7 JULIE 2022
RUSLAND

Jefgeni Zinitsj bly lojaal aan Jehovah, net soos sy ouers en grootouers

SPEEL

Op 27 Junie 2022 het die Oktjabrski-distrikshof van Krasnojarsk broer Jefgeni Zinitsj tot ses jaar in die tronk gevonnis. Hy is onmiddellik in hegtenis geneem.

Tydlyn

11 Desember 2020

Jefgeni se huis word deursoek
21 Januarie 2021

Kriminele saak word gemaak
19 Oktober 2021

Word amptelik aangekla van die organisering van die bedrywighede van ’n ekstremistiese organisasie
20 Oktober 2021

Word onder reisbeperkings geplaas
14 Desember 2021

Kriminele verhoor begin

Profiel

Jefgeni Zinitsj

Gebore: 1966 (Nazarowo, Krasnojarsk-gebied)

Agtergrond: Sy ouers en grootouers was gedurende die Sowjet-era vir hulle geloof vervolg

Is in 1982 as een van Jehovah se Getuies gedoop. Trou met Marija in 1988. Hulle het ’n dogter grootgemaak. Marija is voor die einde van die kriminele verhoor oorlede

Persoonlike kommentare

Jou ouers en grootouers, asook jou vrou s’n, was almal vervolg vir hulle geloof. Watter uitwerking het hulle voorbeelde op jou gehad?

Vervolging was iets algemeens vir ons in daardie tyd. Hulle gesindheid hieroor het vir my ’n waardevolle les geleer. Hulle het nooit kwaad of verbitterd geword oor wat besig was om te gebeur nie. Almal het geweet dat hulle vervolging kon verwag omdat hulle ware Christene is. Wanneer ek nadink oor my ouers se voorbeelde, besef ek dat hulle geloof gebaseer was op ’n duidelike begrip van die waarheid en hulle persoonlike verhouding met God. Een van die dinge wat ek goed van my kinderlewe kan onthou, was om te sien hoe my pa nederig op sy knieë bid.

Dieselfde kan gesê word van my vrou, Marija, se ouers. Die waarheid was nie net deel van hulle lewe nie, dit was hulle hele lewe. Hulle het haar gehelp om sterk geloof te hê, om die Bybel gereeld te lees en te studeer en om opreg om te gee vir die broers en susters in die gemeente. Reg tot die einde toe, selfs toe Marija siek was en behandeling ondergaan het, het sy aangehou om ander te help om na aan Jehovah te bly. Sy het my herinner aan dié wat ’n bietjie aanmoediging nodig gehad het.

Wat het jou gehelp om hierdie baie moeilike omstandighede te hanteer?

My begeerte om aan te hou om Jehovah en my broers en susters te help, motiveer my om nie op te gee nie. Ek het probeer om praktiese hulp te gee aan soveel broers in die tronk as wat ek kon. Dit was ’n wonderlike gevoel om deur Jehovah gebruik te word om iets vir hulle te doen, en dit het my laat voel of iemand my nodig het. Dit het my ook geleer hoe Jehovah vir elkeen van ons sorg.

Die liefde en vrygewigheid wat die broers en susters vir my gewys het, het my ook meer bewus gemaak van Jehovah se liefde en goedkeuring. Hierdie liefdevolle dade bly vir my baie belangrik, veral gedurende hierdie laaste paar maande, omdat ek baie getreur het nadat Marija oorlede is.

Ons is oortuig van Jehovah se liefde en vertroosting vir Jefgeni terwyl hy aanhou om sy familie se moed en volharding in moeilike tye na te volg. – Psalm 86:17.

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE