ÈJIKƆ edɔdoashi ɖe le hamɛ lɔ mɛ yí desun eo shi hɔɖoa? Taŋfuin enyi edɔdoashi ɖe ci yí mɛbu wakɔ. Etɛnŋ nyi sumɔsumɔdɔ alo mɔnukpɔkpɔ ci yí nɔ eo shi vayi. Vɔ shinshin, lanmɛsɛn koɖo eho cukaɖawo alo xomu gbannɔamɛjiwo na degbetɛnŋ wakɔ sugbɔ o. Alo trɔtrɔ ciwo habɔbɔ lɔ wakɔ na yí èɖo atashi agbannɔamɛji ci yí le eo shi so exwe sugbɔ ke. Nɔ ele do ɖe can ɔ, àtɛnŋ ase le eoɖeki mɔ yedewakɔ enu ciwo pleŋ yeji mɔ yeawa le Mawu sumɔsumɔ mɛ o. Esɔgbe mɔ le nɔnɔmɛ cɛ hanciwo mɛɔ, àtɛnŋ agbɔjɔ hweɖewonu. Nɔ ele ahan can ɖe, lé àwɛ aɖu gbɔjɔgbɔjɔ, vevisese alo enyɔleledodɔmɛ ji nɔ woŋgbeɖo aʒin do lanmɛ nɔ eoɔ? Lé àwɛ akpɔtɔ akpɔnɔ jijɔɔ?

Mìakpɔ lé kpɔwɛ ci yí Ʒan amɛʒindoshimɛtɔ ɖo ɖɛ, atɛnŋ akpedo mì nu mìakpɔtɔ akpɔnɔ jijɔ. Mɔnukpɔkpɔ veviwo yí sun Ʒan shi, vɔ kankandoji li mɔ dekpɔkɔ mɔ nɔ enu ciwo yí vajɔ doji le agbemɛ o. Taŋfuin dabui mɔ yeavanɔ gakpamɛ awu hwenu ci hanci yezan le kunuɖeɖedɔ lɔ mɛ o. Vɔ Ʒan kpɔtɔ kpɔkɔ jijɔ yí na nɔnɔmɛ cɛ kpɔtɔ nɔ shi le yi gbe pleŋ mɛ. Nyi yí kpedo nuɔ? Yí lé mìawɛ akpɔtɔ akpɔnɔ jijɔ nɔ mìdo go enu ciwo yí ana mìagbɔjɔɔ?

Yehowa ɖo dɔ nɔ Ʒan mɔ yi le dra amɛwo do ɖɛ nɔ Mɛsia lɔ vava. Ʒan tɔ edɔ cɛ ji le avril han mɛ nɔ exwe 29 K.H. Énu mɔ: “Mí trɔ le míwo jiwo mɛ, ɖo jeŋkwi mɛ [Fyɔɖuxu] lɔ vava gogo.” (Mt. 3:2; Luiki 1:​12-17) Amɛ sugbɔ ɖo to yi. Le nyɔnɔnwi mɛɔ, amɛahwawo so jinjintɔxu yí vase yi ŋɛdu lɔ yí amɛ sugbɔ trɔ jimɛ keŋ yí wa ʒinʒindoshimɛ. Ʒan gbe dɔn yí kanxle sɛnsɛnŋkɔnɔtɔ ciwo yí kpɔnɔ wowoɖekiwo shigbe amɛjɔjɔɛwo nɛ mɔ kojoɖoɖo le te kpɔ wo nɔ wodetrɔ o. (Mt. 3:​5-12) Ʒan wa enu ci yí nyi enuvevitɔ le yi sumɔsumɔdɔ lɔ mɛ hwecinu eʒin Yesu do shi mɛ le octobre han mɛ nɔ exwe 29 K.H. So ecɛ jiɔ, Ʒan tɔ nunu nɔ amɛwo mɔ wo le kplɔ Yesu, Mɛsia ci nyɔ wonu ɖɛ do.​—Ʒan 1:​32-37.

