Eŋɛnywiwema Matie Tɔ 23:1-39
23 Yi godu Yesu nu nɔ amɛahwa lɔ koɖo yi nukplaviwo mɔ:
2 “Esekplamɛtɔwo koɖo Farizitɔwo bu mɔ yewoɖo acɛ ci han Moizi ɖo.
3 Eyi taɖo míwa do enyɔ ciwo pleŋ wonunɔ nɔ mí ji, vɔ míŋgbewa ŋciwo wowanɔ o. Ðo wonuini, vɔ wodewanɔ do enyɔ ciwo wowoŋtɔwo nunɔ ji o.
4 Woblanɔ agban kpɛnkpɛnwo sɔ danɔ do abɔta nɔ amɛwo, vɔ wowoŋtɔwo dejinɔ mɔ yewoasɔ lɔ̀vi tɔɛ kpetii o.
5 Enu ciwo pleŋ wowanɔɔ, wowanɔ wo mɔ nɔ amɛwo akpɔ yewo. Ðo wowanɔ eguvi ciwo mɛ Enuŋwlɛŋwlɛ lɔwo nɔnɔ yí wokekenɔ. Woblanɔ wo do ŋgonu koɖo alɔ̀ mɔ woaglɔn ta nɔ yewo. Wogbewanɔ wowo wu togawo yí wojinjinnɔ.
6 Texwe veviwo nɔnɔ le azanɖuxuwo koɖo ʒinkpin ŋkɔtɔwo* ji nɔnɔ le Ʒuifuwo nukplaxuwo jɔnɔ ji nɔ wo.
7 Wojinɔ mɔ wo le do gbe nɔ yewo koɖo bubu le amɛwo mɛ* yí ayɔnɔ yewo mɔ Rabi.*
8 Vɔ míwoɔ, míŋgbewɛ nɔ woayɔnɔ mí mɔ Rabi o; ɖo amɛ kuɖeka yí nyi míwo Nukplamɛtɔ yí mí pleŋ mínyi nɔviwo.
9 Gbesɔ kpe niɔ, míŋgbeyɔnɔ mɛɖe mɔ míwo da le nyigban ji o, ɖo mɛ kuɖeka yí nyi míwo Da; eyi nyi Mɛ ci yí le jeŋkwi mɛ.
10 Ahanke míŋgbelɔn nɔ woayɔnɔ mí mɔ ŋkɔnɔtɔ o, ɖo mɛ kuɖeka yí nyi míwo Ŋkɔnɔtɔ; eyi nyi Kristo lɔ.
11 Vɔ mɛ ci yí nyi amɛ gangantɔ le mí mɛ ɖo anyi míwo dɔwavi.
12 Mɛɖekpokpui ci yí agangan yiɖekiɔ, woaɖi kpɔtɔ; yí mɛɖekpokpui ci yí asɔ yiɖeki hweɔ, woagingin.
13 “Babɛ nɔ mí, esekplamɛtɔ koɖo Farizitɔ ayemɛnuwatɔwo! Ðo mícu jeŋkwi mɛ Fyɔɖuxu lɔ hɔn do amɛwo. Mídeyikɔ mɛ míwoŋtɔwo o, yí mídena emɔ mɛ ciwo yí ji mɔ yewoaɖo mɛ nɔ woaɖo mɛ hɛnnɛ o.
14 * ——
15 “Babɛ nɔ mí, esekplamɛtɔ koɖo Farizitɔ ayemɛnuwatɔwo! Ðo mízɔnnɔ emɔ to axu ji koɖo nyigban ji yí asɔ mɛɖeka trɔ Ʒuifu* yí nɔ étrɔ Ʒuifu ɖegbɔɔ, míwɛni keke ejenɔ nɔ Gehena* mɛ yiyi yí gbewunɔ hwɛ sɔwu míwoŋtɔwo.
16 “Babɛ nɔ mí, amɛkplɔtɔ ŋkuvitɔnnɔ ciwo yí nunɔ mɔ: ‘Nɔ mɛɖe ta gbedoxɔɔ, deʒan mɔ awa do ji o; vɔ nɔ mɛɖe ta shika ci yí le gbedoxɔ lɔ mɛɔ, éɖo awa do ji.’
17 Sukunɔ koɖo ŋkuvitɔnnɔwo! Shika nɛ, gbedoxɔ ci yí na shika lɔ nyi enukɔkɔɛ nɛ, ci yí gangan wuɔ?
18 Mínunɔ hɛnnɛ mɔ: ‘Nɔ mɛɖe ta avɔnsakpeɔ, deʒan mɔ awa do ji o; vɔ nɔ mɛɖe ta enunana ci yí le avɔnsakpe lɔ jiɔ, éɖo awa do ji.’
19 Ŋkuvitɔnnɔwo! Enunana lɔ nɛ, avɔnsakpe ci yí dɔ enunana lɔ le kɔkɔɛɖe nɛ, ci yí gangan wuɔ?
