Eŋɛnywiwema Luiki Tɔ 8:1-56
-
Nyɔnuwo kplɔ Yesu do (1-3)
-
Labalu ci Yesu do so jinukudotɔ lɔ nu (4-8)
-
Enu ci yí taɖo Yesu do labaluwo (9, 10)
-
Yesu dre jinukudotɔ labalu lɔ mɛ (11-15)
-
Wodetɔ kaɖigban yí sɔ donɔ enu gɔnmɛ o (16-18)
-
Yesu nɔlɔ koɖo nɔviɛwo (19-21)
-
Yesu ɖo te jihɔn gangan ɖeka (22-25)
-
Yesu nya gbɔngbɔnvɔnwo ɖaɖa ehawo mɛ (26-39)
-
Ʒairu viɛ nyɔnuvi; nyɔnu ɖeka tɔ alɔ̀ awu nɔ Yesu (40-56)
8 Sabaɖe le yɛ goduɔ, Yesu yi juganwo koɖo kɔxwiwo mɛ yí dradra Mawu Fyɔɖuxu ŋɛnywi lɔ yí Amɛ Wive lɔwo bɔdo nu.
2 Nyɔnu ciwo mɛ enya gbɔngbɔnvɔnwo ti le koɖo ciwo eda dɔ̀ nɔ ɖewo can kplɔɛ do. Wowo yí nyi: Mari ci woyɔnɔ mɔ Magdalɛnu ci mɛ gbɔngbɔnvɔn amadrɛ to le;
3 Ʒani ci yí nyi Shuza ci yí kpɔnɔ Erodi nuwo ji ashiɛ; Suzanu koɖo nyɔnu sugbɔ bu ciwo yí zan wowo nuwo yí sɔ kpenɔdo wo nu.
4 Hwenu amɛahwa gangan ɖeka va bɔ yí amɛwo so eju vovovowo mɛ va hɛnnɛɔ, édo labalu nɔ wo mɔ:
5 “Jinukudotɔ ɖeka yi jinuku dogbe. Hwenu edokɔ jinuku lɔwoɔ, ɖowo je mɔ tu yí woɖo afɔ wo ji yí xeviwo va can wo ɖu.
6 Ebuwo je ekpewo mɛ yí mi. Vɔ ci wodekpɔ fafaɔ, wofiɔn.
7 Jinuku buwo je aŋwakanwo mɛ yí aŋwakan lɔwo shin koɖo wo yí vlu cɔn wo ji.
8 Vɔ ebuwo je nyigban nywi ji yí ci womiɔ, ɖekaɖeka sɛn ku 100.” Ci enu enyɔ cɛwo ɖegbɔɔ, édo axwa yí nu mɔ: “Mɛ ci eto li nɔ le si.”
9 Vɔ yi nukplaviwo biɔ gɔnmɛ se nɔ labalu lɔ.
10 Émɔ: “Wona gbe míwo nɔ míamɔŋje Mawu Fyɔɖuxu lɔ nyɔwlawla kɔkɔɛwo mɛ. Vɔ mɛkpɛtɛwoɔ, labaluwo mɛ woase wo le, keŋ nɔ wokpɔkpɔɛ can ɔ, wodakpɔ ŋɖe o yí nɔ wosisiɛ can ɔ, wodamɔŋje mɛ o.
11 Ecɛyɛɔ, labalu lɔ gɔnmɛɖeɖe ke: Jinuku lɔ yí nyi Mawu nyɔ.
12 Jinuku ciwo yí je mɔ tu yí nyi mɛ ciwo yí se nyɔ lɔ, vɔ Legba va sɔnɔ nyɔ lɔ so ji mɛ nɔ wo nɔ woŋgbexɔɛ se yí akpɔ hwlɛngan o.
13 Jinuku ciwo yí je ekpewo mɛ nyi mɛ ciwo yí se nyɔ lɔ yí xɔɛ koɖo jijɔ, vɔ wodedo ke o. Wokando nyɔ lɔ ji na nɔ hwenu ɖe, vɔ ci tetekpɔ vaɔ, wojuin.
