Eŋɛnywiwema Luiki Tɔ 24:1-53
24 Le ŋkeke ŋkɔtɔ ji nɔ kwɛshila lɔ nyidin kucukucuɔ, wova yɔdu* lɔ tu yí hɛn enuhwɛnte ciwo wodra do ɖɛ.
2 Vɔ wokpɔ mɔ wobli ekpe lɔ so yɔdu* lɔ nu.
3 Eyi ci woɖo mɛɔ, wodekpɔ Axwetɔ Yesu cɔ lɔ o.
4 Wodan ta nɔ nyɔ lɔ. Eyi kpɔ ɖa! Ŋsu amɛve ɖekawo do awu ciwo yí dada zo yí va le te le axa nɔ wo.
5 Nyɔnu lɔwo vɔn sugbɔ yí do ta gu. Eyi ŋsu lɔwo biɔ wo se mɔ: “Nyi yí taɖo míjijiɛ amɛleagbu kpɔ le amɛkukuwo mɛɔ?
6 Degbele elɛ o, ɖo wofuin so ku. Míɖo ŋwi nyɔ ci enu nɔ mí hwenu ele Galile.
7 Émɔ woasɔ Agbetɔvi lɔ do alɔ̀ mɛ nɔ nuvɔnwatɔwo yí woakin do aci nu. Vɔ woafuin do agbe le ŋkeke amɛtɔntɔ lɔ gbe.”
8 Eyi woɖo ŋwi yi nyɔwo.
9 Woso le yɔdu* lɔ tu yí vayi nu nyɔ cɛwo pleŋ nɔ apotru Wiɖeka lɔwo koɖo mɛkpɛtɛwo pleŋ.
10 Nyɔnu cɛwo yí nyi Mari Magdalɛnu, Ʒani koɖo Mari Ʒaki nɔlɔ. Eyi nyɔnu kpɛtɛ ciwo yí bɔdo wo nu can nukɔ nyɔ cɛwo nɔ apotru lɔwo.
11 Ele ahan gan, wodekando nyɔnu lɔwo ji o yí enyɔ ci nyɔnu lɔwo nu deɖyi nyɔnɔnwi doŋ nɔ wo o.
12 Vɔ Piɛ so yí lɔ ju yi yɔdu* lɔ gbɔ. Ci ebubɔ yí glo mɛ kpɔ ɖaɖaɔ, lɛnvɔn lɔwo ɖekɛ ekpɔ. Eyi taɖo etrɔ yí bubuɔ ŋci yí jɔ lɔ kpɔ.
13 Vɔ gbenɔgbe lɔɔ, enukplavi amɛve yikɔ kɔxwi ɖeka ci yí tɔ mɔ Emawusi mɛ. Éle kpeci wiɖeka* han nɔ Ʒerusalɛmu.
14 Eyi wole seŋ kankɔ so ŋciwo pleŋ yí jɔ nu.
15 Ci wole seŋ kankɔ so ŋcɛwo pleŋ nuɔ, Yesu ŋtɔ gbosɔ wo yí zɔn koɖo wo ɖedo.
16 Vɔ wodenya mɔ yɛ yɔ o.
17 Ébiɔ wo se mɔ: “Nyi nu míkankan seŋ so le emɔ lɔ jiɔ?” Eyi wonɔ te yí ci ŋshishi mɛ.
18 Mɛɖeka ci yí tɔ mɔ Kleopasi le wo mɛ biɔɛ se mɔ: “Mɛdru yí ènyi le Ʒerusalɛmu yí dènya* ŋciwo yí jɔ le ŋkeke cɛwo mɛa?”
19 Ébiɔ wo se mɔ: “Nyiwo yí jɔɔ?” Woɖo ŋci ni mɔ: “Ŋciwo yí jɔ do Yesu Nazarɛtitɔ lɔ ji yɔ. Ényi enyɔnuɖɛtɔ sɛnŋ ɖeka le wana koɖo nuxu mɛ le ŋkɔ nɔ Mawu koɖo agbetɔwo pleŋ.
20 Avɔnsatɔwo gawo koɖo jumɛga mìwotɔwo sɔ jo yí woso eku kojo ni yí kin do aci nu.
21 Vɔ mìwo kpɔkpɔ emɔ sa mɔ, eyi ahwlɛn Izraɛli gan. Gbesɔ kpe niɔ, egbɛ yí nyi ŋkeke amɛtɔn ke yí ŋcɛwo jɔ.
22 Ahanke nyɔnu ɖewo so mì mɛ yí va nu enyɔkpacamɛwo nɔ mì, ɖo wowo fɔn zan yí yi yɔdu* lɔ tu.
23 Vɔ wodekpɔ yi cɔ lɔ o. Wotrɔgbɔ yí va nu mɔ yewokpɔ mawudɔlawo hɛnnɛ yí womɔ yɛle agbe.
24 Yi goduɔ, mɛɖewo so le mì mɛ yí yi yɔdu* lɔ tu yí kpɔ nu lɔwo shigbe lé nyɔnu lɔwo nui do nɛ. Vɔ wodekpɔ yiŋtɔ o.”
25 Eyi enu nɔ wo mɔ: “Oo, enugɔnmɛmasetɔwo koɖo mɛ ciwo yí deɖe blɛ kannɔdo enyɔ ciwo pleŋ enyɔnuɖɛtɔwo nu nɔ wo ji o!
26 Dele veviɖe mɔ Kristo akpe fun cɛwo yí aɖo kanfukanfu yitɔ mɛ ba?”
27 Éɖe ŋciwo pleŋ Enuŋwlɛŋwlɛ lɔwo nu so nu mɛ nɔ wo. Étɔɛ so ŋciwo yí Moizi koɖo enyɔnuɖɛtɔwo pleŋ ŋwlɛ ji.
28 Ci wogogokɔ kɔxwi ci mɛ woyikɔɔ, éwa shigbe mɛ ci yí xɔ mɔ kpe fibu hannɛ.
29 Vɔ woʒin ji nɔ aci wo gbɔ. Wonu ni mɔ: “Nɔ mì gbɔ nɔ eŋ ake, ɖo ewe yi xɔ yí ezan tɔ dodo.” Eyi eci wo gbɔ.
30 Ci eɖukɔ nu* koɖo woɔ, ésɔ kpɔnnɔ yí yra do ji yí ŋi mɛ yí sɔ jo nɔ wo.
31 Eyi wovanya mɛ ci enyi. Vɔ ébu do wo kreɖeɖe.
32 Eyi wonu nɔ wowonɔnɔwo mɔ: “Kpakpa desɔ mì sugbɔ* ci exoxoɔ nuxu nɔ mì le emɔ lɔ ji yí wa ɖaŋ dredreɛ Enuŋwlɛŋwlɛ lɔwo mɛ nɔ mì ba?”
33 Eyi woso le gaxoxo ŋtɔ́ pɛpɛpɛ mɛ yí trɔyi Ʒerusalɛmu yí yi kpɔ apotru Wiɖeka lɔwo yí wobɔ ɖɛ koɖo nukplavi kpɛtɛwo
34 yí nukɔ mɔ: “Wofɔn Axwetɔ lɔ do agbe nyɔnɔnwi yí edasɛ yiɖeki nɔ Simɔ!”
35 Eyi wowo can nu ŋciwo yí jɔ le emɔ lɔ ji koɖo lé wovajeshi ɖɛ do ci eŋɛ kpɔnnɔ lɔ mɛ.
36 Hwenu wole enyɔ cɛwo nukɔɔ, Yesu ŋtɔ va nɔ te do dodomɛ nɔ wo yí mɔ: “Fafa nɔ mí.”
37 Vɔ jika so wo yí wovɔn haan yí wobukɔ mɔ gbɔngbɔn ɖe yí yewokpɔkpɔ.
38 Eyi taɖo ebiɔ wo se mɔ: “Nyi yí na mívɔnvɔn ɔ, nyi yí na míxoxoɔ nu kpɔ le míwo jiwo mɛɔ?
39 Míkpɔ anyi lɔ̀wo koɖo anyi fɔwo. Nyɛŋtɔ lɔ ke. Mítɔ alɔ̀ŋ kpɔ yí akpɔ, ɖo gbɔngbɔn deɖonɔ gbaza koɖo exu shigbe lé nyɛŋɖo hannɛ o.”