20 Eyi taɖo mɛ ci yí ta avɔnsakpeɔ, éta avɔnsakpe lɔ koɖo ŋciwo pleŋ yí le ji.
21 Yí mɛ ci yí ta gbedoxɔɔ, éta gbedoxɔ lɔ ŋtɔ koɖo Mɛ ci yí le mɛ.
22 Mɛ ci yí ta jeŋkwi hɛnnɛɔ, éta Mawu fyɔʒinkpin koɖo Mɛ ci yí le nyinɔnɔ le ji.
23 “Babɛ nɔ mí, esekplamɛtɔ koɖo Farizitɔ ayemɛnuwatɔwo! Ðo mínanɔ madowo nɔ egbehwɛnte ciwo yí nyi maŋti, anɛti koɖo kwimɛ, vɔ mídewanɔ do ŋciwo yí le veviɖe sɔwu le Ese lɔ mɛ ji o. Wowo yí nyi enujɔjɔɛwawa, ŋshishikunamɛ koɖo egbejinɔnɔ. Ŋciwo ele veviɖe mɔ míawa nɛ yí mídagbe wawa do kpɛtɛwo ji hɛnnɛ o.
24 Ŋkuvitɔnnɔ ciwo yí kplɔkɔ amɛwo, mífiɔ̀nnɔ enuzozui hwɛhwɛwo le aha mɛ gan yí minɔ esɔkpotɔnɔ!
25 “Babɛ nɔ mí, esekplamɛtɔ koɖo Farizitɔ ayemɛnuwatɔwo! Ðo míklɔnɔ gotu nɔ kɔnkpu koɖo agban, gan yí xomɛ ɖɔ nɔ wo koɖo sukanujiji* koɖo amɛɖekijimaɖumaɖu.
26 Farizitɔ ŋkuvitɔnnɔ, klɔ xomɛ nɔ kɔnkpu koɖo agban keŋ gbɔxwe nɔ gotu can amɛ́ nɔ wo.
27 “Babɛ nɔ mí, esekplamɛtɔ koɖo Farizitɔ ayemɛnuwatɔwo! Ðo míle shigbe yɔdu ciwo woshi kalo ɣi nɔ nɛ yí wonya kpɔkpɔ le agogbe gan yí xomɛ ɖɔ nɔ wo koɖo amɛkuku xuwo koɖo enumakɔmakɔ hamɛhamɛwo.
28 Ahanke mínyi amɛjɔjɔɛwo le agogbe yí amɛwo kpɔnɔ, gan yí míɖɔ koɖo ayemɛnuwawa koɖo esejimawamawa nɛ.
29 “Babɛ nɔ mí, esekplamɛtɔ koɖo Farizitɔ ayemɛnuwatɔwo! Ðo mídranɔ nyɔnuɖɛtɔwo yɔduwo do yí ɖonɔ acɔ nɔ amɛjɔjɔɛwo yɔduwo*
30 yí nunɔ mɔ: ‘Nɔ mìnɔ agbe le mìwo tɔgbiwo hwenu saɔ, mìdabɔdo wo nu le enyɔnuɖɛtɔwo wuwu mɛ o.’
31 Eyi taɖo míwoŋtɔwo yí dradra míwoɖekiwo mɔ yewonyi eviwo nɔ mɛ ciwo yí wu enyɔnuɖɛtɔwo.
32 Taɖo míɖegbɔ nɔ edɔ ci míwo tɔgbiwo tɔ.
33 “Edanwo, zakpata viwo, lé míawɛ ashi nɔ Gehena* kojoɖoɖo lɔɔ?
34 Eyi taɖo ŋdɔdɔ nyɔnuɖɛtɔwo, ŋɖɛnyatɔwo koɖo nukplamɛtɔwo ɖaɖa mí. Míawu ɖewo, akan ɖewo do aci nu, axo ɖewo koɖo lanŋba le míwo nukplaxuwo yí ado aya nɔ wo le juganwo pleŋ mɛ,
35 keŋ nɔ amɛjɔjɔɛ ciwo pleŋ hun wokɔ ɖɛ do nyigban anɔ kɔ nɔ mí, so amɛjɔjɔɛ Abɛli hun ji keke vaje Zakari Barashi vi hun ji, mɛ ci míwu le kɔkɔɛtɔxu koɖo avɔnsakpe lɔ gblamɛ.
36 Ŋnukɔ nɔ mí le nyɔnɔnwi mɛ mɔ, ŋcɛwo pleŋ ajɔ do egbɛvi cɛwo ji.
37 “Ʒerusalɛmu, Ʒerusalɛmu ci yí wu enyɔnuɖɛtɔwo yí xo kpe mɛ ciwo wodɔ ɖaɖa gbɔ. Ŋji zenɛniɖe mɔ nabɔ viowo doju shigbe lé kloklovinɔ bɔnɔ eviɛwo do yi wawo gɔnmɛ nɛ! Vɔ dèlɔn o.
38 Míkpɔ ɖa! Wotashi míwo xwe ɖɛ nɔ mí.*
39 Eyi taɖo ŋnukɔ nɔ mí mɔ so evyɛɔ, mídagbevakpɔŋ o, keke avaje hwenu yí míanu mɔ: ‘Woacu shi nɔ mɛ ci yí gbɔgbɔ le Yehowa* ŋkɔ mɛ!’”
Gɔnmɛnuŋwlɛnŋwlɛn
^ Alo “nywiwo.”
^ Yi gɔnmɛɖeɖe tiin: “afiwo mɛ.”
^ Alo “Enukplamɛtɔ.”
^ Kpɔ Enumɛɖeɖewo A3.
^ Alo “trɔ ji mɛ.”
^ Kpɔ Enyɔgbe Veviwo mɛ Ðeɖe.
^ Alo “efi.”
^ Alo “eŋwiɖoɖo yɔduwo.”
^ Kpɔ Enyɔgbe Veviwo mɛ Ðeɖe.
^ Alo taŋfuin, “wotashi ɖɛ nɔ mí yí eci tu.”
^ Kpɔ Enumɛɖeɖewo A5.
