A fɔ mi ngɛ San Juan Chancalaito, nɛ ji ma nyafii ko ngɛ Chiapas ngɛ Mexico. Maya no ji mi, nɛ i je Chol wɛtso ɔ mi. A fɔ wɔ nihi 12, nɛ imi ji bi enuɔne. Benɛ i wɛ ɔ, Yehowa Odasefo ɔmɛ kɛ wɔ kase Baiblo ɔ. Mɔbɔ sane ji kaa benɛ i ngɛ wae ɔ, i kɛ níhi nɛ i kase ɔ tsu we ní.

 Benɛ i ye jeha 13 ɔ, i kɛ tsopa yaya bɔni ní tsumi, nɛ i juɔ hulɔ. I hia kɛ je we mi, nɛ i plɛ pee ma mi kpami gbe. Benɛ i ye jeha 16, i bɔni ní tsumi ngɛ wii ngmɔ ko mi. I tsu ní ngɛ lejɛ ɔ maa pee jeha kake. Ligbi ko nyɔ mi nɛ waa kɛ wii fuu ngɛ pa ko poe ɔ, si kake too ɔ, ni komɛ nɛ mɛ hu a juaa tsopa yaya nɛ ɔ kɛ tuhi ba tua wɔ. Benɛ a bɔni wɔ tu fiaami ɔ, i tu kɛ sɛ nyu ɔ mi nɛ i sle kɛ ya si benɛ i ya nu kpo. Lɔ ɔ se ɔ, i tu fo kɛ ho United States ya.

 Benɛ i ya United States ɔ, i ya tsa tsopa yaya juami ní tsumi ɔ nɔ. Ní tsumi nɛ ɔ ngɔ mi kɛ wo sane mi si abɔ. Benɛ i ye jeha 19 ɔ, a nu mi, nɛ a bu mi fɔ ngɛ kojomi he kaa julɔ kɛ nɔ ko nɛ e ka nɔmlɔ gbemi. Enɛ ɔ ha nɛ a wo mi tsu. Benɛ i ngɛ tsu womi he ɔ, i ya piɛɛ kuu ko he, nɛ wa ngɔ wa he kɛ wo basabasa peemi mi. Enɛ ɔ he ɔ, a je mi kɛ ho tsu womi he ko nɛ pã kekle nɔ́ ɔ ya ngɛ Lewisburg ngɛ Pennsylvania.

 Benɛ i ya Lewisburg tsu womi he ɔ, ye je mi bami ya puɛ kulaa mohu. I ngmaangmaa ye he kɛ awi yeli a kuu ko okadi, enɛ ɔ he ɔ, benɛ i ya tsu womi he nɛ ɔ, e yi ha mi kaa ma ya piɛɛ jamɛ a kuu ɔ mi bi kpahi a he ngɛ lejɛ ɔ. I peeɔ basabasa, nɛ be fɛɛ be ɔ, i nɔɔ kunɔ. Ligbi ko ɔ, wa kuu ɔ kɛ kuu kpa ko nɔ kunɔ ngɛ tsu womi he ɔ. Kunɔ ɔ mi wa wawɛɛ. Waa kɛ tsokpotihi kɛ dadehi fiaa wa sibi. Buli nɛ a hyɛɛ wa nɔ ɔ fia tear gas kɛ wo wa kpɛti konɛ wa kpa kunɔ ɔ nɔmi. Lɔ ɔ se ɔ, nikɔtɔma amɛ nɛ a ngɛ lejɛ ɔ ha nɛ a ngɔ mi kɛ ya wo tsu ko nɛ a ngɔɔ nihi nɛ a hɛ mi jɔɛ kɛ ya woɔ mi ɔ eko mi. Ye tsui gbaa ye nya wawɛɛ, nɛ ye nya mi munyu hí. E yi ha mi kulaa kaa ma kongo nihi. Ke i ngɛ ní nɛ ɔmɛ pee ɔ, ye bua jɔɔ wawɛɛ, nɛ e hɛwi mi.