14 Jinuku ciwo yí je aŋwakanwo mɛ nyi mɛ ciwo yí se nyɔ lɔ, vɔ xexe cɛ mɛ tamɛbubukpɔwo, dɔkunuwo koɖo jijɔkpɔkpɔ xexe cɛ mɛ tɔwo vlu yí cɔnnɔ wo ji keŋkeŋ yí wodeshin yí sɛnnɔ ku o.
15 Jinuku ciwo yí je nyigban nywi ji nyi mɛ ciwo yí wa ɖaŋ senɔ nyɔ lɔ koɖo eji nywi yí lini ɖɛ gogwiɖe keŋ sɛnnɔ ku le ejidodo mɛ.
16 “Mɛɖe detɔnɔ kaɖigban yí sɔ nu cuinni alo sɔ donɔ eba gɔnmɛ o, vɔ ésɔ danɔ do kaɖigbanhɛnnu ji nɔ aklɛn nɔ mɛ ciwo yí va axwe lɔ mɛ.
17 Ðo ŋɖekpokpui dale wlawla mɛ keke dagɔnma to o yí wodawa ɖaŋ asɔ ŋɖe wla keke wodavanya gbeɖe yí dagɔnma je dandanŋgbe o.
18 Eyi taɖo míɖo to ase nywiɖe; ɖo mɛ ci shi enu leɔ, woana sugbɔ yi doji, vɔ mɛ ci shi enu deleɔ, woaxɔ ci ebukɔ mɔ yewa ɖɛ ŋtɔkpu le shi.”
19 Ecɛyɛɔ, enɔlɔ koɖo nɔviɛwo va mɔ yewoakpɔɛ, vɔ ci amɛwo sugbɔ trɔdiɔ, wodesɛnŋ yi gbɔ o.
20 Eyi taɖo amɛwo nu ni mɔ: “Nɔo koɖo nɔviowo le te le xexenu yí jikɔ akpɔ eo.”
21 Énu do nu nɔ wo mɔ: “Nɔnyɛ koɖo nɔvinyɛwo yí nyi mɛ ciwo yí seseɛ Mawu nyɔ lɔ yí wakɔ do ji.”
22 Gbeɖekaɔ, Yesu koɖo yi nukplaviwo ɖo tɔjihun ɖeka mɛ yí enu nɔ wo mɔ: “Mìayi ago xlɔtɔ ji nɔ etan lɔ.” Eyi woɖedo.
23 Vɔ ci wole etan lɔ ji yikɔɔ, Yesu dɔn alɔn. Jihɔn sɛnŋsɛnŋ ɖeka tɔ xoxo. Eshi ɖo tɔjihun lɔ mɛ keke etɔ ɖɔɖɔ yí wole afɔku mɛ.
24 Eyi wovayi fuin yí mɔ: “Enukplamɛtɔ, Enukplamɛtɔ mìvɔ!” Éso yí wa adan do jihɔn koɖo etanshu blabla lɔwo yí woɖo te. Eyi eɖa ɖo tototo.
25 Yi goduɔ, ébiɔ wo se mɔ: “Fini míwo xɔse leɔ?” Vɔ vɔnvɔn gangan ɖeka lé wo yí ekpaca wo yí wonukɔ nɔ wowonɔnɔwo mɔ: “Mi yí nyi mɛ cɛ yɛ teŋ mɔ? Ðo éxo nuxu nɔ jihɔn koɖo eshi ŋtɔkpu yí wose tonu ni.”
26 Yesu koɖo yi nukplaviwo vaɖo Gerazeni kan mɛ le fini yí kpanŋkɔ Galile.
27 Ci Yesu to le tɔjihun lɔ mɛ kakaɔ, ŋsu ɖeka ci mɛ gbɔngbɔnvɔn le so eju lɔ mɛ yí va do go yi. Égbedo awu kpɔ yɛɔ, desɔ o yí denɔnɔ axwe ɖe mɛ o, vɔ yɔduwo* gblamɛ yí enɔnɔ.
