Eŋɛnywiwema Luiki Tɔ 10:1-42
-
Yesu ɖo enukplavi 70 lɔwo ɖaɖa Mawu nyɔ nugbe (1-12)
-
Yesu do babɛ nɔ eju ciwo yí detrɔ ji mɛ o (13-16)
-
Enukplavi 70 lɔwo trɔgbɔ (17-20)
-
Yesu kanfu Edalɔ ɖo éwa xomɛvu nɔ mɛ ciwo yí sɔ wowoɖekiwo hwe (21-24)
-
Labalu ci Yesu do so Samaritɔ ci yí lɔn yi kpena nu (25-37)
-
Yesu vayi yɔ Marta koɖo Mari kpɔ (38-42)
10 Le ŋcɛwo goduɔ, Axwetɔ lɔ can amɛ 70 buwo yí dɔ wo ɖaɖa eve-eve yí woɖedo doŋkɔ ni yí yi eju koɖo kɔxwi ɖekpokpui ci mɛ yiŋtɔ avayi mɛ.
2 Eyi enu nɔ wo mɔ: “Le nyɔnɔnwi mɛɔ, jinuku ci woaɖe lɔ sugbɔ, vɔ edɔwatɔwo denyi ŋɖe o. Eyi taɖo míɖe kuku nɔ Botɔ lɔ nɔ aɖo edɔwatɔwo ɖaɖa.
3 Míyi! Míkpɔ ɖa! Míle shigbe lɛngbɔviwo nɛ yí ŋdɔdɔ mí ɖaɖa ehlawo mɛ.
4 Míŋgbehɛn ehogodu alo ahɛn ŋɖuɖu do godu mɛ alo fɔkpawo o yí míŋgbedo gbe nɔ mɛɖe le emɔ lɔ ji o.*
5 Nɔ míɖo axwe ɖe mɛɔ, mínu doŋkɔ mɔ: ‘Fafa nɔ axwe cɛ.’
6 Nɔ fafa xlɔ ɖe le nɔɔ, fafa míwotɔ anɔ koɖi. Vɔ nɔ eɖe deliɔ, fafa míwotɔ agbetrɔva mí ji.
7 Eyi taɖo mínɔ axwe lɔ mɛ yí ŋciwo woana míɔ, míɖu wo yí anu wo. Ðo ele mɔ edɔwatɔ axɔ yi fɛncu. Míŋgbesonɔ le axwewo mɛ ayinɔ ebuwo mɛ o.
8 “Gbesɔ kpe niɔ, nɔ míyi eju ɖekpokpui mɛ yí woxɔ míɔ, míɖu ŋci woasɔ ɖo akɔnmɛ nɔ mí.
9 Mída dɔ̀ nɔ dɔ̀nɔ ciwo yí le eju lɔ mɛ yí anu nɔ wo mɔ: ‘Mawu Fyɔɖuxu lɔ gogo.’
10 Vɔ nɔ míyi eju ɖekpokpui mɛ yí wodexɔ míɔ, míto je yi mɔganwo ji yí anu mɔ:
11 ‘Mìxuxukɔ míwo ju mɛ kɔzɔwo le afɔwo kɔ ɖɛ nɔ mí hɛnnɛ. Vɔ mínya mɔ, Mawu Fyɔɖuxu lɔ gogo.’
12 Ŋnukɔ nɔ mí mɔ, enuwo akandomɛ nɔ Sodomu sɔwu eju ŋtɔ́ le ŋkeke hunnɔ ji.
13 “Babɛ nɔ mí Korazɛntɔwo! Babɛ nɔ mí Bɛtsaidatɔwo! Ðo nɔ enyi enujiŋ ciwo tɔxu míkpɔ yí Tirutɔwo koɖo Sidɔntɔwo kpɔɔ, woatrɔ ji mɛ xoxo yí ata enuwamuvɔn yí anɔ afi mɛ.
