Ni komɛ ngɛ nɛ ke a pee nɔ́ yaya ko nɛ a na e mi nɔ́ ɔ, a kase we nɔ́ ko kɛ ji mi. Jinɛ jã nɛ i ngɛ. A fɔ mi ngɛ Spain ma ngua ko nɛ a tsɛɛ ke Barcelona a mi, nɛ lejɛ ɔ nɛ i hi kɛ wa. Ye weku ɔ hi wo nya ma ko nɛ a tsɛɛ ke Somorrostro. Juli kpanakuhi kɛ nihi nɛ a kɛ tsopa yayahi tsuɔ ní ngɛ lejɛ ɔ wawɛɛ.

 Ye fɔli ɔmɛ fɔ bimɛ nɛɛ, nɛ imi ji a bitɛte. Akɛnɛ ohiatsɛmɛ ji wɔ he je ɔ, ye papaa ha nɛ i ya tsu ní ngɛ he ko nɛ a fiaa tennis bɔɔlu ngɛ. Nɔ́ nɛ i tsuɔ ji kaa ke a fia bɔɔlu ɔ nɛ e ya nɔ he ko tsitsaa a, i ya woɔ kɛ baa. Jamɛ a be ɔ mi ɔ, i ye jeha nyɔngma, nɛ i tsuɔ ní ngmlɛfia nyɔngma daa ligbi. Enɛ ɔ he ɔ, i nyɛ we nɛ ma ya sukuu kaa ye juami bi ɔmɛ. Benɛ i ye jeha 14 ɔ, i bɔni ní tsumi ngɛ he ko nɛ a tsuɔ dade he ní ngɛ.

 Jamɛ a be ɔ mi ɔ, ke nɔ ko sɛ nihe mi ɔ, Spain mlaa a tsɔɔ kaa e sa nɛ e ya soja nɛ e sɔmɔ ma a, enɛ ɔ he ɔ, ngɛ jeha 1975 ɔ mi ɔ, i ya soja. Imi nitsɛ hu ye bua jɔ he kaa maa pee nyumuhi a ní, lɔ ɔ he ɔ, i ya piɛɛ Spain sojahi nɛ a ngɛ Melilla nɛ ji Spain bi a ma ko nɛ ngɛ Afrika yiti je ɔ he. Jamɛ a be ɔ mi ɔ, i kɛ tsopa yayahi bɔni ní tsumi nɛ i fiaa nyu wawɛɛ.

 Benɛ i je soja ní tsumi ɔ mi ɔ, i kpale kɛ ya Barcelona nɛ i ya to juli a kuu ko sisi. Lɛɛ jã wa nɛ nɔ́ ko kɛ wa hɛ ngmɛ, wa maa ju nɛ wa ma ya jua konɛ wa ná sika kɛ ya he tsopa yaya amɛ. I bɔni tsopa yaya ko nɛ a tsɛɛ ke LSD kɛ amphetamine numi, nɛ ajuama bɔmi, dã kɛ asɔ fiɛmi hu ba pee kaa niye ní nɛ i yeɔ daa ligbi. Si himi yaya nɛ ɔ ha nɛ i ba pee nɔ ko nɛ e hɛ mi jɔɛ kulaa. Be fɛɛ be ɔ, i hɛɛ ha, gbiɛ, aloo klaate ngɛ ye he, nɛ i yi gbeye kaa ma ngɔ ní nɛ ɔmɛ eko kɛ ye nɔ ko awi ke e he ba hia.

 Ligbi ko ɔ, i kɛ ye we bi ɔmɛ ya ju nɔ ko lɔle, nɛ polisi ɔmɛ fie wa se. Ke o na wɔ ɔ, e maa pee mo kaa sini nɛ o ngɛ hyɛe. A nyɛɛ wa se maa pee kilomita 30 kɛkɛ nɛ a bɔni wɔ tu fiaami. Nyagbenyagbe ɔ, wa ngɔ wa lɔle ɔ kɛ ya si nɔ́, nɛ wɔ tsuo wa tu fo. Benɛ ye papaa nu he ɔ, e fie mi kɛ je we ɔ mi.

 Jeha enuɔ sɔuu nɛ i be we nɛ i hwɔɔ mi. I hwɔɔ nihi a tsu nya, nihi a lɔle mi, bɛntsihi a nɔ, kɛ gɔ mi. Be ko po ɔ, i hwɔ tɛ puɔ ko mi saii. I na kaa se nami ko be ye he, nɛ ke i gbo po ɔ, e hi. I kai kaa ligbi ko nɛ i nu tsopa yaya a, i ngɔ ha kɛ poopoo ye ninehi a he tsuo, nɛ pa doku ɔmɛ ngɛ ye ninehi a he kɛ ba si piɔ.

 Benɛ i ye jeha 28 ɔ, ye mami ba hla ye se blɔ, nɛ e de mi ke ma kpale kɛ ba we mi. I kplɛɛ, nɛ i wo lɛ si kaa ma ngmɛɛ ye je mi bami yayami ɔ he. Se be pue mi loko i nyɛ ye si nɛ i wo lɛ ɔ nɔ.

 Ligbi ko piani ɔ, Yehowa Odasefohi enyɔ ba si wa sinya. Benɛ i bli sinya a nɛ i ngɛ mɛ tue bue ɔ, ye papaa kpa ngmlaa kɛ je tsu ɔ mi nɛ e de mi ke ma nga sinya a nɛ ma je a he. Se akɛnɛ i sume nɛ nɔ ko nɛ tsɔɔ mi nɔ́ nɛ ma pee he je ɔ, i pui e nya mi. A de mi ke a suɔ nɛ a ha mi womi nyafii etɛ komɛ, nɛ i kplɛɛ. I ha nɛ a tsɔɔ mi he nɛ a kpeɔ ngɛ, nɛ ligbi bɔɔ se ɔ, i ya Matsɛ Yemi Asa a nɔ.

 Nɔ́ nɛ i to he hɛ kekleekle ji kaa nɔ fɛɛ nɔ dla e he saminya. Se imi lɛɛ ye yi bwɔmi ka gagaa, ye kpɛni hɛ vujaa, nɛ bɔ nɛ i dla ye he ɔ hu be hɛ ngmɛ nɔ. Enɛ ɔ he ɔ, i tlɔ kpo ɔ nɔ. Se si kake too ɔ, ye hɛ ngmɛ gba nɔ ko nɔ ngɛ tsu ɔ mi. A tsɛɛ lɛ ke Juan. Be ko nɛ be ɔ, e piɛɛ ye kuu ɔ he. E dla e he saminya. Pee se ɔ, i ba ná le kaa jeha nɛ be ɔ pɛ nɛ e ba plɛ Yehowa Odasefo no. Benɛ i na lɛ ngɛ Matsɛ Yemi Asa a nɔ pɛ nɛ i ba ná kã ko, nɛ i sɛ tsu ɔ mi. Kɛ je jamɛ a ligbi ɔ, i na kaa ye si himi bɔni tsakemi.

 I kplɛɛ kaa a kɛ mi nɛ kase Baiblo ɔ. I ba yɔse hu kaa ke i suɔ nɛ Mawu bua nɛ jɔ ye he ɔ, lɛɛ e sa nɛ ye hɛ mi nɛ jɔ nɛ ma ngmɛɛ ye je mi bami yaya a he. Tsakemi nɛ ɔmɛ a peemi be gbɔjɔɔ kulaa. I ba kase hu kaa loko Yehowa Mawu bua maa jɔ ye he ɔ, ja i ‘tsake kɛ gu ye juɛmi nɛ ma hi tsakee ɔ nɔ.’ (Roma Bi 12:2) Mɔbɔ nɛ Mawu na mi ɔ ta ye tsui he wawɛɛ. Ngɛ yayamihi nɛ i pee ɔ tsuo se ɔ, i ba na kaa e ha mi he blɔ konɛ ma tsake ye si himi. Ye bua jɔ níhi nɛ i kase ngɛ Yehowa he ɔ a he. I ba na kaa Bɔlɔ ko ngɛ nɛ e susuɔ ye he.​—1 Petro 5:6, 7.

 Níhi nɛ i kase ɔ wo mi he wami nɛ i pee tsakemihi ngɛ ye si himi mi. Kaa nɔ hyɛmi nɔ́ ɔ, benɛ ye Baiblo tsɔɔlɔ ɔ kɛ mi bɔni ní kasemi ngɛ taba numi he ɔ, i bi ye he ke, ‘Ke Yehowa Mawu suɔ nɛ ye he nɛ tsɔ ngɛ nɔ́ fɛɛ nɔ́ mi ɔ, lɛɛ e sa nɛ ma kpa sigaleti numi!’ (2 Korinto Bi 7:1) Kɛkɛ nɛ i mwɔɔ sigaletihi tsuo nɛ ngɛ ye dɛ ɔ kɛ wo dwɔmi nɔ́ ɔ mi!

 Jehanɛ hu ɔ, e he ba hia nɛ ma kpa tsopa yaya kɛ ní tsumi, nɛ ma kpa juami hulɔ. Se e he be saii, nɛ i bɔ mɔde wawɛɛ loko i nyɛ pee jã. I le kaa loko ma nyɛ ma pee tsakemi nɛ ɔmɛ ɔ, ja i kɛ nihi nɛ i kɛ mɛ bɔɔ sa a kpa bɔmi. A yi bua mi nɛ ma ya ye hɛ mi mlamlaamla ngɛ tsakemihi nɛ i ngɛ pee ɔ mi. Lɔ ɔ he ɔ, i kɛ ye hɛ fɔ Mawu nɔ wawɛɛ, nɛ gahi nɛ huɛmɛ ehehi nɛ i ba ná ngɛ asafo ɔ mi ɔ woɔ mi ɔ hu, i kɛ tsuɔ ní. Bɔ nɛ a suɔ mi ha, nɛ a susuɔ ye he ɔ, i nɛ eko hyɛ. Nyɔhiɔ bɔɔ komɛ a se ɔ, i kɛ tsopa yaya tsu we ní hu, nɛ i ba “wo su ehe ɔ” konɛ Mawu bua nɛ jɔ ye he. (Efeso Bi 4:24) Ngɛ August 1985 ɔ mi ɔ, i ha nɛ a baptisi mi kaa Yehowa Odasefo no.

 Baiblo ɔ nɛ i kase ɔ ha nɛ ye si himi ba pee kpakpa. E ha nɛ i ye ye he ngɛ je mi bami yaya nɛ ngɛ ye nɔmlɔ tso ɔ awi yee ɔ he, nɛ amlɔ nɛ ɔ, nihi buɔ mi wawɛɛ. Ngɛ anɔkuale mi ɔ, nihi nɛ i kɛ mɛ bɔ be ko nɛ be ɔ, AIDS kɛ tsopa yaya gbe a kpɛti nihi nɛ hiɛ pe 30 ngɛ a nihe mi. Ye bua jɔ wawɛɛ kaa amlɔ nɛ ɔ, i kɛ Baiblo sisi tomi mlaahi ngɛ ní tsue, ke pi jã a, jinɛ be nɛ ɔ mi ɔ, imi hu i gbo.

 Amlɔ nɛ ɔ, ye hɛ mi jɔ, nɛ i pee we basabasa. I hɛɛ we hahi kɛ gbiɛhi ngɛ ye he hu. I susuu we gblee kaa be ko maa su nɛ ma hɛɛ Baiblo kaa i kɛ ngɛ nihi ye buae. Mwɔnɛ ɔ, i kɛ ye yo ɔ ngɛ sɔmɔe kaa daa blɔ gbali.

 E ngɛ mi kaa ye fɔli ba pee we Yehowa Odasefohi mohu lɛɛ, se a bua jɔ bɔ nɛ Baiblo ɔ ye bua mi ha a he. Ye papaa po, be ko nɛ e huɛmɛ ngɛ Odasefohi a he munyu yaya tue ɔ, e fã a he. E ba na heii kaa anɔkuale ɔ nɛ i kase ɔ ye bua mi wawɛɛ. Behi fuu ɔ, ye mami deɔ ke e sa nɛ i ko kase Baiblo ɔ mla. Ee, e sa nɛ i ko kase Baiblo ɔ mla!

 Níhi a si kpami nɛ i ná ngɛ ye si himi mi ɔ ha nɛ i na kaa juɛmi be mi kaa nɔ ko maa nu tsopa yaya aloo e maa pee ní yaya kpa komɛ kɛ susumi ɔ kaa ní nɛ ɔmɛ ma ha lɛ bua jɔmi. Amlɔ nɛ ɔ, Mawu Munyu ɔ nɛ i tsɔɔ nihi ɔ ji nɔ́ nɛ haa mi bua jɔmi nitsɛnitsɛ. Ejakaa lɔ ɔ nɛ he ye yi wami.