1-2. (a) Mɩnla bʋwabɩlɛ yɛ nɩ Pɔɔlʋ wɔ numɔ mmɩlɩ mɔ ɩhɛlɛlɩ kɛlɛta ɩhɔ ɩmanlɩ Ɛfɩsɛsɩmaa nɩ a? (b) Mɩnla ndwokɔɣizialɛ yɛ yekozunzu nwʋmɔ a?

 MMƖLƖ mɔ bedianlɩ Pɔɔlʋ fiyiadɩ wɔ awudo wɔ Wulomi nɩ, nɩ ɩpɛ kɛɛ ɩhyɛ yi mmeliyema dedimaa nɩ ɛzɩzɩbɛ. Naasʋ̃ nɩ ɩlɔ́kʋla kɔhɔ bɛ ɛkɛnɩ ankasa, meti ɩhɛlɛlɩ ahɛlɛta. Ɩhɛlɛlɩ ahɛlɛta eyi numɔ ɔkʋ̃ ɩhɔ manlɩ Ɛfɩsɛsɩmaa nɩ wɔ kɛyɛ alʋbɔ 60 anzɛnyɩɩ 61 Y.M. nu.—Ɛfɩ. 1:1; 4:1.

² Kɛyɛ alʋbɔ bunlu mɔɔ nɩ idua numɔ nɩ, nɩ Pɔɔlʋ va mmɩlɩ sʋ̃maa ɩhã odwokɔba nɩ wɔ Ɛfɩsɛsɩ. (Egy. 19:​1, 8-10; 20:​20, 21) Nɩ ɩdɔ yi mmeliyema yɩ baaba, na nɩ ɩpɛ kɛɛ ɩbʋwa bɛ ma bɔkɔ zʋ bedi nɔhʋanlɛ bɛma Gyehova. Naasʋ̃ mɩnla ti mɔɔ ɩhɛlɛlɩ kɛlɛta ɩvalɩ anwunzumi nɩɩ hanyɩɩ nwʋ ɩhɔ ɩmanlɩ Kilisinyimaa mɔɔ bɔvɔ ngɔlɔ bɛ nɩ a? Na mɩnla yɛ Kilisinyiamaa munwala kɔhʋla kozuma wɔ yɩ fʋlɔdulɛ yɩ nu a? Bɛmá yezunzu ndwokɔɣizialɛ eyimmɔ nwʋ.

BƆZƲ̃ ANWUZUMI NU BƆHƆLƖ HANYƖƖ NU

3. Mɩnla ndwokɔ abɔkɔ yɛ Pɔɔlʋ va lili egyima wɔ kɛlɛta mɔɔ ɩhɛlɛlɩ ɩhɔ manlɩ Ɛfɩsɛsɩmaa nɩ nu a?

³ Pɔɔlʋ hɛlɛlɩ manlɩ Kilisinyiamaa mɔɔ nɩ bɔwɔ Ɛfɩsɛsɩ nɩ kɛɛ: ‘Bɔmʋnlɩ nɩ, nɩ mʋnlʋmmɔzabɛ bɔwɔ anwunzumi nu na nnɛ mɛyɩ bɔwɔ hanyɩɩ nu.’ (Ɛfɩ. 5:8) Wɔ ɛkɩ nɩ, Pɔɔlʋ valɩ ndwokɔ abɔkɔ anwunzumi nɩɩ hanyɩɩ ɩva ihileli kezimɔ nɩ Ɛfɩsɛsɩmaa nɩ bɛyɛ nzɩnzanlɩyɛ kezile wɔ bɛ ɛbɩlawɔlɛ nu. Bɛmá yehila sianti mɔɔ Pɔɔlʋ hʋla hanlɩ kɛɛ bɔmʋnlɩ nɩ, nɩ Ɛfɩsɛsɩmaa nɩ “bɔwɔ anwunzumi nu” nɩ.

