Кудайдыҥ јайаган кайкамчылу јаҥы телекейи
10-чы бӧлӱк
Кудайдыҥ јайаган кайкамчылу јаҥы телекейи
1, 2. Армагеддон деген арутаар јуу-согуштыҥ кийнинде не болор?
КУДАЙДЫҤ Армагеддон деген арутаар јуузыныҥ кийнинде не болор? Оныҥ кийнинеҥ кайкамчылу јаҥы ӧй башталар. Кудайдыҥ башкарузына бойыныҥ чындыгын керелеп, Армагеддонды ӧдӱп чыккандар јаҥы телекейге кийдирилер. Качан кижиликтиҥ билезине Кудайдыҥ алкыштары тӧгӱлип башталза, тӱӱкиликте бу кандый кайкамчылу ӧй болор.
2 Кудайдыҥ Каандыгыныҥ башкарузыла тирӱ арткан улус јердиҥ ӱстин сӱрекей јараш јер эдип јарандырып баштагылаар. Олор бойлорыныҥ ийде-кӱчин бойына эмес, је ол ӧйдӧ јадатан ончо улуска туза экелетен иштерге уландырар. Јер јараш, амыр-энчӱлӱ, кижиликтиҥ кӱӱнине јараар јадатан јер болуп кубулар.
Јаман неме чындыкла солынар
3. Армагеддонныҥ кийнинеҥ тургуза ла кандый јеҥил сезим болор?
3 Ончо бу неме Сатананыҥ телекейин јоголтконынаҥ улам болотон аргалу болор. Ӧӧркӧжӧрин чыгарар тӧгӱн кудайлык јаҥдар, јондык бӱдӱмдер эмезе башкарулар база болбос. Азыш-тозышка кийдирип турган Сатананыҥ ӱредӱзи база болбос; оны таркадып турган ончо организациялар Сатананыҥ системазыла кожо јоголып калар. Сананып ийзеҥ де: Сатананыҥ бастыра корондоп турар айалгазы јайладылар! Кандый јеҥил боло берер!
4. Ўредӱде кандый ӧскӧртӱ болор куучындап бер.
4 Улустыҥ каршулу санааларлу башкарулары Кудайдыҥ тузалу ӱредӱлериле солынар. «Ончо сениҥ уулдарыҥ Кайраканла ӱредилер» (Исаия 54:13). Јылдыҥ сайын уланып турган тузалу ӱредӱнеҥ улам «талайды суулар толтырып тургандый, јер Кудайдыҥ билгириле толор» (Исаия 11:9). Улус база јаманга ӱренбес, је «амыр-энчӱде јадып тургандар чындыкка ӱренгилеер» (Исаия 26:9). Кажы ла кӱн тузалу санааларла, керектерле толуп турар (Деяниелер 17:31; Филиппийецтерге 4:8).
5. Бастыра каршу керектерле, калју улусла не болор?
5 Анайдарда, ӧлтӱриш, базынчык, албан-кӱч, тонош ло оноҥ до ӧскӧ каршу керектер база болбос. Кем де ӧскӧ улустыҥ јаман керектеринеҥ кыйналбас. Притчаларда 10:30 -та айдылат: «Чындык кижи чактыҥ-чакка алаҥзыбас, ак-чек јоктор јердиҥ ӱстине јӱргилебес».
Бийик кеминде су-кадык орныктырылган
6, 7. а) Каандыктыҥ башкарузы кандый чын болгон айалганы токтодор? б) Иисус јерде болордо, мыны канайда кӧргӱскен?
6 Јаҥы телекейде баштапкы тӱймеенниҥ каршулу учы-тӱби тескери бурылар. Темдектезе, Каандыктыҥ башкарузы оорулар ла карыырын токтодып салар. Эмдиги ӧйдӧ сен јакшы су-кадыкту да болзоҥ, јаандаган сайын сениҥ кӧзиҥ коомой кӧрӱп, кулагыҥ јазап укпай, тиштериҥ одылып, эт-сӧӧгиҥниҥ терези чырышталып, ичи-буурыҥ ӱрелип, учы-учында ӧлӱп каларыҥ деген килемји јок чындык бар.
