Mmɩlɩ mɔɔ Gyehova ɩhyɩhyɛlɩ abusunwa nɩ, ɩvalɩ nnwuakula iwulalɩ awʋvʋlɔ bɛ sa. (Kolosiyiamaa 3:20) Ɩdɩ awʋvʋlɔ nɩ bɛ asɛdɩ kɛɛ bɛkɛdɩdɩ bo nnwuakula nɩ ma bɔkɔlɔ Gyehova na bɛanyi baɣa bɛayɛ mbanimbani baaba. (2 Timoti 1:5; 3:15) Ɩsɛ kɛɛ ɔkʋla sʋ̃ ɔnwʋ mɔɔ ɩwɔ wʋ ɣa benyia anzɛnyɩɩ baalɛ nɩ yɩ ahʋnlɩnɩ nu. Nɔhʋanlɛ nu nɩ, be ndianwʋ kɛ awʋvʋlɔ nɩ, ɔnwʋmɔ ihyinyia baaba. Sɛ edi bɔmʋnlɩ ɛfa Gyehova yɩ odwokɔ oduwa wʋzawʋ wʋ ahʋnlɩnɩ nu a, ɩkɛyɛ mɛlɛkɛ kɛɛ ɛkɛva ekehilehile wʋ ɣa yɩ sʋ̃.—Wulomimaa 7:22.

MƆ BAYƖBƲLƲ YƖ ƖKÃ: ‘Ɩwɔ kɛɛ abiyela isiyeziye ɩnwʋ eɣile bela kɛɛ ikediye odwokɔ, sɛ ɩkãã odwokɔ a, ɩwɔ kɛɛ ɩdwɩnɩ nwʋ.’ (Gyemisi 1:19) Sɛ ɛpɛ kɛɛ wʋ nnwuakula nɩ bɛtɩ nɣanlɩ kɛɛ sa bɔkʋla bɛ nɩɩ wʋ tɩndɛ eɣile bela a, mɛyɩ dɩyɛ nɩ ma bɔnwʋ yɩ kɛɛ, eziyeziye wʋ nwʋ kɛɛ ekediye bo odwokɔ wɔ mmɩlɩ bela mɔɔ bɛpɛ kɛɛ bɛ nɩɩ wʋ tɩndɛ nɩ. Ma benyia bʋwabɩlɛ mɔɔ azʋ̃nudwolɩyɛ wɔ nu, kɛmɔ ɩkɛyɛ na ɩayɛ mɛlɛkɛ ɩama wʋ nnwuakula nɩ kɛɛ bɛkɛdɩndɛ. (Gyemisi 3:18) Sɛ benyia adwɩnɩ kɛɛ ɛkɛdɩnyɩandɩnyɩa bɛ anzɛnyɩɩ okowu bɔ ɔfɔ a, bolóbuko bo nu bɛkɛma wʋ. Nyia wʋ nnwuakula nɩ nwʋ abʋtalɩ, na kɔ ɔzʋlɔ la ma bɔnwʋ yɩ kɛɛ ɔdɔ bɛ.—Matiyu 3:17; 1 Kɔlɛntɩmaa 8:1.

MƆ ƆKƆHƲLA ƐKƐYƐ:

• Sɛ wʋ nnwuakula nɩ bɛpɛ kɛɛ bɛ nɩɩ wʋ tɩndɛ a, ɩsɛ kɛɛ enyia mmɩlɩ ɛma bɛ

• Kɛ mmɩlɩ mɔɔ ndwokɔ ɛzɩzɩbɛ be izi nɩ yɛ ɩsɛ kɛɛ ɛ nɩɩ bɛ bɔ nkɔmɔ a, mfomi ɩsɛ kɛɛ ɛta ɛ nɩɩ bɛ bɔ nkɔmɔ

MƆ BAYƖBƲLƲ YƖ ƖKÃ: “Enii mɔɔ ɩda ntɩyasɩ ali wɔ odwokɔ be nu nɩ, sa isi yɩ bʋwɔ.” (Proverbs 16:20, NWT) Itwu mmɩlɩ be a, ɩsɛ kɛɛ ɔnwʋ adwɩnɩ mɔɔ ɩwɔ odwokɔ mɔɔ wʋ nnwuakula nɩ bɛkãã yɩ mɛda, kɛmɔ ɩkɛyɛ a ɛkɛdɩ bɛ nɣanlɩdɩlɛ ɩtʋ bʋwɔ. Ɩyɛ a, nnwuakula bokugua ndwokɔ nu anzɛnyɩɩ bɛtɩndɛ la. “Mʋnlʋmmɔ bɛma bo munwa odwokɔ ɩyɛ fɛlɛkʋ̃, na ɩyɛ́ anyɩnlɩlelɛ ɩma abiyela mɔɔ ikediye nɩ. Akʋ̃ sʋ̃ sɛ abiye ibizia odwokɔ mʋnlʋmmɔ a ɩwɔ kɛɛ mʋnlʋmmɔ bɛyɩ yi munwa kɩnlɩma.” (Kolosiyiamaa 4:6) Íni kɛɛ ɛfa ɛya  ndɛndɛ.—Gyemisi 1:19.