4. Mɩnla ɔhʋanɩ zʋ yɛ nɩ Ɛfɩsɛsɩmaa nɩ wɔ anwunzumi nu a?

⁴ Awohwizʋ̃mɩnlɛ. Ansaana Ɛfɩsɛsɩmaa mɔɔ Pɔɔlʋ hɛlɛlɩ kɛlɛta  eyi hɔ manlɩ bɛ nɩ bazuma nɔhʋanlɛ yɩ na bɛayɛ Kilisinyiamaa nɩ, nɩ bɛdɩ nkɛlɛ bɛma awohwizʋ̃mɩnlɛ nɩɩ dedi mbʋanlɩ azʋlɔtʋ. Ɛfɩsɛsɩ twonwa yi nu yɛ nɩ asɔlɩ pika mɔɔ Gilikimaa bɛ nyamɩnlɩ Atɩmɩsɩ wɔ nɩ wɔ a. Mmenii mɔɔ nɩ bɔwɔ kɛnɩ ɔzɔ mmɩlɩ nɩ, nɩ bɔnwʋ yɩ kɛɛ mɛyɩ yɛ ɩdɩ pika mɔɔ ɩyɛ pɩkɛ paa mɔɔ begyina kyɩ̃ a. Nɩ mmenii kɔ ɔzɔ asɔlɩ pika yɩ nu bɔkɔ bɔsʋ̃mɩ awʋzʋmɩ. Bɛzabɛ mɔɔ nɩ bɛyɛ asɔlɩ pika yɩ sasʋ nɩɩ nyamɩnlɩ Atɩmɩsɩ nwʋ aboduwaba bɔtɔnɩ nɩ, nɩ benyia ozukua paa. (Egy. 19:23-27) Akʋ̃ sʋ̃, bɛzabɛ mɔɔ nɩ bɔwɔ Ɛfɩsɛsɩ nɩ, nɩ bɛyɩ ngongyia.—Egy. 19:19.

5. Mɩnla ɔhʋanɩ zʋ yɛ nɩ Ɛfɩsɛsɩmaa nɩ bɛ ɛbɩlawɔlɛ zɩkɛ a?

⁵ Nna nu ɛbɩlazɩkɛlɛ. Mmenii mɔɔ bɔwɔ Ɛfɩsɛsɩ nɩ, nɩ bɔbɔ ɛbɩla tanɩ. Na nɩ bɛ anyɩ ɩádʋnlɩ nninyeni apɩtã mɔɔ bɛyɛ nɩ nwʋ kʋlaa. Sɛ ɩyɛ na beyiyia numɔ kɛɛ bedii ɛɣɛlɛ anzɛnyɩɩ bɔsʋ̃mɩɩ a, nɩ mɔɔ bɛkã nɩɩ mɔɔ bɛyɛ munwala falɩ nna nu nkitanwʋlilɛ nwʋ. (Ɛfɩ. 5:3) Nɩ Ɛfɩsɛsɩmaa nɩ bo nu sʋ̃maa “bɛ anyɩ ɩádʋnlɩ hwɩɩ” nwʋ, kile kɛɛ nɩ “bɛáli tanɩ mɔɔ bɛyɛ nɩ nwʋ ɛyɛkɛ.” (Ɛfɩ. 4:​17-19) Ansaana bokozuma nɔhʋanlɛ yɩ ma bɔkɔnwʋ mɔɔ ɩdɩ baaba nɩɩ tanɩ nɩ, sɛ nɩ bɛyɛ tanɩ be a, be tiwʋwaba iálile bɛ kʋlaa anzɛnyɩɩ nɩ bɛánwʋ yɩ kɛɛ bokowu mɔɔ bɛyɛɛ nɩ nwʋ ngʋnda bekehile Gyehova. Eyi ti yɛ Pɔɔlʋ hanlɩ bɔ nwʋ odwokɔ kɛɛ “bɛ adwɩnɩ nu ɩdɩ anwunzumi, bɛáhɩnla nnwʋanlɩ nɩ mɔɔ Nyamɩnlɩ ɩfa ɩma nɩ nwʋ” yɩ a.