Ci Yesu kpɔ edɔ ci Ʒan waɔ, énu mɔ: “Le amɛagbetɔwo domɛ ɔ, amɛ ɖekpokpwi de li yí wugan amɛdoshimɛtɔ o.” (Mt. 11:11)  Mìatɛnŋ akando ji mɔ Ʒan kpɔ jijɔ do yayra ciwo exɔ nu. Shigbe Ʒan nɛɔ, amɛ sugbɔ xɔ yayra dojijɔnamɛwo so Mawu gbɔ egbɛ. Yi kpɔwɛ ɖeka yí nyi nɔviŋsu ci yí tɔ mɔ Terry. Yi koɖo ashiɛ Sandra sɔ exwe 50 koɖo ŋɖe wa gashiagamɛ sumɔsumɔdɔ lɔ. Terry nu mɔ: “Mɔnukpɔkpɔ nywi sugbɔwo sun ŋshi vayi. Ŋsumɔ shigbe emɔɖetɔ, Betɛli xomumɛtɔ, mɔɖetɔ vevi, ekán lɔ mɛ hamɛwo jikpɔtɔ, ekán lɔwo mɛ jikpɔtɔ. Vɔ ecɛyɛɔ, ŋgbevanyi mɔɖetɔ vevi.” Nɔ teokrasi mɔnukpɔkpɔwo sun mì shiɔ, ejɔnɔ ji nɔ mì. Vɔ shigbe le mìakpɔɛ le Ʒan kpɔwɛ lɔ mɛ nɛɔ, ebiɔ mɔ mìaje agbla gbɔxwe akpɔtɔ akpɔnɔ jijɔ nɔ mìwo nɔnɔmɛwo trɔ.

Enuvevi ci yí na Ʒan amɛʒindoshimɛtɔ kpɔtɔ kpɔkɔ jijɔ yí nyi mɔ mɔnukpɔkpɔ ci yí sun shi vayi kpɔtɔ jekɔŋ ni. Kpɔ yi kpɔwɛ ɖeka. Le ʒinʒindoshimɛ Yesu tɔ wawa goduɔ, Ʒan sumɔsumɔdɔ tɔ ɖeɖekpɔtɔ yí Yesu tɔ tɔ gangan doji. Ci Ʒan nukplaviwo vɔn do nu niɔ, wova gbɔ yí nu mɔ: “Rabbi, amɛ ci yí le koɖo eo le Ʒurdɛn Tɔ godu, ci nu e ɖu ɖashifu so, yike tɔ amɛwo ʒinʒin do eshi mɛ, yí amɛshamɛ yìkɔ gbɔ.” (Ʒan 3:26) Ʒan ɖo ŋci mɔ: “Amɛ ci gbɔ nyɔnu yoyu le yí nyi asuɔ. Vɔ, asuɔ xlɔ, ci yí lete, yi se yi gbe, le jijɔ gangan mɛ do asuɔ gbemɛ ŋci. Nɛnɛ yí jijɔ lɔ, ci yí nyi anyitɔ, nyi blebu do nɛ.” (Ʒan 3:29) Ʒan dehwlɛn dɔ lɔ koɖo Yesu o; debui mɔ edɔ gangan ci Yesu wakɔ yí na mɔnukpɔkpɔ ci yí le ye shi ɖekpɔtɔ o. Vɔ Ʒan kpɔtɔ kpɔkɔ jijɔ, ɖo édo afixɔxɔ edɔ ci ewakɔ nu shigbe nyɔnu yoyu ‘su xlɔ’ nɛ.

Ci edɔ ci Ʒan wakɔ defa can ɔ, susu ci yí le shi kpedo nu ekpɔtɔ kpɔkɔ jijɔ. Le kpɔwɛ mɛ, Naziritɔ yí enyi so hwenu woji, eyi taɖo deɖo anu vɛn o. (Luiki 1:15) Ci Yesu xokɔ nuxu so agbe kleŋ ci Ʒan nɔnɔ nuɔ, énu mɔ: “Ʒan va enu maɖu koɖo enu manu.” Vɔ Yesu koɖo yi nukplaviwo denyi Naziritɔwo o, eyi taɖo wowo nɔnɔ agbe shigbe amɛshiamɛ nɛ. (Mt. 11:​18, 19). Gbesɔ kpe niɔ, Ʒan dewa enujiŋ ɖe o, vɔ énya mɔ wona ŋsɛn Yesu nukplaviwo nɔ woawa enujiŋwo. Yi nukplavi ciwo vatrɔ Yesu nukplaviwo can le mɛ. (Mt. 10:1; Ʒan 10:41) Ʒan desɔ yi susu ɖo vovototo cɛwo ji o, vɔ éle bu do dɔdoashi ci Yehowa sɔ ni.

