ENUKPLAKPLA NYƆTA 41
Lé woakpedo Bibla nukplavi ɖe nu yí awa ŋkɔyiyi keke awa ӡinӡindoshimɛ—Akpaxwe ŋkɔtɔ
“Míwo yí nyi Kristo wema ci yí wo ŋwlɛ sɔ to mìwo dɔwawa ji nɔ Mawu.”—2 KOR. 3:3.
EHAJIJI 78 “Mawu Ƒe Nya La” Fialawo Míenye
SUSU VEVI LƆ *
Ŋɖe li yí ado jijɔ nɔ hamɛ lɔ pleŋ sɔwu ci woakpɔ Bibla nukplavi ci nu wokpedo yí awakɔ ӡinӡindoshimɛa? (Kpɔ enukplakpla nyɔta 1)
1. Lé 2 Korɛntitɔwo 3:1-3 na yí mìmɔŋje mɛ mɔ, Bibla kplakpla koɖo mɛɖe keke awa ӡinӡindoshimɛ nyi mɔnukpɔkpɔ vevi ɖekaɔ? (Kpɔ foto ci yí le akpa lɔ ji.)
LÉ ÈSENƆ le eoɖeki mɛ, nɔ èkpɔ Bibla nukplavi ɖe wa ӡinӡindoshimɛ le míwo hamɛ lɔ mɛɔ? Kankandojitɔɔ, ena èkpɔnɔ jijɔ! (Mt. 28:19) Yí nɔ enyi eo yí kplanɔ nu koɖo mɛ ci yí wakɔ ӡinӡindoshimɛ lɔɔ, jijɔ lɔ agbewugan doji. (1 Tɛs. 2:19, 20) Yesu nukplavi yoyu ciwo yí wa ӡinӡindoshimɛ yí nyi “wema ci yí wo ŋwlɛ,” nɔ mɛ ciwo yí kpla nu koɖo wo. Vɔ denyi nɔ wowoɖekɛ yɔ o, wogbenyi “wema ci yí wo ŋwlɛ,” nɔ hamɛ lɔ pleŋ.—Hlɛn 2 Korɛntitɔwo 3:1-3.
2. (a) Enyɔbiɔse vevi ci mìɖo abu kpɔɔ, yí nyi yí taɖoɔ? (b) Nyi yí Bibla nukplakpla nyiɔ? (Kpɔ gɔnmɛnuŋwlɛŋwlɛ lɔ.)
2 Jijɔ enyi mɔ le exwe amɛnɛ ciwo yí vayi mɛɔ, mìkpla Bibla koɖo amɛ ciwo yí wu 10 000 000 * le xexeɛ pleŋ mɛ wlecishiawleci. Yí mɛ ciwo yí wa ӡinӡindoshimɛ keŋ trɔ Yehowa Kunuɖetɔ koɖo Yesu nukplavi yoyuwo le exwe ŋtɔ́wo mɛ hlɛnhlɛnmɛ wu 280 000 xweshiaxwe. Lé mìatɛnŋ akpedo amɛ sugbɔtɔ nu le amɛ miliɔn nɛniɖe ŋtɔ́wo mɛ nɔ woawa ӡinӡindoshimɛɔ? Yehowa do ӡinxo yí ɖe mɔ nɔ amɛwo nɔ woatrɔ yi Kunuɖetɔwo, eyi taɖo mìwakɔ ci ji mìkpe yí akpedo wo nu nɔ woawa ŋkɔyiyi yí awa ӡinӡindoshimɛ kaba. Ðo gamɛ yikɔ!—1 Kor. 7:29a; 1 Piɛ 4:7.
3. Nyi mìakpɔ le nyɔta cɛ mɛ so Bibla nukplakpla nuɔ?
3 Nukplaviwowawadɔ lɔ le veviɖe, eyi taɖo Edɔjikpɔha lɔ biɔ alɔjedɔwaxuwo se mɔ, nyi yewoɖo awa nɔ Bibla nukplavi sugbɔtɔ awa ŋkɔyiyi keŋ awa ӡinӡindoshimɛ ma. Le nyɔta cɛ koɖo ci yí kplɔɛdo mɛɔ, mìakpɔ enu ciwo mìatɛnŋ akpla so emɔɖetɔ, eŋɛnywidratɔ ejugodutɔ koɖo ekán lɔ hamɛwo jikpɔtɔ kpɔnutɔxuwo gbɔ. * (Elo. 11:14; 15:22) Wodre enu ci Bibla nukplamɛtɔwo koɖo wowo nukplaviwo atɛnŋ awa nɔ enywiwo ato so Bibla kplakpla lɔ mɛ doji. Le enyɔta cɛ mɛɔ, mìakpɔ enu amatɔn ciwo yí enukplavi ɖe ɖo awa keŋ awa ŋkɔyiyi nɔ ӡinӡindoshimɛ wawa.
MÍKPLANƆ NU KWƐSHILA ÐESHIAÐE
Biɔ nukplavi lɔ se mɔ yewoatɛnŋ akpɔ fiɖe anɔ nyinɔnɔ do keŋ akannɔ seŋ le Bibla mɛ ma (Kpɔ mamamɛ 4-6)
4. Nyi mìɖo anya so Bibla kplakpla koɖo mɛɖe le xɔmɔnu nuɔ?
4 Nɔviŋsu koɖo nɔvinyɔnu sugbɔtɔ kplanɔ Bibla koɖo amɛwo le wowo xɔmɔnu. Seŋkankan koɖo amɛwo le ehɔnnu nyi emɔ nywi ɖeka ci ji woatɛnŋ ato yí ana Bibla kplakpla adro amɛwo, gan seŋkankan cɛwo dejinjinnɔ o, yí taŋfuin dajenɔ ji kwɛshila ɖeshiaɖe o. Eyi taɖo nɔvi ɖewo xɔnɔ mɛ ciwo yí sɔ ɖe le ji wo mimɛlowo keŋ vayɔnɔ wo alo ŋwlɛnɔ Bibla mɛ nyɔ ɖe ɖaɖa wo le trɔtrɔyi amɛve gblamɛ, keŋ asɔ do ŋsɛn eɖesɔleji wowo tɔ. Seŋkankan kleŋ cɛwo tɛnŋ yi ji na nɔ wleci ɖewo. Nɔ nukplavi lɔ dezan gamɛ yí je agbla wu cɛ le Mawu Nyɔ lɔ kplakpla mɛ ɖe, átɛnŋ awa ŋkɔyiyi nywiɖe yí asɔ yiɖeki na Yehowa keke awa ӡinӡindoshimɛa? Átɛnŋ awɛ ba.
5. Lé mìatɛnŋ azan Yesu nyɔ ci le Luiki 14:27-33 mɛ yí asɔ kpedo mìwo Bibla nukplaviwo nu doɔ?
5 Gbeɖekaɔ, Yesu na kpɔwɛ ɖeka yí sɔ dasɛ enu ci mɛɖe ɖo awa nɔ éji mɔ yeanyi ye nukplavi. Éxo nuxu so mɛɖeka ci yí jikɔ acu shanŋ koɖo efyɔ ɖeka ci yí jikɔ ayi ahwa nu. Yesu mɔ exɔcutɔ lɔ ɖo “á nɔ̀ anyinɔnɔ yí a bu tamɛ kpɔ, yí a drɔɛ kpɔ mɔ, eho le eye shi yí ye a ɖegbɔ” nɔ shanŋ lɔ ma. Énu so efyɔ ci yí jikɔ ayi ahwa nu mɔ, yɛɖo “ á nɔ̀ anyinɔnɔ keŋ a kpɔ mɔ ye ɖo ŋsɛn koɖo ahwakɔn” yí atɛnŋ awa enu ci yewojikɔ awa ma. (Hlɛn Luiki 14:27-33.) Ahanke Yesu nya mɔ mɛɖekpokpui ci yí jikɔ anyi ye nukplavi ɖo abu tamɛ kpɔ nywiɖe yí adrɔ enu ciwo yí eɖo awa gbɔxwe akplɔɛdo kpɔ. Susu cɛ yí taɖo mìɖo ado ŋsɛn lanmɛ nɔ mìwo Bibla nukplaviwo nɔ woakplanɔ nu lɔ koɖo mí kwɛshila ɖeshiaɖe. Lé mìatɛnŋ awɛ doɔ?
6. Nyi mìatɛnŋ atekpɔ awa nɔ mìwo Bibla nukplaviwo awa ŋkɔyiyiɔ?
6 Doŋkɔɔ, na nɔ enukplakpla le xɔmɔnu lɔ atɔ jinjinjin. Nɔ èyi gbɔɔ, míŋgbesɛn kpukpui kuɖeka ji o, míatɛnŋ agbeje kpukpui amɛve mɛ. Nɔ ètɔɛ ji ahan yí etɔ mama do axomɛnɔtɔ lɔɔ, biɔɛ se mɔ yewoatɛnŋ akpɔ fiɖe anɔ nyinɔnɔ do keŋ ayi seŋkankan lɔ ji ma. Lé axomɛnɔtɔ lɔ aɖo ŋci do yí adasɛ lé Bibla kplakpla lɔ le veviɖe ni do. Nɔ àkpedo nukplavi lɔ nu nɔ awa ŋkɔyiyi kabaɔ, ètɛnŋ biɔɛ se le yiyimɛ mɔ, yewoatɛnŋ awanɔ nukplakpla lɔ zeve le kwɛshila ɖeka mɛ ma. Ele ahan gan, nubuwo gbele veviɖe wu enukplakpla zeɖeka alo zeve kwɛshila ɖeshiaɖe.
DRANƆ BIBLA NUKPLAKPLA ÐEKAÐEKA DO
Dranɔ Bibla nukplakpla lɔ do nywiɖe yí adasɛ nɔ nukplavi lɔ lé yɛ can adranɔdo do (Kpɔ mamamɛ 7-9)
7. Lé enukplamɛtɔ lɔ ɖo adranɔ Bibla nukplakpla ɖekaɖeka do nywiɖe doɔ?
7 Shigbe enukplamɛtɔ nɛɔ, èɖo adranɔ Bibla nukplakpla ɖekaɖeka do nywiɖe. Àtɛnŋ ahlɛn enu ci míjikɔ akpla lɔ yí ada ŋkuvi do kpukpui lɔwo ji. Susu vevi lɔwo le nɔ susumɛ nɔ eo. Bu tamɛ kpɔ so enukplakpla lɔ nyɔta, enyɔta hwɛhwɛwo, enyɔbiɔsewo, kpukpui ciwo gbɔ woŋwlɛ do mɔ “hlɛn”, fotowo koɖo video ciwo yí atɛnŋ akpedo nu amɔŋje enukplakpla lɔ mɛ. Le yi goduɔ, bu tamɛ kpɔ so ao Bibla nukplavi lɔ nu koɖo lé àwɛ aɖe enu lɔ mɛ ni petii do yí amɔŋje mɛ fafɛɖe keŋ awa do ji.—Nex. 8:8; Elo. 15:28a.
8. Nyi yí apotru Pɔlu nyɔ ciwo yí le Kolosetɔwo 1:9, 10 mɛ kpla mì so gbedodoɖa do ta nɔ mìwo Bibla nukplaviwo nuɔ?
8 Le dradrado lɔ mɛɔ, do gbe ɖaɖa nɔ Yehowa so Bibla nukplavi lɔ koɖo yi ӡanwo nu. Nu nɔ Yehowa nɔ akpedo eo nu nato emɔ nywi ji yí akpla Bibla amɛ lɔ nɔ awa dɔ do yi ji ji. (Hlɛn Kolosetɔwo 1:9, 10.) Biɔ eoɖeki se yí akpɔ mɔ, enyɔ ɖe li yí yi gɔnmɛsese agbɔnnu nɔ nukplavi lɔ, alo nukplamu ɖe li yí lɔnlɔn do ji agbɔnnu ni ma. Le nɔ susumɛ nɔ eo mɔ ye tajinu yí nyi mɔ, yeakpedo nu yí awa ŋkɔyiyi keke awa ӡinӡindoshimɛ.
