WAT verwag Jehovah van diegene wat hom op ’n aanneemlike wyse wil aanbid? Vereis hy volmaaktheid, wat dit onmoontlik vir onvolmaakte mense sal maak om hom te behaag? Of verwag hy slegs wat binne ons bereik is? Die antwoorde op hierdie vrae is noodsaaklik as ons vreugde uit ons diens aan God wil put. Kom ons ondersoek hoe die profeet Miga God se vereistes opgesom het.—Lees Miga 6:8.

‘Hy het jou vertel wat goed is.’ Ons hoef nie te raai wat God van ons verwag nie. Hy het vir ons gesê wat sy vereistes is deur dit duidelik in die Bybel uiteen te sit. Wat God van ons verwag, ‘is goed’. Dit kan nie anders wees nie. “God is liefde”, en daarom dra hy ons belange op die hart (1 Johannes 4:8; 5:3). As ons sy vereistes nakom, behaag dit hom nie net nie, maar strek dit ons ook tot voordeel.—Deuteronomium 10:12, 13.

‘Wat vra Jehovah van jou terug?’ Het God die reg om enigiets van ons terug te vra? Natuurlik het hy! Ons is gehoorsaamheid aan hom verskuldig omdat hy die Bron en Onderhouer van die lewe is (Psalm 36:9). Maar wat vra hy van ons terug? Miga som God se vereistes in drie frases op. Die eerste twee het hoofsaaklik te doen met ons handelinge met ons medemens, en die derde het te doen met ons verhouding met God.

‘Beoefen geregtigheid.’ Volgens een naslaanwerk verwys die Hebreeuse woord vir “geregtigheid” na “billike en regverdige verhoudings in die gemeenskap”. God verwag dat ons ander behandel in ooreenstemming met wat billik en regverdig is volgens sy standaarde. Ons beoefen geregtigheid deur ander met onpartydigheid, opregtheid en eerlikheid te behandel (Levitikus 19:15; Jesaja 1:17; Hebreërs 13:18). Wanneer ons ander regverdig behandel, sal dit hulle moontlik beweeg om ons ook regverdig te behandel.—Matteus 7:12.

‘Om goedhartigheid lief te hê.’ God verwag nie bloot dat ons goedhartigheid moet betoon nie, maar dat ons dit moet liefhê. Die Hebreeuse woord wat as “goedhartigheid” (cheʹsedh) vertaal word, kan ook as “liefderyke goedhartigheid” of “lojale liefde” vertaal word. Een Bybelgeleerde sê: “Liefde, barmhartigheid en goedhartigheid is onvoldoende vertalings van [cheʹsedh]; dit is nie een van hierdie deugde nie, maar hulle almal saam.” As ons goedhartigheid liefhet, betoon ons dit gewilliglik; dit verskaf ons vreugde om behoeftiges te help. Gevolglik smaak ons die geluk wat dit verskaf om te gee.—Handelinge 20:35.

‘Om beskeie te wandel met jou God.’ Die frase “om te wandel” in die Bybel beteken “om ’n sekere handelswyse te volg”. Ons wandel met God deur die lewensweg te volg wat hy in die Bybel uiteengesit het. Ons moet “beskeie” wees om so ’n weg na te streef. Hoe so? Wanneer ons beskeie is voor God, het ons ’n realistiese beskouing van ons posisie voor hom en erken ons ons beperkings. “Om beskeie te wandel met” beteken dus dat ons ’n realistiese beskouing het van wat hy van ons vereis en van wat ons kan gee.

Gelukkig vereis Jehovah nooit meer van ons as wat ons kan gee nie. Hy is tevrede met ons beste pogings in sy diens (Kolossense 3:23). Hy verstaan ons beperkings (Psalm 103:14). Wanneer ons ook leer om dit met gepaste beskeidenheid te aanvaar, kan ons vreugde daaruit put om met hom te wandel. Vind gerus uit hoe jy met God kan begin wandel. Hy sal jou ryklik seën as jy so ’n weg volg.—Spreuke 10:22.