6. Mɩnla ti mɔɔ Pɔɔlʋ hanlɩ kɛɛ akʋ̃ dɩyɛ nɩ Ɛfɩsɛsɩmaa nɩ “bɔwɔ hanyɩɩ nu” yɩ a?

⁶ Naasʋ̃ nɩ Ɛfɩsɛsɩmaa nɩ be wɔ kɛnɩ a, bɔzʋ̃ anwunzumi nu bɛyɩ bɔ nwʋ. Pɔɔlʋ hɛlɛlɩ valɩ bɔ nwʋ kɛɛ “bɔwɔ hanyɩɩ nu.” (Ɛfɩ. 5:8) Akʋ̃ dɩyɛ, nɩ bɛfa Gyehova yi Odwokɔ mɔɔ ɩdɩ kɛɛ hanyɩɩ nɩ bɔbɔ bɛ ɛbɩla. (Ndw. 119:105) Nɩ Ɛfɩsɛsɩmaa eyimmɔ beyiaki awohwizʋ̃mɩnlɛ nyɛlɩyɛ nɩɩ ɛbɩlazɩkɛlɛ munwala. Sikalɛyɩ, nɩ ‘bɔbɔɔ mmɔdɩnɩ kɛɛ bɛkɛyɛ be nninyeni kɛɛ Nyamɩnlɩ’ na bɛayɛ nninyeni mɔɔ ɩkɔzɔ yɩ anyɩ.—Ɛfɩ. 5:1.

7. Mɩnla ɔhʋanɩ zʋ yɛ yɛ bʋwabɩlɛ dɩkɛɛ Ɛfɩsɛsɩmaa mɔɔ bɛɣa bɛyɛlɩ Kilisinyiamaa bɛ dɩyɛ yɩ a?

⁷ Ɔzɔ la yɛ amɩyɛ sʋ̃, ansaana yekozuma nɔhʋanlɛ yɩ nɩ, nɩ ye nu be wɔ awohwizʋ̃mɩnlɛ  nu, na nɩ yɛbɔ ɛbɩla mbʋanlɩ mbʋanlɩ dɩkɛɛ mɔɔ yɛwɔ anwunzumi nu. Ye nu be valɩ yɛ nwʋ wulalɩ awohwizʋ̃mɩnlɛ ɔlʋbɔlilɛ azʋlɔtʋ nu; ye nu be sʋ̃ wɔlɩ ɛbɩla mbʋanlɩ mbʋanlɩ. Naasʋ̃ mmɩlɩ mɔ yɛɣa yezumanlɩ Gyehova nwʋ dɩyɛ na yɛnwʋnlɩ mɔɔ ɩdɩ baaba nɩɩ tanɩ nɩ, yɛyɛlɩ nzɩnzanlɩyɛ. Yɛwɔlɩ yɩ tʋ kɛɛ yɛbɔɔ yɛ ɛbɩla kɛmɔ Gyehova pɛ yɩ nɩ, na eyi ɩma yenyia mfasʋ sʋ̃maa. (Ayɩ. 48:17) Kakɩ yɩ yeyiyia ndwokɔzɩzɩbɛ dɩyɛ, naasʋ̃ ɩsɛ kɛɛ yɛbɔ mmɔdɩnɩ yɛtwɩ̃ yɛ nwʋ wɔ anwunzumi mɔɔ yɛzʋ̃ numɔ yɛyɩ nɩ nwʋ, na ‘yɛahɔ zʋ yɛawɔ yɛ ɛbɩla kɛɛ mmenii mɔɔ bɔwɔ hanyɩɩ nɩ nu.’ Kɛ ɩkɛyɛ na yɛahwɩ̃ yɛ nwʋ wɔ anwunzumi nwʋ a?

TWƖ̃ WƲ NWƲ WƆ ƐBƖLAZƖKƐLƐ NWƲ

8. Kɛmɔ Ɛfɩsɛsɩmaa 5:​3-5 kile nɩ, mɩnla yɛ nɩ ɩsɛ kɛɛ Ɛfɩsɛsɩmaa nɩ bɔtwɩ̃ bɔ nwʋ wɔ nwʋmɔ a?

⁸ Kɩnga Ɛfɩsɛsɩmaa 5:​3-5. Nɩ ɩsɛ kɛɛ Ɛfɩsɛsɩmaa mɔɔ bɛdɩ Kilisinyiamaa nɩ bɔkɔ zʋlɔ bɔpʋ nyɛlɩyɛ mɔɔ Gyehova ɩábɛ yɩ nɩ na ama bɛahɔ zʋ bɛahwɩ̃ bɔ nwʋ wɔ ɛbɩlazɩkɛlɛ nwʋ. Eyi kile kɛɛ nɩ ɩsɛ kɛɛ bɔtwɩ̃ bɔ nwʋ wɔ nna nu ɛbɩlazɩkɛlɛ nwʋ na íni kɛɛ bɔbɔ nwʋmɔ nkɔmmɔ po. Pɔɔlʋ hakɛlɩ bɛ kɛɛ sɛ bɛpɛ kɛɛ benyia “dɩka wɔ Kɩlayɩsɩ nɩɩ Nyamɩnlɩ Bulombunli manlɩ nɩ nu” a, ɩsɛ kɛɛ bɔtwɩ̃ bɔ nwʋ wɔ nninyeni eyimmɔ nwʋ.

