Wɔ January 27, 2023 nɩ, mmenii sʋ̃maa kɛhakɛ Dwuumaa sʋ̃maa mɔɔ bohunhunli bɛ wɔ Nazi aɣanɩ tumi tʋ nɩ. Ebiye a, atinuzɩzɩbɛ odwokɔ nɩɩ awukasɛmɩ mɔɔ ɩhɔlɩ zʋlɔ alʋbɔ 75 mɔɔ idua nu nɩ kɛma mmenii keɣizia bɔ nwʋ kɛɛ, mɩnla ti mɔɔ Nyamɩnlɩ manlɩ ɔhʋanɩ ma bohunhunli Dwuumaa sʋ̃maa wɔ Nazi aɣanɩ tʋ yɩ a?

•   Sɛ ɔkɔnwʋ mɔɔ Bayɩbʋlʋ kã falɩ eyi nwʋ a, kɩnga odwokɔ mɔɔ ise “Mɩnla Ti Mɔɔ Bohunhunli Dwuumaa Wɔ Nazi Aɣanɩ Tʋ a? Mɩnla Ti Mɔɔ Nyamɩnlɩ Iási Yɩ Ɔhʋanɩ a?”

 Bɛdɩɩdɩɩlɩ Dwuumaa sʋ̃maa wɔ Nazi aɣanɩ yɩ tʋ. Bɛhyɛlɩda bohunwahunwanlɩ mmenii abʋmɩ abʋmɩ sʋ̃maa zɛ munwa bohunhunli bɛ. Bɛvalɩ bɛ anyɩ beziyeli mmenii okuwu be zʋ bohunhunli bɛ wɔ ɔzɔ mmɩlɩ nɩ. Ɔzɔ okuwu nɩ, bo nu be yɛ lɛ Gyehova Dasɩvʋlɔmaa mɔɔ iluwa bɛ dedi mɔɔ igyĩ Bayɩbʋlʋ zʋ nɩ ti, bodwodwuli bediyialɩ bɛ nɩ.

•   Sɛ ɛpɛ kɛɛ osuma sʋ̃maa a, kɩnga odwokɔ mɔɔ ise “Mɩnla Yɛ Ɩdʋlɩ Gyehova Dasɩvʋlɔmaa Wɔ Nazi Aɣanɩ Tʋ a?”

 Mmenii sʋ̃maa bo kunlu tu kɛɛ odwokɔ be dɩkɛɛ mɔɔ izili wɔ Nazi aɣanɩ tʋ nɩ kɔhʋla kezi dɔkʋ̃. Anyɩnlɩlelɛ odwokɔ yɛ lɛ kɛɛ, Bayɩbʋlʋ bɔ eɣile be mɔɔ atinuzɩzɩbɛ nɩɩ awukasɛmɩ ɩlɔ́kɔlɩ zʋlɔ nwʋ anʋhʋba.

•   “‘Na mɩzamɩ mizi adwɩnɩ mɔɔ mɩva wɔ bɔ nwʋ,’ Gyehova yɛ ise a, ‘ɩdɩ azʋ̃nudwolɩyɛ adwɩnɩ, na kɛ mmuzulo a, kɛ mɩkɛma eɣile be nɩɩ anyɩnlɩlazʋ bɛ.’”—Gyɛlɩmaya 29:11. a

 Ɔzɔ odwokɔ eyi kɛɣa numɔ wɔ mmɩlɩ mɔ Gyehova ma atinuzɩzɩbɛ odwokɔ ɣa awielɩyɛ na iziyeziye mɔɔ nninyeni tanɩ ɩva ɩɣa nɩ. Ɩlɛ́kyɛ bela:

•   Ɩkɛyɩ atinuzɩzɩbɛmaa mɔɔ bɛtɩɩdɩɩ mmenii wɔ ɛkɛnɩ.—Ɛɣɛlɛwulɛ 2:22.

•   Ikele mmenii mɔɔ bɔnwʋnlɩ amanɩyɛ nɩ.—Yikile 21:4.

•   Ɩkɛva bɛzabɛ mɔɔ bowuwu nɩ ɩkɛɣa nnwʋanlɩ nu dɔkʋ̃.—Dwɔɔnʋ 5:28, 29.

 Sa ɔkʋla nyia anwʋlazʋ wɔ ɛɣɛɛlɛyɩkyɩlɛ ndwokɔ mɔɔ Bayɩbʋlʋ ɩfa ɩma nɩ nu. Sɛ ɔkɔnwʋ kezimɔ ekenyia numɔ anwʋlazʋ a, yɛtʋʋ salɛ yɛkɔvʋlɔ wʋ kɛɛ twé yɛ Bayɩbʋlʋ dɩyɛzumalɛ nhyɩhyɛlɩyɛ mɔɔ bɛáduwa hwɩɩ nɩ kila.