14 Eyi taɖo enuwo akandomɛ nɔ Tirutɔwo koɖo Sidɔntɔwo sɔwu míwo le kojoɖogbe.
15 Eyi míwo Kapɛrnawumutɔwo, woagangan mí keke míayi tɔ jeŋkwia? Oo, keke Yɔdu* mɛ míayi kpɔ míwoɖekiwo le!
16 “Mɛɖekpokpui ci yí ɖokɔ to míɔ, éɖokɔ to nyɛ can. Mɛɖekpokpui ci yí gbe míɔ, égbe nyɛ can yí mɛɖekpokpui ci yí gbeŋ ɔ, égbe mɛ ci yí dɔŋ ɖaɖa hɛnnɛ.”
17 Yi goduɔ, enukplavi 70 lɔwo trɔgbɔ koɖo jijɔ yí nukɔ mɔ: “Axwetɔ, gbɔngbɔnvɔnwo ŋtɔkpu na ta mì ci mìzanzan ao ŋkɔ.”
18 Eyi enu nɔ wo mɔ: “Ŋkpɔ Satana juin xoxo shigbe ejiɖezo so jeŋkwi mɛ nɛ.
19 Míkpɔ ɖa! Ŋna acɛ mí nɔ míaɖo afɔ edanwo koɖo kekliwo ji. Míaɖu ketɔnɔ ŋsɛnwo pleŋ ji yí ŋɖekpokpui dawa nu koɖo mí o.
20 Ele ahan gan, míŋgbekpɔ jijɔ mɔ gbɔngbɔnvɔn lɔwo na ta mí o. Vɔ míkpɔ jijɔ mɔ woŋwlɛ míwo ŋkɔwo le jeŋkwi mɛ.”
21 Le gaxoxo ŋtɔ́ mɛɔ, éɖɔ koɖo gbɔngbɔn kɔkɔɛ yí kpɔ jijɔ yí nu mɔ: “Edanyɛ, jeŋkwi koɖo nyigban Xwetɔ, ŋkanfu eo le amɛwo mɛ. Ðo èwa ɖaŋ wla ŋcɛwo do ŋɖɛnyatɔwo koɖo wemanyatɔwo yí dasɛ wo nɔ ɖevihwɛwo. Ɛɛ, Edanyɛ, ɖo ahan èji mɔ yeawɛ nɛ.
22 Edanyɛ sɔ enuwo pleŋ do alɔ̀ mɛ nɔŋ yí mɛɖe dejeshi Evi lɔ ɖɛ sɔ zeto Eda lɔ nu o. Ahanke mɛɖe dejeshi Eda lɔ sɔ zeto Evi lɔ koɖo mɛɖekpokpui ci yí Evi lɔ lɔn mɔ yeadasɛ Eda lɔ nɔ nu o.”
23 Eyi etrɔ kpanŋkɔ enukplavi lɔwo yí nu nɔ wowoɖekɛwo mɔ: “Eji jɔkɔ mɛ ciwo yí kpɔ ŋciwo míkpɔkɔ.
24 Ðo ŋnukɔ nɔ mí mɔ enyɔnuɖɛtɔ koɖo efyɔ sugbɔ ji mɔ yewoakpɔ ŋciwo míkpɔkpɔ, gan wodekpɔ wo o; yí ase enyɔ ciwo míseseɛ, gan wodese wo o.”
25 Ecɛyɛɔ, kpɔ ɖa! Ŋsu ɖeka ci yí jeshi Ese lɔ ɖɛ nywiɖe so je te keŋ adui kpɔ yí mɔ: “Enukplamɛtɔ, nyi ŋɖo awa keŋ akpɔ* agbe mavɔɔ?”
26 Yesu biɔɛ se mɔ: “Nyi woŋwlɛ do Ese lɔ mɛɔ? Ci èhlin ɖe, lé èse mɛ doɔ?”
27 Éɖo ŋci mɔ: “‘Èɖo alɔn Yehowa* ao Mawu koɖo ao ji pleŋ, ao se* pleŋ, ao ŋsɛn pleŋ koɖo ao susu pleŋ’ yí ‘alɔn ao kpena shigbe eoŋtɔ nɛ.’”
