Mmenii nɔhʋanlɛmaa wɔ ɔzʋ̃mɩnlɛ munwala nu. Ɩdɩ odwokɔba kɛɛ Nyamɩnlɩ ɩnwʋ ɔzɔ mmenii nɩ na ɩdwɩnɩ bɔnwʋ. Naasʋ̃ aɣɛlɛbɔ odwokɔ yɛ lɛ kɛɛ, mmenii bɛfa ɔzʋ̃mɩnlɛ bɛkɩda bɛanyunu bedi tanɩ. (2 Kɔlɛntɩmaa 4:3, 4; 11:13-15) Amanɩyɛwɔlɛ be ɩkã kɛɛ, ɔzʋ̃mɩnlɛ azʋlɔtʋ bɛva bɔnwʋ bowula bɛsabɛsayɛlɛ, abusunwa nu kʋnɛ, nɩɩ nnwuakula mɔɔ bɛyɛ bɛ ayɛkʋa nu. Kila kezimɔ eyi ɩma mmenii mɔɔ bede Nyamɩnlɩ bedi nɩ bɛ ɛɣɛɛlɛ ɩbɔ!​—Kɩnga Matiyu 24:3-5, 11, 12.

Mɔɔ nɔhʋanlɛ ɔzʋ̃mɩnlɛ ɩhyɛ Nyamɩnlɩ animinyiamɩ nɩ, awohwi ɔzʋ̃mɩnlɛ mɛyɩ ɩanyɩ ɩázɔ yɩ. Ikihile enii yɩ adwɩnɩ mɔɔ ígyĩ Bayɩbʋlʋ yɩ zʋ, mɔ awohwi ehilehilelɛ mɔɔ ɩfalɩ Nyamɩnlɩ nɩɩ awuvʋlɔ nwʋ sʋ̃ ɩkɩnla nwʋ. Naasʋ̃ Gyehova ɩpɛyɩ kɛɛ mmenii bɔnwʋ nɔhʋanlɛ mɔɔ ɩfalɩ yɩ nwʋ.​—Kɩnga Wulomimaa 6:23; 1 Timoti 2:3-5.

Anyɩnlɩlelɛ odwokɔ yɛ lɛ kɛɛ, ɔzʋ̃mɩnlɛ mɔɔ bɛyɛ bɔnwʋ kɛɛ bɔdɔ Nyamɩnlɩ naasʋ̃ bɛfa bɛ nyɛlɩyɛ bekile kɛɛ bɔdɔ Abɔnsamɩ yɩ tanɩ oyuwadɩ yɩ nɩ bɔlɔ́kʋla bɛkɛlahɩlɩlahɩlɩ Nyamɩnlɩ. (Gyemisi 4:4) Nyamɩnlɩ Odwokɔ ɩfʋlɛ awohwi ɔzʋ̃mɩnlɛ kɛɛ “Babilɔnʋ twonwa kezile.” Nɩ Babilɔnʋ ɩdɩ ɔwɔkɩ twonwa be mɔɔ ɛkɛnɩ yɛ bɔwɔlɩ awohwi ɔzʋ̃mɩnlɛ ɩtʋ wɔ Nowa yɩ Nzuloyilɛ kezile yɩ mɛda. Ɩlɛ́kyɛ, Nyamɩnlɩ ɩbava awohwi ɔzʋ̃mɩnlɛ mɔɔ ɩdahɩlɩdahɩlɩ na ɩhyɛ enii zʋ nɩ ɩkɛɣa awielɩyɛ.​—Kɩnga Yikile 17:1, 2, 5, 16, 17; 18:8.

Odwokɔba mvʋlɔ sʋ̃ wɔ ɛkɛnɩ. Gyehova yɩ ɛɣɛɛlɛ iléfili mmenii nɔhʋanlɛmaa mɔɔ bɔdʋ bɛbɩndɩnlɩ awohwi ɔzʋ̃mɩnlɛ azʋlɔtʋ mɔɔ ɩwɔ oyuwadɩ yɩ dɩka bela nɩ nu. Ɩkãã ɔzɔ mmenii yɩ munwala ɩbɔ numɔ iluwa nɔhʋanlɛ mɔɔ ikihile bɛyɩ nɩ zʋ.​—Kɩnga Dwɔɔnʋ 6:45.