9. Lé enukplamɛtɔ lɔ atɛnŋ akpedo nukplavi lɔ nu yí adranɔ yi nukplakpla lɔ doɔ? Ðe mɛ.
9 Mìkpɔkɔ mɔ mɔ Bibla nukplakpla ci wowakɔ blaŋblaŋ akpedo nukplavi lɔ nu nɔ enu ciwo pleŋ Yehowa koɖo Yesu wa ajeŋ ni yí aji mɔ yeagbekpla nubuwo doji. (Mt. 5:3, 6) Gbɔxwe nukplavi lɔ akpɔ nyɔna so enukplakpla lɔ mɛ nywiɖeɔ, éɖo asɔ yi susu pleŋ ɖo enu ci ekplakɔ ji. Nɔ àkpedo nu yí awɛɔ, nu ni mɔ yile veviɖe mɔ yɛadranɔ enukplakpla ɖekaɖeka do doŋkɔ, le ecɛ wawa mɛɔ, áhlɛnnɔ enukplakpla lɔ yí abunɔ tamɛ kpɔ so lé atɛnŋ asɔ nukplamu lɔwo do edɔwawa mɛ do. Lé àtɛnŋ akpedo nu le dradrado lɔ mɛ doɔ? Dra nukplakpla ɖeka do doju koɖo nukplavi lɔ yí asɔ dasɛ lé wowɛni do ni. * Dre lé atɛnŋ ajinɔ ɖoŋci nɔ nyɔbiɔse lɔwo keŋ adonɔ jeshi nyɔgbe vevi ɖewo ciwo yí akpedo nu aɖonɔ ŋwi ɖoŋci lɔwo. Le yi goduɔ, nu ni nɔ ananɔ ɖoŋci lɔwo do yiŋtɔ nyɔgbewo mɛ. Nɔ éweni ahan ɔ, àtɛnŋ anya lé emɔŋje nukplakpla lɔ mɛ nywiɖe do. Vɔ nubu gbeli yí àtɛnŋ ado ŋsɛn ao nukplavi mɔ yɛ le wa.
KPLƐ NƆ AKANNƆ SEŊ KOÐO YEHOWA GBESHIAGBE
Kpla ao Bibla nukplavi lé akannɔ seŋ koɖo Yehowa do (Kpɔ mamamɛ 10-11)
10. Nyi yí taɖo Bibla hlɛnhlɛn gbeshiagbe le veviɖeɔ, yí nyi yí Bibla nukplavi ɖo awa gbɔxwe akpɔ sɔɖu le mɛɔ?
10 To akpo nɔ enukplakpla koɖo yi nukplamɛtɔ kwɛshila ɖeshiaɖeɔ, nukplavi lɔ ŋtɔ awanɔ ŋɖewo ŋkeŋke ciwo mɛ akpɔnɔ nyɔna so. Éɖo akannɔ seŋ koɖo Yehowa. Lé awɛ doɔ? Áɖonɔ to Yehowa yí agbexonɔ nuxu ni. Átɛnŋ aɖo to Mawu to Bibla hlɛnhlɛn gbeshiagbe ji. (Ӡoz. 1:8; Eha. 1:1-3) Dasɛ lé atɛnŋ azan “Bibla hlɛnhlɛn toto” ci woatɛnŋ awa kɔpi nɔ le jw.org ji. * Vɔ gbɔxwe atɛnŋ akpɔ sɔɖu le Bibla hlɛnhlɛn lɔ mɛɔ, do ŋsɛn yi nɔ abunɔ tamɛ kpɔ so enu ci Bibla kplɛ so Yehowa nu koɖo lé atɛnŋ asɔ enu ci ekpla do edɔwawa mɛ le yi gbe mɛ do.—Edɔ. 17:11; Ӡaki 1:25.