7 е бу бистиҥ ӧбӧкӧлӧристеҥ энчиленип алган шыралу уур јӱк удабас ӧткӧн ӧйгӧ јӱре берер. Иисус јердиҥ ӱстинде болордо, су-кадык јанынаҥ нени кӧргӱскени санааҥга кирет пе? «Ого кӧп калык јууктап келди, бойлорыла кожо аксактар, кӧзи кӧрбӧстӧр, тил јоктор, кенек, анаҥ да ӧскӧ кӧп јоболду улустарды алганча келип, олорды Иисустыҥ буттарыныҥ јанына салып бердилер; Ол олорды јазып ийди; Калык тил јоктордыҥ эрмектенип тургандарын, кенектердиҥ су-кадык боло бергенин, аксактардыҥ базып јӱргендерин, кӧзи кӧрбӧстӧрдиҥ кӧрӱп тургандарын кӧрӱп, кайкап турды» (Матфейдеҥ 15:30, 31, АМК).
8, 9. Јаҥы телекейде бийик кеминде су-кадык орныктырылза, кандый ырыс болорын айдып бер.
8 Јаҥы телекейде бистиҥ бастыра ооруларыс јайладылза, кандый ырыс болгой не! Бис база качан да јаман су-кадыктаҥ кыйналбазыс. «Бир де кижи „мен оору“ деп айтпас». «Ол тушта кӧрбӧс улустыҥ кӧстӧри ачылар ла укпас улустыҥ кулактары јарыыр. Ол тушта аксак кижи аҥ чылап калыыр ла тил јок кижиниҥ тили кожоҥдоор» (Исаия 33:24; 35:5, 6).
9 Кажы ла кӱн эртен тура ойгонып, су-кадыгыҥ оҥдолып турганын сескениҥ — бу кайкамчылу болбос по? Јажы јаан улус јиит тужындагы ийде-кӱчине ойто такып једингени ле Адам ла Евада озолодо болгондый бийик кемине јеткенин билери јакшы эмес пе? Библия сӧзин берет: «Ол тушта оныҥ эди-сӧӧги јиит тужындагызына кӧрӧ артык боло берер; ол јиит тужыныҥ кӱндерине ойто бурылар» (Иов 33:25). Шили кӧстӧрди, угатан аппараттарды, кӧлӧсӧлӱ маҥтадар отургуштарды, эмчиликке керектӱ не-немелерди таштап ийери кандый јакшы болгой не! База качан да эмчиликтиҥ кыптары, эмчилер ле тиштер эмдеери кереги јок болор.
10. Ӧлӱмле не болор?
10 Бийик кеминде су-кадыкту улустыҥ ӧлӧр дӧ кӱӱндери келбес. Је олорго ӧлӧргӧ дӧ келишпес, нениҥ учун дезе кижилик энчиленип алган једикпес тутактыҥ ла кинчектиҥ кыйнажында база болбос. Христос «ончо ӧштӱлерин Бойыныҥ буттарыныҥ алдына салбаганча, каан болуп башкарар учурлу. Калганчы ӧштӱ — Ӧлӱм — јоголтылар». «Ўргӱлји јӱрӱм — Кудайдыҥ сыйы» (1 Коринфяндарга 15:25, 26; Римляндарга 6:23; анайда ок Исаия 25:8 кӧр).
11. Јаҥы телекейдиҥ алкыштары Откровениеде кандый тӱп-шӱӱлтеле айдылат?
11 Сӱрекей јараш јерде кижиликтиҥ билезине беретен бастыра бу алкыштарды тӱп шӱӱлтеге экелип, Библияныҥ калганчы бичиги айдат: «Кудай олордыҥ кӧстӧриниҥ јажын арчып салар, ӧлӱм де болбос, ый-сыгыт та, комудал да, оору-јобол до база болбос, нениҥ учун дезе азыйгы ӧй ӧдӱп калган» (Откровение 21:3, 4).
Ӧлгӧндӧрдиҥ кайра бурылганы
12. Иисус Кудай Ого улус тиргизерге берген арганы канайда кӧргӱсти?
