ÈDO jeshi mɔ le xexe lɔ mɛ gbɛɔ, amɛwo kpɔɛni mɔ yewoje anɔ texwe vevi ɖewo, aɖo acɛwo alo lé woawa nu do yewo nu ɖo ato akpoa? Nɔ enu cɛwo gbe sugbɔ le wo shi can ɔ, wokpɔɛni mɔ yewoje yí agbexɔ wu ahan. Mɛ ciwo yí ɖonɔ susu ŋtɔ́wo nyi egoyitɔwo yí ŋɖe dejenɔŋ nɔ wo o. Ahan yí Bibla nu mɔ amɛwo ale le ŋkeke vɔvɔɛ cɛwo mɛ nɛ.—2 Tim. 3:2.

Le nyɔnɔnwi mɛɔ, de egbɛ ŋɖe egoyiyi nyi o. Adamu koɖo Ɛva ɖui mɔ yewoasɔ gbeta nɔ yewoɖekiwo so ŋci yí nyɔ koɖo ŋci yí dɔn nu yí alɔzu sɛnŋsɛnŋwo to le mɛ. Exwe sanŋdi nɛniɖewo goduɔ, Ʒuda fyɔ Ozia bui mɔ yeje yí atɔ linfinzo le gbedoxɔ lɔ mɛ, vɔ afɛn gangan wakɔ yí ele. (2 Kro. 26:​18, 19) Ahankeɔ, Farizitɔwo koɖo Sadusiwo bui mɔ yewoje yí Mawu akpɔ yewo mɔ yewonyi amɛ veviwo ɖo ci yewonyi Abraxamu jijimɛviwo taɖo.—Mt. 3:9.

Amɛ sugbɔ ciwo yí trɔdo mì gbɛ jinɔ wowoɖeki tɔ yí gbe yinɔ go yí wowo nuwana lɔ tɛnŋ wa dɔ do mì ji. (Gal. 5:26) Mìtɛnŋ vatɔ bubui mɔ mì je yí axɔ edɔ veviɖe alo lé woawa nu do mì nu ɖo ato akpo. Lé mìawɛ agbe susu ŋtɔ́ɔ? Gbɔxwe mìawɛɔ, mìɖo aɖo Yehowa susu do enu lɔ nu. Bibla gɔnmɛɖose amɛve atɛnŋ akpedo mì nu.

Yehowa yí sɔnɔ ŋci mìɖo axɔ nɔ mì. Mìakpɔ kpɔwɛ ɖewo.

• Le xomu toto mɛɔ, ŋsu ɖo akpɔɛni mɔ ye shiye bunɔ ye, yí nyɔnu ɖo akpɔɛni mɔ ye  suye lɔn ye. (Efe. 5:33) Le alɔlele mɛɔ, Yehowa mɔ asu koɖo ashiwo ɖo adanɔsɛ lɔnlɔn vividoamɛnutɔ nɔ wowonɔnɔwo ɖekɛ yí mɛɖe dajinɔ yiɖekitɔ o. (1 Kor. 7:3) Jilawo jinɔ mɔ yewo viwo le se tonu nɔ yewo, yí nɛnɛke jila lɔwo ɖo adasɛ lɔnlɔn ŋtɔŋtɔ nɔ wowo viwo yí agbekpenɔdo wo nu.—2 Kor. 12:14; Efe. 6:2.

• Le hamɛ lɔ meɔ, éle mɔ mìabu hamɛmɛshinshin edɔsɛnsinwatɔwo. (1 Tɛs. 5:12) Éle ahan gan, wodeɖo acɛ yí aɖu ga nɔ wowo nɔviŋsu koɖo nɔvinyɔnuwo o.—1 Piɛ 5:​2, 3.

• Mawu na acɛ acɛkpakpawo nɔ woaxɔ taga koɖo bubu so wowo jumɛviwo gbɔ.—Rɔm. 13:​1, 6, 7.

