Korrupsie in regerings verwys na die misbruik van openbare mag vir persoonlike gewin. Hierdie misbruik van mag het ’n lang geskiedenis. In die Bybel is daar byvoorbeeld ’n wet teen omkopery in regterlike sake. Dit toon dat die gebruik reeds 3 500 jaar gelede algemeen was (Eksodus 23:8). Maar korrupsie behels natuurlik meer as om bloot omkoopgeskenke te aanvaar. Soms steel korrupte staatsamptenare goedere of geld of maak hulle gebruik van dienste waarop hulle nie geregtig is nie. Hulle misbruik dalk ook hulle posisie om hulle familie en vriende te bevoordeel.

Hoewel daar in enige menslike organisasie korrupsie kan wees, kom dit blykbaar die meeste in regerings voor. Volgens die Global Corruption Barometer vir 2013, wat deur Transparency International uitgegee word, dink mense regoor die wêreld dat die vyf korrupste instansies politieke partye, die polisie, die staat, die wetgewer en die howe is. Kyk na ’n paar verslae wat toon hoe wydverspreid die probleem is.

• AFRIKA: In 2013 is sowat 22 000 staatsamptenare in Suid-Afrika van wangedrag aangekla omdat hulle by korrupsie betrokke was.

• DIE AMERIKAS: In 2012 is 25 mense in Brasilië daaraan skuldig bevind dat hulle openbare fondse gebruik het om politieke steun te koop. Een van die skuldiges was die voormalige president se stafhoof, die tweede magtigste persoon in die land.

• ASIË: In Seoel, Suid-Korea, het 502 mense in 1995 gesterf toe ’n afdelingswinkel ineengestort het. Ondersoekbeamptes het uitgevind dat kontrakteurs stadsamptenare omgekoop het sodat hulle beton van minderwaardige gehalte kon gebruik en veiligheidsmaatreëls kon skend.

• EUROPA: “Die omvang van die probleem [korrupsie in Europa] is verstommend”, sê Cecilia Malmström, Kommissaris van Binnelandse Sake vir die Europese Kommissie. Sy het bygevoeg dat “die politici blykbaar nie vasbeslote is om korrupsie uit te roei nie”.

Korrupsie in regerings het diep wortels. Professor Susan Rose-Ackerman, ’n deskundige op die gebied van antikorrupsie, het geskryf dat “regerings die manier waarop hulle sake doen, heeltemal moet verander” as hulle korrupsie wil uitwis. Hoewel die situasie hopeloos lyk, toon die Bybel dat selfs groter veranderinge nie net moontlik is nie, maar beslis sal plaasvind.