Stel jou hierdie toneel voor: David ry in ’n gebied waar niks bekend lyk nie. Die padtekens en bakens wys dat hy nie is waar hy moet wees nie. David besef dat hy verdwaal het. Hy moes iewers langs die pad by die verkeerde straat afgedraai het.

Wat sou jy doen as jy David was?

Jy het verskeie opsies:

1. Vra vir hulp.

2. Gebruik ’n kaart of ’n GPS.

3. Hou aan ry en hoop dat jy op die een of ander manier die plek sal vind.

Opsie C is natuurlik die ondoeltreffendste.

Opsie B het ’n voordeel bo die eerste. Jy kan immers ’n kaart of GPS gedurende jou reis by jou hou, en dit kan help om jou te lei.

Die Bybel kan jou op ’n soortgelyke manier help!

Hierdie topverkoper kan

• jou deur die lewe se probleme help

• jou help om jouself beter te leer ken en ’n beter persoon te word

• jou wys hoe om die beste lewe moontlik te hê

Van die oomblik dat ons kan praat, vra ons vrae.

• Waarom is die lug blou?

• Waarvan is die sterre gemaak?

Later begin ons vrae vra oor die wêreld om ons.

• Waarom gebeur slegte dinge?

• Waarom sterf mense?

Sê nou die antwoorde op hierdie vrae was nog altyd in die Bybel?

Baie mense sê dat die Bybel vol mites en legendes is, dat dit verouderd is of dat dit eenvoudig te moeilik is om te verstaan. Maar is die Bybel werklik die probleem of is dit eerder wat mense oor die Bybel gehoor het? Is hulle dalk verkeerd ingelig?

Byvoorbeeld, mense dink dat die Bybel sê dat God in beheer van die wêreld is. Maar hoe kan dit wees? Hierdie wêreld is buite beheer! Dit word geteister deur pyn en lyding, siekte en die dood, armoede en rampe. Hoe kan ’n liefdevolle God hiervoor verantwoordelik wees?

Wil jy graag weet wat die antwoord is? Wat die Bybel sê oor wie in beheer van die wêreld is, sal jou dalk verbaas!

Jy het waarskynlik opgemerk dat die raad in hierdie brosjure op die Bybel gebaseer is. Jehovah se Getuies is oortuig daarvan dat die Bybel ’n betroubare bron van leiding is. Dit is omdat dit “deur God geïnspireer [is] en . . . nuttig [is] om te onderrig, om tereg te wys, om dinge reg te stel” (2 Timoteus 3:16, 17). Jy is dit aan jouself verskuldig om hierdie ou—maar moderne—boek te ondersoek!