18 MEI 2022 | BYGEWERK: 12 MAART 2024
RUSLAND

JONGSTE NUUS – BROER TRONK TOE GESTUUR | Inwer Sijoechof word met krag gevul

SPEEL

Op 7 Maart 2024 het die Maikop-stadshof van die Republiek van Adigeja broer Inwer Sijoechof skuldig bevind en hom tot ses jaar tronkstraf gevonnis. Hy is vanaf April 2021 in aanhouding voor sy verhoor en sal in aanhouding bly.

Tydlyn

15 April 2021

Word aangekla van ’n misdaad omdat hy gemeentelike vergaderinge deur middel van videokonferensie hou
16 April 2021

Die owerhede deursoek Inwer se huis sowel as die huise van vier ander Getuies van Jehovah. Hy word ondervra en in tydelike aanhouding geplaas
17 April 2021

Word in aanhouding voor sy verhoor geplaas
15 Augustus 2021

Word na ’n maksimumsekuriteit-detensiesentrum wat 110 kilometer van Maikop af is, oorgeplaas
13 September 2021

Kriminele verhoor begin

Profiel

Inwer Sijoechof

Gebore: 1974 (Maikop)

Agtergrond: Het boekhou en ouditering studeer. Het as ’n bankteller en ’n boekhouer gewerk

Het in 1989 die Bybel saam met Jehovah se Getuies begin studeer. Was beïndruk deur hulle eerlikheid. Is op 9 September 1990 gedoop. Het Bybelwaarhede met sy ouer suster gedeel, wat in 1992 gedoop is. Sy suster en haar man is sy enigste familielede wat Getuies is

Persoonlike kommentare van Inwer se ouer suster, Zarieta Tsjoerda a

Wat help Inwer om sy aanhouding te verduur?

Die eerste keer wat ons mekaar in die detensiesentrum kon sien, het ek hom gevra hoe hy daaroor voel om so afgesonder van sy familie en vriende te wees. Hy het opgewonde geraak en gesê dat van die oomblik wat die owerhede sy huis deursoek het, hy begin voel het dat Jehovah hom met krag vul, net soos ’n mens ’n ballon met lug vul.

Hy behou ook ’n goeie geestelike roetine deur elke dag drie hoofstukke uit die Hebreeuse Geskrifte en een hoofstuk uit die Griekse Geskrifte te lees. En hy probeer ander gevangenes help deur vir hulle praktiese hulp aan te bied. Gedurende die eerste twee maande het hy twee gevangenes gehelp om op te hou rook.

Wat het jy gedoen om jouself voor te berei omdat jy weet dat jy en jou man dalk ook gearresteer kan word?

Wanneer toeriste hulleself voorberei om na ’n ander land te reis, kan hulle hulle teen potensiële siektes laat inent. My “inentings” is Bybelverse, ons liedjies en opbouende ondervindinge. Toe die werk van Jehovah se Getuies in 2017 in Rusland verbied is, het ek weer die verslae in die Jaarboek gelees oor hoe die predikingswerk gedoen is in lande waar die werk verbied is. Ek het daarin belanggestel om uit te vind hoe ons broers en susters, ten spyte van die gevare, hulle geloof behou het en aanhou preek het.

Ons het besluit dat as ons gearresteer word, ons nie jammer vir onsself sal voel nie. Dit sal ’n uitdagende maar kosbare toewysing vir ons wees. Dit sal wees asof Jehovah vir ons sê: “Kom oor na Masedonië.” – Handelinge 16:9.

Ons het die vertroue dat ons liewe broers en susters in Rusland sal “[aanhou] om krag te ontvang by die Here, want sy mag is groot”. – Efesiërs 6:10.

a Omdat broer Sijoechof op die oomblik in aanhouding is voor sy verhoor, was dit nie moontlik om kommentare van hom te kry nie.

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE