1-2. Lé Yehowa nyɔ ciwo yí le Ezai 65:16, 17 mɛ dokɔ ŋsɛn mì nɔ mìakpɔtɔ adonɔ ji doɔ?

“ŊGBENA TA O!” eyi nyi exwe 2017 takpekpegan nyɔta, ci yí do ŋsɛn amɛ. Takpekpegan lɔ kpedo mì nu yí mìkpɔ lé mìawɛ ado ji le mìwo cukaɖawo mɛ. Mìwa takpekpegan cɛ yɛɔ, eyi exwe amɛnɛ vɔ, gan mìgbekpɔtɔ dokɔ ji le xexe vwin cɛ mɛ.

² Cukaɖa ciwo mɛ èto vayi yɛɔ? Ao xomumɛtɔ ɖe alo ao xlɔ vevi ɖe yí kua? Èle dɔ̀ sɛnŋsɛnŋ ɖea? Shinshin yí dokɔ aya nɔ eoa? Jɔjɔmɛ fɔku ɖe yí jɔ do eo jia, wowa tamɛsɛnnu ɖe koɖo eo alo cikɔ yumɛ nɔ eoa? Alo COVID-19 dɔ̀vwin lɔ yí na èsekɔ vevia alo nubu ɖe yí dokɔ vevisese nɔ eoa? Mìkpɔkɔ mɔ veviɖe nɔ gbecigbe cukaɖa cɛwo pleŋ avayi yí mìaŋlɔbe wo, wodagbejɔ kpɔ o!—Hlɛn Ezai 65:16, 17.

3. Nyi mìɖo awa le kakacɛ mɛɔ, yí nyi yí taɖoɔ?

³ Agbenɔnɔ le xexe vwin cɛ mɛ gbɔnnu yí taŋfuin mìado go cukaɖa sɛnŋ buwo sɔwu le esɔmɛ. (Mt. 24:21) Eze gbajɛɛ mɔ, mìɖo akpɔtɔ adonɔ ŋsɛn mìwo jidodo. Nyi yí taɖoɔ? Ðo Yesu nu mɔ: “Toto ejidodo míwotɔ mɛ ɔ, mí a hwlɛn míwoɖekiwo gan.” (Luiki 21:19) Nɔ mìbu tamɛ kpɔ so mɛ ciwo yí do ji nywiɖe le mìwo cukaɖawo han mɛɔ, atɛnŋ ado ŋsɛn mìwo jidodo.

4. Nyi yí taɖo mìatɛnŋ anu mɔ Yehowa yí ɖo ejidodo kpɔwɛ nywitɔ ɖɛɔ?

⁴ Mi yí ɖo ejidodo kpɔwɛ nywitɔ ɖɛɔ? Yehowa Mawu yɔ. Ðoŋci lɔ kpaca eoa? Taŋfuin awa ahan nɔ eo doŋkɔ, vɔ nɔ èvabu tamɛ kpɔ so nuɔ, àkpɔ enu ci yí taɖo enyi ahan. Legba yí kpakɔ acɛ nɔ xexe lɔ, eyi taɖo cukaɖawo sugbɔ li.  Yehowa ɖo ŋsɛn yí agu xexe lɔ le afɔdumɛ, gan énɔkɔ te mɔ yeavawɛ gbeɖeka le esɔmɛ. (Rɔm. 9:22) Gbɔxwe ŋkeke lɔ aɖoɔ, mìwo Mawu kpɔtɔ dokɔ ji. Na mìakpɔ enu amashiɖekɛ ciwo mɛ Yehowa dokɔ ji le.

5. Lé woxo ɖyi Mawu ŋkɔ lɔ doɔ, yí lé ena ese le eoɖeki mɛɔ?

⁵ Woxo ɖyi Yehowa ŋkɔ lɔ. Yehowa lɔn yi ŋkɔ lɔ yí ji mɔ, mɛshiamɛ le do bubu yi nu. (Ezai 42:8) Vɔ woxo ɖyi yi ŋkɔ nywi lɔ so exwe 6 000 ke. (Eha. 74:10, 18, 23) Wotɔ nyɔ cɛ ji le Edɛn kpa lɔ mɛ, hwenu Legba (ci gɔnmɛ yí nyi “Eɖyixoamɛtɔ”) do hwɛ Mawu mɔ yɛte enu ɖeka ci yí ana Adamu koɖo Ɛva akpɔ jijɔ wo. (Gɔnm. 3:1-5) So hwenɔnuɔ, wowa fɛn donɔ hwɛ Yehowa gbaagbali mɔ, enu ci teŋ yí agbetɔwo ʒan ɔ, yɛtenɔ wo. Yesu xa le yiɖeki mɛ sugbɔ ci woxo ɖyi Dalɔ ŋkɔ. Susu cɛ yí taɖo ekpla yi nukplaviwo mɔ wo le do gbe ɖaɖa mɔ: “Mìwo Da ci yí le jeŋkwi mɛ, Ao ŋkɔ le kɔ.”—Mt. 6:9.

6. Nyi yí taɖo Yehowa ɖe mɔ gamɛ sugbɔ vayi gbɔxwe adasɛ mɔ eye yí je akpa cɛ nɔ jeŋkwi koɖo nyigban ɔ?

⁶ Wofɔn gu do yi cɛkpatɔnyinyi nu. Yehowa ɖekɛ kpaŋ yí je akpa acɛ nɔ jeŋkwi koɖo nyigban yí lé ekpanɔ acɛ do yí nyi enywitɔ. (Enyɔ. 4:11) Vɔ Legba tekpɔ yí ble mawudɔlawo koɖo agbetɔwo nɔ woabui mɔ Mawu deje akpa acɛ o. Yehowa datɛnŋ asɔ gbeɖeka koɖo zan asɔ dasɛ mɔ eye yí je akpa acɛ yí lé yekpanɔ acɛ do yí nyi enywitɔ o. Mawu sɔ ŋɖɛnyanya yí tashi agbetɔwo nɔ woakpa cɛ na nɔ hwenu jinjin ɖe. Hwenɔnuɔ, amowo akpɔɛ mɔ ci yewogbe tonu sese nɔ Enuwowatɔ lɔɔ, yewodatɛnŋ akpa acɛ anyɔ o. (Ʒer. 10:23) Ci Mawu do ʒinxoɔ, awɛ mɔ woakpɔ nyɔ lɔ gbɔ zeɖeka yí anyi evɔ. Eyi mɛshiamɛ avanya mɔ lé Yehowa kpanɔ acɛ do yí nyi nywitɔ yí yi Fyɔɖuxu lɔ ɖekɛ kpaŋ yí ahɛn fafa koɖo vofamɛnɔnɔ va nyigban ji.

7. Miwo yí fɔn gu do Yehowa nuɔ, yí nyi awa nɔ woɔ?

⁷ Eviɛ ɖewo fɔn gu do nu. Yehowa wa yi dɔlawo koɖo eviɛ agbetɔwo yí afɛn alo nuvɔn ɖekɛ dele wo nu o. Vɔ le yi goduɔ, eviɛ mawudɔla ɖeka ci yí nyi Satana (ci gɔnmɛ yí nyi “Egufɔntɔ”) do to nɔ Adamu koɖo Ɛva ciwo yí nyi agbetɔ maɖonuvɔn yí wofɔn gu do Yehowa ji. Mawudɔla koɖo agbetɔ buwo bɔdo wo nu le gufɔnfɔn lɔ mɛ. (Ʒuda 6) Le yiyimɛɔ, mɛ ciwo yí le Izraɛli jukɔn ci Mawu can mɛ can gbi yí tɔ ŋsumawuwo sɛnsɛn. (Ezai 63:8, 10) Yehowa se le yiɖeki mɛ mɔ wotrɔ ye to mɛ. Vɔ, édo ji yí gbekpɔtɔ dokɔ ji keke aje hwenu agu egufɔntɔ lɔwo pleŋ. Eyi Yehowa koɖo yi sɛntɔ egbejinɔtɔ ciwo yí dokɔ ji koɖi le xexe vwin cɛ mɛ akpɔ jijɔ, ɖo woakpɔ gbɔndomɛ!

