yerusalem ya. Benɛ a ngɛ Oliv Yo ɔ nɔ nɛ e piɛ bɔɔ nɛ a maa su Betfage ɔ, Yesu de e kaseli ɔmɛ a ti ni enyɔ ke:

“Nyɛɛ ya kɔpe nɛ ngɛ nyɛ hɛ mi nɛ ɔ mi. Ke nyɛ su lejɛ ɔ pɛ nyɛ maa na teji yo nɛ a muɔ lɛ si, kɛ e bi. Nyɛɛ pɛne mɛ, nɛ nyɛɛ ngɔ mɛ ba ha mi. Nɛ ke nɔ ko bi nyɛ munyu ko ɔ, nyɛ de lɛ ke, ‘A he hia Nyɔmtsɛ ɔ.’ Kɛkɛ ɔ, e maa ngmɛɛ a he ha nyɛ nɔuu.”​​—Mateo 21:2, 3.

Kaseli ɔmɛ kɔ we se kaa gbami ko he munyu nɛ Yesu ngɛ tue ɔ nɛ. Se pee se ɔ, a nu Zakaria gbami ɔ sisi. E gba kɛ fɔ si kaa Matsɛ nɛ Mawu wo e he si ɔ maa ‘ba e he si, nɛ e maa hi teji okpɔngɔ nɔ; ee, e maa hi teji okpɔngɔ bi nɔ’ kɛ sɛ Yerusalem.​​—Zakaria 9:9.

Benɛ kaseli nɛ Yesu tsɔ mɛ ɔ ya Betfage nɛ a ya ngɛ teji bi ɔ kɛ e nyɛ ɔ pɛnee ɔ, nihi nɛ a ngɛ lejɛ ɔ bi mɛ ke: “Mɛni nyɛ ngɛ pee ɔ? Teji bi ɔ nyɛ ngɛ pɛnee ɔ?” (Marko 11:5) Se benɛ a de mɛ ke Nyɔmtsɛ ɔ lɛ tsɔ mɛ ɔ, a ngmɛɛ a he nɛ a kɛ lohwe ɔmɛ ya ha Yesu. Kaseli ɔmɛ ngɔ a tadehi ngɔ pue teji ɔmɛ a nɔ, nɛ Yesu hi teji bi ɔ nɔ.

Benɛ Yesu hi teji ɔ nɔ kɛ yaa Yerusalem ɔ, nihi babauu ya da blɔ ɔ he. Ni komɛ ngɔ a tadehi kɛ pue blɔ ɔ mi, nɛ ni komɛ hu “po tso kɔnihi kɛ je pu mi” nɛ a kɛ pue blɔ ɔ mi. Nihi nɛ nyɛɛ e hɛ mi, kɛ ni nɛmɛ nɛ nyɛɛ e se ɔ tsuo hwɔ lele ke: ‘Mo kpɔ wɔ! A gbaa nɔ nɛ ma ngɛ Yehowa biɛ mi ɔ! A gbaa wa tsɛ David matsɛ yemi nɛ ma a!’ (Marko 11:8-10) Kɛkɛ nɛ Farisi bi komɛ nɛ a ngɛ ni ɔmɛ a kpɛti ɔ, a mi mi fu, nɛ a de Yesu ke: “Tsɔɔlɔ, ha nɛ o se nyɛɛli ɔmɛ nɛ a pee dii!” Se Yesu he nɔ ke: “I ngɛ nyɛ dee ke, ke ni nɛ ɔmɛ ma a nya a, tɛhi tete ma hwɔ lele.”​​—Luka 19:39, 40.

Benɛ Yesu na Yerusalem ma a, aywilɛho nu lɛ, nɛ e bɔni ya fomi. E de ke: “I ná nɛ mwɔnɛ ɔ ligbi nɛ ɔ, o le níhi nɛ hia mo loko o ma ná tue mi jɔmi! Se a ngɔ laa mo!” A maa gbla Yerusalem tue ngɛ e tue gbomi ɔ he. Yesu de ke: “Be ma nɛ o he nyɛli ɔmɛ ma sa o yi kɛ kpe; a maa tsi blɔhi tsuo ngɛ ma a mi, nɛ a ma tua mo kɛ je he slɔɔtohi. A ma kpata o hɛ mi pɛsɛpɛsɛ, nɛ nihi nɛ ngɛ ma a mi hu a maa gbe mɛ tsuo; a be tɛ kake po sie ngɛ e blɔ he.” (Luka 19:42-44) Nɔ́ nɛ Yesu de ɔ ba mi niinɛ, ejakaa a kpata Yerusalem hɛ mi ngɛ jeha 70 ɔ mi.

Benɛ Yesu sɛ Yerusalem ma a mi ɔ, ‘ma a tsuo hwɔ hoo, nɛ a bi ke: “Mɛnɔ ji nɛ ɔ?”’ Kɛkɛ nɛ ma kpekpemi ɔ he nɔ ke: ‘Nɔ nɛ ɔ ji gbalɔ Yesu nɛ je Nazaret ngɛ Galilea a nɛ!’ (Mateo 21:10, 11) Nihi nɛ a ngɛ lejɛ ɔ benɛ Yesu tle Lazaro si kɛ je gbeje ɔ ye nɔ́ nɛ a na a he odase. E dɔ Farisi bi ɔmɛ kaa nihi ngɛ Yesu se nyɛɛe, nɛ a nyɛ we nɛ a tsi a nya. Enɛ ɔ he ɔ, a de a sibi ke: “Je ɔ tsuo nɛ hia kɛ nyɛɛ e se ɔ nɛ.”​​—Yohane 12:18, 19.

Yesu ya sɔlemi we ɔ konɛ e ya tsɔɔ ní kaa bɔ nɛ e pɔɔ peemi ke e ya Yerusalem ɔ. E tsa hɛ yuyuili kɛ glɔtsɛmɛ ngɛ lejɛ ɔ. Osɔfo nikɔtɔma amɛ na nɛ jokuɛwi ngɛ lele hwɔe nɛ a ngɛ dee ke, “A je David Bi ɔ yi!” A mi mi fu, nɛ a bi Yesu ke: “Nɔ́ nɛ ni ɔmɛ ngɛ dee ɔ, o ngɛ nue?” Kɛkɛ nɛ Yesu he nɔ ke: “Ee, i ngɛ nue! Anɛ nyɛ kane we ngmami nɛ ɔ hyɛ lo? Ngmami ɔ ke, ‘O dla bimwɔwi, kɛ nyɔ nya bimɛ kɛ to konɛ a la la ngɔngɔɛ kɛ je o yi.’”​​—Mateo 21:15, 16.

Yesu hyɛ sɔlemi we ɔ mi tsuo kɛ kpe, se akɛnɛ je ngɛ jɔe he je ɔ, e kɛ e bɔfo ɔmɛ kpale kɛ ho Betania ya. A je Yerusalem loko Hɔgba, Nisan ligbi 10 je sisi, nɛ a ya hwɔ Betania jamɛ a gbɔkuɛ ɔ.