Gyehova ɩdwɩnɩ mmenii mɔɔ bɔdɔ mɔɔ ɩdɩ nɔhʋanlɛ nɩɩ baaba nɩ nwʋ. Itu bɛ fʋlɔ kɛɛ bɔzʋ̃ awohwi ɔzʋ̃mɩnlɛ nu bɛyɩ bɔnwʋ. Mmenii mɔɔ bɔdɔ Nyamɩnlɩ nɩ bɔwɔ ɛpɛ kɛɛ bɛkɛzɩnza bɛ ɛbɩlawɔlɛ na bɛazɔ ɩanyɩ.​—Kɩnga Yikile 18:4.

Wɔ adʋwavʋlɔ bɛ mmɩlɩ zʋ nɩ, mmɩlɩ mɔɔ mmenii nɔhʋanlɛmaa be bɛdɩlɩ odwokɔba nɩ wɔ adʋwavʋlɔ nɩ mmɔ bɛ ɛkɛnɩ nɩ, bɛvalɩ anyɩnlɩlelɛ beleli bedianlɩ numɔ. Bozumanlɩ ɔhʋanɩ fʋlɔ mɔɔ ɩsɛ kɛɛ boduwa ɔzʋlɔ bɔsʋ̃mɩ, anyɩnlɩlelɛ ɔhʋanɩ mɔɔ ɩma benyia sianti baaba nɩɩ anyɩnlɩlazʋ wɔ ɛbɩlawɔlɛ nu. Bɛdɩ ndianwʋ baaba bɛma yɛ nnɛ, iluwakɛɛ beleli odwokɔba nɩ bedianlɩ numɔ iluwa Gyehova mɔɔ bɛvalɩ yɩ belili bɔmʋnlɩ wɔ bɛ azɩwʋwalɛ nu nɩ.​—Kɩnga 1 Tɛsalonikamaa 1:8, 9; 2:13.

Gyehova ide mmenii mɔɔ bɔtwɩ̃ bɔnwʋ wɔ awohwi ɔzʋ̃mɩnlɛ nwʋ nɩ ɩba yɩ ɔzʋ̃mɩnlɛ mɔɔ bɛdɩ kɛɛ abusunwa nɩ yɩ nu. Sɛ ede salɛ yɩ nɩ mɔɔ Gyehova ɩtʋ ɩfʋlɛ wʋ nɩ etiã numɔ a, ekenyia yɩ ɔhɔnwʋvalɛ, ɛkɛɣa ɛkɛhɩnla ɩ zʋ̃mɩnlɛmaa mɔɔ bɛdɩ abusunwa mɔɔ bɔwɔ ɔlɔlɛ nɩ nwʋ, na ekenyia nnwʋanlɩ mɔɔ íni awielɩyɛ.​—Kɩnga Maakɩ 10:29, 30; 2 Kɔlɛntɩmaa 6:17, 18.

Ndɛnɩwuwalɛ mɔɔ ɩbaɣa awohwi ɔzʋ̃mɩnlɛ ɩzʋ nɩ ɩdɩ odwokɔba. Ɩkɛva azʋ̃nudwolɩyɛ ɩkɛɣa azɩlɛ yɩ zʋ dɩka bela. Awohwi ɔzʋ̃mɩnlɛ ɩlɛ́dahɩlɩdahɩlɩ na ɩabukobuko mmenii nu dɔkʋ̃. Mmenii mɔɔ bɔkɔwʋwa azɩlɛ yɩ zʋ nɩ bɛkɛyɛ ɔkʋ̃ wɔ nɔhʋanlɛ Nyamɩnlɩ yɩ ɔzʋ̃mɩnlɛ nu.​—Kɩnga Yikile 18:20, 21; 21:3, 4.