Eŋɛnywiwema Maki Tɔ 7:1-37
7 Farizitɔwo koɖo esekplamɛtɔ ɖewo so Ʒerusalɛmu va yí trɔdi.
2 Eyi wokpɔ yi nukplavi ɖewo ɖuɖuɔ nu koɖo alɔ̀ xoɖyiwo. Édasɛ mɔ wodeklɔ alɔ̀ o.*
3 (Ðo nɔ Farizitɔwo koɖo Ʒuifu kpɛtɛwo pleŋ deklɔ alɔ̀ keke yí kɔ do logoɔ, wodeɖunɔ nu o yí sɔ wakɔ do tɔgbiwo kɔnuwo ji truɖuɖu.
4 Nɔ wogbɔ so afi mɛɔ, wodeɖunɔ nu nɔ wodele shi o. Kɔnu sugbɔ buwo gbeli yí wowanɔ tiin. Ðewo yí nyi kɔnkpuwo, zeviwo koɖo gajungbanwo ʒinʒin do eshi mɛ.)
5 Eyi taɖo Farizitɔwo koɖo esekplamɛtɔ lɔwo biɔ Yesu se mɔ: “Nyi yí taɖo ao nukplaviwo dewanɔ do tɔgbiwo kɔnuwo ji yí ɖukɔ nu koɖo alɔ̀ xoɖyiwoɔ?”
6 Énu nɔ wo mɔ: “Ezai nyɔ jɔ ci enu nyɔ ɖɛ so míwo ciwo yí nyi ayemɛnuwatɔwo nu. Éŋwlɛ ɖɛ mɔ, ‘Aɖe mɛ ɖekɛ yí jukɔn cɛ bubuɔŋ le, vɔ wowo jiwo teyi azɔge le ŋgbɔ.
7 Gbali yí wosɛnsɛnŋ, ɖo agbetɔ sewo yí wokplanɔ amɛwo.’
8 Mígbe Mawu sewo ɖɛ yí le bu do agbetɔ kɔnuwo yí wawa.”
9 Égbenu nɔ wo mɔ: “Mísɔ aye yí gbe Mawu sewo ɖɛ keŋ yí wawa do míwo kɔnuwo ji.
10 Le kpɔwɛ mɛ Moizi nu mɔ, ‘Bu dao koɖo nɔo’ yí ‘Woawu mɛ ci yí zu* dalɔ alo nɔlɔ.’
11 Vɔ míwo nunɔ mɔ, ‘Mɛɖe atɛnŋ anu nɔ dalɔ alo nɔlɔ mɔ: “Enushianu ci yí le ŋshi yí nasɔ kpedo eo nu nyi kɔrban (yi gɔnmɛ yí nyi mɔ, ŋci wosɔ ɖo gbe nɔ Mawu).”’
12 Mídegbelɔnnɔ mɔ, mɛ lɔ le wa ŋɖekɛ nɔ dalɔ alo nɔlɔ o.
13 Eyi taɖo kɔnu ciwo míwoŋtɔwo míɖo ɖɛ na yí mísɔ Mawu nyɔ sɔ trɔ enugbali. Ŋcɛ hanwo li sugbɔ yí míwanɔ.”
14 Eyi taɖo Yesu gbeyɔ amɛahwa lɔ va yiɖeki gbɔ yí nu nɔ wo mɔ: “Mí pleŋ míɖo to yí ase nyɔ ci ŋnukɔ gɔnmɛ.
15 Ŋɖekɛ desonɔ agogbe yí ɖonɔ xomɛ nɔ amɛ yí atɛnŋ axo ɖyi amɛ o; vɔ ŋciwo yí sonɔ xomɛ nɔ amɛ yí xonɔ ɖyi amɛ.”
16 * ——
17 Ci eso le amɛahwa lɔ gbɔ yí ɖo axwe ɖeka mɛɔ, yi nukplaviwo tɔ nyɔ biɔbiɔ yi se so labalu lɔ nu.
18 Eyi taɖo enu nɔ wo mɔ: “Míwo can mídese mɛ shigbe wowo nɛ yɔa? Mídenya mɔ ŋɖekpokpui ci yí so agogbe yí ɖo xomɛ nɔ amɛ dexonɔ ɖyi amɛ ba?
19 Ðo denyi eji mɛ eyinɔ o, vɔ dɔgbu mɛ eyinɔ yí wosɔ yinɔ kpaji.” Ahan yí Yesu dasɛ mɔ ŋɖuɖuwo pleŋ mɛ́ nɛ.
20 Égbenu kpi mɔ: “Ŋci yí tonɔ so xomɛ nɔ amɛ yí xonɔ ɖyi amɛ.
