Gyehova * Nyamɩnlɩ yɛ ɩhyɩhyɛlɩ agyiahʋnlɩ mɔɔ ili bɔmʋnlɩ nɩ a. Bayɩbʋlʋ ɩkã ikile yɛ kɛɛ, ɩwɔlɩ baalɛ mɔɔ ili bɔmʋnlɩ nɩ, na “ɩvalɩ yɩ ɩɣɩlɛlɩ benyia yɩ nɩ.” Adamɩ yɩ anyɩ ileli baaba na ɩmanlɩ ɩhanlɩ kɛɛ: “Eyi yɛ ɩdɩ mu bowulo nu bowulo nɩɩ mʋ nnwʋnlamɩ nu nnwʋnlamɩ a.” (Genesis 2:22, 23, NWT) Gyehova ɩla ɔnwʋmɔ la ɩpɛ kɛɛ agyiahʋnlɩmaa bɛ anyɩ ide.

Sɛ ekyia a, ɔkɔdwɩnɩ kɛɛ dɩyɛ bela ɩkɔhɔlɩ ɔzʋlɔ pɛpɛɛpɛ. Nɔhʋanlɛ odwokɔ yɛ lɛ kɛɛ, ohunɛ nɩɩ ɛyɩlɛ mɔɔ bɔdɔ bɔ nwʋ baaba po nɩ, sa beyiyia ndwokɔ ɛzɩzɩbɛ. (1 Kɔlɛntɩmaa 7:28) Wɔ blohyʋɔ eyi nu nɩ, ɔkɔnwʋ Bayɩbʋlʋ nu egyinalɛzʋ-ndwokɔ mɔɔ sɛ ɛfa ɛyɛ egyima a, ɩkɛma wʋ agyiahʋnlɩ nɩɩ wʋ abusunwa ɩkɛyɛ anyɩnlɩlelɛ.—Gyemisi 1:25.

MƆ BAYƖBƲLƲ YƖ ƖKÃ: Ohunɛ yɛɛ ɩdɩ abusunwa yi ti a. —Ɛfɩsɛsɩmaa 5:23.

Sɛ ɛdɩ ohunɛ a, Gyehova ikilaa ɔhʋanɩ kɛɛ ekehila wʋ yɩ bʋwɔ baaba wɔ ɔlɔlɛ nu. (1 Pita 3:7) Ɩwɔlɩ yɩ kɛɛ wʋ wʋwalɛvʋlɔ, na ɩpɛ kɛɛ ɛ nɩɩ wʋ yɩ di wɔ annidi nɩɩ ɔlɔlɛ nu. (Genesis 2:18, NWT) Ɩsɛ kɛɛ ɔdɔ wʋ yɩ baaba paa ma yɩ ɔzɔ ti, ekenyia ɛpɛ kɛɛ ɛkɛva mɔɔ wʋ yɩ ɩpɛ yɩ nɩ ekeli wʋ dɩyɛ bɔmʋnlɩ.—Ɛfɩsɛsɩmaa 5:25-29.

Sɛ ɛdɩ ɛyɩlɛ a, Gyehova ikilaa ɔhʋanɩ kɛɛ ekeli wu hũ nni baaba na wawʋwa yɩ ma iali yɩ asɛdɩ nwʋ egyima. (1 Kɔlɛntɩmaa 11:3; Ɛfɩsɛsɩmaa 5:33) Kyiná yɩ pɔkɔzilɛ mɛda na ɔzʋ̃ wʋ ahʋnlɩnɩ munwatĩĩ nu bʋwa ma beli ɔnwʋmɔ egyima. (Kolosiyiamaa 3:18) Sɛ ɛyɛ yɩ ɔzɔ a, wʋ nwʋ kɛyɛ pɩkɛ wɔ wu hũ nɩɩ Gyehova bɛ anyɩ zʋ. —1 Pita 3:1-6.