8-9. Ŋsu ciwo wokankɔ so Yehowa nuɔ, yí nyi mìatɛnŋ awa so wo nuɔ?

⁸ Legba kpɔtɔ kannɔ ŋsu do nu ni. Satana do hwɛ Yehowa sɛntɔ egbejinɔtɔ Job koɖo yi sɛntɔ egbejinɔtɔwo pleŋ mɔ wowoɖekitɔ wojikɔ taɖo yí sinkɔ. (Job 1:8-11; 2:3-5) Legba kpɔtɔ dokɔ hwɛ agbetɔwo keke je egbɛ. (Enyɔ. 12:10) Mìatɛnŋ awa mìwo kpaxwe yí asɔ dasɛ mɔ ŋsu yí Satana kankɔ nɔ mìdonɔ ji le cukaɖawo mɛ yí kpɔtɔ le gbeji nɔ Yehowa, ɖo mìluin. Shigbe lé Yehowa cu shi nɔ Job nɛɔ, ácu shi nɔ mìwo can nɔ mìdo ji.—Ʒaki 5:11.

⁹ Satana zankɔ ŋsusɛnsɛnha ŋkɔnɔtɔwo yí wonunɔ mɔ Yehowa nyi tamɛsɛntɔ yí na agbetɔwo kpekɔ fun. Nɔ  ɖeviwo kuɔ, sɛnsɛnŋkɔnɔtɔ ɖewo nunɔ hɛnnɛ mɔ, Mawu yí kplɔ wo yi jeŋkwimɛ, ɖo éʒan mawudɔla sugbɔ. Enyɔ kpotu teŋ yí nyɔ cɛ nyi! Mìjeshi Yehowa mìwo Da lɔ mɔ yɛnyi amɛlɔntɔ. Eyi taɖo nɔ mìlé dɔ̀vwin ɖe alo mìwo mɛ vevi ɖe kuɔ, mìdedonɔ hwɛ mìwo Mawu gbeɖe o. Vɔ, mìɖo xɔse mɔ gbeɖekaɔ, Mawu ada dɔ̀ nɔ dɔ̀nɔwo yí afɔn mɛkukuwo so ku. Mìatɛnŋ anu nɔ mɛshiamɛ ci yí alɔn yí aɖo to mì mɔ Yehowa nyi lɔnlɔn Mawu. Ecɛ ana Yehowa aɖo enyɔ ŋci nɔ mɛ ci yí gbalikɔ.—Elo. 27:11.

10. Nyɔ ci yí Ehajiji Wema 22:23, 24 nu so Yehowa nuɔ?

¹⁰ Yi sɛntɔ lɔnlɔntɔwo kpekɔ fun. Yehowa nyi Mawu ci yí senɔ vevi do amɛ nu. Evenɔ ni sugbɔ nɔ ékpɔ yí mìkpekɔ fun, taŋfuin sɔ kudo yumɛcici, edɔ̀lele alo mìwoŋtɔwo gbɔjɔgbɔjɔwo. (Hlɛn Ehajiji Wema 22:23, 24.) Yehowa mɔŋje mìwo vevisesewo mɛ, éji mɔ yeaɖe wo si yí áwɛ hɛnnɛ. (Sɔ sɔ koɖo Hunhun 3:7, 8; Ezai 63:9.) Gbeɖeka avasun yí “a cucu ɖashi keŋkeŋ le ŋkuviwo ji nɔ wo. Eku, enulolo, avinfanfan, alo vevisese da gbe li o.”—Enyɔ. 21:4.

