In 2023 is dit 75 jaar vandat Jehovah se Getuies Bybelpublikasies in Singalees begin vertaal het. Dit is die taal wat deur meer mense in Sri Lanka gepraat word as enige ander.

Ons publikasies was aan die begin net in Engels uitgegee omdat Engels die amptelike taal in die land was toe dit onder Britse bewind was. Maar in 1948 is die eerste publikasie in Singalees vrygestel, die boekie The Joy of All the People. Een jaar nadat die boekie vrygestel is, het die aantal verkondigers in Sri Lanka meer as verdubbel van 12 na 25.

In 1953 is die boekie Grondslag vir geloof in ’n nuwe wêreld en die boek Die waarheid sal julle vrymaak in Singalees uitgegee. Net ’n paar jaar later, in Maart 1958, het ons broers ’n belangrike gebeurtenis in vertaalwerk bereik – die vrystelling van die eerste Wagtoring in Singalees.

In 2009 is ’n hoogtepunt in die Singalese vertaalwerk bereik. Daardie jaar het broer Stephen Lett, ’n lid van die Bestuursliggaam, Sri Lanka besoek en die vrystelling van die Nuwe Wêreld-vertaling van die Heilige Skrif in Singalees aangekondig.

Een van die broers wat die vrystelling van die Bybel bygewoon het, het gesê: “Toe ek die Nuwe Wêreld-vertaling in Singalees gekry het, was ek baie dankbaar teenoor Jehovah, ons Groot Onderrigter. Die vertaling is maklik om te lees en te verstaan, en dit maak dit vir my makliker om te sien hoe ek die inligting in my lewe moet toepas.”

Dit is duidelik dat Jehovah die 4 839 verkondigers in die 63 Singalese gemeentes seën, sowel as al 7 121 verkondigers in Sri Lanka. Ons weet dat Jehovah sal aanhou om hulle te seën terwyl hulle die “suiwer taal” praat en aan ander leer. – Sefanja 3:9.