MƆ ƆKƆHƲLA ƐKƐYƐ:

• Bizia wu hũ anzɛnyɩɩ wʋ yɩ ɔhʋanɩ mɔɔ ɔkɔhʋla ɛkɛyɛ ohunɛba anzɛnyɩɩ ɛyɩlɛba. Tiye yɩ bʋwɔ, na yɛ mɔɔ ɔkɔhʋla bela kɛɛ ɛkɛyɛ nzɩnzanlɩyɛ

• Sí abʋtalɩ. Sa ide mmɩlɩ na ama bɛzabɛ anwɩ̃ bɛazuma kezimɔ bɛkɛma bonu bela yɩ anyɩ ikele

MƆ BAYƖBƲLƲ YƖ ƖKÃ: Ɩsɛ kɛɛ ɛfa mɔɔ wu hũ anzɛnyɩɩ wʋ yɩ ɩpɛ yɩ nɩ edi bɔmʋnlɩ. (Fɩlɩpɩmaa 2:3, 4) Bu wu hũ anzɛnyɩɩ wʋ yɩ kɛɛ ɩtʋ bʋlɔ, na kakɛ kɛɛ Gyehova ɩpɛ kɛɛ yɩ azʋ̃mɩvʋlɔ ‘bɛyɛ baaba bɛma abiyela.’ (2 Timoti 2:24) “Máma odwokɔ tanɩ ɩzʋ̃ bo munwa nu ifinde; mfomi bɛdɩndɛ́ kɩnlɩma mɔɔ ɩma enii inyia anyunumihɔlɛ na inyia mɔɔ ihyinyia nɩ, ama ebiyela mɔɔ mʋnlʋmmɔ bɛkɛhã bela nɩ ɔzʋlɔ ɩaɣa mfasʋ ama bɛzabɛ mɔɔ betiye nɩ.” Meti kila wʋ ndwokɔhanlɛ bʋwɔ. (Ɛfɩsɛsɩmaa 4:29) Gyehova yɩ sunzuma nɩ ɩkɔwʋwa wʋ ma ɛ nɩɩ wu hũ anzɛnyɩɩ wʋ yɩ kɛdɩndɛ wɔ ɔlɔlɛ nɩɩ ɔhʋanɩ ba zʋ.—Galatiyiamaa 5:22, 23; Kolosiyiamaa 4:6.

MƆ ƆKƆHƲLA ƐKƐYƐ:

• Bɔ́ mpayɩ siã abʋtalɩ na ama wʋanyia adwɩnɩ mɔɔ numɔ ɩla ɛkɛnɩ ansaana ɛ nɩɩ wu hũ anzɛnyɩɩ wʋ yɩ bɛazunzu anyɩnlɩbʋlʋ ndwokɔ nwʋ

• Dwɩnɩ mɔɔ ɛkɛhã nɩɩ kezimɔ ɛkɛhã yɩ nɩ nwʋ bʋwɔ baaba

MƆ BAYƖBƲLƲ YƖ ƖKÃ: Sɛ ekyia a, ɛ nɩɩ wu hũ anzɛnyɩɩ wʋ yɩ bɛba bɛyɛ “nnwʋnlamɩ ɔkʋ̃.” (Matiyu 19:5) Naasʋ̃ bɛla ɔnwʋmɔ la bɛdɩ mmenii anwɩ̃ mɔɔ bonu bela wɔ adwɩnɩhilelɛ sʋnʋnkʋ̃. Meti ihyinyia kɛɛ bosuma kɛɛ bɛkɛma bɛ adwɩnɩ nɩɩ bɛ nɣanlɩdɩlɛ ɩkɛyɛ ɔkʋ̃. (Fɩlɩpɩmaa 2:2) Ɔkʋ̃yɛlɛ ihyinyia baaba mmɩlɩ mɔɔ besi pɔkɔ be nɩ. Bayɩbʋlʋ ɩkã kɛɛ: “Agyinadulɛ yɛɛ ɩma pɔkɔzilɛ ikyina a.” (Proverbs 20:18, NWT) Bɛmá Bayɩbʋlʋ nu egyinalɛzʋ-ndwokɔ ihile bɛ ɔhʋanɩ wɔ mmɩlɩ mɔɔ bɔbɔ numɔ besi pɔkɔ azʋlɔtʋ mɔɔ ɔnwʋmɔ ihyinyia baaba nɩ. —Luuku 11:28.

MƆ ƆKƆHƲLA ƐKƐYƐ:

• Kã wʋ nɣanlɩdɩlɛ nwʋ odwokɔ kile wu hũ anzɛnyɩɩ wʋ yɩ, na kɛ nkɔmɔwɔlɛ anzɛnyɩɩ adwɩnɩhilelɛ be kɛkɛ a

• Sɛ ɛpɛ kɛɛ ɛyɛ dɩyɛ be a, dí bɔmʋnlɩ ɛ nɩɩ wu hũ anzɛnyɩɩ wʋ yɩ bozunzu ɔnwʋmɔ ansa