 He nɛ a kɛ mi ya wo ngɛ tsu womi he ɔ jehanɛ ɔ, imi pɛ nɛ i ngɛ lejɛ ɔ. Lɔ ɔ he ɔ, i bɔni Baiblo ɔ kanemi konɛ ma kɛ je ye juɛmi ngɛ be nɛ e piɛ ha mi ngɛ lejɛ ɔ nɔ. Be ko ɔ, buli nɛ a hyɛɛ wa nɔ ɔ a kpɛti nɔ kake ba ha mi You Can Live Forever in Paradise on Earth womi ɔ eko. a Benɛ i ngɛ womi nɛ ɔ kanee ɔ, i kai níhi nɛ i kase ngɛ ye jokuɛ mi benɛ Odasefo ɔmɛ kɛ mi ngɛ Baiblo ɔ kasee ɔ. I ba susu bɔ nɛ ye je mi bami ha nɛ ye si himi pee basaa ha a he. I susu ye weku ɔ hu he. Akɛnɛ ye nyɛmiyihi enyɔ ba plɛ Yehowa Odasefohi he je ɔ, i de ye he ke, ‘A maa hi si kɛ ya neneene.’ Kɛkɛ nɛ i bi ye he ke, ‘Imi lɛɛ mɛni tsiɔ mi blɔ?’ Jamɛ a be ɔ mi nɔuu nɛ i ma ye juɛmi nya si kaa ma pee tsakemi.

 Se kɛ̃ ɔ, i le kaa ja nɔ ko ye bua mi loko ma nyɛ ma tsake ye je mi bami. Enɛ ɔ ha nɛ i sɛ hlami nɛ i sɔle kɛ kpa Yehowa pɛɛ kaa e ye bua mi. Lɔ ɔ se ɔ, i ngma sɛ womi kɛ ya ha Yehowa Odasefohi a ní tsumi kɔni nɛ ngɛ United States ɔ kaa i suɔ nɛ a kɛ mi nɛ ba kase Baiblo ɔ. Asafo ɔ ní tsumi kɔni ɔ to blɔ nya konɛ Odasefo no ko nɛ e ngɛ asafo nɛ kɛ he nɛ i ngɛ ɔ kɛ we ɔ mi ɔ kɛ mi nɛ ba kase Baiblo ɔ. Jamɛ a be ɔ mi ɔ, a ha we nɛ nɔ ko nɛ e pi ye weku no nɛ ba slaa mi, lɔ ɔ he ɔ, Odasefo no ɔ ngmaa mi sɛ womi kɛ woɔ mi he wami, nɛ e maneɔ mi Baiblo kasemi womihi. Enɛ ɔ wo mi he wami wawɛɛ, nɛ i na kaa ma nyɛ ma tsake ye je mi bami.

I ba mwɔ y e yi mi kpɔ kaa ma je awi yeli a kuu nɛ i hi mi jeha babauu ɔ mi. Enɛ ɔ ji tsakemi ngua ko nɛ i pee ngɛ ye si himi mi. Wa kuu ɔ nya dalɔ ɔ hu ngɛ tsu womi he ɔ, he nɛ a kɛ nihi nɛ a hɛ mi jɔɛ ɔ woɔ ɔ. Lɔ ɔ he ɔ, ligbi ko ɔ, i de lɛ ke i suɔ nɛ ma pee Yehowa Odasefo no. Heto nɛ e ha mi ɔ pee mi nyakpɛ. E de mi ke: “Ke o suɔ niinɛ ɔ, lɛɛ moo ya. I be nyɛe ma tsi o nya kaa o ko ja Mawu. Se ke kuu ɔ mi nɛ o ngɛ hlae maa je kɛkɛ ɔ, i he ye kaa o le nyagbahi nɛ o kɛ maa kpe.”

