Ons is ’n internasionale organisasie wat geen verbintenis met ander godsdiensgroepe het nie. Hoewel ons wêreldhoofkwartier in die Verenigde State is, woon die oorgrote meerderheid van Jehovah se Getuies in ander lande. Trouens, ongeveer agtmiljoen Getuies leer mense die Bybel in meer as 230 lande. Ons doen dit uit gehoorsaamheid aan Jesus se woorde: “Hierdie goeie nuus van die koninkryk sal in die hele bewoonde aarde verkondig word as ’n getuienis vir al die nasies.”—Matteus 24:14.

Ons is baie wetsgehoorsaam, ongeag waar ons woon. Maar ons probeer hard om polities neutraal te bly. Ons doen dit omdat ons Jesus se opdrag aan Christene gehoorsaam om “geen deel van die wêreld” te wees nie. Daarom raak ons nie by politieke geskille of bedrywighede betrokke nie en ondersteun ons nie oorlog nie (Johannes 15:19; 17:16). Trouens, gedurende die Tweede Wêreldoorlog is Jehovah se Getuies in die tronk gegooi, gemartel en selfs doodgemaak omdat hulle nie hulle neutraliteit wou prysgee nie. ’n Voormalige Duitse biskop het geskryf: “Hulle kan tereg daarop aanspraak maak dat hulle die enigste groep gewetensbeswaardes in die Derde Ryk was.”

Nogtans sonder ons ons nie af nie. Jesus het aangaande sy volgelinge gebid: “Ek versoek u nie om hulle uit die wêreld weg te neem nie” (Johannes 17:15). Daarom sien jy dalk hoe ons, as deel van die plaaslike gemeenskap, werk toe gaan, inkopies doen en skool toe gaan.