Mary nɩɩ yi hũ John a da manlɩ be mɔɔ mmenii sʋ̃maa zʋ̃ Philippines ba bʋwa kɛnɩ yɛ egyima nu. Na bɛ anyɩ deli nwʋmɔ kɛɛ bɛkɛhã odwokɔba nɩ bekehile mmenii eyimmɔ. Wɔ COVID-19 adimakɛlɛ mmɩlɩ nu nɩ, Mary nɩɩ mmenii sʋ̃maa mɔɔ bɔwɔ manlɩ mɔɔ bɛda numɔ yɩ nɩɩ mmenii mɔɔ bɔwɔ manlɩ mvʋlɔ zʋ wɔlɩ Bayɩbʋlʋ dɩyɛzumanlɛ tʋ. Kɛ ɩyɛlɩ yɩ izeli a?

Nɩ Mary bizia yɩ Bayɩbʋlʋ dɩyɛzumanlɛmaa yɩ odwokɔɣizialɛ be. Nɩ ibizia bɛ kɛɛ: “Asʋ̃ ezi mmenii be sʋ̃ mɔɔ bɛ anyɩ keleli nwʋmɔ kɛɛ bokozuma Bayɩbʋlʋ yɩ a?” Sɛ bɛkã kɛɛ nyɛ a, nɩ izia iɣizia bɛ kɛɛ bɔkɔhʋla kɔwʋwa yɩ ma ɩ nɩɩ bɛ kɛdɩndɛ a. Mbɔmɩ sʋ̃maa nɩ, nɩ dɩyɛ baaba be zʋ̃ ɔzɔ odwokɔɣizialɛ yɩ nu ɩba. Mɩnla ti mɔɔ yɛkãã ɔzɔ a? Sianti yɛ lɛ kɛɛ, mmenii mɔɔ bɛ anyɩ deli mɔɔ bosuma wɔ Bayɩbʋlʋ yɩ nu nwʋ nɩ ta kã mɔɔ bosuma nɩ nwʋ odwokɔ bekile bɔ ɔhɔnwʋmmɔ nɩɩ bo mmusunwamaa. Sɛ nɩ Mary bizia yɩ Bayɩbʋlʋ dɩyɛzumanlɛmaa yɩ odwokɔ eyi a, mɩnla yɛ nɩ ɩzʋ̃ numɔ ɩba a?

Mary yɩ Bayɩbʋlʋ dɩyɛzumanlɛvʋlɔ be mɔɔ bɔfʋlɔ yɩ Jasmin wʋwalɩ yɩ ma inyianlɩ mmenii anla mɔɔ bɛ anyɩ deli nwʋmɔ kɛɛ bokozuma Bayɩbʋlʋ yɩ. Bo nu ɔkʋ̃ mɔɔ bɔfʋlɔ yɩ Kristine nɩ, yɩ anyɩ lelili bɛ Bayɩbʋlʋ dɩyɛzumanlɛ yɩ nwʋ nkʋ̃ʋ̃ ma ɩhã ihileli Mary kɛɛ ɩmá bozuma dɩyɛ mbɔmɩ anwɩ̃ wɔ dapɛnɩ yɩ nu. Mmɩlɩ mɔ Mary ɣizialɩ Kristine kɛɛ izi abiye mɔɔ yɩ anyɩ keleli nwʋmɔ kɛɛ ikozuma Bayɩbʋlʋ yɩ nɩ, ɩhanlɩ kɛɛ, “Nyɛ, sa mɩkã wʋ nwʋ odwokɔ mikile mʋ ɔhɔnwʋmmɔ.” Wɔ dapɛnɩ ɛgyɩkɩ̃ɩ̃ be nu nɩ, Kristine wʋwalɩ Mary ma yɩ sa hanlɩ yɩ ɔhɔnwʋmmɔ anla mɔɔ nɩ bɛ anyɩ deli nwʋmɔ kɛɛ bokozuma Bayɩbʋlʋ yɩ. Mɛyɩ mɛda nɩ Kristine valɩ yɩ ɔhɔnwʋmmɔ mvʋlɔ ɣa hɩnlanlɩ nwʋmɔ, na bo nu be sʋ̃ valɩ abiyemmɔ ɣalɩ.

Nɩ Kristine pɛ kɛɛ yɩ abusunwa mɔɔ bɔwɔ Philippines nɩ sʋ̃ suma Bayɩbʋlʋ yɩ. Meti ɩhanlɩ nwʋmɔ odwokɔ ihileli yɩ ɣa baalɛ Andrea. Ahyɛasɩ yɩ, nɩ Andrea sunzu kɛɛ ‘Gyehova Dasɩvʋlɔmaa dɩ anwunzumi tʋ okuwu be mɔɔ bɛále Gyisɛsɩ bedi na Old Testament yɩ la yɛ bɛfa bedi egyima a.’ Naasʋ̃ bozumanlɩ dɩyɛ ɔkʋ̃ bowieli la pɛ, yɛ yɩ adwɩnɩ zɩnzanlɩ a. Nɩ sɛ bosumaa dɩyɛ na ɩnwʋ dɩyɛ fʋlɔ be a, ɩkã kɛɛ, “Sɛ Bayɩbʋlʋ yɩ hã dɩyɛ a, mɛyɩ nɩ ɩdɩ nɔhʋanlɛ!”

Aɣinzi yi, Andrea hanlɩ yɩ ɔhɔnwʋmmɔ anwɩ̃ be nɩɩ yi egyima nu enii be nwʋ odwokɔ hileli Mary ma ɩ nɩɩ bɛ wɔlɩ Bayɩbʋlʋ dɩyɛzumanlɛ tʋ. Akʋ̃ sʋ̃, nɩ Andrea yɩ antɩ be wɔ kɛnɩ mɔɔ bɔfʋlɔ yɩ Angela mɔɔ yɩ anyɩ zũ. Nɩ sɛ Mary ɩ nɩɩ Andrea bosumaa dɩyɛ a, Angela tiye ebiye mɔɔ nɩ Mary ízi po. Eɣile ɔkʋ̃ be, Angela hanlɩ hileli Andrea kɛɛ ɩhã ihilé Mary ma ɩ nɩɩ yɩzayɩ sʋ̃ zumá Bayɩbʋlʋ yɩ. Nɩ Angela yɩ anyɩ deli mɔɔ isumaa yɩ nwʋ baaba. Kɛyɛ eziyianɩ ɔkʋ̃ pɛ nu nɩ, nɩ ihwi ɛhɛlɛlɛ ndwokɔ sʋ̃maa igua yi ti nu, na nɩ ɩpɛ kɛɛ bɛ nɩɩ yɩ suma dɩyɛ  mbɔmɩ anla wɔ dapɛnɩ bela! Andrea wʋwalɩ Angela ma iluwalɩ vidiyo-kɔɔlʋ zʋ idiyeli dɩyɛzumanlɛ eɣile bela.

Mary nwʋnlɩ kɛɛ, mmɩlɩ bela mɔ ɩ nɩɩ Kristine kozuma dɩyɛ nɩ, nɩ Kristine yi hũ Joshua luwaluwa kɛnɩ, meti Mary hanlɩ hileli yi kɛɛ sɛ ɩpɛ a ɩɣá ɩwʋwa numɔ idiyé ebiye. Joshua hanlɩ kɛɛ, “Sa mitiye la, naasʋ̃ áma ebizia odwokɔ bela mɩ, kɛ zɔ a sa mutwodwu mʋkɔ.” Naasʋ̃ bozumanlɩ dɩyɛ kɛyɛ miniti anlu pɛ nɩ, ndwokɔ mɔɔ iɣizialɩ nɩ, nɩ ɩzʋnɩ ɩtɛla mɔɔ Kristine ɣizialɩ nɩ kʋlaa na ɩbɛlɩ kɛɛ bɛ nɩɩ yɩzayɩ sʋ̃ kozuma Bayɩbʋlʋ yɩ.

Odwokɔɣizialɛ sikalɛ mɔɔ Mary ɣizialɩ nɩ manlɩ inyianlɩ Bayɩbʋlʋ dɩyɛzumanlɛmaa sʋ̃maa. Ɩyɛlɩ nhyɩhyɛlɩyɛ ma mmeliyema mvʋlɔ wʋwalɩ ma bɛ nɩɩ dɩyɛzumanlɛmaa yɩ bo nu be zumanlɩ dɩyɛ. Iluwa ɔzɔ odwokɔɣizialɛ sikalɛ yɩ ti, Mary nɩɩ Bayɩbʋlʋ dɩyɛzumanlɛmaa 28 zumanlɩ dɩyɛ wɔ amanlɩ anla nu.

Jasmin mɔɔ ɩdɩ Mary yɩ Bayɩbʋlʋ dɩyɛzumanlɛvʋlɔ mɔɔ ili bɔmʋnlɩ mɔɔ ahyɛasɩ yɩ yɛhanlɩ yɩ nwʋ odwokɔ nɩ, inlumanlɩ wɔ April 2021. Kristine sʋ̃ nlumanlɩ wɔ May 2022 na izia ɩhɔ ɩhɩnla yɩ abusunwa nwʋ wɔ Philippines. Akʋ̃ sʋ̃, mmenii anwɩ̃ be mɔɔ Kristine valɩ bɛ manlɩ Mary ma ɩ nɩɩ bɛ zumanlɩ dɩyɛ nɩ sʋ̃ nlumanlɩ. Aziyianɩ ɛgyɩkɩ̃ɩ̃ be mɛda sʋ̃ yɛ Angela nlumanlɩ a, na kakɩ yɩ ɩsʋ̃mɩ kɛɛ ɔhʋanɩbukolɛvʋlɔ. Kristine yi hũ Joshua, nɩɩ bɛ ɣa baalɛ Andrea, nɩɩ Bayɩbʋlʋ dɩyɛzumanlɛmaa sʋ̃maa sʋ̃ benyiaa anyunumihɔlɛ paa.

Wɔ asʋ̃mavʋlɔ yɩ bɛ mmɩlɩ zʋ nɩ, mmenii sʋ̃maa hanlɩ mɔɔ bɛdɩlɩ bɛvalɩ Gyisɛsɩ nwʋ nɩ be behileli bo mmusunwamaa nɩɩ bɔ ɔhɔnwʋmmɔ. (Dwɔ. 1:​41, 42a; Egy. 10:​24, 27, 48; 16:​25-33) Mɩnla ti mɔɔ wʋáɣizia wʋ Bayɩbʋlʋ dɩyɛzumanlɛmaa nɩɩ anyɩnlɩlelɛmaa mvʋlɔ kɛɛ, “Asʋ̃ ezi mmenii be sʋ̃ mɔɔ bɛ anyɩ keleli nwʋmɔ kɛɛ bokozuma Bayɩbʋlʋ yɩ a?” Ebiye a iluwa odwokɔɣizialɛ sikalɛ eyi zʋ nɩ, ekenyia mmenii sʋ̃maa mɔɔ bɛpɛ kɛɛ bosuma Bayɩbʋlʋ yɩ.