11. Lé nukplavi ɖe atɛnŋ akpla gbedodoɖa nywiɖe doɔ, yí nyi yí taɖo ele veviɖe mɔ adonɔ gbe ɖaɖa nɔ Yehowa blaŋblaŋ ɔ?
11 Do ŋsɛn ao nukplavi nɔ axonɔ nuxu nɔ Yehowa le gbedodoɖa mɛ ŋkeŋke. Donɔ gbe ɖaɖa so jimɛ le tɔtɔmɛ koɖo vɔvɔnu nɔ enukplakpla ɖekaɖeka yí ayɔnɔ nukplavi lɔ ŋkɔ do mɛ. Nɔ ésekɔ ao gbedodoɖawoɔ, átɛnŋ akpla lé adonɔ gbe ɖaɖa so jimɛ nɔ Yehowa Mawu le Yesu Kristo ŋkɔ mɛ do. (Mt. 6:9; Ӡan 15:16) Kpɔɛ le susumɛ, lé Bibla hlɛnhlɛn ŋkeŋke (etoɖoɖo Yehowa) koɖo gbedodoɖa (nuxuxoxo nɔ Yehowa) atɛnŋ akpedo ao nukplavi nu yí ate gogo Mawu doji ɖa! (Ӡaki 4:8) Nɔ éwanɔ enu cɛwo ŋkeŋkeɔ, akpedo nu awa ŋkɔyiyi yí asɔ yiɖeki na Yehowa keŋ awa ӡinӡindoshimɛ. Nubu ci yí atɛnŋ agbekpedo nuɔ?
KPEDO NU NƆ ATE GOGO YEHOWA YÍ ANYI YI XLƆ
12. Lé enukplamɛtɔ ɖe atɛnŋ akpedo yi nukplavi nu yí anyi exlɔ koɖo Yehowa doɔ?
12 Mìji mɔ mìwo Bibla nukplavi akpla nu so Yehowa nu. Vɔ enu ci ekplakɔ atɛnŋ awa dɔ do yi ji ji yí aji mɔ yeawa do ji. Yesu kpla nu sugbɔ amɛwo yí wojinɔ mɔ yewoakpla nu sugbɔ le gbɔ. Vɔ amɛwo gbekplɔɛnido, ɖo yi kplamuwo wanɔ dɔ do wowo ji ji. (Luiki 24:15, 27, 32) Ao nukplavi ɖo akpɔ Yehowa shigbe Amɛ ŋtɔŋtɔ nɛ, mɛ ci atɛnŋ aje xlɔ koɖo yí akpɔɛni shigbe Edalɔ, yi Mawu koɖo yi Xlɔ nɛ. (Eha. 25:4, 5) Le Bibla nukplakpla lɔ mɛɔ, dɔn nukplavi lɔ susu yi nɔnɔmɛ nywi ciwo yí le mìwo Mawu shi ji. (Hun. 34:5, 6; 1 Piɛ 5:6, 7) Wɛni ahan nɔ míkplakɔ nyɔta ɖekpokpui. Kpedo nu nɔ amɔŋje Yehowa nɔnɔmɛ nywiwo mɛ. Eɖewo yí nyi yi lɔnlɔn, xomɛvuwawa koɖo ŋshishikunamɛ. Yesu mɔ, “ese ŋkɔtɔ koɖo ese vevitɔ lɔ” yí nyi “lɔn [Yehowa] ao Mawu.” (Mt. 22:37, 38) Tekpɔ acu lɔnlɔn gangan ɖoɖo nɔ Mawu do jimɛ nɔ ao nukplavi lɔ.