9. Mɩnla ti mɔɔ ɩsɛ kɛɛ yekila bʋwɔ na yɛáyɛlɩ dɩyɛ bela mɔɔ ɩkɛma yɛkɛva yɛ nwʋ yekowula ɛbɩlazɩkɛlɛ nu a?

⁹ Ɩsɛ kɛɛ amɩyɛ sʋ̃ yɛkɔ zʋlɔ yɛtwɩ̃ yɛ nwʋ wɔ “anwunzumi nu nyɛlɩyɛ mbʋanlɩ mbʋanlɩ nɩ mmɔ mɔɔ mmenii bɛyɛ na mfasʋ íni ɔzʋlɔ nɩ” nwʋ. (Ɛfɩ. 5:11) Ozumanlɛnwʋnlɛ azʋlɔtʋ ma yɛnwʋ kɛɛ sɛ abiye kila, itiye, anzɛnyɩɩ ɩbɔ ɛbɩlazɩkɛlɛ nwʋ nkɔmmɔ a, ɩma ɩyɛ mɛlɛkɛ kɛɛ ɩkɛyɛ tanɩ. (Gyn. 3:6; Gye. 1:​14, 15) Wɔ manlɩ be zʋ nɩ, mmeliyema sʋ̃maa wɔlɩ yɩ tʋ kɛɛ bɛ nɩɩ bɔ nwʋ bɔ nwʋ bɔbɔɔ nkɔmmɔ wɔ sohyiya midiya zʋ na bɛɣa bɛyɛlɩ “ɔhɔnwʋmmɔ.” Ahyɛasɩ yɩ mɛyɩ, nɩ bɔbɔ sunzuma ɔfʋã nu nninyeni nwʋ nkɔmmɔ. Naasʋ̃ mmɩlɩ ɩkɔlɩɩ zʋlɔ nɩ, bɔwɔlɩ yɩ tʋ kɛɛ bɔbɔɔ nna nu nkitanwʋlilɛ nwʋ nkɔmmɔ. Aɣinzi yi, ɔzɔ mmeliyema yɩ bo nu sʋ̃maa hanlɩ kɛɛ ɔzɔ nkɔmmɔ yɩ mɔɔ bɔwɔlɩ nɩ manlɩ bɛvalɩ bɔ nwʋ bowulalɩ nna nu ɛbɩlazɩkɛlɛ nu.

10. Mɩnla adwɩnɩ yɛ Setanɩ pɛ kɛɛ yenyia a? (Ɛfɩsɛsɩmaa 5:6)

¹⁰ Mɔɔ Gyehova kã kɛɛ ɩdɩ tanɩ na nwʋmɔ ɩádɩ nɩ, Setanɩ yi oyuwadɩ yɩ pɛ kɛɛ yede yedi kɛɛ odwokɔ bela íni nwʋmɔ. (2 Pit. 2:19) Eyi ɩáyɛ nnwʋánlɩ! Ɔzʋmɩ mmɩlɩ tɩndɩnlɩ yɛ Abɔnsamɩ ɩwɔ mmɔdɩnɩ kɛɛ ɩkɛzɩkɛ mmenii bɛ adwɩnɩ wɔ mɔɔ ɩdɩ baaba nɩɩ tanɩ nwʋ a. (Ayɩ. 5:20; 2 Kɔl. 4:4) Meti ɩáyɛ nnwʋánlɩ kɛɛ fɩlɩmɩ, TV zʋ egyimalilɛ, nɩɩ wɛbsayɩtɩ azʋlɔtʋ ma mmenii nyia adwɩnɩ mɔɔ ɩ nɩɩ Gyehova yɩ mmɛla mɔɔ ɩfalɩ ɛbɩlawɔlɛ nwʋ nɩ iáyiyia! Setanɩ pɛ kɛɛ yenyia adwɩnɩ kɛɛ, nyɛlɩyɛ evinli nɩɩ ɛbɩlawɔlɛ mbʋanlɩ mbʋanlɩ mɔɔ mmenii bɔ wɔ oyuwadɩ nu nɩ, ɩ́dɩ tanɩ mfomi ɩyɛ fɛ baaba.—Kɩnga Ɛfɩsɛsɩmaa 5:6.

11. Mɩnla ɔhʋanɩ zʋ yɛ Angela yi ozumanlɛnwʋnlɛ yɩ ma yɛnwʋ kɛɛ ihyinyia kɛɛ yɛfa fʋlɔdulɛ mɔɔ nɣɛlɛbɛ wɔ numɔ mɔɔ ɩwɔ Ɛfɩsɛsɩmaa 5:7 yi nu yɛyɛ egyima a? (Kila mfonyini yi sʋ̃.)

¹¹ Setanɩ pɛ kɛɛ yɛfa mmenii mɔɔ sɛ yɛ nɩɩ bɛ bɔ a, ɩkɛyɛ sɩ ɩkɛma yɛ kɛɛ yɛkɛva Gyehova yɩ mmɛla yɛkɛyɛ egyima nɩ ɔhɔnwʋ. Eyi ti Pɔɔlʋ duli Ɛfɩsɛsɩmaa nɩ fʋlɔ kɛɛ: “Máma bɛ nɩɩ ɔzɔ mmenii nɩ botu wɔ ɔhʋanɩ bela nu,” kile kɛɛ, mmenii mɔɔ bɛyɛ nyɛlɩyɛ mɔɔ ɩázɔ Nyamɩnlɩ anyɩ nɩ. (Ɛfɩ. 5:7) Meti ɩsɛ kɛɛ yekila yɛ nwʋ bʋwɔ paa yɛtɛla tɩɩtɩɩ Ɛfɩsɛsɩmaa nɩ po, iluwakɛɛ nnɛ, kɛ mmenii mɔɔ yɛ nɩɩ bɛ yiyia anyunumi nɩɩ anyunumi nkʋ̃ la yɛ bɛba bɛyɛ yɛ ɔhɔnwʋmmɔ a. Mfomi bɛzabɛ mɔɔ yɛ nɩɩ bɛ di nkitanwʋ wɔ sohyiya midiya zʋ sʋ̃ kɩnla nwʋ. Angela a mɔɔ ɩzʋ̃ Asia nɩ nwʋnlɩ  kɛɛ, sohyiya midiya zʋ kɔhʋla kɛyɛ ɛyɛlɛ paa. Ɩhanlɩ kɛɛ: “Ngyɩkɩ̃ɩ̃ ngyɩkɩ̃ɩ̃ la, ɩkɔhʋla ɩkɛzɩkɛ wʋ adwɩnɩ. Ɩákyɛ yɛ minyianlɩ adwɩnɩ kɛɛ sɛ mɩ nɩɩ bɛzabɛ mɔɔ bɛáva Bayɩbʋlʋ nu mmɛla bɛyɛ hwɩɩ po bɔ a, ɩáyɛ hwɩɩ. Aɣinzi yi, mɩɣa minyianlɩ adwɩnɩ kɛɛ sɛ mʋbɔ ɛbɩla mɔɔ Gyehova ɩábɛ yɩ po a, mfʋmɩ bela íni nwʋmɔ.” Naasʋ̃ asafʋ nu mbanimbani be bɔzʋ̃ ɔlɔlɛ nu bɔwʋwalɩ Angela ma ɩyɛlɩ nzɩnzanlɩyɛ mɔɔ ihyinyia nɩ. Ɩkã kɛɛ: “Sikalɛyɩ, sunzuma ɔfʋã nu nninyeni yɛ mɩfa muwula mɩ adwɩnɩ nu a, na kɛ sohyiya midiya zʋ nninyeni a.”

