Ja, die Bybel voorsien oortuigende bewyse dat God werklik bestaan. Dit spoor ons aan om geloof in God op te bou, nie deur blindelings godsdienstige bewerings te glo nie, maar deur ons “denkvermoë”, of “intellektuele vermoë”, te gebruik (Romeine 12:1; 1 Johannes 5:20). Kyk na die volgende redenasies wat op die Bybel gegrond is:

•   Die bestaan van ’n ordelike heelal wat lewe bevat, dui op die bestaan van ’n Skepper. Die Bybel sê: “Elke huis word natuurlik deur iemand gebou, maar hy wat alles gebou het, is God” (Hebreërs 3:4). Hierdie logika is wel eenvoudig, maar vir baie geleerdes is dit oortuigend. a

•   As mense het ons ’n ingebore begeerte om die betekenis en doel van die lewe te verstaan, ’n honger wat kan voortduur selfs nadat ons fisiese behoeftes bevredig is. Dit is deel van wat die Bybel ons “geestelike behoefte” noem, wat die begeerte insluit om God te ken en te aanbid (Matteus 5:3; Openbaring 4:11). Hierdie geestelike behoefte bewys nie net dat God bestaan nie, maar dit toon ook dat hy ’n liefdevolle Skepper is wat wil hê dat ons hierdie behoefte moet bevredig.—Matteus 4:4.

•   Breedvoerige profesieë in die Bybel is eeue voor die tyd opgeteken en is vervul presies soos voorspel is. Die akkuraatheid en fyn besonderhede van hierdie voorspellings is ’n kragtige bewys dat dit ’n bomenslike bron het.—2 Petrus 1:21.

•   Bybelskrywers het wetenskaplike kennis besit wat hulle tydgenote nie gehad het nie. Byvoorbeeld, in die ou tyd het baie volke geglo dat die aarde ondersteun word deur ’n dier, soos ’n olifant, ’n wildevark of ’n os. Maar die Bybel sê van God: “Hy . . . hang die aarde op aan niks” (Job 26:7). En die Bybel beskryf die vorm van die aarde akkuraat as ’n “sfeer”, of “bol” (Jesaja 40:22, voetnoot in NW; Douay Version). Volgens baie mense is die redelikste verklaring vir sulke gevorderde kennis dat Bybelskrywers hulle inligting van God ontvang het.

•   Die Bybel beantwoord talle moeilike vrae, die soort vrae wat iemand ’n ateïs kan laat word as hy geen bevredigende antwoorde daarop vind nie. Byvoorbeeld: As God liefdevol en almagtig is, waarom is daar dan lyding en boosheid in die wêreld? Waarom het godsdiens dikwels ’n slegte in plaas van ’n goeie invloed?—Titus 1:16.