JAJƐWO BIƆNƆ SE MƆ
Lé Bibla atɛnŋ akpedo ŋnu doɔ?—Akpaxwe 3: Kpɔnɔ Nyɔna Sugbɔ So Ao Bibla Hlɛnhlɛn Mɛ
Nɔ èkpɔ Bibla mɛɔ, àkpɔ mɔ ŋciwo woŋwlɛ do mɛ sugbɔ. Ŋgbegbɔjɔ eo yí namɔ yedahlin o! Ewaɖeɔ, kpɔ Bibla lɔ shigbe ekplɔn ci ji ŋɖuɖu sugbɔ hamɛhamɛ le nɛ. Dàtɛnŋ aɖu ŋciwo pleŋ èkpɔ o. Vɔ àsɔ ciwo àɖu yí xodu aɖɔ eo dru.
Nɔ àɖu ele sugbɔ nɔ Bibla hlɛnhlɛn ɔ, ele mɔ ao susu anɔnɔ ŋci èhlɛnkɔ ji. Nyɔta cɛ akpedo eo nu nawɛ ahan.
Ŋciwo yí le nyɔci cɛ mɛ
Nyi yí taɖo ao susu ɖo anɔnɔ ŋci èhlɛnnɔ le Bibla mɛ jiɔ?
Nɔ èdonɔ gbla sugbɔ do ao Bibla hlɛnhlɛn mɛɔ, ahanke yí àgbekpɔnɔ nyɔna sugbɔ so mɛ nɛ. Bu tamɛ kpɔ so kpɔwɛ cɛ nu: Nɔ èsɔ tiigbe do shizozu mɛ yí ɖi ti blaŋ ɔ, àse hwɛnhwɛn yitɔ hwɛɖeka le shi lɔ mɛ. Vɔ àse vivi nɔ yi hwɛnhwɛn lɔ nywiɖe nɔ ègbi do eshizozu lɔ mɛ na nɔ hwenu ɖe.
Ahanke ele le Bibla hlɛnhlɛn kpaxwe can nɛ. Mìdanɔ hwlɛndoji ahlɛnnɔ Bibla lɔ blaŋ o, vɔ mìazannɔ hwenu ɖe yí asɔ bunɔ tamɛ kpɔ so ŋci mìhlɛn nu nɔ aɖo mìwo ji mɛ. Edɔ ci yí mɛ ci yí ŋwlɛ Ehajiji Wema 119 wanɔ nɛ. Énu so Mawu se lɔ nu mɔ: “Ŋbunɔ tamɛ kpɔ so nu le ŋkeke lɔ keŋkeŋ mɛ.”—Ehajiji Wema 119:97, NWT.
Le nyɔnɔnwi mɛɔ, nyɔ cɛ dedasɛ mɔ àzan ŋkeke lɔ keŋkeŋ gamɛwo pleŋ ŋtɔŋtɔ asɔ hlɛnkɔ Bibla yí abukɔ tamɛ kpɔ so nu o. Susu vevi lɔ ke: Ehajiji Wema ŋwlɛtɔ lɔ zan hwenu ɖe yí sɔ bu tamɛ kpɔ so Mawu Nyɔ lɔ nu. Ecɛ kpedo nu esɔ gbeta nywiwo.—Ehajiji Wema 119:98-100.
“Enɔnyɛ nu nɔŋ gbeɖeka mɔ, ‘èɖo ŋkeke amadrɛ le hwɛshila ɖeka mɛ yí le kwɛshila lɔ mɛɔ, èwanɔ nu sugbɔ nɔ eɔɖeki. Nyi yí taɖo dazan hwenu ɖewo do Yehowa nuɔ? Eyi nyi nunywi ci àwa!’”—Melanie.
Nɔ èbu tamɛ kpɔ so Bibla gɔnmɛɖosewo nuɔ, ákpedo eo nu sugbɔ nasɔnɔ gbeta nywiwo. Le kpɔwɛ mɛ, nɔ èsɔkɔ mɛ ciwo ànyi xlɔ koɖo abi hwenu woteteɛ eo kpɔ mɔ eɔ lé wa enudɔndɔn ɖe.
Lé àwɛ yí atɛnŋ akpɔnɔ nyɔna sugbɔ so Bibla hlɛnhlɛn mɛɔ?
Wa toto so nu. Cugbejɛvi ɖeka ci yí tɔ mɔ Julia nu mɔ, “Ðo hwenu ɖe koŋ ɖɛ asɔ hlɛnnɔ Bibla yí amado eo. Nya ŋci àhlɛn, hwenu àhlin koɖo shini ànɔ yí ahlin.”