12. Mɩnla yɛ ɩkɔwʋwa yɛ ma yekegyina Gyehova yɩ mmɛla mɔ ɩfalɩ baaba nɩɩ tanɩ nwʋ nɩ mɛda a?

¹² Adwɩnɩ mɔɔ oyuwadɩ yɩ ɩlɛ yɩ kɛɛ ɛbɩlazɩkɛlɛ dɩ baaba nɩ, ɩsɛ kɛɛ yɛkʋ̃ yetiyia, iluwakɛɛ yezi kɛɛ ɩdɩbɛ. (Ɛfɩ. 4:​19, 20) Ɩdɩ baaba kɛɛ yekeɣizia yɛ nwʋ kɛɛ: ‘Asʋ̃ mʋbɔ mmɔdɩnɩ kɛɛ mʋkɔhwɩ̃ mʋ nwʋ wɔ mi egyima nu maa, mu sukuulumaa, anzɛnyɩɩ mmenii mvʋlɔ mɔɔ bɛáwu Gyehova yɩ mmɛla nɩ nwʋ a? Asʋ̃ mɩfa akɛnɣazɩzɩbɛ mikyina Gyehova yɩ mmɛla mɛda, mmɩlɩ po mɔ mmenii mvʋlɔ kã kɛɛ mɩádwɩnɩ mmenii nwʋ nɩ a?’ Kɛmɔ 2 Timoti 2:​20-22 kã nɩ, ɩsɛ kɛɛ yekila bʋwɔ mmɩlɩ mɔ yɛpɛɛ ɔhɔnwʋmmɔ wɔ Kilisinyianɩ asafʋ yɩ nu sʋ̃. Ɩsɛ kɛɛ yɛma ɩbʋwa yɛ adwɩnɩ nu kɛɛ, abiyemmɔ bɔlɔ́bʋwa yɛ ma yɛkɔzʋ̃mɩ Gyehova wɔ nɔhʋanlɛ nu.

BƆWƆ́ BƐ ƐBƖLA KƐƐ “MMENII MƆƆ BƆWƆ HANYƖƖ NƖ NU”

13. Sɛ bɛkã kɛɛ bɔwɔ́ bɛ ɛbɩla kɛɛ “mmenii mɔɔ bɔwɔ hanyɩɩ nu nɩ” a, kɛ yɩ tʋ kile a? (Ɛfɩsɛsɩmaa 5:​7-9)

¹³ Pɔɔlʋ hyɛlɩ Kilisinyiamaa mɔɔ bɔwɔ Ɛfɩsɛsɩ nɩ ɛzɩzɩbɛ kɛɛ bɔhɔ́ zʋlɔ bɔhwɩ̃ bɔ nwʋ wɔ anwunzumi nu na bɔhɔ́ zʋlɔ bɛyɛ bɛ dɩyɛ kɛɛ “mmenii mɔɔ bɔwɔ hanyɩɩ nu nɩ.” (Kɩnga Ɛfɩsɛsɩmaa 5:​7-9.) Mɩnla yɛ eyi kile a? Ɩsɛ kɛɛ yɛbɔ yɛ ɛbɩla kɛɛ nɔhʋanlɛ Kilisinyiamaa eɣile bela. Ɔhʋanɩ ɔkʋ̃ mɔɔ yekoluwa zʋ yɛkɛyɛ zɔ yɛ lɛ kɛɛ yekozuma Bayɩbʋlʋ yɩ nɩɩ yɛ Bayɩbʋlʋ nwʋ awuuku yi bʋwɔ. Ihyinyia paa kɛɛ yɛfa yɛ adwɩnɩ yesiye Gyisɛsɩ mɔɔ ɩdɩ “oyuwadɩ hanyɩɩ” nɩ yi ndianwʋ nɩɩ yi ehilehilelɛ zʋ.—Dwɔ. 8:12; Ɛɣɛ. 6:23.

14. Mɩnla ɔhʋanɩ zʋ yɛ sunzuma nwanzanwanza yɩ kɔhʋla kɔwʋwa yɛ a?

¹⁴ Akʋ̃ sʋ̃, yehyinyia Nyamɩnlɩ sunzuma nwanzanwanza yɩ na ɩawʋwa yɛ ma yɛahɔ zʋlɔ  yɛawɔ yɛ ɛbɩla kɛɛ “mmenii mɔɔ bɔwɔ hanyɩɩ nu nɩ.” Mɩnla ti a? Iluwakɛɛ ɩ́la azɩ kɛɛ yɛkɛma yɛ nwʋ kɛdɩ wɔ oyuwadɩ eyi mɔɔ ɛbɩlazɩkɛlɛ yɛ numɔ manlɩ yɩ nu. (1 Tɛs. 4:​3-5, 7, 8) Sunzuma nwanzanwanza yɩ kɔwʋwa yɛ ma yɛkɔhʋ̃ yekediyia adwɩnɩ mɔɔ mmenii mɔɔ bɔwɔ oyuwadɩ eyi nu mɔɔ bɛáwu Gyehova yɩ mmɛla bɛlɛ yɩ nɩ. Sunzuma nwanzanwanza yɩ kɔwʋwa yɛ sʋ̃ ma yɛkɛla “baabayɛlɛ, pɛlɩpɛlɩlilɛ nɩɩ nɔhʋanlɛ sʋ̃maa” ali.—Ɛfɩ. 5:9.