13. Na kpɔwɛ ɖeka ci yí dasɛ lé woakpedo nukplavi ɖe nu yí anya Yehowa nɔnɔmɛ nywiwo.
13 Nunɔ enu ci yí taɖo èlɔn Yehowa nɔ ao nukplavi lɔ. Ecɛ akpedo nu akpɔ mɔ, yeŋtɔ yeɖo ate gogo Mawu doji keŋ atekpɔ aluin. (Eha. 73:28) Le kpɔwɛ mɛ, enyɔ ɖe le enukplakpla wema lɔ mɛ alo kpukpui ɖe mɛ yí xo nuxu so Yehowa lɔnlɔn, nunya, jɔjɔɛnyinyi alo yi ŋsɛn nu yí ewa dɔ do ao ji jia? Nui nɔ ao nukplavi lɔ yí aɖe mɛ ni mɔ, yɛnyi ɖeka le susu sugbɔ ciwo yí na yelɔn mìwo Da ci yí le jeŋkwimɛ. Nubu gbeli yí Bibla nukplavi ɖekaɖeka ɖo awa keŋ awa ŋkɔyiyi nɔ ӡinӡindoshimɛwawa.
DO ŊSƐN YI NƆ AYINƆ HAMƐ LƆ BƆBƆWO
Do ŋsɛn ao Bibla nukplavi lɔ nɔ aɖe blɛ atɔ bɔbɔwo! (Kpɔ mamamɛ 14-15)
14. Sɔ koɖo Ebretɔwo 10:24, 25 ɖe, lé hamɛ bɔbɔwo yiyi atɛnŋ akpedo Bibla nukplavi ɖe nu yí awa ŋkɔyiyi doɔ?
14 Mì pleŋ jinɔ mɔ mìwo nukplaviwo awa ŋkɔyiyi keke awa ӡinӡindoshimɛ. Emɔ vevi ɖeka ci ji mìakpedo wo nu le yí nyi mɔ, mìado ŋsɛn wo nɔ bɔbɔwo yiyi. Enukplamɛtɔ kpɔnutɔxuwo nu mɔ Bibla nukplavi ciwo yí yinɔ bɔbɔ wanɔ ŋkɔyiyi blaŋ sɔwu. (Eha. 111:1) Enukplamɛtɔ ɖewo nunɔ nɔ wowo nukplaviwo mɔ, enu sugbɔ li yí wodatɛnŋ akpla le axomɛ o, bɔbɔwo ɖekɛ yí woatɛnŋ akpla wo le. Hlɛn Ebretɔwo 10:24, 25 koɖo ao nukplavi lɔ keŋ adre nyɔna ciwo yí akpɔ nɔ éyinɔ bɔbɔwo ni. Dasɛ video ci yí nyi, Nyiwo yí jɔnɔ le Fyɔɖuxuxɔwo mɛɔ? * ni. Kpedo ao nukplavi nu yí aɖui gligaan mɔ yedagɔnnɔ bɔbɔwo o.
15. Nyi mìatɛnŋ awa asɔ do ŋsɛn mìwo nukplavi nɔ ayinɔ bɔbɔwo gashiagamɛɔ?
15 Nyi yí àtɛnŋ awa nɔ ao nukplavi deyi bɔbɔ kpɔ alo yinɔ wo ɖaaɖaaɔ? Sɔ jijɔ xo nuxu ni so ŋɖe ci èkpla le bɔbɔwo mɛ dejinjin o nu. Ecɛ ado ŋsɛn yi yí ava bɔbɔwo sɔwu ci àyɔɛni nɔ bɔbɔwo kpoŋ. Na Jutakpɔxɔ alo Agbenɔnɔ koɖo sumɔsumɔdɔ bɔbɔ nukplawema ci wojikɔ akpla le bɔbɔ yi. Dasɛ enu ciwo mɛ woagbeje le bɔbɔ ci yí gbɔkɔ mɛ ni keŋ abiɔɛ se mɔ akpaxwe ci yí ajɔ ji ni wu ma. Enu ci ao nukplavi lɔ akpɔ koɖo enyɔ ci ase le bɔbɔ ŋkɔtɔ ci ayi anyɔ wu ciwo ekpɔ le sɛnsɛnha buwo mɛ vayi. (1 Kor. 14:24, 25) Ádo go mɛbuwo ciwo kpɔwɛ nywiwo atɛnŋ asran yí mɛ ŋtɔ́wo agbekpedo nu awa ŋkɔyiyi keke awa ӡinӡindoshimɛ.