Jinɔ texwe nywi ci ànɔ. Cugbejɛ ɖeka ci yí tɔ mɔ Gianna nu mɔ, “Jinɔ texwe ci yí ɖoɖa yí anɔ. Sɔ kpe nɔ yɛɔ, na nɔ ao xomumɛtɔ kpɛtɛwo anya toto ci èwa yí asɔ hlɛnnɔ Bibla, nɔ woŋgbevaɖenɔ fun nɔ eo o.”
Nɔ Bibla ci yí le telefonu, ɔdinatɛɛ alo mashini bu ɖe ji yí èzankɔɔ, wɛ keke enuŋwlɛŋwlɛ bu ɖe ŋgbeva ŋmɛ nɔ mashini lɔ yí avadɔn ao susu so nuhlɛnhlɛn lɔ ji o. Èhɛn àte Bibla wematɔ zanzan kpɔ. Le nyɔnɔnwi mɛɔ, enumɛkukuwo dasɛ mɔ nɔ mìhlɛnkɔ nu le wema jiɔ, enɔnɔ fafɛɖe nɔ mì mɔ mìamɔŋje ŋci mìhlɛnkɔ lɔ mɛ. Vɔ nɔ enyi mashini ɖe ji mìhlɛnkɔ nu lɔ leɔ, egbɔnnɔ nu gbɔxwe mìwo susu anɔ ŋci mìhlɛnkɔ Iɔ ɖekɛ ji.
“Ŋkpɔ mɔ anyi susu denɔnɔ ŋci ŋhlɛnhlɛn le mashini ji nywiɖe o. Hweɖewonuɔ, enuŋwlɛŋwlɛ buwo vanɔ ŋmɛ ni alo kɔnnɛshiɔn agbe dɔ wawa abi mashini lɔ avatɔ fafa. Vɔ nɔ wema ŋtɔŋtɔ ji enu lɔ le yí nahlɛn ɔ, ecɛ ɖe dejɔnɔ o. Ŋci ɖekɛ yí le veviɖe yí nyi mɔ, shini nanɔ ahlɛn enu lɔ le klɛn nywiɖe.”—Elena.
Donɔ gbe ɖaɖa doŋkɔ. Nu nɔ Yehowa mɔ lé kpedo ye nu nɔ yeamɔŋje Bibla kpaxwe ci yejikɔ ahlɛn mɛ, lé kpedo ye nu nɔ yeavaɖo ŋwi nu lɔ yí agbekpɔ nyɔna so mɛ.—Ʒaki 1:5.
Nɔ àwa nu asɔ koɖo gbedodoɖa lɔɔ, èɖo awa numɛkuku citocito so exolɔlɔ ci èhlɛnkɔ lɔ nu. Lé àwɛ awa numɛkuku lɔɔ? Nɔ JW Library dɔwanu ji alo eka ji yí èhlɛnkɔ Bibla lɔ leɔ, àtɛnŋ aӡin alɔ̀ do kpukpui ɖe ji yí akpɔ wema koɖo nyɔta bu ciwo yí xo nuxu so nu.
Biɔnɔ nyɔwo se. Le kpɔwɛ mɛ: ‘Nyi exolɔlɔ cɛ kplakplaŋ so Yehowa nuɔ? Édadasɛ yi nɔnɔmɛ ɖe ci natɛnŋ asran a?’ (Efezitɔwo 5:1) ‘Nyi ŋkpla so exolɔlɔ cɛ mɛ ci ji natɛnŋ awa do le anyi gbe mɛɔ?’ (Ehajiji Wema 119:105) ‘Natɛnŋ azan ŋci ŋhlɛn lɔ yí asɔ kpedo mɛbuwo nu le ŋɖe mɛa?’—Rɔmatɔwo 1:11.
Gbebiɔ eɔɖeki se mɔ, ‘Lé ŋci ŋhlɛn lɔ ca ka koɖo Bibla nyɔta doɔ?’ Biɔse cɛ le veviɖe. Nyi yí taɖoɔ? Ðo nushianu ci yí le Bibla mɛ, so Gɔnmɛjeje wema ji yi Enyɔdasɛ wema ji, ca ka koɖo nyɔta vevi cɛ. Nyɔta lɔ yí nyi: Lé Yehowa ato jeŋkwi mɛ Fyɔɖuxu yitɔ lɔ ji do yí akɔ yiŋkɔ ŋci yí agbeɖo kpe yi ji mɔ eye yí ɖogbe akpa nɔ xexe lɔ yí lé yekpanɔ acɛ do yí nyi nywitɔ.