40 Eyi hwenu ele nyɔ cɛwo nukɔɔ, édasɛ yi lɔ̀wo koɖo yi fɔwo nɔ wo.
41 Vɔ ci eji jɔkɔ wo sugbɔ yí ekpɔtɔ yí kpacakɔ wo yí wodekankando nyɔ lɔ jiɔ, ébiɔ wo se mɔ: “Ŋɖuɖu ɖe le mí shia?”
42 Eyi wosɔ kpavi wiwi kankan ɖeka ni.
43 Ésɔɛ yí ɖui le ŋmɛ nɔ wo.
44 Yi goduɔ, énu nɔ wo mɔ: “Enyɔ cɛwo yí ŋnu nɔ mí hwenu ŋkpɔtɔ le mí gbɔ mɔ, enyɔ ciwo pleŋ yí Moizi Se lɔ, enyɔnuɖɛtɔwo koɖo Ehajijiwo nu so ŋnu ɖo ajɔ do ji.”
45 Eyi ehun wowo susuwo nɔ woawa ɖaŋ amɔŋje Enuŋwlɛŋwlɛ lɔwo mɛ.
46 Énu nɔ wo mɔ, “Woŋwlɛ ɖɛ mɔ: Kristo lɔ ɖo akpe fun yí woafuin le amɛkukuwo mɛ le ŋkeke amɛtɔntɔ lɔ gbe.
47 Eyi woadra jimɛtrɔtrɔ nyɔ nɔ nuvɔnwo sɔsɔke to yi ŋkɔ ji le jukɔnwo pleŋ mɛ. Woatɔɛ so Ʒerusalɛmu.
48 Míakpɔ ŋcɛwo tɔxu.
49 Míkpɔ ɖa! Nasɔ ŋci Danyɛ sɔ ɖo gbe nɔ mí jo nɔ mí. Vɔ mínɔ ju lɔ mɛ keke ana nɔ hwecinu míaxɔ ŋsɛn so jeŋkwi mɛ.”
50 Eyi ekplɔ wo ti keke va Betani yí kɔ yi lɔ̀wo yi ji yí yra wo.
51 Hwenu eyrakɔ woɔ, wosɔɛ so wo gbɔ yí kɔɛ yi jeŋkwi mɛ.
52 Wona bubu yi* yí trɔgbɔ va Ʒerusalɛmu koɖo jijɔ gangan ɖeka.
53 Eyi wonɔnɔ gbedoxɔ lɔ mɛ yí kannɔfu Mawu gashiagamɛ.
Gɔnmɛnuŋwlɛnŋwlɛn
^ Alo “eŋwiɖoɖo yɔdu.”
^ Alo “eŋwiɖoɖo yɔdu.”
^ Alo “eŋwiɖoɖo yɔdu.”
^ Alo “eŋwiɖoɖo yɔdu.”
^ Yi gɔnmɛɖeɖe tiin: “stadi 60.” Stadi ɖeka nyi mɛta 185. Kpɔ Enumɛɖeɖewo B14.
^ Alo taŋfuin, “Eoɖekɛ yí nyi mɛdru le Ʒerusalɛmu ci yí denya enyɔ lɔwoa?”
^ Alo “eŋwiɖoɖo yɔdu.”
^ Alo “eŋwiɖoɖo yɔdu.”
^ Alo “nɔ kplɔn nu.”
^ Yi g̱ɔnmɛɖeɖe tiin: “Mìwo jiwo dele zo le mì mɛ.”
^ Alo “Wobubɔ ni.”