16. Nyiwo yí mìɖo awa asɔ kpedo Bibla nukplaviwo nu nɔ woawa ŋkɔyiyi keŋ awa ӡinӡindoshimɛɔ, yí nyi mìakpla le nyɔta ci yí gbɔgbɔ mɛɔ?
16 Lé mìatɛnŋ awanɔ Bibla nukplakpla do koɖo mɛɖe yí awa ӡinӡindoshimɛɔ? Mìatɛnŋ akpedo nukplavi ɖekaɖeka nu nɔ ado vevi enukplakpla lɔ, nɔ mìdo ŋsɛn yi mɔ yi le dranɔ enukplakpla ɖekaɖeka do yí mìava kplɛni koɖi kwɛshila ɖeshiaɖe. Mìgbeji mɔ mìado ŋsɛn yi nɔ akannɔ seŋ koɖo Yehowa ŋkeŋke yí anyi xlɔ koɖi. Mìji mɔ mìado ŋsɛn yi nɔ bɔbɔwo yiyi hɛnnɛ. (Kpɔ dakavi ci yí nyi, “ Enu ciwo yí nukplaviwo ɖo awa keŋ awa ŋkɔyiyi nɔ ӡinӡindoshimɛwawa”.) Vɔ shigbe lé nyɔta ci yí gbɔgbɔ aɖe mɛ nɛɔ, enu amatɔn buwo li yí Bibla nukplamɛtɔwo atɛnŋ awa yí asɔ kpedo nukplaviwo nu nɔ woayi ŋkɔ keŋ awa ӡinӡindoshimɛ.
EHAJIJI 76 Ðe Dzi Medzɔa Wò Oa?
^ par. 5 Woakpla ŋɖe mɛɖe gɔnmɛ yí nyi mɔ, woakpedo nu nɔ lé “ebunɔ tamɛ kpɔ do, lé esenɔ le yiɖeki mɛ do alo lé ewanɔ nu do atrɔ yoyu alo ato akpo nɔ sasatɔ.” Exwe 2020 mawunyɔkpukpui mìwo tɔ yí nyi Matie 28:19. Eɖo ŋwi nɔ mì lé ele veviɖe do mɔ, mìakpla Bibla koɖo amɛwo yí akpla wo lé woawɛ yí anyi Yesu Kristo nukplavi ciwo yí wa ӡinӡindoshimɛ. Le enyɔta cɛ koɖo ci yí kplɔɛdo mɛɔ, mìakpɔ lé mìawɛ yí abi doji le edɔ vevi cɛ wawa mɛ.
^ par. 2 ENYƆGBE GƆNMƐ ÐEÐE: Nɔ èwa toto koɖo mɛɖe yí kannɔ seŋ koɖi kabakaba le Bibla mɛɔ, anyi èwakɔ Bibla nukplakpla. Nɔ èdasɛ lé míawanɔ Bibla nukplakpla lɔ do nɔ nukplavi lɔ yí wa nukplakpla lɔ koɖi zeve keŋ kando ji mɔ enukplakpla lɔ ayi jiɔ, àtɛnŋ aŋwli do ao nukplaviwo mɛ.
^ par. 3 Enukplamunyɔ ɖewo le nyɔta cɛwo mɛ yí woɖe so enyɔci ci yí nyi “Ale Si Nàwɔ Abi Ðe Ðaseɖiɖidɔa Me” ciwo yí le Fiaɖuƒe Subɔsubɔdɔ juillet 2004 yi mai 2005 mɛ.
^ par. 9 Kpɔ miniti amɛnɛ video ci yí nyi Kpla ao nukplaviwo lé woadrado do. Le JW Library® jiɔ, yi MULTIMEDIA > NOS REUNIONS ET NOTRE MINISTERE > DEVENONS PLUS HABILES kpaxwe.
^ par. 10 Yi WEMAWO > WEMAWO KOÐO WEMAGBAJAWO kpaxwe.
^ par. 14 Le JW Library® jiɔ, yi MULTIMEDIA > NOS REUNIONS ET NOTRE MINISTERE > OUTILS POUR LA PREDICATION kpaxwe.
