Eŋɛnywiwema Matie Tɔ 15:1-39
15 Farizitɔwo koɖo esekplamɛtɔwo so Ʒerusalɛmu va Yesu gbɔ yí biɔɛ se mɔ:
2 “Nyi yí taɖo ao nukplaviwo dada le tɔgbiwo kɔnuwo jiɔ? Le kpɔwɛ mɛ, wodeklɔnɔ alɔ̀* gbɔxwe yí ɖunɔ nu o.”
3 Énu do nu nɔ wo mɔ: “Nyi yí taɖo míwo dada le Mawu sewo ji do míwo kɔnuwo ŋciɔ?
4 Le kpɔwɛ mɛ, Mawu nu mɔ: ‘Bu dao koɖo nɔo,’ yí ‘Woawu mɛ ci yí zu* dalɔ alo nɔlɔ.’
5 Vɔ míwo nunɔ mɔ, ‘Mɛɖekpokpui ci yí nu nɔ dalɔ alo nɔlɔ mɔ: “Enushianu ci yí le ŋshi yí nasɔ kpedo eo nu nyi ŋci ŋsɔ ɖo gbe nɔ Mawu” ɔ,
6 mɛ ŋtɔ́ degbeɖo abu dalɔ dandandan o.’ Ahan míwo kɔnuwo dɔ yí mísɔ Mawu nyɔ lɔ sɔ trɔ enugbali nɛ.
7 Ayemɛnuwatɔwo, Ezai nyɔ jɔ ci enu ɖɛ so mí nu mɔ:
8 ‘Aɖe mɛ ɖekɛ yí jukɔn cɛ bubuɔŋ le, vɔ wowo jiwo teyi azɔge le ŋgbɔ.
9 Gbali yí wosɛnsɛnŋ, ɖo agbetɔ sewo yí wokplanɔ amɛwo.’”
10 Eyi Yesu yɔ amɛahwa lɔ va yiɖeki gbɔ yí nu nɔ wo mɔ: “Míɖo to ase gɔnmɛ nɔ enyɔ cɛ:
11 De ŋci wosɔ do aglan mɛ yí xonɔ ɖyi amɛ o, vɔ ŋci yí tonɔ le aglan mɛ nɔ amɛ yɔ.”
12 Yi goduɔ, yi nukplaviwo va gbɔ yí nu ni mɔ: “Ènya mɔ ci Farizitɔwo se enyɔ ci ènuɔ, edo dɔmɛzi nɔ woa?”
13 Éɖo ŋci nɔ wo mɔ: “Aci ɖekpokpui ci Danyɛ ci yí le jeŋkwi mɛ dedoɔ, woahuin si.
14 Mítashi wo. Ŋkuvitɔnnɔ ciwo yí kplɔkɔ amɛwo yí wonyi. Vɔ nɔ ŋkuvitɔnnɔ kplɔkɔ ŋkuvitɔnnɔɔ, wowo amɛve lɔwo ayi je dodu mɛ.”
15 Piɛ nu mɔ: “Dre labalu lɔ gɔnmɛ nɔ mì.”
16 Yesu nu do nu mɔ: “Míwo can mídese mɛ hɔɖo o?
17 Mídenya mɔ ŋɖekpokpui ci wosɔ do aglan mɛ tonɔ dɔgbu mɛ yí wovasɔ yinɔ kpaji ba?
18 Vɔ ŋciwo yí tonɔ le aglan mɛɔ, eji mɛ yí wosonɔ. Wowo yí xonɔ ɖyi amɛ.
19 Le kpɔwɛ mɛ, eji mɛ yí susu vɔnwo: amɛwuwu, hashiwawa, mateliwawa,* efififi, ŋsukankan do nu nɔ amɛ koɖo enyɔkpotuwo nunu sonɔ.
20 Ŋcɛwo yí xonɔ ɖyi amɛ; vɔ woaɖu nu alɔ̀ maklɔ* dexonɔ ɖyi amɛ o.”
21 Ci Yesu so le nɔɔ, éyi Tiru koɖo Sidɔn juwo mɛ.
22 Eyi Fenisi nyɔnu ɖeka ci yí so nɔtɔxu va gbɔ yí do axwa yí nu mɔ: “Axwetɔ, Davidi Viɛ, ku ŋshishi nɔŋ. Gbɔngbɔnvɔnwo dokɔ aya nɔ anyi vi nyɔnuvi veviɖe.”
23 Vɔ Yesu deke nu do mɛ ni o. Eyi taɖo yi nukplaviwo va nu ni mɔ: “Nu ni nɔ ayi, ɖo édodoɔ axwa kplɔ mì do.”
24 Éɖo ŋci mɔ: “Lɛngbɔ ciwo yí bu le Izraɛli jukɔn mɛ ɖekɛwo gbɔ wodɔŋ ɖaɖa.”
