Enyɔbiɔse Ciwo Yí So Yi Hlɛntɔwo Gbɔ
Lé nyɔta ci yí nyi “Ao ŋkɔ le kɔ” ci yí le Jutakpɔxɔ juin 2020 tɔ mɛ na yí mìwo jixɔse ci mìɖo do Mawu ŋkɔ lɔ nu koɖo yi cɛkpatɔnyinyi kɔ nywiɖe dojiɔ?
▪ Mìkpla le nyɔta cɛ mɛ mɔ, enyɔ gangan ɖeka yí kpanŋkɔ enuwawa nyaŋɖɛwo pleŋ: eyi nyi Yehowa ŋkɔ ŋci kɔkɔ. Acɛkpatɔnyinyi nyɔ ci yí fɔn do te ci yí nyi mɔ lé Yehowa kpakpa acɛ do yí nyi nywitɔa nyi akpaxwe ɖeka le nyɔ vevi lɔ mɛ. Ahanke enyɔ ci yí kan egbejinɔnɔ agbetɔwo tɔ nyi akpaxwe bu nɔ enyɔ vevi lɔ.
Nyi yí taɖo mìva tɛtɛgbe do ji mɔ Yehowa ŋkɔ lɔ koɖo yi ŋci kɔkɔ nyi enyɔ gangan vevitɔ lɔɔ? Mìakpɔ susu amɛtɔn ciwo yí ɖo enyɔ lɔ ŋci.
Satana xoxoɔ ɖyi Mawu ŋkɔ keke so hwenu efɔn gu do ji le Edɛn kpa lɔ mɛ
Ŋkɔtɔ, Satana sɔ nyɔ do Yehowa ŋkɔ lɔ koɖo mɛ ciŋmɛ enyi nu le Edɛn kpa lɔ mɛ. Enyɔ ci Satana biɔ Ɛva se dasɛ mɔ Yehowa denyi xomɛvunɔ o yí ese ci yí edo nɔ mɛ ciwo ji ekpakpa acɛ do desɔgbe o. Satana trɔ ta nɔ enyɔ ciwo Yehowa nu yí nu mɔ Mawu nyi ŋsukantɔ. Éxo ɖyi Yehowa ŋkɔ. Évatrɔ “Legba” ci gɔnmɛ yí nyi “eɖyixoamɛtɔ.” (Ʒan 8:44) Ɛva se Satana nyɔwo yí gbe to nɔ Mawu, yí fɔn gu do yi cɛkpakpa nu. (Gɔnm. 3:1-6) So hwenɔnu keke vaɖo egbɛɔ, Satana kpɔtɔ xoxoɔ ɖyi Mawu ŋkɔ, yí nukɔ ŋsunyɔwo so mɛ ci Yehowa nyi nu. Mɛ ciwo yí kannɔdo ŋsunyɔ ŋtɔ́wo ji desenɔ tonu nɔ Yehowa o. Vɔ Mawu mɛwo kpɔɛ mɔ, eɖyixoxo Yehowa ŋkɔ kɔkwɛ ŋtɔ́ nyi enumajɔmajɔ vwin. Ecɛ yí dɔ yí efunkpekpe koɖo enumajɔmajɔwawa vasugbɔ le nyigban lɔ ji.
Amɛvetɔ, Yehowa ɖui mɔ yeakɔ ye ŋkɔ ŋci yí ana amɛ́ yí asɔ wa nywi nɔ enuwawawo pleŋ. Ecɛ le veviɖe nɔ Yehowa. Eyi taɖo enu mɔ: “Na dasɛ . . . mɔ Anyi ŋkɔ gangan lɔ nyi enu kɔkwɛ nyɔnɔnwitɔ.” (Eze. 36:23) Yesu dasɛ ŋci yí ɖo anyi enu tajitɔ le Yehowa sɛntɔwo gbedodoɖawo mɛ ci emɔ: “Ao ŋkɔ le kɔ.” (Mt. 6:9) Bibla dasɛ yi zenɛniɖe mɔ Yehowa ŋkɔ lɔ ŋci kɔkɔ le veviɖe. Kpɔwɛ ɖewo ke: “Kanfukanfu nɔ Tɔhonɔ ŋkɔ.” (1 Kro. 16:29; Eha. 96:8) “Mí kanfu yi jiɖuɖu ŋkɔ.” (Eha. 66:2) “Na na bubu ao ŋkɔ keke asɔyi mavɔmavɔ.” (Eha. 86:12) Gbeɖekaɔ, Yehowa ŋtɔ xo nuxu so jeŋkwi mɛ yí wosi le gbedoxɔ ci yí le Ʒerusalemu mɛ fini Yesu nu le mɔ: “Eda, kanfu Ao ŋkɔ.” Eyi Yehowa ɖo ŋci ni zeɖeka mɔ, “Ŋ kanfu Yi yí Na gbe kanfu Yi.”—Ʒan 12:28. a
Amɛtɔntɔ, Yehowa dro canɔ ka koɖo yi ŋkɔ lɔ alo mɛ ciŋmɛ enyi tɛgbɛɛ. Kpɔ lé Yehowa ŋkɔ ale veviɖe do le dodokpɔ ci yí ava le Exwe Kotokun ɖeka Cɛkpakpa Yesu Kristo tɔ vɔvɔnu ɖa. Lé Mawudɔlawo koɖo agbetɔwo akpɔ Yehowa ŋkɔ lɔ do le hwenɔnuɔ? Nɔ mìaɖo nyɔbiɔse cɛ nuɔ, mìatrɔ aɖo ŋwi enyɔ amɛve ciwo yí kan enyɔ gangan lɔ: egbejinɔnɔ agbetɔwo tɔ koɖo xexegbɛ cɛkpatɔnyinyi nyɔ lɔ. Mɛ ciwo yí dasɛ mɔ yewonyi gbejinɔtɔwo akpɔtɔ adokɔ go cukaɖa ciwo yí adasɛ mɔ wokpɔtɔ le gbejia? Oo. Woanyi amɛkpekpewo yí woado wo kpɔ keŋkeŋ. Woana wo agbe mavɔ. Xexeɛ pleŋ mɛ cɛkpatɔnyinyi nyɔ lɔ akpɔtɔ anyi enyɔ ci nu woaxokɔ nuxu so yí akpɔtɔ adodoɔ mama agbetɔwo koɖo mawudɔlawo mɛa? Oo. Hwenɔnuɔ, mɛ ciwo yí le jeŋkwi mɛ koɖo nyigban ji avanyi enu kuɖeka yí alɔn mɔ Yehowa le kpa cɛ nɔ yewo keke asɔyi mavɔ. Keŋ ɖe, Yehowa ŋkɔ lɔ yɛ ɖe, yɛagbe le veviɖe le hwenɔnua?