21 Ðo agbetɔ ji mɛ yí susu dɔndɔnwo tonɔ so. Wowo yí nyi: mateliwawa,* efififi, amɛwuwu,
22 hashiwawa, sukanujiji, nuvwinwawa, amɛbleble, enudɔndɔnwawa gannaganna,* ŋbia,* enyɔkpotununu, egoyiyi koɖo enugɔnmɛmase.
23 Xomɛ yí nuvwin cɛwo pleŋ sonɔ yí xonɔ ɖyi amɛ.”
24 Yesu so le nɔ yí yi Tiru koɖo Sidɔn kan mɛ. Le nɔɔ, éɖo axwe ɖeka mɛ yí deji mɔ mɛɖe le nya o, vɔ amɛwo nya.
25 Kaka lɔɔ, nyɔnu ɖeka se nyɔ so nu yí va je klo ji do afɔ gbɔ ni. Gbɔngbɔn makɔmakɔ dokɔ aya nɔ eviɛ nyɔnuvi.
26 Nyɔnu lɔ nyi Grɛkitɔ yí so Fenisi ci yí le Siri.* Éɖe kuku ni zenɛniɖe mɔ yɛ le nya gbɔngbɔnvɔn lɔ ti le ye viye nyɔnuvi lɔ mɛ.
27 Vɔ énu nɔ nyɔnu lɔ mɔ: “Tashi ɖeviwo nɔ xodu aɖɔ wo keŋ, ɖo denyɔ mɔ woasɔ ŋɖuɖu ɖeviwo tɔ dɔ ɖaɖa avuviwo o.”
28 Vɔ nyɔnu lɔ ɖo ŋci ni mɔ: “Axwetɔ nyao yɔ, gan avuvi ciwo yí le ekplɔn gemɛ ɖunɔ ɖeviwo ŋɖuɖu wliwli ciwo yí juinni.”
29 Eyi Yesu ɖo ŋci ni mɔ: “Ci ènu ahan ɔ, so yi; gbɔngbɔnvɔn lɔ to le ao vi nyɔnuvi lɔ mɛ.”
30 Eyi taɖo eyi axomɛ yí kpɔ ɖeviɛ le nyimlɔxu le ba ji yí gbɔngbɔnvɔn lɔ to le mɛ.
31 Ci Yesu so le Tiru kan mɛɔ, éto Sidɔn koɖo Dekapoli* kan mɛ yí yi Galile Xu tu.
32 Le nɔɔ, wokplɔ ŋsu tokunɔ ɖeka ci yí dexonɔ nuxu nywiɖe vɛ ni. Woɖe kuku ni mɔ yɛ le sɔ yi lɔ̀ da do ji.
33 Ékplɔɛ yi azɔge so amɛahwa lɔ gbɔ. Ésɔ lɔ̀viwo do etowo mɛ ni. Écu tan yí tɔ alɔ̀ aɖe ni.
34 Ékpɔ jeŋkwi mɛ yí gbɔn fuun yí nu ni mɔ: “Efata,” ci gɔnmɛ yí nyi mɔ, “Hun.”
35 Eyi etowo hun ni yí aɖe kɔ ni yí etɔ nuxu xoxo nywiɖe.
36 Yesu do se nɔ wo mɔ woŋgbenu nɔ mɛɖe o. Vɔ nɔ égbe nɔ woɔ, eyi taŋ wogbenuini doji.
37 Le nyɔnɔnwi mɛɔ, ékpaca wo keke yí wonu mɔ: “Éwakɔ nushianu nywiɖe. Éna yí tokunɔwo sekɔ tonu ŋtɔkpu yí nuxumaxotɔwo xokɔ nuxu.”
Gɔnmɛnuŋwlɛnŋwlɛn
^ Wodeklɔ alɔ̀ shigbe lé Farizitɔwo koɖo Ʒuifu buwo klɔnɔ alɔ̀ sɔgbe koɖo wowo kɔnuwo nɛ o.
^ Alo “nu nyɔvɔn.”
^ Kpɔ Enumɛɖeɖewo A3.
^ Grɛki nyɔgbe pɔrneia. Kpɔ Enyɔgbe Veviwo mɛ Ðeɖe.
^ Alo “ŋkpɛnnuwawa.” Grɛki nyɔgbe asɛlgei. Kpɔ Enyɔgbe Veviwo mɛ Ðeɖe.
^ Alo “ŋkuvi ci yí bianɔŋ.”
^ Yi gɔnmɛɖeɖe tiin: “Sirifenisitɔ.” Édasɛ mɔ woji le Fenisi.
^ Alo “Eju Amɛ́wo lɔwo Kan mɛ.”