25 Vɔ nyɔnu lɔ va gbɔ yí je klo ji* yí nu ni mɔ: “Axwetɔ kpedo ŋnu!”
26 Yesu ɖo ŋci mɔ: “Denyɔ mɔ woasɔ ŋɖuɖu ɖeviwo tɔ dɔ ɖaɖa avuviwo o.”
27 Nyɔnu lɔ nu mɔ: “Axwetɔ nyao yɔ, vɔ avuviwo ɖunɔ ŋɖuɖu wliwli ciwo yí juinni so wowo xwetɔ kplɔn ji.”
28 Eyi Yesu ɖo ŋci ni mɔ: “Oo nyɔnu, ao xɔse gangan sugbɔ. Le vamɛ nɔ eo shigbe lé èji do nɛ.” Hwenɔnu pɛɛ yí edɔ̀ lɔ mi nɔ ɖeviɛ.
29 Ci Yesu so le nɔɔ, éva fini yí gogo Galile Xu tu yí de eto ɖeka ji yí nɔ nyinɔnɔ do nɔ.
30 Amɛahwa gangan ɖeka va gbɔ yí hɛn ebutɔntɔwo, ekplɛxotɔwo, ŋkuvitɔnnɔwo, nuxumaxotɔwo koɖo dɔ̀nɔ buwo va gbɔ. Wokɔ wo sɔ da do yi fɔ gbɔ yí eda dɔ̀ nɔ wo.
31 Ci amɛahwa lɔ kpɔ yí mɛ ciwo dexonɔ nuxu tɔ nuxu xoxo, mɛ ciwo shi afɔ alo abɔ dele haya, mɛ ciwo yí tɔntɔn bu tɔ zɔnlin zɔnzɔn yí ŋkuvitɔnnɔwo tɔ enu kpɔkpɔɔ, ékpaca wo yí wokanfu Izraɛli Mawu.
32 Yesu yɔ yi nukplaviwo yí nu nɔ wo mɔ: “Amɛahwa lɔ nu wa ŋshishi nɔŋ, ɖo so ŋkeke amɛtɔn ke yí wole ŋgbɔ. Wodeɖu ŋɖe o. Ŋdeji mɔ natashi wo woayi axwe shive o, ɖo wotɛnŋ vayi juin le mɔ ji.”
33 Vɔ yi nukplaviwo nu ni mɔ: “Ci lɛtɔxu desɔ axwe gbɔ ɖe, fini mìatɛnŋ akpɔ ŋɖuɖu le keke asun amɛ sugbɔ cɛwoɔ?”
34 Eyi Yesu biɔ wo se mɔ: “Kpɔnnɔ nɛni yí le mí shiɔ?” Woɖo ŋci mɔ: “Kpɔnnɔ amadrɛ koɖo kpavi hwɛhwɛ ɖewo.”
35 Eyi ci enu nɔ amɛ lɔwo mɔ wo le nɔ nyinɔnɔ do nyigban ɖegbɔɔ,
36 ésɔ kpɔnnɔ amadrɛ koɖo kpavi lɔwo. Ci edo akpe do wo ji ɖegbɔɔ, éŋɛ wo mɛ yí sɔ wo jo nɔ nukplavi lɔwo yí nukplavi lɔwo ma wo nɔ amɛahwa lɔ.
37 Wo pleŋ ɖu nu yí xodu ɖɔ wo. Wolɔ kankan ciwo yí kpɔtɔ yí woɖɔ kishi gangan* amadrɛ.
38 Ŋsu ciwo yí ɖu nu lɔ hlɛnhlɛnmɛ nyi 4 000, wodehlɛn nyɔnuwo koɖo ɖeviwo do mɛ o.
39 Ci enu nɔ amɛ lɔwo yí woso ɖegbɔɔ, éɖo tɔjihun yí yi Magadan ju mɛ.
Gɔnmɛnuŋwlɛnŋwlɛn
^ Farizitɔwo koɖo Ʒuifu buwo klɔnɔ alɔ̀ sɔgbe koɖo wowo kɔnuwo.
^ Alo “nu nyɔvɔn.”
^ Grɛki nyɔgbe pɔrneia. Kpɔ Enyɔgbe Veviwo mɛ Ðeɖe.
^ Edasɛ mɔ, wodaklɔ alɔ̀ shigbe lé Farizitɔwo koɖo Ʒuifu buwo klɔnɔ alɔ̀ sɔgbe koɖo wowo kɔnuwo nɛ o.
^ Alo “bubɔ ni.”
^ Alo “kishi ci mɛ woxwlenɔ nuwo do.”
