Woɖe exlɔ gɔnmɛ mɔ yɛnyi “mɛ ciwo yí ku do nɔnɔ nu ɖo wolɔn nɔnɔ.” Le kpɔwɛ mɛ, ci Davidi wu Goliati goduɔ, Ʒonatan koɖo Davidi vanyi exlɔ bakpomadɔnwo. (1Sam 18:1) Wo amɛve lɔwo ɖo nɔnɔmɛ nywi ciwo yí dɔ woji mɔ yewoanyi xlɔ koɖo yewonɔnɔwo. Eyi taɖo ŋciwo wojeshi ɖɛ so amɛ nu yí nyinɔ gɔnmɛɖokpe nɔ exlɔ kacaca ci yí sɛnŋ. Gbɔxwe woajeshi mɛɖe ɖɛɔ, eʒan gamɛ koɖo agblajeje. Ele ahan gan, le ɛntɛnɛti jugbajahadoxuwo jiɔ, degbɔnnɔnu mɔ woaje “xlɔ” koɖo amɛwo o. Ci mɛ lɔwo atɛnŋ anu ŋci woji mɔ yewoanu pɛpɛpɛ yí amɛwo dejeshi nu sugbɔ so wo nuɔ, enɔnɔ fafɛɖe nɔ wo mɔ woawla mɛ ciŋmɛ wonyi teŋ. Eyi taɖo ele mɔ mìabu tamɛ kpɔ nywiɖe so mɛ ciwo mìalɔn aje xlɔ koɖo nu. Nɔ dejeshi mɛɖe ɖɛ nywiɖe vɔ yí eji mɔ yeanyi xlɔ koɖo eo le ɛntɛnɛti hadoxu ɖe jiɔ, ŋgbevɔn mɔ nɔ yegbe yɛave nu o. Afɔku gangan ciwo yí le mɛ dɔ mɛɖewo xa ɖui yí gbe mɔ yewo dazan ɛntɛnɛti hadoxuwo o. Vɔ nɔ ècin mɔ yeazan ɛntɛnɛti hadoxu ɖe ɖe, nyi yí ɖo anɔ susumɛ nɔ eo ɔ?

MÍKPƆ VIDEO CI YÍ NYI ƐNTƐNƐTI JI JUGBAJAHADOXUWO: ZE NƆ FƐNCAWO, KEŊ AÐO NYƆBIƆSE CIWO MÌAKPƆ YƐ ŊCI:

• Nyi èɖo abu kpɔ gbɔxwe aŋwlɛ ŋɖe alo asɔ fotowo da do ɛntɛnɛti jiɔ?

• Nyi yí taɖo èɖo acan mɛ ciwo anyi ao xlɔwo le ka ji nywiɖeɔ?

• Nyi yí taɖo èɖo aɖo sɛnxu nɔ gamɛ ci èzannɔ le ɛntɛnɛti jugbajahadoxu jiɔ?—Efe 5:15, 16