Mìwo can nɔ mìle bu do dɔdoashi ci yí le mì shi le Yehowa sumɔsumɔdɔ lɔ mɛɔ, mìatɛnŋ akpɔtɔ akpɔnɔ jijɔ. Terry ci mìyɔ le tɔtɔmɛ nu mɔ: “Ŋsɔnɔ anyi susu ɖonɔ dɔdoashi ɖekaɖeka ci wonaŋ ji.” Ci ebu tamɛ kpɔ so gashiagamɛ sumɔsumɔdɔ lɔ ci ewa le yi gbemɛ nuɔ, énu mɔ: “Deveŋ mɔ ŋwa cancan cɛ o, ɖo enunywiwo ɖeɖe yí ŋɖonɔ ŋwi.”

Mìatɛnŋ akpɔnɔ jijɔ sugbɔ le Mawu sumɔsumɔdɔ lɔ mɛ nɔ mìbunɔ tamɛ kpɔ so enu ci yí na afixɔxɔ le teokrasidɔ alo agbannɔamɛji ɖe nu. Mɔnukpɔkpɔ enyi mɔ “mì nyi amɛ ciwo yí wanɔdɔ koɖo Mawu.” (1 Kor. 3:9) Nɔ wokpɔtɔ lekɔ bu nɔ cinɔnu xɔafi ɖeɔ, akpɔtɔ anyanɔ kpɔkpɔ. Ahanke mìakpɔtɔ akpɔnɔ jijɔ nɔ mìbunɔ tamɛ kpɔ so bubu gangan ci enyi nɔ mì mɔ, mìwakɔ dɔ koɖo Yehowa nu nɛ. Mìdasɔ vɔnsa ciwo mìwakɔ sɔnɔ koɖo ci mɛbuwo wakɔ o. Mìdabui mɔ mɔnukpɔkpɔ ci yí sun mì shi hwe wu ci yí le mɛbuwo shi o.​—Gal. 6:4.

Taŋfuin Ʒan anya mɔ ye sumɔsumɔdɔ lɔ dagbeyi ji na nɔ hwenu jinjin o, vɔ datɛnŋ do jeshi mɔ yɛavaɖo te cakaŋ o. (Ʒan 3:30) Le xwe 30 K.H.-ɔ, efyɔ Erodi le Ʒan do gakpamɛ. Wleci amadɛn godu nɔ ci Ʒan ʒin Yesu do shi mɛ yí ecɛ jɔ. Ele ahan gan Ʒan kpɔtɔ ɖekɔ kunu. (Maki 6:​17-20) Ci Ʒan nɔnɔmɛwo trɔkɔ ahan ɖe, nyi yí akpedo nu yí akpɔtɔ akpɔkɔ jijɔɔ? Ésɔ yi susu ɖo gbɔngbɔnmɛnuwo ji.

