NƆ WOJIKƆ aɖe nyɔnu le sasa hwenuɔ, ŋsu lɔ alo yi xomu nanɔ agban nyɔnu lɔ xomu. Agbannana lɔ tɛnŋ nyi ehovevinuwo, elanwo alo eho ŋtɔ. Hweɖowonuɔ, mɛɖewo wanɔ dɔ do dumɛ nɔ agbannana, eyi Ʒakɔbu wa hwenu ejikɔ aɖe Rashɛli. Éxɔ gbe mɔ yeawa dɔ nɔ Rashɛli dalɔ na nɔ xwe amadrɛ. (Gɔnm. 29:17, 18, 20) Nyi yí taɖo wonanɔ agban ɔ?

Carol Meyers ci yí nyi wemanyatɔ ɖeka ci yí ɖenɔ Bibla nyɔwo mɛ nu mɔ: “Agban ci wona tɛnŋ nyi efɛn ci wocu do dumɛ nɔ edɔ ciwo yí nyɔnu lɔ awa sa nɔ ekpɔtɔ le xomu lɔ mɛ. Ecɛ nɔnɔ veviɖe nɔ xomu ciwo nyi glɛshinɔwo.” Agbannana lɔ tɛnŋ dɔ hɛnnɛ mɔ xomu lɔwo koɖo ve aca yí awa xlɔ. Xomu lɔwo koɖo ve donɔ alɔ nɔnɔ le cukaɖawo hwenu. Sɔ kpe niɔ, agbannana lɔ dasɛ mɔ nyɔnu lɔ aso le edalɔ gbɔ yí ecɛyɛɔ, asuɔ yí akpɔ ji yí agbele bu ni.

Agbannana denyi mɔ nyɔnu lɔ nyi enuɖe ci woaxwle alo asa o. Wema ɖeka ci yí xo nuxu so lé wonɔnɔ agbe do koɖo akɔnuwo nu le blema Izraɛli nu mɔ: “Eho alo nubuɖe ci wokan mɔ woɖo ana nyɔnu lɔ xomu gbɔxwe aɖi tɛnŋ na aze shigbe mɔ sa wosakɔ nyɔnu lɔ nɛ. Vɔ de ahan amowo kpɔɛni nɛ o, enu enyi yí wona nyɔnu lɔ xomu denyi xwlexwle ho yɔ o.”

Le ju ɖewo mɛ gbɛɔ, amowo kpɔtɔ nakɔ agban nɔ nyɔnu. Nɔ ajitɔ koɖo ajinɔ ciwo yí nyi Kristotɔwo jikɔ akan agban ci woana nɔ wowo viɔ, woɖo awɛ keke amɛshiamɛ anya mɔ ‘wonyi nugɔnmɛsetɔwo,’ woakan agban lɔ le dredrenu. (Fili. 4:5; 1 Kor. 10:32, 33) Nɔ wowɛ ahan ɔ, woadasɛ mɔ yewodenyi ‘eholɔntɔwo’ alo ŋbiatɔnɔwo o. (2 Tim. 3:2) Gbe sɔ kpe niɔ, nɔ jila Kristotɔwo dekan eho sugbɔ nɔ mɛ ci yí jikɔ aɖe wowo viɔ, visu lɔ dadɔn alɔlelezan lɔ yi ŋkɔ keŋ atɛnŋ aji eho sugbɔ acu o. Alo damɔ yeatashi emɔɖeɖedɔ lɔ keŋ awa dɔ sugbɔ akpɔ eho gangan ci wokan nɔ ye o.

Le eju ɖewo mɛɔ, ese li yí nu eho nɛni ci woacu. Finiwo yí enyi ahan leɔ, ajitɔ koɖo ajinɔ ciwo yí nyi Kristotɔwo wanɔ do ju mɛ se ŋtɔ́ ji. Nyi yí taɖoɔ? Ðo Mawu Nyɔ lɔ nu mɔ Kristotɔwo “ɖo a na bubu acɛkpakpa gawo” yí anyì ju mɛ se ciwo yí detrɔkpe Mawu sewo o.—Rɔm. 13:1; Edɔ. 5:29.