15. Kɛ ɩkɛyɛ na yɛanyia sunzuma nwanzanwanza nɩ a? (Ɛfɩsɛsɩmaa 5:​19, 20)

¹⁵ Ɔhʋanɩ ɔkʋ̃ mɔɔ yekoluwa zʋlɔ yekenyia sunzuma nwanzanwanza yɩ yɛ lɛ kɛɛ yɛkɔwɔ mpayɩ yekeziã. Gyisɛsɩ hanlɩ kɛɛ Gyehova ɩkɛva “sunzuma nwanzanwanza nɩ ɩkɛma mmenii mɔɔ bebizia yɩ nɩ.” (Lk. 11:13) Akʋ̃ sʋ̃, sɛ yɛbɔ numɔ yɛyɩ Gyehova ayɛlɛ wɔ asafʋ ayiyialɩyɛ tʋ a, yekenyia sunzuma nwanzanwanza nɩ. (Kɩnga Ɛfɩsɛsɩmaa 5:​19, 20.) Tumi mɔɔ Nyamɩnlɩ sunzuma nwanzanwanza nɩ ikenyia wɔ yɛ zʋ nɩ, ɩkɔwʋwa yɛ ma yɛkɔwɔ ɛbɩla mɔɔ ɩsɔ Nyamɩnlɩ anyɩ.

16. Mɩnla yɛ ɩkɔwʋwa yɛ ma yekezizi abɔkɔ baaba a? (Ɛfɩsɛsɩmaa 5:​10, 17)

¹⁶ Sɛ ɩsɛ kɛɛ yesi pɔkɔ be mɔɔ nwʋmɔ hyinyia a, ɩwɔ kɛɛ ‘yɛnwʋ mɔɔ Gyehova pɛ kɛɛ yɛyɛ’ na yɛma ɩ nɩɩ yɛ pɔkɔzilɛ yɩ yiyia. (Kɩnga Ɛfɩsɛsɩmaa 5:​10, 17.) Sɛ yɛpɩbɛlɩ Bayɩbʋlʋ egyinalɛzʋ-ndwokɔ mɔɔ ɩfalɩ yɛ bʋwabɩlɛ yɩ nwʋ a, nɩ ikile kɛɛ yɛpɩbɛɛ Nyamɩnlɩ yɩ adwɩnɩ wɔ odwokɔ yɩ nwʋ. Na sɛ yɛfa egyinalɛzʋ-ndwokɔ yɩ yedi egyima a, ɩkɛma yekezizi abɔkɔ baaba.

17. Kɛ ɩkɛyɛ na yɛava yɛ mmɩlɩ yɛali egyima bʋwɔ a? (Ɛfɩsɛsɩmaa 5:​15, 16, NWT) (Kila mfonyini yi sʋ̃.)

¹⁷ Pɔɔlʋ izia sʋ̃ iduli Kilisinyiamaa mɔɔ bɔwɔ Ɛfɩsɛsɩ nɩ fʋlɔ kɛɛ bɛvá bɛ mmɩlɩ beli egyima bʋwɔ. (Kɩnga Ɛfɩsɛsɩmaa 5:​15, 16, NWT.) Yɛ tamvʋlɔ Abɔnsamɩ pɛ kɛɛ yɛfa yɛ mmɩlɩ munwala yɛpɩbɛ anwʋnyia wɔ oyuwadɩ yɩ nu na ama yɛányia mmɩlɩ yɛfa yɛsʋ̃mɩ Nyamɩnlɩ. (1 Dwɔ. 5:19) Sa ɩkʋla ɩyɛ mɛlɛkɛ kɛɛ Kilisinyianii be kɛva yɩ adwɩnɩ keziye ozukua, ɔnwʋmazumanlɛ, anzɛnyɩɩ egyima zʋ kɛdɛla kɛɛ ɩkɛbɩbɛ ahʋanɩ mvʋlɔ mɔɔ ikoluwa zʋlɔ  ɩkɛdɛlɛ yɩ ɔzʋ̃mɩnlɛ nu. Sɛ ɩyɛ zɔ a, nɩ ikile kɛɛ ɩmaa oyuwadɩ adwɩnɩ kenyia yɩ zʋ tumi. Nɔhʋanlɛ nu nɩ, ɔzɔ nninyeni yi ɩ́dɩ nninyeni tanɩ, naasʋ̃ íni kɛɛ yɛma mɛyɩ di bɔmʋnlɩ wɔ yɛ ɛbɩlawɔlɛ nu. Sɛ yɛkɔwɔ yɛ ɛbɩla kɛɛ “mmenii mɔɔ bɔwɔ hanyɩɩ nu nɩ” a, ihyinyia kɛɛ yɛfa yɛ mmɩlɩ yedi egyima bʋwɔ na yɛfa yɛ adwɩnɩ yesiye nninyeni mɔɔ nwʋmɔ hyinyia paa nɩ zʋ.

