Eŋɛnywiwema Matie Tɔ 19:1-30
19 Ci Yesu nu nyɔ cɛwo ɖegbɔɔ, éso le Galile yí va Ʒude lixowo ji le Ʒurdɛn tɔsasa godu.
2 Amɛwo sugbɔ yí kplɔɛ do hɛnnɛ yí eda dɔ̀ nɔ dɔ̀nɔwo le nɔ.
3 Farizitɔwo va Yesu gbɔ mɔ yewoadui kpɔ. Eyi taɖo wobiɔɛ se mɔ: “Ese ɖe emɔ mɔ ŋsu agbe ashiɛ do ŋɖekpokpui jia?”
4 Yesu ɖo ŋci mɔ: “Mídehlɛn kpɔ mɔ mɛ ci yí wa agbetɔwo le gɔnmɛjejeɔ, asu koɖo ashi ewa wo
5 yí nu mɔ: ‘Eyi taɖo ŋsu aso gbeɖe dalɔ koɖo nɔlɔ ɖɛ yí axoca koɖo ashiɛ yí wo koɖo ve lɔ atrɔ lankpu kuɖeka’ ba?
6 Eyi taɖo wodegbenyi amɛ amɛve o, vɔ lankpu ɖeka. Taɖo ŋci Mawu bla do ɖekɛɔ, mɛɖe ŋgbema mɛ o.”
7 Wobiɔɛ se mɔ: “Vɔ nyi yí taɖo Moizi ŋwlɛ mɔ, wo le na nyɔnugbegbewema nyɔnu yí agbiɔ?”
8 Énu nɔ wo mɔ: “Ci eji mɛ sɛnŋ nɔ mí taɖo Moizi na gbe mɔ míagbe míwo shiwo, vɔ de ahan ele le gɔnmɛjeje nɛ o.
9 Ŋnukɔ nɔ mí mɔ, mɛɖekpokpui ci yí gbe ashiɛ yí denyi hashi* ewa o keŋ vayi ɖe nyɔnu buɔ, eyi wa hashi.”
10 Enukplavi lɔwo nu ni mɔ: “Nɔ enyi ahan yí ŋsu koɖo nyɔnu gblamɛ nyɔ le nɛɔ, nɔ wodeɖe nyɔnuɔ, enyɔ wu.”
11 Énu nɔ wo mɔ: “De mɛshiamɛ yí sun ji yí wanɔ do enyɔ cɛ ji o, vɔ mɛ ciwo Mawu na ɖekɛ yɔ.
12 Ðo mɛɖewo li woji wo yí wonyi kobonɔ yí mɛbuwo li agbetɔwo yí ta wo. Mɛbuwo gbeli ciwo yí sɔ wowoɖekiwo wa amɛtatawo do jeŋkwi mɛ Fyɔɖuxu lɔ ŋci. Nɔ mɛɖe asun jiɔ, le wɛ.”
13 Yɛ goduɔ, wokplɔ ɖeviwo va Yesu gbɔ nɔ asɔ alɔ̀ da do wo ji yí ado gbe ɖaɖa do ta nɔ wo, vɔ yi nukplaviwo gbe nɔ wo.
14 Gan Yesu nu mɔ: “Mítashi ɖeviɛwo nɔ woava ŋgbɔ, míŋgbexe emɔ nɔ wo o. Ðo mɛ ciwo yí le shigbe wowo hannɛ tɔ yí jeŋkwi mɛ Fyɔɖuxu lɔ nyi.”
15 Eyi esɔ alɔ̀ da do wo ji yí so le nɔtɔxu.
16 Mɛɖeka va gbɔ yí biɔɛ se mɔ: “Enukplamɛtɔ, nunywi ci ŋɖo awa keŋ akpɔ agbe mavɔɔ?”
17 Éɖo ŋci ni mɔ: “Nyi yí taɖo èbiɔkɔ nyɔŋ se so nunywi nuɔ? Mɛ kuɖeka kpaŋ yí nyi amɛnywi. Vɔ nɔ èji mɔ yeakpɔ agbeɔ, kpɔtɔ awanɔ do ese lɔwo ji.”
18 Ébiɔɛ se mɔ: “Ese ciwo yɔɔ?” Yesu ɖo ŋci ni mɔ: “Ŋgbewu amɛ o, ŋgbewa hashi o, ŋgbefi fi o, ŋgbekan ŋsu do nu nɔ amɛ o.
19 Bu dao koɖo nɔo yí èɖo alɔn ao kpena shigbe eoŋtɔ nɛ.”
20 Ðajɛvi lɔ ɖo ŋci ni mɔ: “Ŋwakɔ do ese cɛwo pleŋ ji. Nyi yí gbekpɔtɔ nɔŋ ɔ?”
21 Yesu nu ni mɔ: “Nɔ èji mɔ wodakpɔ afɛn* ɖe le ye nuɔ, yi sa ao nuwo yí asɔ eho lɔ na wamɛnɔwo yí awa dɔkunuwo ɖɛ le jeŋkwi mɛ; yi goduɔ, nàkplɔ ŋdo.”
22 Ci ɖajɛvi lɔ se ahan ɔ, éɖedo ŋshishitɔ, ɖo enu sugbɔ le shi.
23 Eyi Yesu nu nɔ yi nukplaviwo mɔ: “Ŋnukɔ nɔ mí le nyɔnɔnwi mɛ mɔ, ágbɔnnu nɔ dɔkunɔ mɔ aɖo jeŋkwi mɛ Fyɔɖuxu lɔ mɛ.
24 Ŋgbenukɔ nɔ mí hɛnnɛ mɔ, ale fafɛɖe nɔ esɔkpotɔnɔ mɔ ato tɔnnyi tu mɛ sɔwu nɔ dɔkunɔ mɔ aɖo Mawu Fyɔɖuxu lɔ mɛ.”
25 Ci enukplavi lɔwo se nyɔ cɛɔ, ékpaca wo sugbɔ yí womɔ: “Mi teŋ yí atɛnŋ akpɔ hwlɛngan ɔ?”
26 Eyi Yesu kpɔ ŋmɛ nɔ wo juun yí nu nɔ wo mɔ: “Agbetɔwo gbɔ yí aglo le, vɔ ŋɖe deglonɔ Mawu o.”
27 Eyi Piɛ biɔɛ se mɔ: “Kpɔ ɖa! Mìgbe nuwo pleŋ ɖɛ yí kplɔ eo do; nyi yí avanyi mìwotɔɔ?”
28 Yesu nu nɔ wo mɔ: “Ŋnukɔ nɔ mí le nyɔnɔnwi mɛ mɔ, hwenu woatrɔ awa nuwo yí Agbetɔvi lɔ anɔ nyinɔnɔ do fyɔʒinkpin gangan yitɔ jiɔ, míwo ciwo yí kplɔŋ do anɔ nyinɔnɔ do fyɔʒinkpin 12 ji yí aɖo kojo nɔ Izraɛli kɔta 12 lɔwo.
29 Yí mɛɖekpokpui ci yí tashi axwewo, fofo alo nɔviwo, eda, enɔ, eviwo alo agblewo ɖɛ do anyi ŋkɔ ŋciɔ, áxɔ ŋcɛwo wu donu sanŋdi ɖeka yí woagbena agbe mavɔ yi.
30 “Vɔ amɛ sugbɔ ciwo yí nyi ŋkɔtɔwo avanyi godutɔwo yí amɛ godutɔwo avanyi ŋkɔtɔwo.