12 Иисус јаҥыс ла оору улусты эмдеп, кенектерди јаскан эмес, је мынаҥ да кӧп эткен. Ол анайда ок улусты ӧлӱмнеҥ кайра бурыган. Мынайып Ол, Кудайдыҥ Ого сыйлаган кижини тирилтер кайкамчылу аргазын кӧргӱскен. Бир эр кижиниҥ кызы божоп каларда, Иисус оныҥ айлына келген учурал санааҥа кирет пе? Иисус божоп калган кызычакка айтты: «Кызычак, сеге айдып турум, тур!» Оноҥ не боло берди? «Кызычак ол ло тушта ӧрӧ туруп, база берди». Ондо болуп, мыны кӧргӧн улус «сӱреен кайкадылар». Олор бу ырысты јӱк арайдаҥ бадырдылар! (Марктаҥ 5:41, 42; анайда ок Луканаҥ 7:11—16; Иоаннаҥ 11:1—45 кӧр).
13. Кандый улус тиргизилер?
13 Јаҥы телекейде «ӧлӱп калган акту ла акту эмес улус тирилери болор» (Деяниелер 24:15). Ол ӧйдӧ Иисус ӧлгӧндӧрди тиргизерге, Кудайдыҥ берген ийдезин тузаланар, нениҥ учун дезе Ол айткан: «Мен тирилери ле јӱрӱм, Меге бӱткен кижи ӧлзӧ дӧ тирилер» (Иоаннаҥ 11:25). «Межиктерде јаткандардыҥ [Кудайдыҥ сагыжында] ончозы Кудайдыҥ Уулыныҥ ӱнин угуп, тирилип чыгар» — деп, Ол анайда ла айтты (Иоаннаҥ 5:28, 29, АМК).
14. Ӧлӱм јок болорынаҥ улам, оныла кожо не јайладылар?
14 Качан ӧлгӧн улус бойлорыныҥ јуук улустарына биригерге, бӧлӱктерле ээчий-дечий тирилгилезе, бастыра јер-ӱстинде кандый уулу сӱӱнчи болгой не! Газеттерде сӧӧк јууп јатканы керегинде тирӱ арткан улусты кунуктырар јетирӱлер база болбос. Оныҥ ордына — јаҥы тирилгендер керегинде — олорды сӱӱп тургандарга ырыс экелетен јетирӱлер болордоҥ айабас. Анайдарда, база кандый да сӧӧк јууры ла сӧӧктӱ кобылар болбос!
Чындык амыр-энчӱлӱ телекей
15. Михейдиҥ судуры канайып учына јетире бӱдер?
15 Јӱрӱмниҥ кажы ла бӧлӱгинде чындык амыр-энчӱ чыннаҥ ла болор. Јуу-согуштар, јуу-согуштардыҥ адаанын алып тургандар ла мылтык-јепсел белетеери ӧдӱп калган ӧйдиҥ керектери болор. Нениҥ учун? Нениҥ учун дезе угы-тӧзиниҥ ле терезиниҥ ӧҥиниҥ ӧӧркӧжӧрин чыгарып турган јилбӱлери јоголып калар. Ол тушта чыннаҥ ла учына јетире «албаты албатыга кылыш кӧдӱрбес, ӧлтӱрерине база ӱренгилебес» (Михей 4:3).
16. Јуулар база болбозын деп Кудай канайып кичеенер?
16 Бу кайкамчылу деп билдирердеҥ айабас, нениҥ учун дезе кижиликтиҥ тӱӱкизи — јаантайын јуу-согуштарлу казыр тӱӱкилик. Бу нениҥ учун мындый болгон дезе, кижилик кӧрмӧстӧрдиҥ ле кижиликтиҥ башкарузында болгон. Јаҥы телекейде Каандыктыҥ башкарузында болотоны бу: «Келип кӧригер Кайраканныҥ иштерин... Јуу-согушты јердиҥ учына јетире токтодып, саадакты јок эделе, јыданы сындырып, јууга баратан абраларды отло кӱйдӱрип салды» (Псалом 45:9, 10).
17, 18. Јаҥы телекейде улус ла тындулар ортодо кандый колбулар болор?