MƆ ƆKƆHƲLA ƐKƐYƐ:

• Ɩávalɩ ɔnwʋmɔ odwokɔ ɔkʋ̃ mɔɔ wʋ nnwuakula nɩ bɛkãã nɩ, mɩátua bo munwa zʋ anzɛnyɩɩ mɩáfa bɔ nwʋ ɛya

• Kakɛ kezimɔ nɩ ɛtɩ nɣanlɩ nɩɩ nninyeni mɔɔ nɩ ɔnwʋmɔ ihyinyia wʋ wɔ mmɩlɩ mɔɔ nɩ ɛdɩ kuakula kɛɛ bɛzabɛ la nɩ

MƆ BAYƖBƲLƲ YƖ ƖKÃ: “Nnwuakula a, kɛmɔ mʋnlʋmmɔ bɛdɩ dedimaa nɩ ti, ɩdɩ mʋnlʋmmɔ bɛ asɛdɩ kɛɛ bekediye bɛ awʋvʋlɔ bo odwokɔ. Sianti yɛ lɛ kɛɛ, mɛyɩ yɛ ɩsɔ Niibenyia yɩ anyɩ a.” (Kolosiyiamaa 3:20) Gyehova ɩva nnwuakula iwula ɛzɩlɛ ɩ nɩɩ enlilɛ bo munwatĩĩ bɛ sa. Ɩsɛ kɛɛ bekilehile bo nnwuakula nɩ ma betiye bɛ na bedi be nni sʋ̃. (Ɛfɩsɛsɩmaa 6:1-3) Sɛ awʋvʋlɔ nɩ ‘bɛáyɛ ɔkʋ̃ wɔ adwɩnɩ nu’ a, nnwuakula yɩ nɩ bɔnwʋ yɩ. (1 Kɔlɛntɩmaa 1:10) Sɛ bɛ adwɩnɩ iáyiyia wɔ odwokɔ be nwʋ po a, íni kɛ bɛma nnwuakula yɩ nɩ bɔnwʋ yɩ, sianti yɛ lɛ kɛɛ eyi ɩlɛ́ma nnwuakula yɩ nɩ bokowu bɛ.

MƆ ƆKƆHƲLA ƐKƐYƐ:

• Bozunzu ɔnwʋmɔ na bɛyɛ adwɩnɩ ɔkʋ̃ wɔ ɔhʋanɩ mɔɔ bokoluwa ɔzʋlɔ bɛkɛdɩnyɩa bo nnwuakula nɩ

• Sɛ ɛ nɩɩ wu hũ anzɛnyɩɩ wʋ yɩ bɛáyɛ adwɩnɩ ɔkʋ̃ wɔ kezimɔ bɛkɛdɩdɩ bo nnwuakula nɩ nwʋ a, bɔ mmɔdɩnɩ kɛɛ ɛkɛdɩ wu hũ anzɛnyɩɩ wʋ yɩ yɩ adwɩnɩhilelɛ tʋ

MƆ BAYƖBƲLƲ YƖ ƖKÃ: “Bɛdɩdɩ bɛ na behilehile bɛ kɛmɔ ye Niibenyia ɩpɛ yɩ nɩ.” (Ɛfɩsɛsɩmaa 6:4) Ihyinyia egyima ɛzɩzɩbɛ na ama bɛahʋla bɛadɩdɩ bo nnwuakula bʋwɔ. Behyinyia ɛdɩdɩlɛ nwʋ nhyɩhyɛlɩyɛ, mɔ ɔhʋanɩ mɔɔ bokoluwa ɔzʋlɔ bɛkɛdɩnyɩa bo nnwuakula nɩ sʋ̃ ɩkɩnla ɔnwʋmɔ. (Hibulumaa 12:11) Kɛ ɛkɛdɩnyɩa kuakula nɩ iáhile kɛɛ ekehyi yi nkʋ̃ʋ̃ la, mfomi yɩ ɔfʋã be sʋ̃ yɛ lɛ kɛɛ ɔkɔwʋwa yɩ ma ɩkɔnwʋ sianti mɔ bɛhyɩhyɛ mmɛla be nɩ. (Proverbs 28:7, NWT) Akʋ̃ sʋ̃, kilehile bɛ ma bɔlɔ Gyehova yɩ Odwokɔ na bɛdɩ numɔ egyinalɛzʋ-ndwokɔ nɩ yɩ tʋ. (2 Timoti 3:15) Eyi ɩkɔhʋla ɩkɔwʋwa bɛ ma bekenyia tilewʋwaba baaba.—Hibulumaa 5:14.

MƆ ƆKƆHƲLA ƐKƐYƐ:

• Bʋwa wʋ nnwuakula nɩ ma bɔnwʋ Nyamɩnlɩ kɛɛ enii pɔkyɩ̃ɩ̃ mɔɔ ɩwɔ ɛkɛnɩ mɔɔ bɔkɔhʋla bekele yɩ bekeli

• Bʋwa bɛ ma bɔnwʋ yɩ, na bɔhwɩ̃ bɔ nwʋ wɔ asianɩ mɔɔ ɩwɔ ɛbɩlazɩkɛlɛ ngyɛpɛlɛ nwʋ, dɩkɛ mɔɔ ɩwɔ Intanɛtɩ nɩɩ intanɛtɩ zʋ nkitanwʋlilɛ azʋlɔtʋ zʋ nɩ. Kilehile bɛ ma bɔnwʋ kezimɔ bɔkɔhwɩ̃ bɔ nwʋ wɔ mmenii mɔɔ bɛkɛva nna nu ɛbɩlazɩkɛlɛ bɛkɛɣa bɔzʋ nɩ nwʋ