 Jeha enyɔ se ɔ, nihi nɛ a hyɛɛ wa nɔ ɔ to he hɛ kaa ye je mi bami tsake. Lɔ ɔ he ɔ, jehanɛ ɔ, a ha mi mumi womi he bɔɔ. Kaa nɔ hyɛmi nɔ́ ɔ, ke i yaa du ɔ, a wui mi hakɔfu hu. Bulɔ ko ba wo mi he wami kaa ma ya nɔ ngɛ tsakemi nɛ i ngɛ pee ɔ mi. Benɛ e piɛ jeha kake nɛ a ma je mi ngɛ he nɛ i ngɛ ɔ, nikɔtɔma amɛ nɛ a ngɛ tsu womi he ɔ ha nɛ a kɛ mi ya he ko nɛ jɔ bɔɔ pe he nɛ i ngɛ kekle ɔ. Lejɛ ɔ kɛ tsu womi he ɔ nitsɛ kɛ we tsɔ. Benɛ i ye jeha nyɔngma ngɛ tsu womi he ɔ nɛ a je mi ngɛ jeha 2004 ɔ mi ɔ, a kpale mi kɛ ho Mexico ya.

 Benɛ i ya Mexico ɔ, e kɛ we nɛ i ya na Yehowa Odasefohi a Matsɛ Yemi Asa ko. Kekleekle ligbi nɛ i ya asafo mi kpe ɔ, i wo tade nɛ wa woɔ ngɛ tsu womi he ɔ kɛ ya ejakaa lɔ ɔ pɛ ji tade nɛ sa nɛ i ngɛ. Ngɛ bɔ nɛ i dla ye he ha tsuo se ɔ, Odasefo ɔmɛ kɛ bua jɔmi nya ye he. Mi mi jɔmi kpo nɛ a je kɛ tsɔɔ mi ɔ ha nɛ i na kaa i ba anɔkuale Kristofohi a kpɛti. (Yohane 13:35) Jamɛ a ligbi ɔ, asafo mi nikɔtɔma amɛ to blɔ nya konɛ nɔ ko kɛ mi nɛ ba hi Baiblo ɔ kasee. Jeha kake se ngɛ September 3, 2005 ɔ nɔ ɔ, a baptisi mi kaa Yehowa Odasefo no.

 Ngɛ January 2007 ɔ mi ɔ, i je be tsuo sɔmɔmi ní tsumi ɔ sisi nɛ i kɛ ngmlɛfia 70 fiɛɛɔ daa nyɔhiɔ, nɛ i tsɔɔ nihi Baiblo ɔ. Ngɛ jeha 2011 ɔ mi ɔ, i ná he blɔ kɛ ya Baiblo Sukuu Kɛ Ha Nyumuhi Nɛ A Sɛ We Gba Si Himi Mi ɔ eko (amlɔ nɛ ɔ, a tsɛɛ sukuu nɛ ɔ ke Sukuu Kɛ Ha Matsɛ Yemi Sane Kpakpa Fiɛɛli). Sukuu nɛ ɔ ye bua mi wawɛɛ, nɛ i nyɛɔ tsuɔ ní tsumihi nɛ a kɛ wo ye dɛ ngɛ asafo ɔ mi ɔ saminya.

 Ngɛ jeha 2013 ɔ mi ɔ, i kɛ Pilar sɛ gba si himi mi. E kɛ peeɔ plasee kaa e he we níhi nɛ i de lɛ ngɛ ye he ɔ yi. I kpale we kɛ yɛ ye sa je mi bami ɔ he hu. Bɔ nɛ ye si himi ba plɛ ha mwɔnɛ ɔ ha nɛ i kɛ ye yo ɔ tsuo ná nɔ mi mami kaa niinɛ, Baiblo ɔ nyɛɔ tsakeɔ nɔ si himi.​—Roma Bi 12:2.

 I na kaa Yesu munyu nɛ ngɛ Luka 19:10 kɔɔ ye he. Yesu de ngɛ lejɛ ɔ ke: ‘I ba konɛ ma ba hla nɔ́ nɛ e laa a nɛ ma he e yi wami.’ Amlɔ nɛ ɔ, e pee we mi hu kaa i ji nɔ ko nɛ e laa, nɛ i yi nihi awi hu. Baiblo ɔ ye bua mi nɛ amlɔ nɛ ɔ, i ngɛ bua jɔmi nitsɛnitsɛ ngɛ si himi mi, tue mi jɔmi ngɛ i kɛ nihi a kpɛti, nɛ nɔ́ nɛ pe kulaa a, huɛ bɔmi kpakpa ngɛ i kɛ Yehowa nɛ ji ye Bɔlɔ ɔ wa kpɛti.