11. Lé Yehowa sɛntɔ egbejinɔtɔ ciwo yí ku kpɔkpɔ druini doɔ?

¹¹ Exlɔ veviwo ku ni. Lé Yehowa senɔ le yiɖeki mɛ so ŋsu koɖo nyɔnu egbejinɔtɔ ciwo yí ku nuɔ? Éjikɔ veviɖe mɔ yeagbekpɔ wo! (Job 14:15) Bui kpɔ yí akpɔ lé edrokɔ Yehowa veviɖe mɔ yeakpɔ ye xlɔ vevi Abraxamu ke ɖa! (Ʒaki 2:23) Alo kpɔ lé Yehowa gbejikɔ veviɖe mɔ yeaxo nuxu koɖo Moizi ci exonɔ nuxu koɖo “ŋmɛ ŋmɛ” sa ɖa! (Hun. 33:11) Gbekpɔ lé akpɔkpɔ mɔ veviɖe mɔ yease kanfukanfu ha nyasese ciwo Davidi koɖo hakpatɔ buwo aji ɖa! (Eha. 104:33) Ci  Yehowa xlɔ cɛwo dɔn alɔn le kumɛ can ɔ, deŋlɔbe wo o. (Ezai 49:15) Lé wole do sa kpɔtɔ le susumɛ nɔ Yehowa. Ci Bibla xokɔ nuxu so wo nuɔ, emɔ: “amɛshamɛ le agbe ni.” (Luiki 20:38) Gbeɖekaɔ, áfɔn wo do agbe yí agbese wowo gbedodoɖa ciwo yí so jimɛ yí alɔn yí woasin. Nɔ ao mɛ vevi ɖe kuɔ, nyɔ cɛwo atɛnŋ ado ŋsɛn eo yí afa akɔn nɔ eo.

12. Nyi yí donɔ vevisese nɔ Yehowa sugbɔ le ŋkeke vwin kpɛtɛkpɛtɛ cɛwo mɛɔ?

¹² Amɛ vwinwo cukɔ nu kpɔ koɖo mɛbuwo. Ci egufɔnfɔn lɔ je gɔnmɛ le Edɛn ɔ, Yehowa nya mɔ nɔnɔmɛ lɔwo adahɛn doji gbɔxwe avanyɔ. Yehowa gbe nuvwinwawa, numajɔmajɔwawa koɖo tamɛsɛnnuwawa ciwo yí le xexeɛ mɛ gbɛ. Ésenɔ vevi do mɛ ciwo gbɔjɔ yí datɛnŋ ahwlɛn ta nɔ wowoɖeki nu, le kpɔwɛ mɛ, nyɔcɔviwo koɖo kposhuwo. (Zak. 7:9, 10) Nɔ Yehowa kpɔ wocukɔ nu kpɔ koɖo yi sɛntɔ egbejinɔtɔwo yí cu wo do gakpamɛɔ, edonɔ vevisese ni sugbɔ. Míatɛnŋ akando ji mɔ yɛlɔn míwo ciwo pleŋ yí dokɔ ji shigbe yɛ nɛ.

13. Lé agbetɔwo wakɔ gbɔdɔndɔn masɔkoɖosenuwo le ŋmɛ nɔ Mawu doɔ, yí nyi avawaɔ?

¹³ Agbetɔwo wakɔ gbɔdɔndɔn masɔkoɖosenu sɔwu sa. Satana jinɔ mɔ yeable agbetɔ ciwo Mawu wa do yiŋtɔ nɔnɔmɛ nu nɔ woawakɔ gbɔdɔndɔn masɔkoɖosenuwo. Ci Yehowa kpɔ “mɔ agbetɔwo nyi enuvɔnwatɔwo” le Nowe hwenuɔ, “[Éxa] le Yi jimɛ, ɖo É kpɔ mɔ agbetɔ ci yí Ye wa do nyigban ji dé nyɔ o.” (Gɔnm. 6:5, 6, 11) So hwenɔnu ɖe, nɔnɔmɛ lɔwo kando mɛa? Oo! Gbɔdɔndɔn masɔkoɖosenu sugbɔ bɔ le ŋsu koɖo nyɔnu gblamɛ yí mɛ ciwo yí ɖo vijinu ɖekɛ ŋmɛwo can dɔnnɔ nɔnɔ gbɔ. Enuwana cɛwo jɔnɔ ji nɔ Legba taŋ! (Efe. 4:18, 19) Enu ci yí gbejɔnɔ ji nɔ Satana taŋ yí nyi, nɔ édo Yehowa sɛntɔ adodwi ɖe domɛ yí ewa nuvɔn gangan ɖe. Nɔ Yehowa do ʒinxo keke vaje fini ajeɔ, águ mɛ ciwo wanɔ gbɔdɔndɔn masɔkoɖosenuwo yí gbe mɔ yewodatrɔ o, keŋ asɔ dasɛ mɔ yegbe gbɔdɔndɔn masɔkoɖosenuwo keŋkeŋ.

14. Nyi agbetɔwo wakɔ nɔ nu ciwo Mawu wa do nyigban lɔ jiɔ?

¹⁴ Wodadahɛn enu ciwo Mawu wa. Agbetɔ ‘ɖunɔ fyɔ do agbetɔ ji nɔ yi gblegble’ yí gbedanahɛn nyigban lɔ koɖo elan ciwo Yehowa sɔ do ashi nɔ wo mɔ wo le lebu nɔ. (Ŋun. 8:9 NWT; Gɔnm. 1:28) Jɔjɔmɛnunyatɔ ɖewo nu mɔ agbetɔwo nuwanawo atɛnŋ agu elan alo aci ciwo yí awu miliɔn ɖeka le xwe ɖewo kpoŋ godu. Susu cɛ yí taɖo amowo nunɔ mɔ xexe lɔ le afɔku mɛ! Mìdo akpe mɔ, Yehowa ɖo gbe mɔ ‘yeatrɔn mɛ ciwo yí trɔnkɔ nyigban lɔ’ yí ana nyigban lɔ atrɔ Paradiso.—Enyɔ. 11:18; Ezai 35:1.

15-16. Nyi yí ɖo acucu mì mìado ji shigbe Yehowa nɛɔ? Na yi kpɔwɛ ɖeka.

¹⁵ Bu tamɛ kpɔ so cukaɖa dovevisesenamɛ ciwo pleŋ mɛ Yehowa dokɔ ji le na nɔ xwe kotokun nɛniɖe nu. (Kpɔ dakavi ci yí nyi “ Enu ciwo mɛ Yehowa dokɔ ji le.”) Yehowa atɛnŋ agu xexe vwin cɛ le hweɖekpokpui nu. Vɔ mìkpɔkpɔ nyɔna so yi ʒinxododo mɛ! Bu tamɛ kpɔ so kpɔwɛ cɛ nu. Sɔɛ mɔ wonu nɔ ŋsu ɖeka koɖo ashiɛ mɔ evi ci wojikɔ aji anyi dɔ̀nɔ yí agbe lɔ mɛ agbɔnnu ni yí dashin gbɔxwe aku o. Ci woji vi lɔɔ, jila lɔwo kpɔ jijɔ ci wonya mɔ ebulele nɔ ɖeviɛ agbɔnnu nɔ yewo sugbɔ can. Ci wolɔn wowo vi lɔɔ, wolɔn mɔ yewoado ji keŋ awa nushianu ni nɔ ase vivi nɔ agbe lɔ.