18. Mɩnla yɛ Donald yɛlɩ na ama ɩava yɩ mmɩlɩ iali egyima bʋwɔ a?

¹⁸ Pɩbɛ ɔhʋanɩ azʋlɔtʋ mɔɔ okoluwa zʋ kɛyɛ sʋ̃maa wɔ Gyehova ɔzʋ̃mɩnlɛ nu. Ɔzɔ yɛ Donald mɔɔ ɩda South Africa nɩ yɛlɩ a. Ɩhanlɩ kɛɛ: “Muzunzunli mʋ bʋwabɩlɛ yɩ nwʋ na mizianlɩ Gyehova kɛɛ ɩwʋwá mɩ ma mɩyɛ sʋ̃maa wɔ yɩ ɔzʋ̃mɩnlɛ nu. Mizianlɩ yɩ kɛɛ ɩmá minyia egyima mɔɔ ɩkɛma mikenyia mmɩlɩ sʋ̃maa mʋkɔhɔ dasɩlɛlilɛ. Gyehova wʋwalɩ mɩ ma minyianlɩ egyima mɔɔ ɩdɩ zɔ mɩyɛlɩ. Na mɩ nɩɩ mɩ yɩ munwala wɔlɩ mmɩlɩ munwala ɔzʋ̃mɩnlɛ egyima yɩ tʋ.”

19. Kɛ ɩkɛyɛ na yɛahɔ zʋ yɛawɔ yɛ ɛbɩla kɛɛ “mmenii mɔɔ bɔwɔ hanyɩɩ nu nɩ” a?

¹⁹ Pɔɔlʋ yɩ kɛlɛta mɔɔ ɩhɛlɛlɩ ɩhɔ ɩmanlɩ Ɛfɩsɛsɩmaa nɩ, ɩwʋwalɩ bɛ ma bɔhɔlɩ zʋlɔ belili Gyehova nɔhʋanlɛ. Na ɔzɔ ɔhʋanɩhilelɛ yɩ kɔhʋla kɔwʋwa amɩyɛ sʋ̃. Kɛmɔ yɛɣa yɛnwʋ yɩ nɩ, ɩkɔwʋwa yɛ ma yɛkɔnwʋ nninyeni mɔɔ ɩsɛ kɛɛ yɛfa yedide yɛ anyɩ nɩɩ mmenii mɔɔ ɩsɛ kɛɛ yɛfa bɛ ɔhɔnwʋ. Ɩkɛhyɛ yɛ ɛzɩzɩbɛ ma yekozuma Bayɩbʋlʋ eɣile bela na nɔhʋanlɛ yɩ hanyɩɩ nɩ iahile yɛ ɔhʋanɩ wɔ dɩyɛ bela mɔɔ yɛkɛyɛ nɩ nu. Na ɩma yɛnwʋ kɛɛ sunzuma nwanzanwanza yɩ nwʋ hyinyia iluwakɛɛ ɩkɛma yekenyia subanɩ ngɩnlɩma. Sɛ yɛfa mɔɔ Pɔɔlʋ hɛlɛlɩ nɩ yɛyɛ egyima a, ɩkɛma yekezizi abɔkɔ mɔɔ ɩ nɩɩ Gyehova yɩ adwɩnɩ yiyia. Sɛ yɛyɛ eyimmɔ a, ɩkɔwʋwa yɛ ma yɛkɔbʋ anwunzumi mɔɔ ɩwɔ oyuwadɩ yɩ nu nɩ na yɛawʋwa hanyɩɩ nɩ nu!