17 Анайда ок, кижи ле тынду ортодо Едемде болгондый амыр-энчӱ болор (Бытие 1:28; 2:19). Кудай айдып јат: «Ол тушта олорго јалаҥныҥ тындуларыла, теҥериде учар куштарла, јылып јӱрер тындуларла јуук колбулар тургузарым... Олорго јеткер јок јадарга берерим» (Осия 2:18).
18 Бу амыр-энчӱ канча кирези элбеп таркаар? «Бӧрӱ ле кураан кожо јӱрер, ирбис ле уулак кожо јадар; бозу, кара-кула ла чар кожо болор, олорды кичинек бала јединип јӱрер». Тындулар качан да улуска эмезе бой бойлорына коркыду јетиргилебес. Керек дезе «кара кула чар чылап салам јиир!» (Исаия 11:6 —9; 65:25).
Јерди сӱрекей јараш јер эдип кублтары
19. Јер кандый болуп кубулар?
19 Бастыра јер кижилик јадатан сӱрекей јараш јер болуп кубулар. Бу шылтактаҥ улам Иисус: «Менле кожо сӱрекей јараш јерде болорыҥ» — деп, Ого бӱде берген эр кижиге сӧзин берер аргалу болгон. Библияда айдылып јат: «Ээн чӧл лӧ кургак јер сӱӱне берер, кижи јатпай турган ороон сӱӱнип, нарцисстий чечектей берер... Нениҥ учун дезе ээн чӧлдӧ суулар сызылып агар ла чӧлдӧ агын суулар агар» (Луканаҥ 23:43; Исаия 35:1, 6).
20. Нениҥ учун торолош кижиликке база болбос?
20 Кудайдыҥ Каандыгыныҥ башкарузында миллиондор улусты торого база алдыртпас. «Јерде ле кырдыҥ ӱстинде буудай байлык јайканар; ӱрендери оныҥ эҥилер». «Јалаҥда ӧзӧр агаш бойыныҥ јилегин берер, јер бойыныҥ тӱжӱмин берер; олор бойыныҥ јеринде коркыбай јӱргилеер» (Псалом 71:16, ЈТ; Иезекииль 34:27).
21. Туразы јок болоры, кысталыжып јадар јерлерле, каршуларла толгон јерлерле не болор?
21 Ондо јоксыраш, туразы јок болоры, кысталыжып јадар јерлер, эмезе каршулу керектерле толгон јерлер база болбос. «Туралар тудуп, анда јаткылаар, виноградтар отургузып, олордыҥ јиилектерин јигилеер. Ӧскӧ кижи јатсын деп туткулабас, ӧскӧ кижи јиизин деп отургускылабас». «Кажы ла кижи бойыныҥ виноград сабалагыныҥ ла сӱкей агажыныҥ (смоковница) алдына отурар, олорды кем де коркытпас» (Исаия 65:21, 22; Михей 4:4).
22. Кудайдыҥ башкарузыныҥ алкыштары Библияда канайда бичилет?
22 Сӱреен јараш јердиҥ ӱстинде ончо кижилик бастыра бу немелерле, оноҥ до ӧскӧ немелерле алкыштар алар. Псалом 144:16 -да айдылат: «Колыҥды Сен ачып, ончо кӱӱндӱ јӱрӱп тургандарды тойо азырайдыҥ». «Јобош улус јерди энчиркенип, толо амыр-энчӱле јакшызынып јӱрер... чындык улус јерди энчиркенип, чактыҥ-чакка ондо јадар» — деп, Библияныҥ судурыныҥ јарлаганы кайкамчылу эмес (Псалом 36:11, 29).
Озогызын јоголторы
23. Бистиҥ бастыра чыдашкан кыйын-шыраларысты Кудай канайда јайладаар?
23 Кудайдыҥ Каандыгыныҥ башкарузы ӧткӧн алты муҥ јылдыҥ јетирген бастыра каршузын јоголтор. Ол ӧйдӧ улустыҥ кандый да болгон шыразын сӱӱнчи кӧп катапка артыктаар. Јӱрӱм качан да кандый бир јаман эске алыныштарла кунукчылду болбос. Тузалу санаалар ла иштер улустыҥ кӱнӱҥ сайын эдетен ижи болуп, јӱрек сыстадар эске алыныштарды араайынаҥ солып салар.