 ¹⁶ Ahanke gbɔxwe woaji Adamu koɖo Ɛva jijimɛviwo pleŋ ɔ, wonyi nuvɔmɛwo. Vɔ Yehowa lɔn wo yí lenɔ bu nɔ wo. (1 Ʒan 4:19) Gbesɔ kpe niɔ, Yehowa ɖo nujikpekpe wu jila ciwo nyɔ mìnu vayi yɛ, eyi taɖo átɛnŋ agu efunkpekpe ciwo mɛ eviɛwo le. Éɖo ŋkeke ci ji agu efunkpekpe ciwo yí dokɔ aya nɔ agbetɔwo. (Mt. 24:36) Yehowa lɔnlɔn ɖo acucu mìwo can nɔ mìakpɔtɔ adonɔ ji hweɖekpokpuinu ci eʒan.

17. Lé nyɔ ci wonu so Yesu nu le Ebretɔwo 12:2, 3 mɛ do ŋsɛn mì nɔ mìakpɔtɔ adonɔ ji doɔ?

¹⁷ Yehowa ɖo jidodo kpɔwɛ maɖoafɛn nɔ mì. Yesu sun ji keke do ji shigbe Dalɔ nɛ. Ci Yesu va nyigban jiɔ, wozui, do ŋkpɛn yi yí kin do funtrenamɛci nu yí eku do ta nɔ mì. (Hlɛn Ebre. 12:2, 3.) Kankandojitɔɔ, ejidodo kpɔwɛ ci Yehowa ɖo yí do ŋsɛn Yesu yí edo ji. Ecɛ atɛnŋ ado ŋsɛn mìwo can.

18. Lé 2 Piɛ 3:9 kpedo mì nu yí mìmɔŋje nu ciwo yí to so ʒinxo ci Yehowa do mɛɔ?

¹⁸ Hlɛn 2 Piɛ 3:9. Yehowa nya hwenu nywitɔ ci ji agu xexe vwin cɛ le. Ci edo ʒinxoɔ, agbetɔ sugbɔsugbɔ ciwo ayi miliɔn nɛniɖe vajeshi ɖɛ yí sinkɔ. Enyi jijɔ nɔ wo pleŋ mɔ Yehowa do ji na nɔ hwenu jinjin ɖe ahan keke wovaji yewo yí yewokpla lé yewoaluin do keŋ yí sɔ yewoɖekiwo ni. Nɔ Yehowa sɔ jijɔ cu shi nɔ yi sɛntɔ miliɔn nɛniɖe ciwo yí do ji yi vɔvɔnuɔ, adasɛ gbajɛɛ mɔ, gbeta ci Yehowa sɔ yí do ʒinxo yí nyi nywitɔ.

19. Nyi mìɖo aɖui gligaan yí awaɔ, yí ele ci mìakpɔ so mɛɔ?

¹⁹ Mìkpla lé mìado ji koɖo jijɔ do so Yehowa gbɔ. Ci Satana na yí vevisese koɖo cukaɖa sugbɔ li can ɔ, Yehowa kpɔtɔ nyi “jijɔ Mawu.” (1 Tim. 1:11, NWT) Mìwo can, mìatɛnŋ akpɔtɔ akpɔnɔ jijɔ nɔ mìle te kpɔ hwenu ci Yehowa akɔ yi ŋkɔ ŋci yí adasɛ mɔ éye yí nyi acɛkpatɔgan yí agu nuvwinwawa koɖo cukaɖa ciwo pleŋ yí le xexeɛ mɛ gbɛ. Mína mìaɖui gligaan yí ado ji keŋ anya mɔ mìwo Da ci yí le jeŋkwimɛ can dokɔ ji yí ecɛ afa akɔn nɔ mì. Nɔ mìwɛ ahan ɔ, nyɔ cɛwo avamɛ nɔ mɛshiamɛ le mì mɛ, eyi nyi mɔ: “[Woacu shi] nɔ amɛ ci yí donɔji le tetekpɔwo mɛ, ɖo gacimɛ yí wo tikpɔ ɖegbɔ ɔ, á xɔ agbe fyɔ kuku ci yí Axwetɔ lɔ sɔ wa gbeɖu nɔ amɛ ciwo yí lwin.”—Ʒaki 1:12.