Yehowa sɔ lɔnlɔn nanɔ nu mì yí ewunɔ gan ci mìje nɔ. Ci mìnyi nuvɔnmɛwoɔ, eku ɖekɛ yí mìje nɔ. (Rɔm. 6:23) Vɔ ci Yehowa ɖo lɔnlɔn egbejinɔnɔtɔ nɔ mìɔ, énanɔ shicu sugbɔ mì. (Eha. 103:​10, 11) To xomɛvu yitɔ ji yí mìxɔnɔ shicu ɖekaɖeka alo edɔ ɖekaɖeka so gbɔ.—Rɔm. 12:​6-8; Efe. 2:8.

Nɔ̀ zanŋte do enuwana xexe lɔ tɔ nu. Le manyamanya mɛɔ, mìtɛnŋ vatɔ bubui mɔ mìje yí axɔ enuwo sɔwu. Yesu dasɛ mɔ ecɛ atɛnŋ avajɔ fafɛɖe eyi taɖo ezan kpɔwɛ ci mɛ wocu denari ɖekaɖeka nɔ edɔwatɔwo. Edɔwatɔ ɖewo tɔ edɔ wawa so nyidin fɔnfɔnmɛ yí wa dɔ le ŋkeke lɔ pleŋ mɛ le nyidɔn gangan ŋgbe yí mɛbuwo vawa dɔ na nɔ gaxoxo ɖeka kpaŋ kpoŋ. Gbɛbɔbɔ ŋkɔtɔ lɔ kpɔɛ mɔ yewoje yí axɔ eho sugbɔ sɔwu ɖo edɔ ci yewowa ŋci. (Mt. 20:​1-16) Yesu zan kpɔwɛ cɛ yí sɔ dasɛ nɔ yi dokplɔtɔwo mɔ, enu ci Mawu sɔ jijɔ na wo ɖo ajeŋ nɔ wo.

Enu le jeŋ nɔ eo, yí mɛbu nu ŋgbe ci ŋmɛ nɔ eo o. (1 Tɛs. 5:18) Sran apotru Pɔlu ci yí debiɔ ŋɖe so nɔviɛ Korɛntitɔwo gbɔ ci eɖo acɛ awɛ ahan can. (1 Kor. 9:​11-14) Shicu ɖekaɖeka ci mìxɔ ɖo ajeŋ nɔ mì yí mìɖo agbe enuciŋmɛnɔamɛ gbɔngbɔn.

Kpla amɛɖekisɔsɔhwe. Nɔ mɛɖe kpɔkpɔ yiɖeki mɛ ɖoɖuɔ, étɛnŋ vatɔ kpɔkpɔɛ mɔ yeje  yí axɔ enu sɔwu enu ciwo yí le ye shi. Amɛɖekisɔsɔhwe yí akpedo mì nu mìaɖu susu ci mɛ afɔku le ŋtɔ́ ji.

Enyɔnuɖɛtɔ Daniɛli gbe amɛɖekisɔsɔhwe kpɔwɛ nywi ɖɛ nɔ mì. Xomu ci mɛ eso, lé enyɔvi do, lé enya ŋɖɛ do koɖo lé eɖo enujikpekpewo do tɛnŋ dɔ yí akpɔɛ mɔ yeje yí woaɖo ye do texwe veviɖe yí asɔ edɔ ciwo yí le veviɖe jo nɔ ye. (Dan. 1:​3, 4, 19, 20) Vɔ, Daniɛli kpɔtɔ sɔ yiɖeki hwe, yí nɔnɔmɛ cɛ dɔ yí enyi amɛ vevi nɔ Yehowa.—Dan. 2:30; 10:​11, 12.

Mìɖo agbe amɛɖekitɔjiji, egoyiyi gbɔngbɔn ci yí le xexe lɔ mɛ gbɛ. Vɔ mìle kpɔtɔ akpɔkpɔ jijɔ do shicu ɖekaɖeka ci Yehowa nanɔ mì toto yi xomɛvu ji.