Yehowa ŋkɔ lɔ avale kɔkɔɛɖe yí mɛɖe dagbexo ɖyi yi o. Vɔ Yehowa ŋkɔ lɔ akpɔtɔ anyi enuvevitɔ nɔ yi sɛntɔwo pleŋ ciwo yí le jeŋkwi mɛ alo nyigban ji. Nyi yí taɖo agbenyi ahan ɔ? Ðo woakpɔ Yehowa agbekpɔtɔ awakɔ enujiŋwo. Bui kpɔ, Yesu asɔ yiɖeki hwe yí asɔ acɛkpakpa lɔ pleŋ jo nɔ Yehowa yí Mawu “a ɖu fyɔ do enushanu ji.” (1 Kor. 15:28) Le yi goduɔ, agbetɔ ciwo yí le nyigban ji akpɔ “vovo koɖo kanfukanfu ciwo yí nyi Mawu viwotɔ.” (Rɔm. 8:21) Eyi Yehowa awɛ yí edro yitɔ ci yí nyi kpɔ mɔ enuwawa ciwo yí le jeŋkwi mɛ koɖo nyigban ji anyi xomu gangan ɖeka ci yí le ju avamɛ keŋkeŋ.—Efe. 1:10.
Lé trɔtrɔ cɛwo akpɔ ŋsɛn do Yehowa xomu ci yí le jeŋkwi mɛ koɖo nyigban ji doɔ? Kankandojitɔɔ, mìakpɔtɔ aɖo edro sɛnŋsɛnŋɖe mɔ mìakpɔtɔ akanfukɔ Yehowa ŋkɔ nywi lɔ. Gbɔngbɔn kɔkɔɛ lɔ na yí ehajitɔ Davidi ŋwlɛ mɔ: “Mí kanfu Tɔhonɔ Mawu. . . Mí kanfu yi jiɖuɖu ŋkɔ keke asɔyi mavɔmavɔ.” (Eha. 72:18, 19) Mìakpɔtɔ akpɔkɔ susu yoyu koɖo susu dojijɔnamɛ ciwo yí adɔ mìakanfukɔ yi ŋkɔ keke asɔyi mavɔmavɔ.
Nɔ mìanuiɔ, Yehowa ŋkɔ lɔ le dumɛ nɔ enu ciwo keŋkeŋ enyi. Eyi vevitɔ lɔɔ, yi ŋkɔ lɔ ɖonɔ ŋwi yi lɔnlɔn nɔ mì. (1 Ʒan 4:8) Mìakpɔtɔ aɖonɔ ŋwi mɔ lɔnlɔn yí dɔ yí Yehowa wa mì, eyi ke na yí esɔ Eviɛ sa vɔn do ta nɔ mì. Yí lɔnlɔn lɔ ke yí gbena yí ekpanɔ acɛ do mì ji le emɔ jɔjɔɛ ji. Vɔ mìakpɔtɔ akpɔkɔ lé Yehowa lekɔ bu nɔ yi nuwawawo koɖo lɔnlɔn do. Keke asɔyi mavɔmavɔɔ, mìakpɔtɔ ateteɛ gogo mìwo Da yí mìagbekannɔfu yi ŋkɔ gangan lɔ.—Eha. 73:28.
a Bibla gbenu mɔ Yehowa wanɔ enuwo “do yi ŋkɔ nywi ŋci.” Ékplɔnɔ yi mɛwo, kpenɔdo wo nu, hwlɛnɔ ta nɔ wo, sɔ nuvɔnwo kenɔ wo, hɛnnɔ wo do agbe. Éwanɔ ŋcɛwo pleŋ do yi ŋkɔ gangan Yehowa ŋci.—Eha. 23:3; 31:3; 79:9; 106:8; 143:11.