28 Ci ekpɔ Yesu ɔ, édo axwa yí je klo ji ni yí nu sɛnsinɖe mɔ: “Yesu, Mawu Ejiɖaatɔ Vi, enyɔ ci yí le gblamɛ nɔ nyɛ koɖo eoɔ? Ŋɖe kuku, ŋgbetre fun nɔŋ o.”
29 (Ðo Yesu ɖe gbe nɔ gbɔngbɔn makɔmakɔ lɔ mɔ yɛ le to le ŋsu lɔ mɛ. Gbɔngbɔn makɔmakɔ lɔ vanɔ ji zenɛniɖe* yí woblɛni koɖo awlɛga yí donɔ ketiketi afɔwo ni yí cɔɛni, vɔ ésonɔ wo yí gbɔngbɔnvɔn lɔ kplɔɛ yinɔ azɔge-azɔge fini amɛwo dele o.)
30 Yesu biɔɛ se mɔ: “Lé woyɔnɔ eoɔ?” Émɔ: “Ahwakɔn,” ɖo gbɔngbɔnvɔnwo sugbɔ le mɛ.
31 Eyi woɖe kuku nɔ Yesu mɔ yiŋgbenya yewo ɖaɖa edumaɖosɛnxu mɛ o.
32 Eha sugbɔ ɖekawo ɖuɖuɔ nu le eto lɔ ji yí woɖe kuku ni mɔ yɛ le na gbe yewo nɔ yewoaɖo eha lɔwo mɛ. Eyi ena gbe wo.
33 Gbɔngbɔnvɔn lɔwo to le ŋsu lɔ mɛ yí vayi ɖo eha lɔwo mɛ. Eha lɔwo lɔ ju hwlihwlihwli so eto lɔ tamɛ yí je etan lɔ mɛ yí nu shi yí ku.
34 Vɔ ci mɛ ciwo yí kpɔnɔ eha lɔwo ji kpɔ ŋci yí jɔɔ, woshi yí vayi nui le jugan lɔ koɖo kɔxwi lɔ mɛ.
35 Amɛwo yi yí vayi kpɔ ŋci yí jɔ. Ci wova Yesu gbɔɔ, wokpɔ ŋsu ci mɛ gbɔngbɔnvɔnwo to le yí edo awu yí le nywiɖe yí le nyinɔnɔ le afɔ gbɔ nɔ Yesu. Eyi vɔnvɔn lé wo.
36 Mɛ ciwo yí kpɔ nu lɔ tɔxu nu lé eyi do keke ŋsu ci mɛ gbɔngbɔnvɔnwo le sa vale nywiɖe nyɔ nɔ mɛ lɔwo.
37 Eyi amɛ sugbɔ ciwo yí so Gerazeni ju lɔ pleŋ mɛ nu nɔ Yesu mɔ yɛ le so le yewo gbɔ, ɖo wovɔn sugbɔ. Eyi taɖo eɖo tɔjihun mɛ yí so.
38 Ŋsu ci mɛ gbɔngbɔnvɔnwo to le ɖeɖeɛ kuku ni mamimami mɔ yeakplɔɛ do. Vɔ Yesu trɔɛ yí nu ni mɔ:
39 “Yi axwe ayi nu ŋciwo Mawu wa nɔ eo nɔ amɛwo.” Eyi taɖo eyi yí vayi nu ŋciwo Yesu wa ni kpedo eju lɔ pleŋ mɛ.
40 Ci Yesu trɔgbɔɔ, amɛahwa lɔ wa ɖaŋ xɔɛ nywiɖe, ɖo wo pleŋ kpɔkɔ emɔ ni.
41 Vɔ ŋsu ɖeka ci yí tɔ mɔ Ʒairu va. Ŋsu cɛ kpɔnɔ Ʒuifuwo nukplaxu lɔ ji. Éje klo ji nɔ Yesu yí ɖe kuku ni mɔ yɛ le va ye xomɛ.