28 Énu ni mɔ: “Èwa ɖaŋ ɖo ŋci nywiɖe; kpɔtɔ awɛkɔ ahan keŋ akpɔ agbe.”
29 Vɔ ci ŋsu lɔ ji mɔ yeadasɛ mɔ yenyi amɛjɔjɔɛɔ, ébiɔ Yesu se mɔ: “Mi cucucu yí nyi anyi kpenaɔ?”
30 Yesu nu do nu ni mɔ: “Ŋsu ɖeka so le Ʒerusalɛmu vayikɔ Ʒeriko yí je flafinɔwo lɔ̀ mɛ. Woxɔ ŋciwo yí le shi keke je ŋciwo edo ji. Woxui yí so gbeɖi ɖɛ yí ele beɖebeɖe.
31 Ga ŋtɔ́ mɛ pɛpɛpɛɔ, avɔnsatɔ ɖeka to mɔ lɔ vayikɔ. Vɔ ci ekpɔɛɔ, éto akpa ni vayi.
32 Ahanke Levitɔ ɖeka can vayikɔ yí kpɔɛ le nɔ yí to akpa ni vayi nɛ.
33 Vɔ Samaritɔ ɖeka to emɔ lɔ vayikɔ yí kpɔɛ yí yi nu sadɔnu ni.
34 Eyi egbosɔɛ yí ku ami koɖo vɛn do abi lɔwo mɛ ni yí bla wo ni. Ékɔɛ do yiŋtɔ sɔkɛtɛ ji yí hin yi mɛdruzexu nɔ woale bu ni.
35 Yi ŋkegbuɔ, ésɔ denari* amɛve na mɛ ci yí kpɔkpɔ mɛdruzexu lɔ ji yí nu mɔ: ‘Le bu ni yí ŋɖekpokpui ci àgbezan dojiɔ, nacui nɔ eo nɔ ŋtrɔgbɔ.’
36 Le wowo amɛtɔn lɔwo mɛ ɖe, mi yí dasɛ mɔ yenyi ŋsu ci flafinɔwo xo lɔ kpena doŋ nɔ eoɔ?”
37 Émɔ: “Mɛ ci yí ku ŋshishi ni yɔ.” Eyi Yesu nu ni mɔ: “So yi ayi wɛ ahan hɛnnɛ.”
38 Ci wole emɔ lɔ ji yikɔɔ, éyi kɔxwi ɖeka mɛ. Eyi nyɔnu ɖeka ci yí tɔ mɔ Marta xɔɛ mɛdru do yi xomɛ.
39 Nɔviɛ nyɔnushi ɖeka tɔ mɔ Mari. Énɔ nyinɔnɔ do akɔnmɛ nɔ Axwetɔ lɔ yí seseɛ enyɔ ciwo enukɔ.*
40 Vɔ ŋkuvi bya nɔ Marta yɛ do edɔ sugbɔ wawa nu. Eyi taɖo eva Yesu gbɔ yí nu mɔ: “Axwetɔ, ci nɔvinyɛ tashi edɔ lɔwo do kɔ nɔ nyɛɖekɛ ɖe, dewa ɖe nɔ eo ba? Nu ni nɔ avakpedo ŋnu.”
41 Eyi Axwetɔ lɔ ɖo ŋci ni mɔ: “Marta, Marta, èsosoɔ jika nɔ enu sugbɔ.
42 Vɔ enu kankin alo kuɖeka kpoŋ yí ʒan. Ðo Mari yɛsɔ enywitɔ lɔ yí mɛɖe daxɔɛ le shi o.”
Gɔnmɛnuŋwlɛnŋwlɛn
^ Alo “nɔ mídodoɔ gbe nɔ amɛwoɔ, míŋgbefan wo o.”
^ Alo “Hadɛsi” ci yí nyi agbetɔviwo pleŋ yɔdu. Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “aɖu cinɔ nɔ.”
^ Kpɔ Enumɛɖeɖewo A5.
^ Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo B14.
^ Yi gɔnmɛɖeɖe tiin: “yi nyɔwo.”