Ci Ʒan le gakpamɛɔ, ésekɔ lé Yesu sumɔsumɔdɔ lɔ kekekɔ ta do. (Mt. 11:2; Luiki 7:18) Ʒan kando ji mɔ Yesu yí nyi Mɛsia lɔ, vɔ átɛnŋ abiɔ se mɔ lé Yesu awɛ awa do enyɔ ciwo pleŋ Ŋwlɛnŋwlɛn lɔwo nu mɔ Mɛsia lɔ avawa ji ma. Ʒan tɛnŋ gbebiɔ se mɔ, ci enyi efyɔ yí Mɛsia lɔ aɖu ɖe, Yesu cɛkpakpa lɔ atɔ  ji le majinjinɖe mɛa? Ecɛ ana Yesu aɖeŋ ti le gakpamɛa? Ʒan ji veviɖe mɔ yeamɔŋje edɔ ci Yesu avawa mɛ nywiɖe, eyi taɖo edɔ yi nukplavi amɛve ɖaɖa mɔ wo le biɔ Yesu se mɔ: “Eo yí nyi amɛ ci yí a va a alo mì a gbe kpɔ emɔ nɔ amɛ bu a?” (Luiki 7:19) Ci wotrɔ gbɔɔ, Ʒan aɖo to wo nywiɖe hwecinu woadrekɔ lé Yesu wa enujiŋwo do yí sɔ dakɔ dɔ̀ nɔ amɛwo. Eyi Yesu trɔ yí dɔ wo ɖaɖa nɔ woayi nu nɔ Ʒan mɔ: “Ŋkuvitɔnnɔwo kpɔkpɔ enu, amɛ ciwo shi afɔwo de le ɔ, zɔnzɔn, kponɔwo kpɔkpɔ edɔ̀ yɔyɔ, tokunɔwo le etonusekɔ, [amɛkukuwo] fɔnfɔn, yi wo dradra eŋɛnywi lɔ nɔ wamɛnɔwo.”​—Luiki 7:​20-22.

Enyɔ ciwo yí Ʒan nukplaviwo vanu ni ado ŋsɛn yi sugbɔ dandandan. Ecɛ ɖo kpe yi ji mɔ Yesu wakɔ edɔ ciwo wonu ɖɛ mɔ Mɛsia lɔ avawa. Yesu deɖe Ʒan ti le gakpamɛ o, gan Ʒan nya mɔ sumɔsumɔdɔ ci yewa denyi enu gbali o. Yi nɔnɔmɛ lɔwo detrɔ o, vɔ susu ɖe li ci yí taɖo ekpɔkɔ jijɔ.

Shigbe Ʒan nɛɔ, nɔ mìsɔ susu ɖo gbɔngbɔnmɛnuwo jiɔ, mìakpɔ ŋsɛn ci yí ana mìasɔ jijɔ koɖo jigbɔnɖɛ do ji. (Kol. 1:​9-11) Mìatɛnŋ awa cɛ nɔ mìhlɛnnɔ Bibla yí bunɔ tamɛ kpɔ so nu, ɖo ecɛ ana mìaɖonɔ ŋwi mɔ edɔwawa koɖo Mawu danyi gbali gbeɖe o. (1 Kor. 15:58) Sandra nu mɔ: “Eta kuɖeka hlɛnhlɛn nɔ Bibla ŋkeŋke na ŋvate gogo Yehowa doji. Ekpedo ŋnu ŋsɔ susuwo so nyɛɖeki ji yí sɔ daɖo Yehowa ji.” Mìagbetɛnŋ asɔ susu ɖo enu ciwo nɔviwo wakɔ le Fyɔɖuxu lɔ dɔwo mɛ ji yí akpedo mì nu mìdagbebunɔ tamɛ kpɔ so mìwoŋtɔwo ɖekɛ nu o, vɔ mìwo susuwo anɔnɔ enu ciwo Yehowa wakɔ ji. Sandra nu mɔ: “JW Televiʒiɔn^® wana ciwo yí tonɔ wleci ɖeshiaɖe na mìte gogo habɔbɔ lɔ doji. Wogbekpedo mì nu mìkpɔtɔ kpɔkɔ jijɔ le mìwo dɔdoashi lɔ mɛ.”

Le hwenu kpoli ci Ʒan amɛӡindoshimɛtɔ wa yi dɔ mɛɔ, ésɔ “gbɔngbɔn koɖo ŋsɛn Elitɔ” dra ŋɛnywi lɔ. Yí shigbe Eli nɛɔ, Ʒan can “nyi amɛ shigbe mìwo ɛnɛ.” (Luiki 1:17; Ʒaki 5:17) Nɔ mìsran yi kpɔwɛ yí enu jenɔŋ nɔ mì keŋ mìgbesɔ susu ɖonɔ gbɔngbɔnmɛnuwo jiɔ, mìwo can mìatɛnŋ akpɔkɔ jijɔ le mìwo Fyɔɖuxu lɔ dɔwo mɛ, nɔ ŋɖe jɔjɔ can.