42 Ðo eviɛ nyɔnuvi ci yí ɖo xwe 12 han yí nyi evi kuɖeka kpaŋ* ni le kudunu.
Ci Yesu ɖedoɔ, amɛahwa lɔ xɛxɛ gijigiji.
43 Nyɔnu ɖeka ci nu ehun ŋɛŋɛ do so exwe 12 ke le nɔ. Mɛɖekpokpui detɛnŋ da dɔ̀ lɔ ni o.
44 Éto godu nɔ Yesu yí tɔ alɔ̀ yi wu toga. Eyi zeɖeka kakaɔ, ehun lɔ ɖo te.
45 Yesu biɔ se mɔ: “Mi yí tɔ alɔ̀ŋ ɔ?” Ci mɛ lɔwo pleŋ nunuɔ mɔ denyi yewo yɔɔ, Piɛ mɔ: “Enukplamɛtɔ, amɛahwa lɔ trɔdo eo yí xaxa eo gijigiji nɛ.”
46 Yesu nu mɔ: “Mɛɖeka tɔ alɔ̀ŋ, ɖo ŋkpɔ mɔ ŋsɛn ɖeka to le ŋmɛ.”
47 Ci nyɔnu lɔ kpɔ mɔ Yesu nya ŋci yewaɔ, évɔn yí hunhunkɔ yí va je klo ji do ŋkɔ ni. Énu ŋci yí taɖo etɔ alɔ̀ yi koɖo lé edɔ̀ lɔ mi ni le afɔdumɛ do le ŋmɛ nɔ amɛwo pleŋ.
48 Vɔ Yesu nu ni mɔ: “Evinyɛ, xɔse ci èɖo na edɔ̀ mi nɔ eo. Yi le fafa mɛ.”
49 Ci ele nuxu lɔ xokɔɔ, ŋsu ɖeka so le Ʒuifuwo nukplaxu jikpɔtɔ lɔ xomɛ va yí mɔ: “Ao vi nyɔnuvi ku; ŋgbedo aya nɔ Enukplamɛtɔ lɔ gbali o.”
50 Ci Yesu siɔ, énu nɔ Ʒairu mɔ: “Ŋgbevɔn o, ɖò xɔse kpoŋ yí vio agan.”
51 Ci eɖo exɔ lɔ mɛɔ, delɔn yí mɛɖe ɖo mɛ koɖi sɔ zeto Piɛ, Ʒan, Ʒaki sɔ kpe nɔ ɖevi lɔ dalɔ koɖo nɔlɔ nu o.
52 Vɔ amɛwo pleŋ le avin fankɔ yí le ekwi fankɔ do ɖevi lɔ ŋci. Eyi Yesu nu mɔ: “Mími avin fanfan, ɖo ɖevi lɔ deku o, alɔn dɔnkɔ ele.”
53 Eyi wotɔ kuikui, ɖo wonya mɔ ɖevi lɔ ku.
54 Vɔ élé alɔ̀ nɔ ɖevi lɔ yí mɔ: “Nyɔnuvihwɛ, so je te!”
55 Eyi gbɔngbɔn* trɔva nyɔnuvi lɔ mɛ yí eso je te zeɖeka. Eyi Yesu mɔ wo le na nu yi nɔ aɖu.
56 Ðevi lɔ dalɔ koɖo nɔlɔ kpɔ jijɔ manumanu. Vɔ Yesu do se nɔ wo mɔ woŋgbenu ŋci yí jɔ lɔ nɔ mɛɖe o.
Gɔnmɛnuŋwlɛnŋwlɛn
^ Alo “eŋwiɖoɖo yɔduwo.”
^ Ágbetɛnŋ anyi mɔ, “Gbɔngbɔnvɔn lɔ va ji sɛnŋsɛnŋɖe na nɔ hwenu jinjinɖe.”
^ Yi gɔnmɛɖeɖe tiin: “evi akogo.”
^ Alo “agbeŋsɛn.”
