“Yɔŋ nɔ matɔ nɔ eo; nanu enu ganganwo koɖo enu ciwo mɛ datɛnŋ amɔŋje o, ciwo dejeshi ɖɛ o nɔ eo faa.”​—Ʒeremi 33:3, Xexe Yeye Gɔmeɖeɖe.

 “Yɔŋ nɔ matɔ nɔ eo; nanu enu gangan koɖo enu citocito ciwo dejeshi ɖɛ o nɔ eo.”​—Ʒeremi 33:3, Nouvelle Version International.

 To enyɔ cɛwo jiɔ, Mawu yɔkɔ amɛwo mɔ wo le do gbe ɖaɖa nɔ ye. Nɔ mɛ ciwo yí se amɛyɔyɔ lɔ lɔn doji yí do gbe ɖaɖa nɔ Mawuɔ, ánu ŋciwo yí avajɔ le esɔ mɛ nɔ wo.

 “Yɔŋ Nɔ Matɔ Nɔ Eo.” Enyɔgbe “Yɔŋ” denyi kpɔ mɔ woayɔkɔ alo adokɔ axwa yɔ Mawu ŋkɔ kpoŋ yɔ o. Le lɛɔ, woayɔ Mawu yí nyi mɔ, woaji yi kpekpedonu alo emɔdasɛnamɛ yitɔ le gbedodoɖa mɛ.​—Ehajiji Wema 4:1; Ʒeremi 29:12.

 Eɖyi mɔ blema Izraɛli jukɔn yí wonu amɛyɔyɔ nɔ. Jukɔn cɛ trɔ gbeɖe Mawu ɖɛ, yí Babiloni hwakɔnwo je wo ji. (Ʒeremi 32:1, 2) Yehowa a yɔkɔ Izraɛliviwo mɔ wo le trɔgbɔ va ye gbɔ to gbedodoɖa mɛ.

 “Nanu enu ganganwo koɖo enu ciwo mɛ datɛnŋ amɔŋje o, ciwo dejeshi ɖɛ o nɔ eo.” Enu ciwo Mawu ɖo gbe mɔ yeavadre mɛ nyi enu ciwo mɛ wodatɛnŋ “amɛŋje o.” Ci gɔnmɛ yí nyi mɔ enyɔ ci gɔnmɛ agbetɔwo datɛnŋ amɔŋje wowoŋtɔwo gbeɖe o. Enyɔgbe “enu ciwo mɛ datɛnŋ amɔŋje o” tɛnŋ gbeɖo gɔnmɛsese ci yí nyi “enyɔ wlawlawo.”

 “Enyɔ wlawla” ciwo mɛ Mawu avaɖeɔ? Wowo yí nyi enu ciwo yí avajɔ le esɔmɛ: woagban blema Ʒerusalɛmu jugan lɔ, yí mɛɖekɛ dagbe nɔ mɛ o; vɔ woagbevatrɔ acui yí amɛwo agbevanɔ mɛ ke. (Ʒeremi 30:1-3; 33:4, 7, 8) Yi goduɔ, Mawu gbeɖo gbe mɔ wodagbevagu jukɔn ci yí nyi ye sɛntɔwo o.​—Ʒeremi 32:36-38.

 Yehowa do eŋɛ cɛ nɔ enyɔnuɖɛtɔ Ʒeremi le exwe 608 D.Y., hwecinu Efyɔ Sidekia wawa exwe amɛwo le gaji. Ʒeremi nu ɖɛ mɔ Ʒerusalɛmu avajuin yí woalé Sidekia yi hwashigbemɛ. Ci ŋɛdu lɔ dejɔ ji nɔ efyɔ lɔɔ, élé Ʒeremi.​—Ʒeremi 32:1-5; 33:1; 37:21.

 Nɔnɔmɛ cɛwo mɛ yí Mawu nu amɛyɔyɔ ci yí le Ʒeremi 33:3 mɛ le. Ŋshishitɔɔ, Efyɔ Sidekia koɖo amɛ sugbɔtɔ le jukɔn lɔ mɛ kpɔtɔ le egu fɔnkɔ. (Ʒeremi 7:26; 25:4) Wodedo gbe ɖaɖa nɔ Mawu yí biɔ emɔdasɛnamɛ yitɔ o. Le exwe ɖeka goduɔ, woxɔ acɛkpakpa lɔ le Sidekia shi, wogban Ʒerusalɛmu jugan lɔ, yí lé amɛ sugbɔtɔ ci yí ci agbe yi hwashigbemɛ le Babiloni.​—Ʒeremi 39:1-7.

 Enyɔ ciwo woŋwlɛ do Ʒeremi 33:3 ɖo ŋwi nɔ enuhlɛntɔwo gbɛ mɔ, nɔ mɛɖe donɔ gbe ɖaɖa nɔ Mawu yí kplanɔ yi Nyɔ Bibla lɔɔ, Mawu atɛnŋ ana yí ajeshi ‘enu ciwo yí Mawu dro, yí anya wo nywiɖe’ yí agbejeshi “nuwlawlawo do citocito tɔxu.” (Kolosetɔwo 1:9; 1 Korɛntitɔwo 2:10) Enu citocito cɛwo yí nyi enu ciwo Mawu ɖo gbe mɔ yeawa le majinjinɖe mɛ.​—Enyɔdasɛ 21:3, 4.

 Kpɔ video kpoli cɛ keŋ akpɔ enumɛtoto nɔ Ʒeremi wema lɔ.