24, 25. а) Исаияныҥ судурына келиштире не болор учурлу? б) Ӧткӧн шыралардаҥ јаҥыс ла јарт эмес эске алыныштар артар деп нениҥ учун бис бӱдӱмјилӱ болор аргалу?
24 Кичеҥкей Кудай јарлап јат: «Мен јаҥы теҥери ле [улусла башкараар јаҥы теҥеридеги башкару] јаҥы јер [кижиликтиҥ чындык биригӱзи] јайап јадым; озогызы санаага кирбес ле јӱрекке келбес. А слер Мениҥ јайап јатканыма чактыҥ-чакка сӱӱнип, јыргаарар». «Бастыра јер тыштанып, амырап јат, сӱӱнчинеҥ кыйгырып јат» (Исаия 14:7; 65:17, 18).
25 Анайып, ондый узак болгон јаман айалганы Кудай Бойыныҥ Каандыгы ажыра тӱгезе солыыр. Бистиҥ ӧткӧн ӧйис јетирген кандый ла каршуларды тегин ле солып береринеҥ ажындыра алкыштарла бастыра ӱргӱлјиге јеткилдеер. Анайып Ол биске Бойыныҥ јаан киченижин јетирер. Ол тушта, бис эске алынар кӱӱндӱ болзос, бистиҥ ӧдӱп калган санааркаштарыс јарт эмес эске алыныштар болуп калар.
26. Нениҥ учун Кудай ӧдӱп калган кандый ла шыраларды ажындыра тӱзедип салар?
26 Бот канайып бистиҥ бу телекейде ӧдӱп чыккан шыраларысты Кудай кайралдаар. Бис бойыстыҥ ӧбӧкӧлӧристеҥ једикпес тутакты энчиркенип, бийик кеминде эмес эдип туулганыстыҥ бурузы бисте эмес деп Ол билер. Бистер бу Сатананыҥ телекейинде туулганыста, бисте буру јок, нениҥ учун дезе Адам ла Ева чындык арткылаган болзо, мыныҥ ордына бис јараш јердиҥ ӱстине туулар эдибис. Оныҥ учун бистиҥ ӱлӱгисте болгон кӱчтерди Кудай улу килемјизиле ажындыра тӱзедип салар.
27. Кандый судурлар бойыныҥ јаҥы телекейде кайкамчылу бӱдетенин сакыгылап јат?
27 «Јайалта бойы ол тушта чириириниҥ базынчыгынаҥ Кудайдыҥ балдарыныҥ мактулу јайымына јайымдалар. Нениҥ учун дезе ончо јайалта эмдиге јетире онтоп, кыйналып турганын билерис» — деп, Римляндарга 8:21, 22-де озолондыра айдылганыныҥ јайымын кижилик јаҥы телекейде билип, кӧрӱп ийер. Ол тушта улус «Каандыгыҥ Сениҥ келзин; канайып теҥериде, анайып јерде де табыҥ Сениҥ болзын» деген мӱргӱӱлдиҥ учына јетире бӱткенин кӧрӧр. (Матфейдеҥ 6:10). Сӱрекей јараш јердеги кайкамчылу айалгалар теҥеридеги айалгаларды јурап кӧргӱзер.
[Ӱренериниҥ сурактары]
[23 бӱктеги јуруктар]
Јаҥы телекейде јажы јаан улус јиит тужына бурылар.
[24 бӱктеги јурук]
Јаҥы телекейде бастыра оорулар ла кенегени јайладылар.
[25 бӱктеги јурук]
Јаҥы телекейде божоп калган улус јӱрӱмге тиргизилер.
[26 бӱктеги јурук]
«Јуулажарына база ӱренгилебес».
[27 бӱктеги јуруктар]
Сӱрекей јараш јердиҥ ӱстинде улус ла тындулар ортодо амыр-энчӱ бийик кеминде болор.
[27 бӱктеги јурук]
«Кудай колын ачып, ончо кӱӱндӱ јӱрӱп тургандарды тойо азыраар».
[28 бӱктеги јурук]
Кудайдыҥ Каандыгы бастыра ӧдӱп чыккан шыраларды ажындыра тӱзедип салар.
