“Mmɩlantɩyɛ nɩɩ nɣɛdɛkɛ sʋ̃maa benyiaa adwɩnɩ nu adimakɛlɛ, na yɛɣa yɛnwʋ yɩ kɛɛ sohyiya midiya kɩnla nninyeni mɔɔ ɩfa eyi ɩba nɩ nwʋ.”—Dr. Vivek Murthy, U.S. surgeon general, New York Times, June 17, 2024.

 Kɛ ɩkɛyɛ na awʋvʋlɔ bɛawɔ bo nnwuakula nwʋ banɩ wɔ asianɩ mɔɔ sohyiya midiya fa ba nɩ nwʋ a? Bayɩbʋlʋ fa fʋlɔdulɛ kɩnlɩma be ma.

 Kila Bayɩbʋlʋ nu egyinalɛzʋ-ndwokɔ asã eyimmɔ.

 “Nɣɛlɛbɛvʋlɔ mɛyɩ ɩdwɩnɩ agyiakɛ bela mɔɔ ikodu nɩ nwʋ.”—Ɛɣɛlɛwulɛ 14:15.

 Sohyiya midiya kɔhʋla kenyia wʋ ɣa zʋ tumi wɔ ɔhʋanɩ mɔɔ ɩávata zʋ, meti áma ɛtɩ nɣanlɩ kɛɛ ɔhʋanɩ bela zʋ ɩsɛ kɛɛ wʋ ɣa fa di egyima. Ansaana ɛkɛma ɩkɛva ikeli egyima nɩ, kila kɛɛ wʋ nɩ yɩ adwɩnɩ dĩ mɔɔ ɩkɔhʋla ɩkɔnwʋ mmɩlɩ dʋdʋ mɔɔ ɩkɛva ikeli egyima, ɔhɔnwʋmmɔba mɔɔ ɩkɛva wɔ zʋ, nɩɩ kezimɔ ɩkɔbʋ nninyeni mɔɔ ɩávata.

•   Sɛ ɛpɛɛ ɔnwʋ nwʋmɔ ndwokɔ sʋ̃maa a, yesiãã wʋ kɩnga “Memma Me Ba Nkɔ Sohyia Midia So Anaa?” nɩɩ “Boa Wo Ba a Ɔyɛ Babun Ma Ɔnyɛ Ahwɛyiye Wɔ Sohyia Midia So.”

 “Bɛvá bɛ mmɩlɩ beli egyima bʋwɔ.”—Ɛfɩsɛsɩmaa 5:16.

 Ansaana ɛkɛma wʋ ɣa kɛva sohyiya midiya keli egyima nɩ, ma ɩnwʋ kezimɔ ɩkɛva ikeli egyima, na ma ɩnwʋ́ kezimɔ eyi kɔwɔ yɩ nwʋ banɩ. Fa wʋ anyɩ tiã azɩ kila nzɩnzanlɩyɛ azʋlɔtʋ mɔɔ ɩɣa wʋ ɣa yɩ, yɩ ɛbɩlawɔlɛ nu na ama wʋanwʋ ɛyɩlɛ mɔɔ okodua kɛma yɩ.

•   Fa vidiyo mɔɔ bɔdʋlɔdʋlɔ mɔɔ ise Ma Wʋ Anyɩ Ɩlá Ɛkɛ Wɔ Intanɛtɩ Nkitanwʋlilɛ Zʋ nɩ bʋwa wʋ ɣa ma ɩnwʋ́ sianti mɔɔ ɩsɛ kɛɛ ikila kezimɔ ɩkɛva sohyiya midiya ikeli egyima bʋwɔ.

 Bayɩbʋlʋ yɩ kã kɛɛ yɛda “mmɩlɩ mɔ numɔ yɛ sɩ” nu. (2 Timoti 3:1-5) Naasʋ̃ ɩma yɛnwʋ kezimɔ yekegyina ndwokɔzɩzɩbɛ eyimmɔ munwa. Sa enyia ndwokɔ mɔɔ igyĩ Bayɩbʋlʋ zʋ mɔɔ ɩbʋ 20 ma awʋvʋlɔ nɩɩ bo nnwuakula wɔ ɔzɔ odwokɔ eyi mɔɔ ɩfalɩ mmɩlantɩyɛ nɩɩ nɣɛdɛkɛ bɛ adwɩnɩ nu pɔkɔdɩlɛ nwʋ.